Read Nzema Zɛk 14 Bible Online

Zɛk 14 - Nzema bible

Zɛk 14

¹Bɛdie, Ɛdɛnkɛma kenle ne ɛlɛba, mɔɔ ninyɛne mɔɔ bɛrawua wɔ Gyɛlusalɛm ɛke la bɛbahyɛ wɔ bɛ nye zo ɛke ala.

²Mebaboɔboa maanle maanle ne mɔ kɔsɔɔti anloa meamaa bɛ nee Gyɛlusalɛm aho na bɛava suakpole ne. Bɛbave bɛ ninyɛne na bɛafunlofunla bɛ mraalɛ ne mɔ. Bɛbahye suakpole ne azo amra foa ko bɛahɔ nlɔnu, na bɛdabɛ mɔɔ bɛkɛha la, bɛbadɛnla ɛkɛ ne.

³Akee Ɛdɛnkɛma bahɔ na ɔ nee maanle maanle ne mɔ ahɔho, kɛmɔ ɔyɛ a konle nu ɔyɛ la.

⁴Mekɛ ne anu ɔbava ɔ gyakɛ yeazie Ɔlivi Boka ne mɔɔ wɔ Gyɛlusalɛm aduduleɛ la azo, na boka ne bakpuke nwiɔ, ɔvi aduduleɛ yeahɔdɔ adɔleɛ, yeaye bɔnza tɛtɛlɛ kpalɛ yeado ɛkɛ; ɛhye bamaa boka ne foa ko ahɔli sɔlɔ na foa ko arali nyiakɛ.

⁵Bɛbanriandi bɛahɔ me awoka ne mɔ bɔnza ne anu, ɔluakɛ bɔnza ne anu badɛlɛ toonwo adwu Ezɛle. Bɛbanriandi, kɛmɔ bɛ nlenya mɔ nriandile azɛlɛkpusulɛ mekɛ ne anu wɔ Dwuda Belemgbunli Ɛzaya mekɛ zo la. Akee Ɛdɛnkɛma bɛ Nyamenle ne bara, na ɔ nee Nyamenle menli ne mɔ amuala ara.

⁶Kenle zɔhane, wuluwulu ɛnrɛra yɛɛ ɛyɛlɛ ɛnrɛra.

⁷Ɔbayɛ kenle mɔɔ Ɛdɛnkɛma ɔdaye ala a ɔze a. Aleɛ ɛnrɛdwo na aleɛ ahye, ɔluakɛ aledwolɛ bayɛ wienyi kɛ alehyenlɛ la.

⁸ Mekɛ ne anu, ngoane nzule bazenze avi Gyɛlusalɛm, foa ko bazenze ahɔgua aduduleɛ nyevile ne anu na foa ko noko ahɔgua adɔleɛ nyevile ne anu. Fɔsɛlɛ nu o, wawaa nu o, kɛ ɔsi ɔsenze la, zɔhane ala yɛɛ ɔbazenze mekɛ biala a.

⁹Ɛdɛnkɛma bali azɛlɛ ye kɔsɔɔti azo belemgbunli; mekɛ ne anu awie biala bazonle Ɛdɛnkɛma kɛ yemɔ a ɔle Nyamenle kokye ne a yɛɛ ye duma ko.

¹⁰Azɛlɛ ne kpokpoti, ɔvi Giba mɔɔ kɔdwu Relemɔn mɔɔ wɔ Gyɛlusalɛm nyiakɛ la bayɛ fienemgbole. Na Gyɛlusalɛm bagyinla kpundii wɔ ɔ bo zo ne wɔ boka zo, ɔvi Bɛngyaman Anlenkɛ Kpole nloa yeahɔ anlenkɛ kpole dɛba ne anwo, yeahɔdwu Muleɛ Anlenkɛ Kpole ne anloa, na ɔvi Hananili Tawa ne anwo yeahɔdwu belemgbunli ne nwanyeyɛlɛ ɛleka ne mɔ.

