Read Nzema Zɛk 8 Bible Online

Zɛk 8 - Nzema bible

Zɛk 8

¹Tumivolɛ Ɛdɛnkɛma dendɛle hilele me.

²Ɔse, “Medame Tumivolɛ Ɛdɛnkɛma, metwe Gyɛlusalɛm anwo nungule kpole kpalɛ, yɛɛ mefa ɛya a metwe ɔ nwo nungule ne a.

³Medame Ɛdɛnkɛma mese: Mebazia meahɔ Gyɛlusalɛm, mebahɔ meahɔdɛnla Gyɛlusalɛm avinli, na bɛbavɛlɛ Gyɛlusalɛm nɔhalɛ suakpole, na bɛavɛlɛ Tumivolɛ Ɛdɛnkɛma Boka ne Boka Nwuanzanwuanza.

⁴Medame Tumivolɛ Ɛdɛnkɛma mese: Mrenya mrelera nee mraalɛ mrelera eza badɛnlɛdɛnla Gyɛlusalɛm gua ne mɔ azo, ko biala bava kpɔma a adia a, ɔluakɛ yeyɛ ɛrelera.

⁵Suakpole ne azo gua ne mɔ azo bayɛ ngakula mrenya nee mraalɛ ngome mɔɔ ɛlɛdi nwɔhoa a.

⁶“Na medame Tumivolɛ Ɛdɛnkɛma, mebiza kɛ: Saa ɔyɛ azibɛnwo ɔmaa bɛdabɛ Dwuuma mɔɔ bɛha la bɛ nye zo wɔ mekɛ ɛhye anu a, ɛnee ɔwɔ kɛ ɔyɛ medame noko azibɛnwo ɔ?

⁷Medame Tumivolɛ Ɛdɛnkɛma mese: Bɛnlea, mebalie me menli ne meavi adɔleɛ nee aduduleɛ maanle ne mɔ anu,

⁸na meava bɛ meara meamaa bɛaradɛnla Gyɛlusalɛm. Bɛbayɛ me menli na meayɛ bɛ Nyamenle, wɔ nɔhalɛlilɛ nee tenleneyɛlɛ nu.”

⁹Tumivolɛ Ɛdɛnkɛma se, “Bɛdabɛ mɔɔ bɛlɛtie edwɛkɛ ɛhye mɔ bɛavi me kpɔmanvolɛma anloa la, bɛnyia akɛnrasesebɛ, kɛmɔ mekɛ mɔɔ bɛwula Tumivolɛ Ɛdɛnkɛma Sua ne aze la bɛnyianle la, amaa bɛahola bɛazi Ɛdɛnkɛma Ɛzonlenlɛ Sua ne.

¹⁰Ɔluakɛ mɔɔ ɛnee mekɛ zɔhane ɛtɛdwule la, bɛmbɔ awie ɛkpa bɛndua ye kakɛ yɛɛ bɛmbɔ awie nane ɛkpa bɛndua ye kakɛ, yɛɛ awie biala ɛnva ɔ nwo kɔlɔnwo ɛngɔ ɛmba wɔ ye kpɔvolɛma asa anu, ɔluakɛ ɛnee meye ɛkpɔlɛ medo awie biala nee ɔ gɔnwo avinli.

¹¹Na kɛkala me nee bɛdabɛ mɔɔ bɛha la ɛnrɛli ye kɛ mɔɔ alumua ne me nee bɛ lile la, medame Tumivolɛ Ɛdɛnkɛma a mese a.

¹²Bɛbalua bɛ aleɛ anzonudwolɛ nu; vanye mbaka bazo, na azɛlɛ ne amaa bɛ aleɛ ahye, yɛɛ ɛbɔlɛ badɔ amaa bɛ. Mebamaa menli ɛhye mɔ abo zo amra mɔɔ ɛha la anyia ninyɛne ɛhye mɔ amuala.

¹³Na kɛmɔ bɛyɛ amowa ɛfenle wɔ maanle maanle ne mɔ avinli la, zɔhane ala, O Dwuuma nee Yizilayɛma, yɛɛ mebalie bɛ na bɛayɛ nyilalɛ bɛamaa maanle maanle ne mɔ a. Yemɔti bɛmmasulo, na bɛnyia akɛnrasesebɛ.”

¹⁴Tumivolɛ Ɛdɛnkɛma se, “Mekɛ mɔɔ bɛ ze mɔ hanle me ɛya la, menyianle adwenle kɛ me nee bɛ di ye ɛtane zo, na amgba noko menyɛle.

¹⁵Na kɛkala, medame Tumivolɛ Ɛdɛnkɛma, menyia adwenle bieko kɛ mekɛ ɛhye anu meyɛ boɛ meamaa Gyɛlusalɛm nee Dwudama amuala. Yemɔti bɛmmasulo.

¹⁶ Ninyɛne mɔɔ ɔwɔ kɛ bɛyɛ la ɛne: Bɛha nɔhalɛ bɛhile bɛ nwo ngoko, bɛyia nu a bɛbua ndɛne nɔhalɛ nu na bɛmaa anzonudwolɛ ɛrɛla.

¹⁷Bɛmmafa bɛ gɔnwo mɔ anwo adwenle ɛtane, yɛɛ bɛmmadie ndane adalɛ biala bɛto nu, ɔluakɛ mekyi ninyɛne ɛhye mɔ amuala, medame Ɛdɛnkɛma a mese a.”

¹⁸Tumivolɛ Ɛdɛnkɛma dendɛle hilele me, ɔse,

¹⁹“Medame Tumivolɛ Ɛdɛnkɛma mese: Ɛhɔne ne mɔɔ bɛkye ye siane nna ne, siane nnu ne, siane nsuu ne yɛɛ siane bulu ne mɔ anu la bayɛ anyelielɛ nee fɛlɛkolilɛ mekɛ amaa Dwudama na bɛado ɛkponle anyelielɛ nu. Yemɔti bɛhulo nɔhalɛ nee anzonudwolɛ.”

²⁰Tumivolɛ Ɛdɛnkɛma se, “Menli dɔɔnwo bara;

²¹menli vi azuamgbole dɔɔnwo azo bahɔ azuamgbole zo ahɔze kɛ, ‘Bɛmaa yɛha yɛ nwo waa yɛhɔ yɛhɔzɛlɛ Ɛdɛnkɛma na yɛzonle Tumivolɛ Ɛdɛnkɛma. Bɛrɛla bɛmaa yɛhɔ.’

²²Maanle maanle mɔɔ anwo yɛ se nee menli ngakyile ngakyile barakpondɛ Tumivolɛ Ɛdɛnkɛma abo zo bɛazonle ye wɔ Gyɛlusalɛm, na bɛazɛlɛ ye moalɛ.

²³Mekɛ ne anu mrenya bulu vi maanle maanle ne mɔ nee aneɛ ngakyile ne mɔ anu barazɔ Dwuunli tɛladeɛ nu na bɛaha kɛ, ‘Maa yɛ nee wɔ ɛhɔ, ɔluakɛ yɛde kɛ Nyamenle nee bɛ lua.’ ”