Read Nzema Zɛk 7 Bible Online

Zɛk 7 - Nzema bible

Zɛk 7

¹Maanle Maanle Belemgbunli Dalayɛse lile ɛvolɛ nna wɔ Pɛhyea ebia zo la, Ɛdɛnkɛma dendɛle hilele Zɛkalaya wɔ siane ngɔnla ne mɔɔ bɛfɛlɛ ye “Kyeselɛve” la ye kenle nna ne azo.

²Bɛtɛlema ɛzoa Hyalizɛ nee Riligɛmɛlɛke nee bɛ sa zo kɛ bɛhɔzɛlɛ Ɛdɛnkɛma,

³na bɛbiza sɛlɛvolɛma mɔɔ wɔ Tumivolɛ Ɛdɛnkɛma Ɛzonlenlɛ Sua ne anu nee Nyamenle kpɔmanvolɛma ne mɔ kɛ, “Yɛli nyane na yɛhye ɛhɔne wɔ siane nnu ne anu, kɛmɔ ɛvolɛ dɔɔnwo mɔɔ ɛraze ɛhɔ la yɛyɛ ye la ɔ?”

⁴Na Tumivolɛ Ɛdɛnkɛma dendɛle hilele me.

⁵Ɔse, “Biza menli mɔɔ wɔ maanle ne anu nee sɛlɛvolɛma ne kɛ: Mekɛ mɔɔ bɛhyele ɛhɔne na bɛlile nyane wɔ siane nnu ne mɔ anu, wɔ ɛvolɛ abulasuu ye mɔɔ ɛze ɛhɔ la anu la, asoo mame me ti a bɛhyele ɛhɔne ne a?

⁶Mɔɔ bɛdi, bɛanlo la, asoo mame me ti ɔ? Se bɛlile, bɛnlonle bɛmanle bɛ nwo!

⁷“Mekɛ mɔɔ ɛnee Gyɛlusalɛm le gbudugbudu na awie biala asa ɛyia ɔ nwo, mɔɔ ɛnee azuamgbole ɛbɔ ɛyia ye, na ye nyiakɛ nee ye adɔleɛ ndololeɛ nu kɔsɔɔti le menli ngome la, Ɛdɛnkɛma ammaa ye alumua kpɔmanvolɛma ambɔ edwɛkɛ ɛhye mɔ nolo angile bɛ ɔ?”

⁸Akee Ɛdɛnkɛma dendɛle hilele Zɛkalaya.

⁹Ɔse, “Medame, Tumivolɛ Ɛdɛnkɛma, mese: Bɛbua ndɛne nɔhalɛ nu, bɛyɛ ahunlunyele na bɛze bɛ nwo anwunvɔne ngoko ngoko;

¹⁰bɛmmasisi ahunlanvolɛ, menli mɔɔ ɛnlɛ bɛ ze mɔ, nyɛvolɛ anzɛɛ ehyianvolɛma; yɛɛ bɛ biala mmafa ɔ diema anwo adwenle ɛtane.”

¹¹Noko menli ne kpole kɛ bɛnrɛdie, na bɛkpunyunle bɛ bati, bɛduoduale bɛ nzo, amaa bɛande edwɛkɛ ne.

¹²Bɛboɔboale bɛsolole, amaa bɛandie Nyamenle mɛla ne nee edwɛkɛ mɔɔ Tumivolɛ Ɛdɛnkɛma ɛva ɛzoa ye Sunsum ne yemaa yelua ye alumua kpɔmanvolɛma anwo zo yeha yehile bɛ la. Zɔhane ati Tumivolɛ Ɛdɛnkɛma vale ɛya kpole,

¹³na ɔhanle kɛ, “Kɛmɔ menvɛlɛle na bɛandie la, bɛdabɛ bɛvɛlɛle la, medame noko meandie.

¹⁴Membɔle bɛ asande wɔ maanle maanle kɔsɔɔti mɔɔ bɛnze bɛ la anu. Na azɛlɛ ne mɔɔ bɛgyakyile ye bɛ nzi la lale ɛkɛ ne mɔɔ awie ɛngɔ, ɛmba zolɛ a, na azɛlɛ kɛnlɛma ne dɔle mgbane.”