Read Nzema Mal 2 Bible Online

Mal 2 - Nzema bible

Mal 2

¹Tumivolɛ Ɛdɛnkɛma se, “Akee bɛmɛ sɛlɛvolɛma, bɛ mɛla a le ɛhye:

²Saa bɛnrɛdie me edwɛkɛ, bɛnrɛva bɛnrɛzie bɛ ahonle nu kɛ bɛwula me duma ne anyunlunyia a, mebamaa munzule ara bɛ nwo zo na meamaa bɛ nyilalɛ ahakyi munzule. Nɔhalɛ, memaa bɛ nyilalɛ ɛhakyi munzule dɛbadɛba, ɔboalekɛ bɛambu me edwɛkɛ ne bie.

³Mebahwi bɛ bo zo amra anyunlu, na meava bɛ azubɔlɛ nane ne mɔ ebinli meakpuda bɛ nyunlu, na meaye bɛ meavi me nye zo.

⁴ Ɛhye yɛɛ bamaa bɛanwu kɛ medame yɛɛ meva mɛla ɛhye memaa bɛ a, amaa ngyekyeleɛ mɔɔ me nee Livae yɛkyekyele la anzɛkye.

⁵ “Ngyekyeleɛ ne mɔɔ me nee ye yɛle la le ngoane nee anzonudwolɛ ngyekyeleɛ, yɛɛ menvale memanle ye amaa yeazulo, yɛɛ ɔzulole me noko. Ɔte me duma a, ɔ nwo wozo ye.

⁶Ye ngilehilelɛ le fɔɔnwo yɛɛ yeambɔ adalɛ biala. Ɔ nee me luale anzonudwolɛ nu na ɔbɔle ɛbɛla mɔɔ tenrɛ la, na ɔmanle menli dɔɔnwo gyakyile ɛtaneyɛlɛ.

⁷Ɔluakɛ ɔwɔ kɛ ndelebɛbo finde sɛlɛvolɛ biala anloa edwɛkɛ nu, yɛɛ ɔwɔ kɛ menli fa ɛzukoalɛdeɛ wɔ ye ɛdendɛlɛ nu, ɔboalekɛ ɔle Tumivolɛ Ɛdɛnkɛma soanvolɛ.

⁸“Noko bɛmɛ, bɛvi adenle ɛhye azo bɛye bɛ nwo yɛɛ bɛva bɛ ngilehilelɛ bɛmaa menli dɔɔnwo ɛdu koti; bɛtulu ngyekyeleɛ ne mɔɔ me nee Livae kyekyele la.

⁹Zɔhane ati medame Ɛdɛnkɛma mese, meye bɛ nyunlu nwoma mɔɔ awie biala ɛmbu bɛ a, amaa bɛagua bɛ nyunlu aze wɔ menli nu, ɔboalekɛ bɛanlua me adenle ne anu bɛangilehile; bɛnea sonla nyunlu na bɛahilehile.”

¹⁰Yɛ muala yɛ ze ɛnle ko ɔ? Tɛ Nyamenle ko ne ala a bɔle yɛ muala ɔ? Duzu ati a yɛnli nɔhalɛ yɛmmaa yɛ nwo, na ɔlua zo yɛgua yɛ ze mɔ ngyekyeleɛ ne mɔɔ bɛ nee Nyamenle yɛle la anwo evinli a?

¹¹Dwudama anli nɔhalɛ, bɛbɔ munzule wɔ Yizilayɛ amuala nee Gyɛlusalɛm. Dwudama ɛva evinli ɛha Ɛleka Nwuanzanwuanza ne mɔɔ Ɛdɛnkɛma anye die ɛkɛ ne la. Bɛhɔgya mraalɛ mɔɔ sonle nyamenle gyɛne la.

¹²Sonla mɔɔ yɛ ɛhye mɔ la, saa yemɔ a ɔdi nwolɛ ɛzonle, anzɛɛ ɔdi daselɛ, anzɛɛ saa ɔfa nwolɛ azubɔdeɛ ɔba Tumivolɛ Ɛdɛnkɛma anyunlu bɔbɔ a, Ɛdɛnkɛma ɛye ye ɛvi Gyɛkɔbo sua nu.

¹³Debie bieko mɔɔ eza bɛyɛ la ɛne: Bɛtwi monle wɔ Ɛdɛnkɛma azukponle ne azo. Bɛsu na bɛdi nyane bɛ nuhua kɛ ɛnɛ ɔnlie bɛ azubɔlɛ ninyɛne ne mɔ, yɛɛ ɔ nye ɛnlie nwolɛ.

¹⁴Bɛbiza kɛ, “Duzu ati a ɔnlie ɛ?” Ɔboalekɛ Ɛdɛnkɛma di ngyekyeleɛ mɔɔ bɛ nee bɛ mraalɛ mɔɔ bɛgyale bɛ bɛ mgbavolɛ nu la yɛle la anwo daselɛ. Bɛanli nɔhalɛ bɛammaa bɛ, noko bɛ mraalɛ ɔ, yɛɛ ngyekyeleɛ ne kile kɛ bɛle bɛ ye mɔ.

¹⁵Asoo Ɛdɛnkɛma anga bɛ ambɔ nu anyɛ bɛ ko wɔ sunsum nee nwonane nu? Na duzu a ɛnee ɔkpondɛ a? Ɔkpondɛ Nyamenle nu mralɛ. Yemɔti bɛnlea bɛ nwo boɛ kpalɛ na bɛmmabɔ bɛ mraalɛ mɔɔ bɛkɛgya bɛ bɛ mgbavolɛ nu la ewole.

¹⁶Yizilayɛ Ɛdɛnkɛma Nyamenle ne se, “Mekyi ewolebɔlɛ, yɛɛ mekyi nrenya mɔɔ fa anyebolo bɔ ɔ ye ewole la. Medame Tumivolɛ Ɛdɛnkɛma a mese a. Yemɔti bɛnlea bɛ nwo boɛ na bɛli nɔhalɛ bɛmaa bɛ ye mɔ.”

¹⁷Bɛva bɛ ɛdendɛlɛ bɛgyegye Ɛdɛnkɛma, na akee bɛbiza kɛ, “Kɛ yɛzi yɛgyegye ye ɛ?” Bɛ edwɛkɛ mɔɔ bɛka la a le kɛ, “Awie biala mɔɔ di ɛtane la le kpalɛ wɔ Ɛdɛnkɛma anye zo, yɛɛ ɔ nye die bɛ nwo.” Eza bɛbiza kɛ, “Na Nyamenle ne mɔɔ di pɛlepɛle la wɔ nienwu?”