Read Nzema Zɛk 5 Bible Online

Zɛk 5 - Nzema bible

Zɛk 5

¹Eza memanle me nye zo, na menwunle nwoma mɔɔ ɛdu faa la.

²Na Nyamenle soanvolɛ ne bizale me kɛ, “Duzu a ɛnwu ye a?” Membuale ye kɛ, “Menwu nwoma mɔɔ ɛdu faa la; ye tendenle le mita ngɔnla yɛɛ ye tɛtɛlɛ le mita nna nee foa ko.”

³Nyamenle soanvolɛ ne zele me kɛ, “Munzule mɔɔ bahɔ ewiade amuala la wɔ nwoma ɛhye azo. Bɛhɛlɛ zolɛ kɛ awie biala mɔɔ kɛyɛ awule la, ɔwɔ kɛ bɛtu ye bɛfi azɛlɛ ne azo, yɛɛ awie biala mɔɔ kɛha ndane adalɛ la, ɔwɔ kɛ bɛtu ye bɛfi azɛlɛ ne azo.

⁴Tumivolɛ Ɛdɛnkɛma se ɔbazoa ye yeamaa yeawolo awule awuke biala nee bɛdabɛ mɔɔ bɛfa ye duma bɛka ndane adalɛ la biala awuke nu, na ɔbadɛnla ɛkɛ ne toonwo kɔkpula kɛ sua zɔhane kɛyɛ suadu, na nuhua mbaka nee awolɛ kɛgologolo kɛgua la.”

⁵Akee Nyamenle soanvolɛ ne mɔɔ nee me dendɛle la razele me kɛ, “Maa ɛ nye zo na nea debie mɔɔ ɛlɛse ahɔ la.”

⁶Membizale ye kɛ, “Duzu debie ɔ?” Ɔbuale me kɛ, “Kɛndɛne ne a ɛlɛse la.” Ɔvale ɔzɔle zolɛ kɛ, “Ɔgyi ɛkɛ ne ɔmaa ewiade amra amuala ɛtane ne.”

⁷Kɛndɛne ne lɛ sumi nduazo; bɛdukuele zolɛ, na ɛnee raalɛ bie de nuhua.

⁸Na Nyamenle soanvolɛ ne hanle kɛ, “Raalɛ ɛhye gyi ɛkɛ ne maa amumuyɛ.” Akee ɔzuhunle ye ɔdole kɛndɛne ne anu na ɔhanle sumi nduazo ne ɔdole zolɛ.

⁹Memanle me nye zo bieko la menwunle kɛ mraalɛ nwiɔ mɔɔ lɛ ndɛbalɛ kɛ anloma akoso ɛdeɛ ne la ɛdu faa ɛlɛba, na anwoma ne ɛlɛbɔ bɛ bo. Bɛramanle kɛndɛne ne zo bɛhɔle anwuma.

¹⁰Membizale Nyamenle soanvolɛ ne kɛ, “Na bɛfa kɛndɛne ne bɛahɔ nienwu?”

¹¹Ɔbuale me kɛ, “Bɛfa bɛahɔ Babelonia. Bɛbazi sua ɛkɛ bɛamaa ye. Bɛbava kɛndɛne ne bɛazie sua ne anu na bɛazonle ye.”