¹¹ Menli bayi zo gbudugbudu, ɔluakɛ munzule biala ɛnrɛra zolɛ. Gyɛlusalɛmma badɛnla mɔɔ awie ɛngyegye bɛ a.

¹²Akee ewule mɔɔ Ɛdɛnkɛma bava ado maanle maanle mɔɔ kɛva konle kɛdoa Gyɛlusalɛm la anwo la ɛne: bɛ nwonane bakpɔlɔ wɔ mekɛ mɔɔ bɛde ngoane nu la, bɛ nye bakpɔlɔ bɛ nye mbɔne ne mɔ anu, yɛɛ bɛ tafinlima bakpɔlɔ bɛ nloa anu.

¹³Mekɛ ne anu Ɛdɛnkɛma bamaa sulosulo adɔ bɛ nwo na bɛ nye zo ada bɛ, amaa bɛadwazo bɛdabɛ bɛ ngome bɛ nwo zo ngoko ngoko.

¹⁴Dwudama bɔbɔ baho atia Gyɛlusalɛmma. Bɛbave anwonyia mɔɔ wɔ aleɛabo la amuala; ezukoa nvutuke, dwɛtɛ fufule, yɛɛ adɛladeɛ ngɛnlɛma dɔɔnwo mɔɔ zonle bo zolɛ.

¹⁵Ewulenzane badɔ mgbɔnwɔ, mgbɔnwɔndua, afunlumu, asoaso, yɛɛ nane biala mɔɔ wɔ kpɔvolɛ ne azokoɛleɛ la avinli.

¹⁶Akee awie biala mɔɔ wɔ maanle maanle ne mɔ mɔɔ ɛra Gyɛlusalɛm anwo zo ɛlɛ la anu, mɔɔ kɛvi ɛsalɛ la bahɔ Gyɛlusalɛm ɛvolɛ biala ahɔzonle Belemgbunli ne, Tumivolɛ Ɛdɛnkɛma, na yeali ye Kpɔda Bo Ɛdɛnlanlɛ Ɛvoyia ne.

¹⁷Na saa azɛlɛ ye azo abusua ekpulike bie wɔ ɛkɛ na yeangɔ Gyɛlusalɛm yeangɔnzonle Belemgbunli ne, Tumivolɛ Ɛdɛnkɛma a, ezule ɛnrɛdɔ bɛ azɛlɛ ne azo.

¹⁸Saa Yigyibitima kpo na bɛangɔnva bɛ nwo bɛangile a, ewulenzane ne mɔɔ Ɛdɛnkɛma fa to maanle maanle mɔɔ angɔnli Kpɔda Bo Ɛdɛnlanlɛ Ɛvoyia ne bie la anwo la ado bɛ avinli.

¹⁹Ɛhye a bayɛ Yigyibitima nee maanle maanle ne mɔ mɔɔ kɛkpo na bɛangɔnli Kpɔda Bo Ɛdɛnlanlɛ Ɛvoyia ne la ndeanlɛ a.

²⁰Mekɛ ne anu bɛbahɛlɛ ɛhye wɔ mgbɔnwɔ ne mɔ dɔne ne mɔ anwo kɛ, “Bɛdu bɛzie ahane bɛmaa Ɛdɛnkɛma.” Siase mɔɔ wɔ Ɛdɛnkɛma Ɛzonlenlɛ Sua ne anu la bayɛ kɛ azukponle ne azo dwora;

²¹yɛɛ siase biala mɔɔ wɔ Gyɛlusalɛm nee Dwuda la, bɛbadu bɛazie ahane bɛamaa Tumivolɛ Ɛdɛnkɛma, amaa bɛdabɛ mɔɔ bɛkɛra kɛ bɛbabɔ azu la ava ado bɛ azubɔlɛ aleɛ ne. Awie ɛnrɛli gua wɔ Tumivolɛ Ɛdɛnkɛma Ɛzonlenlɛ Sua ne anu wɔ mekɛ ne anu.