Read Nzema Zɛk 3 Bible Online

Zɛk 3 - Nzema bible

Zɛk 3

¹ Akee Ɛdɛnkɛma vale Sɛlɛvolɛ Kpanyinli Dwɔhyua hilele me. Ɔgyi Ɛdɛnkɛma soanvolɛ ne anyunlu ɛkɛ na Seetan gyi ɔ sa fema zo kɛ ɔto ye ɛzonle.

² Na Ɛdɛnkɛma soanvolɛ ne zele Seetan kɛ, “O Seetan! Ɛdɛnkɛma ɛdua wɔ kakɛ! Ɛdɛnkɛma mɔɔ ɛnlea nu ɛye Gyɛlusalɛm ɛyɛ ye ɛdeɛ la ɛdua wɔ kakɛ! Asoo tɛ ɛyɛzinli a wɔdu wɔvi senle nu la?”

³Mekɛ mɔɔ Dwɔhyua gyi Nyamenle soanvolɛ ne anyunlu ɛkɛ ne la, ɛnee ɔwula adɛladeɛ evinli ɛtane bie.

⁴Na Nyamenle soanvolɛ ne zele bɛdabɛ mɔɔ bɛgyigyi ɔ nyunlu ɛkɛ ne la kɛ, “Bɛyeye adɛladeɛ evinli ɛtane ne mɔ ɔ nwo.” Akee ɔhanle ɔhilele Dwɔhyua kɛ, “Nea, meye wɔ ɛtane ne mɔ kɔsɔɔti mevi ɛ nwo, na mebava adɛladeɛ ngɛnlɛma meawula wɔ.”

⁵Na menganle kɛ, “Maa bɛbɔ ye abɔtile kɛnlɛma.” Yemɔti bɛbɔle ye abɔtile kɛnlɛma na bɛwulale ye adɛladeɛ ngɛnlɛma; ɛnee Nyamenle soanvolɛ ne gyi ɛkɛ ɛlɛnea yɛ.

⁶Na Ɛdɛnkɛma soanvolɛ ne zele Dwɔhyua kɛ,

⁷“Tumivolɛ Ɛdɛnkɛma se: Saa ɛdua me ndenle ne mɔ anu na ɛyɛ gyima mɔɔ meva memaa wɔ la a, ɛbanlea me Ɛzonlenlɛ Sua nu ɛke na wɔanlea me awuke ne mɔ azo, na meamaa wɔ adenle wɔ menli mɔɔ gyi ɛke la avinli.

⁸ Akee tie, Dwɔhyua, wɔmɔ a ɛle Sɛlɛvolɛ Kpanyinli a, ɛ nee ɛ gɔnwo mɔ mɔɔ dede ɛ nyunlu ɛke la amuala, bɛdie, ɔboalekɛ bɛle menli mɔɔ saleɛ doa bɛ a. Mebaye me sonvolɛ ne mɔɔ bɛfɛlɛ ye Baka Ɛhane la meahile bɛ!

⁹Bɛnlea, meva bolɛ mezie Dwɔhyua anyunlu ɛkɛ. Ɔle bolɛ kokye mɔɔ anye le nsuu a, na zolɛ yɛɛ mebahɛlɛ a, medame Tumivolɛ Ɛdɛnkɛma a mese a. Mebaye azɛlɛ ɛhye fɔlɛlilɛ ne amuala kenle kokye.

¹⁰ Kenle zɔhane, bɛ nuhua ko biala bado ɛsalɛ avɛlɛ ɔ gɔnwo mɔɔ ɔ nee ye zua la wɔ ye vanye baka nee ye feege baka bo, medame Ɛdɛnkɛma a mese a.”