Read Nzema Zɛk 13 Bible Online

Zɛk 13 - Nzema bible

Zɛk 13

¹“Mekɛ ne anu bɛbabuke nzufeanvea bɛava bɛanrinzi Devidi abo zo amra nee Gyɛlusalɛmma amuala ɛtane nee evinli biala bɛagua.

²Mekɛ ne anu, medame Ɛdɛnkɛma mese, mebaminliminli mmonle mɔɔ wɔ maanle ne anu nee bɛ aluma kɔsɔɔti abo zo, amaa bɛangakye bɛ bieko; eza mebadu kpɔmanvolɛma adalɛ nee sunsum ɛtane ne mɔ kɔsɔɔti meavi azɛlɛ ne azo.

³Na saa awie biala finde kɛ ɔle Nyamenle kpɔmanvolɛ a, ɔ ze nee ɔ nli mɔɔ wole ye la baze ye kɛ, ‘Ɔwɔ kɛ bɛku wɔ, ɔluakɛ ɛfa Ɛdɛnkɛma duma ɛbɔ adalɛ.’ Na ɔ ze nee ɔ nli bawɔ ye atwɛ ahu ye nee ye Nyamenle nrɛlaleɛ ne.

⁴Mekɛ ne anu Nyamenle kpɔmanvolɛ biala mɔɔ baha Nyamenle nrɛlaleɛ, yeaha ɛnyelɛzodeɛnwunlɛ edwɛkɛ la baze nwolɛ nyiane. Ɔnrɛva ɛdanlɛ mɔɔ bɛnwo ye futuu la ɔnrɛheda ɔ ti zo ɔnrɛbɛlɛbɛla menli.

⁵Ɔbaha kɛ, ‘Menle Nyamenle kpɔmanvolɛ, mele ɛyazonlɛnli, ɔluakɛ sumunli me ngakula nu ɛbɔ nu egyinli ala a meyɛ a.’

⁶Na saa awie biza ye kɛ, ‘Na nganlɛ ɛhye mɔ mɔɔ wɔ ɛ nzi la noko ɛ?’ a, ɔbaha kɛ, ‘Bɛle nganlɛ mɔɔ me gɔnwo mɔ mɔɔ mengɔle bɛ sua nu la bɔle me a.’ ”

⁷ Tumivolɛ Ɛdɛnkɛma se, “Dwazo, konle dadeɛ, dwazo ku me mboaneneavolɛ ne, ku ahenle ne mɔɔ gyi me nwo ɛke la. Bɔ mboaneneavolɛ ne ku ye maa mboane ne mɔ ɛbɔ asande. Medame mebava me sa meazie ngyikyi ne mɔ anwo.

⁸Medame Ɛdɛnkɛma mese, azɛlɛ ye amuala, mebahyɛ nu nsa na meazɛkye nwiɔ, meaminli bɛ bo zo. Nuhua ɛkpɔ ko ala a baha a.

⁹Ekpunli ko ne mɔɔ tɔ zolɛ nsa bɔbɔ la, mebagua bɛ senle nu meadu bɛ nuhua, kɛmɔ bɛtu dwɛtɛ fufule nu la, na meazɔ bɛ meanlea, kɛmɔ bɛsɔ ezukoa nvutuke bɛnea la. Bɛbabɔ me duma bɛavɛlɛ me, na mebalie bɛ zo. Mebaha kɛ, ‘Bɛle me menli’ na bɛbaha kɛ, ‘Ɛdɛnkɛma le me Nyamenle.’ ”