Read Nzema Zɛk 9 Bible Online

Zɛk 9 - Nzema bible

Zɛk 9

¹ Ɛdɛnkɛma nrɛlaleɛ ne ɛne: Luk 10.13-14 Ɛdɛnkɛma nrɛlaleɛ ne tia Heedelakema yɛɛ ɔbadwu Dɛmasekɛsema anwo zo. Ɔluakɛ Ɛdɛnkɛma ɛva Yizilayɛ mbusua ekpunli ekpunli ne mɔ nee Selea maanle ne suakpole ne ɛyɛ ye ɛdeɛ.

²Zɔhane ala yɛɛ Heemate mɔɔ wɔ Heedelakema ɛweɛne zo, Tayama yɛɛ Saedɛnema mɔɔ ze nrɛlɛbɛ la le Ɛdɛnkɛma ɛdeɛ a.

³Tayama ɛzi aranemgbole na bɛboɔboa dwɛtɛ fufule nee ezukoa nvutuke nloa edukue edukue kɛ gua zo ndɛtɛlɛ.

⁴Noko nea, Ɛdɛnkɛma baza bɛ alie bɛ ninyɛne na yeavuandi bɛ anwonyia yeagua nyevile nu, na bɛado senle suakpole ne azo bɛayela ye.

⁵ Menli mɔɔ wɔ suakpole Ahyekɛlɔn azo la banwu ɛhye, na ɛzulolɛ baha bɛ. Gazama banwu ye, na bɛ nwo bafofo bɛ. Ɛkelɔnoma noko banwu ye, na bɛanwu kɛ bɛ anyelazo muala ɛwie. Gaza belemgbunli ne bawu, yɛɛ Ahyekɛlɔn bayɛ kulofenle (suadu). Emɔ 1.6-8; Zɛf 2.4-7

⁶Menli ngakyile baradɛnla Ahyedɔdo; na Ɛdɛnkɛma bamaa Filisitiama adubɛnwo ne abɔ aze.

⁷Ɛdɛnkɛma se, “Bɛnrɛli nane mɔɔ mogya wɔ nu nee bɛkyi aleɛ ne mɔ mɔɔ bɛdi la bieko. Menli mɔɔ baha la bayɛ me menli; bɛbayɛ kɛ abusua ekpulike wɔ Dwuda, yɛɛ Ɛkelɔnoma bayɛ kɛ Gyibɛsema la.

⁸Akee mebadɛnla me sua ne anyunlu kɛ sinzavolɛ, amaa awie biala andia kilikili anze ɛkɛ. Awie ɛnrɛsisi bɛ bieko, ɔluakɛ medame me nye nwiɔ ɛnwu nyane mɔɔ bɛlɛnwu ye la.”

⁹ O Zayɔnoma, bɛmaa bɛ nye ɛlie! O Gyɛlusalɛmma, bɛdea nu kpole kpalɛ! Bɛnlea, bɛ belemgbunli ne ɛlɛba bɛ ɛkɛ; ɔlɛba ye konimlilɛ nu. Ɔle bɛlɛvo yɛɛ ɔde asoaso zo, asoaso ralɛ zo.

¹⁰ Ɛdɛnkɛma se, “Mebabubu Yifelaem konle ehwili ne mɔ na meaye bɛ konle mgbɔnwɔ ne mɔ wɔ Gyɛlusalɛm. Mebabubu bɛ konle ɛda ne mɔ anu, na ɔbamaa anzonudwolɛ aha maanle maanle ne mɔ. Ye belemgbunlililɛ badwu ɛnwea ɛnwea, ɔvi Azule Yufileti ne anloa yeahɔdwu ewiade awieleɛ.”

¹¹ Ɛdɛnkɛma se, “Kɛmɔ me nee wɔ ɛyɛ ngyekyeleɛ mɔɔ bɛva azubɔlɛ mogya bɛzɔ ɔ nloa la ati, mebadwula wɔ menli ne mɔɔ bɛhye bɛ nuokɛ la, mebaye bɛ meavi kuma ne mɔɔ nzule ɛnle nu la anu.

¹²Bɛzia bɛrɛla bɛ ɛvealeka ne, O bɛmɛ pilizama mɔɔ bɛlɛ anyelazo a, ɛnɛ meka meahile bɛ kɛ, debie biala mɔɔ bɛminli ye la, mebamaa bɛanyia ye mɔnwo.

¹³Ɔluakɛ meva Dwuda meyɛ me ɛda mekpo. meva Yizilayɛ meyɛ me ɛda mbaka. O Zayɔn, mebado bɛ mra mrenya kɛ dadeɛ, meava meaha Gilikima senle, na meanwɔha bɛ kɛ kovolɛ dadeɛ.”

¹⁴Akee Ɛdɛnkɛma bavinde bɛ ti zo anwuma; ɔbatoto ye ɛda ne kɛ ɛsɛlɛmanye; Awulae Nyamenle ne babɔ aweɛne tendenle ne anu, na yealua nyiakɛ ahumuakyima ne anu yeara.

¹⁵Tumivolɛ Ɛdɛnkɛma bawowa bɛ; bɛbahu totoabɔma ne bɛatietia bɛ nwo zo. Bɛbayɛ begyebegye kɛ asɛɛ bɛbo nza; bɛbaha bɛ kpɔvolɛma mogya bɛagua, yeazonyi kɛ asɛɛ ɔgyi kɔpo nu na bɛlɛwola bɛagua azukponle ne mgbɛne zo.

¹⁶Mekɛ ne anu Ɛdɛnkɛma bɛ Nyamenle ne balie bɛ, ɔluakɛ bɛle ye menli. Bɛle kɛ belemgbunli abɔtile zo mgbɔba, bɛbada ye azɛlɛ ne azo.

¹⁷Ɛhɛe, azɛlɛ ne bayɛ kpalɛ, ayɛ kɛnlɛma! Zolɛ abɛlɛ nee nwanye fofolɛ bamaa zolɛ mgbavolɛ nee mbɛlɛra anyia anwosesebɛ.