Read Nzema Zɛk 6 Bible Online

Zɛk 6 - Nzema bible

Zɛk 6

¹Eza memanle me nye zo na menwunle kɛ konle ehwili nna vi awoka nwiɔ avinli ɛlɛba. Awoka ne mɔ le kɔbele awoka.

² Konle ehwili ne mɔɔ lumua la, mgbɔnwɔ kɔkɔlɛ a ɛlɛtwe ye a. Mɔɔ tɔ zo nwiɔ la mgbɔnwɔ ne mɔ le bile,

³ mɔɔ tɔ zolɛ nsa la mgbɔnwɔ ne mɔ le fufule, yɛɛ mɔɔ tɔ zolɛ nna la mgbɔnwɔ ne mɔ le nzonle anwo ndetandeta.

⁴Na membizale Nyamenle soanvolɛ ne mɔɔ nee me dendɛle la kɛ, “Me menle, na ɛhye mɔ noko ɛ?”

⁵ Nyamenle soanvolɛ ne buale kɛ, “Ɛhye mɔ hɔvale bɛ nwo hilele Ɛdɛnkɛma mɔɔ bɔle azɛlɛ ye la, na kɛkala bɛlɛkɔ anwuma anwoma nna ne anu.

⁶Konle ehwili ne mɔɔ mgbɔnwɔ bile ne mɔ ɛlɛtwe ye la kɔ ɛbɔ nu afoa nu maanle ne anu, wɔ Babelonia, mɔɔ mgbɔnwɔ fufule ne mɔ ɛlɛtwe ye la kɔ adɔleɛ afoa nu maanle ne anu, yɛɛ mɔɔ mgbɔnwɔ nzonle anwo ndetandeta ne mɔ ɛlɛtwe ye la kɔ nyiakɛ afoa nu maanle ne anu.”

⁷Mgbɔnwɔ nzonle anwo ndetandeta ne mɔ vindele rale la, ɛnee bɛngola gyinla fee; ɛhɔlɛ ala yɛɛ bɛkulo kɛ bɛkɔ na bɛkɔkpɔla azɛlɛ ye a. Na Nyamenle soanvolɛ ne zele bɛ kɛ, “Bɛhɔ ɛ, bɛhɔkpɔla azɛlɛ ye.” Yemɔti bɛhɔle kɛ bɛkakpɔla azɛlɛ ye.

⁸Nyamenle soanvolɛ ne deanle nu zele me kɛ, “Nea, mgbɔnwɔ ne mɔ mɔɔ ɛlɛkɔ ɛbɔ nu afoa nu la ɛmaa me Sunsum ne akunlu ɛdwo ɛbɔ nu afoa nu maanle ne anwo.”

⁹Ɛdɛnkɛma dendɛle hilele me.

¹⁰Ɔse, “Die dwɛtɛ fufule nee ezukoa nvutuke fi Hɛledae, Tobaegya, yɛɛ Gyɛdaya mɔɔ bɛhyele bɛ bɛhɔle nlɔnu na bɛvi Babelonia bɛra la ɛkɛ ne, na kenle ko ne ala fa kɔ Zɛfanaya ara Dwosaya sua nu. Fa dwɛtɛ fufule ne nee ezukoa nvutuke ne yɛ belemgbunli kyɛlɛ na fa soa Sɛlɛvolɛ Kpanyinli Dwɔhyua, Gyɛhɔzadake ara nrenya ne,

¹² na ka kile ye kɛ, ‘Tumivolɛ Ɛdɛnkɛma se: Bɛnlea, sonla ne mɔɔ ye duma a le Baka Ɛhane la ɛne. Ɔbakpazi wɔ ɛleka mɔɔ ɔde la na yeazi Ɛdɛnkɛma Ɛzonlenlɛ Sua ne.

¹³Yemɔ a ɔbazi Ɛdɛnkɛma Ɛzonlenlɛ Sua ne a, na bɛbali ye eni kɛ belemgbunli. Ɔbadɛnla ye belemgbunli ebia nu na yeazie ye menli ne. Ɔbanyia sɛlɛvolɛ ko wɔ ye belemgbunli ebia ne anwo, na bɛdabɛ bɛ mu nwiɔ bɛ nloa bazɛ bɛ nwo anzonudwolɛ nu.’

¹⁴Belemgbunli kyɛlɛ ne ɛnrɛkpa Ɛdɛnkɛma Ɛzonlenlɛ Sua ne anu ɛlɛ, na ɔbayɛ ngakyelɛdeɛ yeamaa Hɛledae, Tobaegya, Gyɛdaya, yɛɛ Zɛfanaya ara Dwosaya.

¹⁵“Menli mɔɔ wɔ moa moa la baraboa Ɛdɛnkɛma Ɛzonlenlɛ Sua ne ɛzilɛ; na bɛbanwu kɛ Tumivolɛ Ɛdɛnkɛma a ɛzoa me bɛ nwo a. Saa bɛtie Ɛdɛnkɛma bɛ Nyamenle ne ane na bɛyɛ tieyɛ bɛmaa ye a, bɛbanwu kɛ ɛhye mɔ amuala bazi.”