Read Nzema Zɛk 4 Bible Online

Zɛk 4 - Nzema bible

Zɛk 4

¹Nyamenle soanvolɛ ne mɔɔ nee me dendɛle la rale bieko, na ɔradunwuele me kɛ asɛɛ sonla bie mɔɔ wɔ nafelɛ nu la.

²Na ɔbizale me kɛ, “Duzu a ɛnwu ye a?” Membuale ye kɛ, “Menwu ezukoa nvutuke kɛnlaneɛbaka, dwora gyi zolɛ, na ahɛnlaneɛ nsuu gyigyi zolɛ. Kɛnlaneɛ ne mɔ mɔɔ gyigyi kɛnlaneɛbaka ne azo la, ko biala anloa nsuu.

³ Ɔlivi mbaka nwiɔ noko gyigyi nwolɛ. Ko wɔ dwora ne fema zo yɛɛ ko wɔ ye bɛne zo.”

⁴Akee membizale Nyamenle soanvolɛ ne mɔɔ nee me dendɛle la kɛ, “Me menle, ɛhye mɔ abo a le duzu?”

⁵Nyamenle soanvolɛ ne mɔɔ nee me dendɛle la buale me kɛ, “Ɛnde ɛhye mɔ abo ɔ?” Menganle kɛ, “Kyɛkyɛ, me menle, mende ɔ bo.”

⁶ Na ɔzele me kɛ, “Edwɛkɛ mɔɔ Ɛdɛnkɛma ɛlɛka ahile Zɛlubabɛle la ɛne: Tɛ anwosesebɛ anzɛɛ tumi, na me Sunsum ne yɛɛ ɛbava wɔali konim a, medame Tumivolɛ Ɛdɛnkɛma a mese a.

⁷O awoka mgbole, bɛle duzu? Zɛlubabɛle badwulu bɛ yeamaa bɛayɛ kɛ azɛlɛ sɛsɛ; akee mɔɔ ɔkɛze kɛ ɔfa bolɛ ne mɔɔ la zolɛ anwuma la yeara la ɛnee bɛlɛtea nu kɛ, ‘Kɛnlɛmaleɛ! Ɔle kɛnlɛma somaa!’ ”

⁸Eza Ɛdɛnkɛma dendɛle hilele me,

⁹ɔse, “Zɛlubabɛle ɛwula sua ɛhye adiabo ne aze; ɔbazi yeawie. Na ɛkɛ ne yɛɛ bɛbanwu kɛ Tumivolɛ Ɛdɛnkɛma a ɛzoa wɔ bɛ nwo ɛke a.

¹⁰Awie biala mɔɔ ɛkpo mekɛ mɔɔ ɛnee bɛlɛyɛ ninyɛne ngyikyi ngyikyi la bali fɛlɛko, na ɔbanwu kɛ Zɛlubabɛle gua zolɛ ɛlɛsi sua ne. “Ahɛnlaneɛ nsuu ɛhye mɔ a le Ɛdɛnkɛma anye ne mɔɔ ɔfa ɔnea ewiade amuala la.”

¹¹ Membizale ye kɛ, “Na ɔlivi mbaka nwiɔ ɛhye mɔɔ ko gyi kɛnlaneɛbaka ne fema zo, ko gyi ye bɛne zo la abo a le duzu?”

¹²Eza membizale ye kɛ, “Na ɔlivi mbaka ngane ɛhye mɔ mɔɔ gua ezukoa nvutuke paepe nwiɔ ne mɔɔ nwole dua nu finde gua la anwo la noko abo a le duzu.”

¹³Na ɔbizale me kɛ, “Ɛnde ɛhye abo ɔ?” Membuale ye kɛ, “Kyɛkyɛ, me menle, mende ɔ bo.”

¹⁴Ɔzele me kɛ, “Ɛhye mɔ a le menli nwiɔ ne mɔɔ bɛkpokpa bɛ nwole na bɛgyi ewiade amra amuala Awulae anwo ɛkɛ ne la.”