Read Nzema Mal 1 Bible Online

Mal 1 - Nzema bible

Mal 1

¹Ɛdɛnkɛma nrɛlaleɛ ne mɔɔ ɔluale Malakae anwo zo ɔvale ɔmanle Yizilayɛma la ɛne:

² Ɛdɛnkɛma se, “Mehulo bɛ.” Noko bɛmɛ bɛse, “Kɛ wɔzi wɔhulo yɛ ɛ?” Ɛdɛnkɛma biza bɛ kɛ, “Asoo tɛ Yisɔ adiema a le Gyekɔbo? Noko mehulo Gyekɔbo, Emɔ 1.11-12; Oba 1-14

³na mekpɔ Yisɔ. Memaa ye awoka zo azɛlɛ ɛhakyi ɛsɛlɛ na meva ye agyadeɛ muala mewula ɛsɛlɛ zo boboduma ne mɔ asa anu.”

⁴Saa Yidɔmma ka kɛ, “Bɛzɛkye yɛ maanle ye bɔbɔ ɛdeɛ, noko yɛbazia yɛakyekye ye fofolɛ” a, ɛnee kɛ Tumivolɛ Ɛdɛnkɛma se la ɛne, “Bɛbakyekye bɛ azua ne mɔ, na mebagologolo bɛ meagua. Bɛbavɛlɛ bɛ azɛlɛ ne ‘Amumuyɛ Azɛlɛ’ na bɛavɛlɛ bɛdabɛ mumua ne ‘Menli mɔɔ Ɛdɛnkɛma ɛva bɛ nwo ɛya mɔɔ ɛnlɛ awieleɛ a.’ ”

⁵Bɛdabɛ bɛbanwu ye bɛ nye zo na bɛaha kɛ, “Ɛdɛnkɛma anwo yɛ ɛzulolɛ wɔ Yizilayɛ anzi lɔ!”

⁶Tumivolɛ Ɛdɛnkɛma biza bɛ kɛ, “Ralɛ di ɔ ze eni yɛɛ akɛlɛ di ɔ menle eni. Na saa mele bɛ ze a, ɛnee eni mɔɔ bɛdi me la a le boni? Yɛɛ saa mele bɛ menle a, ɛnee ɛzulolɛ mɔɔ bɛsulo me la wɔ nienwu? Bɛmɛ sɛlɛvolɛma bɔbɔ yɛɛ bɛsɛkye me duma a. Noko bɛmɛ bɛbiza kɛ, ‘Ɛnee kɛ yɛzi yɛzɛkye wɔ duma ɛ?’

⁷Bɛfa aleɛ mɔɔ nwolɛ ɛnde la bɛgua me azukponle zo. Noko bɛbiza kɛ, ‘Kɛ yɛzi yɛgua ɛ nwo evinli ɛ?’ Bɛ adwenle a le kɛ Ɛdɛnkɛma azukponle ne bɔbɔ, ɔnle kɛ bɛdi ye eni.

⁸ Asoo saa bɛfa nane mɔɔ anye ɛzi la bɛba kɛ bɛva bɛbɔ azu bɛmaa me a, ɛnee bɛdabɛ bɛnea a bɛtɛbɔle munzule? Yɛɛ saa bɛfa nane mɔɔ ɛbubu anzɛɛ ewule ɛha ye la bɛba kɛ bɛva bɛbɔ azu bɛmaa me a, asoo ɛnee bɛtɛbɔle munzule? Bɛva ninyɛne zɔhane mɔ bɛhɔhyɛ bɛ amɛnlado ne. Asoo bɛnea a ɔ kunlu kɛdwo bɛ nwo anzɛɛ ɔ nye kɛlie bɛ nwo?”

⁹Bɛmɛ sɛlɛvolɛma, bɛzɛlɛ Nyamenle bɛmaa ɔ nye ɛlie yɛ nwo na ɔlo yɛ. Asoo bɛnea a ɔkɛlie bɛ sa nu azubɔdeɛ mɔɔ le zɛhae la?

¹⁰Ɛdɛnkɛma se, “Anrɛɛ bɛ nuhua ko ahɔtoto Ɛzonlenlɛ Sua ne nlenkɛ ne mɔ anu amaa bɛanzɔ senle wɔ me azukponle ne azo mgbane mgbane. Me kunlu ɛndwo bɛ nwo yɛɛ menrɛlie bɛ sa nu azubɔdeɛ biala.

¹¹Me duma le kpole wɔ maanle maanle avinli ɔvi sɛnzɛne aduduleɛ kɔdwu adɔleɛ. Ɛleka biala bɛkpu ɛyɛlɛ evuanlɛ na bɛfa azubɔdeɛ mɔɔ anwo te la bɛmaa me, ɔluakɛ me duma ne le kpole wɔ maanle maanle avinli.

¹²Na bɛmɛ, saa bɛka kɛ ‘Ɛdɛnkɛma azukponle ne anwo ɛnde yɛɛ kpanwo ne ɛnle kpalɛ’ a ɛnee bɛgua azukponle ne anwo evinli.

¹³Bɛmɛ, bɛ edwɛkɛ a le kɛ, ‘Duzu ɛvɛlɛ a le ɛhye?’ Bɛka ɛhye na bɛakpobi bɛ nloa. “Saa bɛbabɔ azu a bɛfa nane mɔɔ bɛwuale, anzɛɛ ɛbubu anzɛɛ ewule ɛha ye la a bɛyɛ azubɔdeɛ bɛbɛlɛ me a. Asoo medie ɛhye a ɔyɛ boɛ?

¹⁴Munzule ɛha nzisi sonla ne mɔɔ lɛ boane nyinli wɔ ye nyɛmoa nu, ɔkɛva ɔkɛbɔ ɛwɔkɛ, na akee ɔkɛva ɛtane bie ɔkɛrabɔ azu ɔkɛmaa Ɛdɛnkɛma la, ɔluakɛ mele belemgbunli kpole, yɛɛ maanle maanle kɔsɔɔti sulo me.”