Read Nzema Mal 3 Bible Online

Mal 3 - Nzema bible

Mal 3

¹ Tumivolɛ Ɛdɛnkɛma se, “Nea, mebazoa me ɛbɔfoɔ meamaa yeahɔziezie adenle ne anu yeamaa me. Na arɛlevilɛ nu ala bɛbanwu Awulae ne mɔɔ bɛlɛkpondɛ ye la kɛ ɔlɛkɔ Ɛzonlenlɛ Sua ne anu. Ngyekyeleɛ ne anwo ɛbɔfoɔ ne mɔɔ bɛ nye la ye ade la ɛlɛba.”

² Kenle mɔɔ ɔkɛra la, nwane a kɛhola gyinla a, yɛɛ saa ɔye ɔ nyunlu a, nwane a kɛnyia gyinlagyakɛ a? Ɔluakɛ ɔbayɛ kɛ dwinvolɛ senle mɔɔ ɔfa ɔtu ninyɛne nu anzɛɛ saminla anloa ɛsesebɛ mɔɔ bɛfa bɛkpo ninyɛne la.

³Ɔbadɛnla aze kɛ dwinvolɛ mɔɔ tu dwɛtɛ fufule nu la. Ɔbadu Livaema anu na yeabolo bɛ nwo kɛ ezukoa nvutuke anzɛɛ yeahwi bɛ nwo kɛ dwɛtɛ fufule, kɔdwu mekɛ mɔɔ bɛkɛva nɔhalɛ azubɔlɛ ninyɛne bɛkɛmaa Ɛdɛnkɛma la.

⁴Ɛhye bamaa Dwudama nee Gyɛlusalɛmma azubɔlɛ ninyɛne ayɛ anyenzɔlɛ amaa Ɛdɛnkɛma, kɛmɔ ɛnee ɔde wɔ ɛvolɛ dɔɔnwo mɔɔ ɛraze ɛhɔ la.

⁵Tumivolɛ Ɛdɛnkɛma se, “Mebahwe meabikye bɛ na meabua bɛ ndɛne. Mebadea ngonyiama, awuvolɛvalɛma nee bɛdabɛ mɔɔ bɛka ndane mgbane mgbane la ndɛndɛ zo. Mebadea bɛdabɛ mɔɔ bɛsisi gyimayɛvoma wɔ bɛ kakɛdualɛ nu, bɛdabɛ mɔɔ bɛsisi ahunlanvolɛ nee nrisa, bɛdabɛ mɔɔ bɛmbu nyɛvolɛ yɛɛ bɛdabɛ mɔɔ bɛnzulo me la.”

⁶Ɛdɛnkɛma se, “Medame Ɛdɛnkɛma, mengakyi ɛlɛ. Yemɔti bɛmɛ Gyekɔbo abo zo amra, bɛ bo zo ɛtɛbɔle bɔkɔɔ.

⁷Sumunli bɛ nlenya mɔ mekɛ zo yɛɛ bɛvale me mɛla zo ɛtietialɛ a, yɛɛ bɛnli zolɛ. Bɛzia bɛrɛla me ɛkɛ ne, na medame noko menwɔra bɛ nwo ɛkɛ. Noko bɛbiza kɛ, ‘Ɛnee kɛ yɛyɛ yɛzia yɛ nzi ɛ?’

⁸Asoo sonla kola wua Nyamenle? Noko bɛmɛ, ɛwualɛ ala a bɛwua me a. Na bɛbiza kɛ, ‘Ɛnee kɛ yɛsi yɛwua wɔ ɛ?’ Bɛwua me wɔ bɛ azubɔlɛ nu nee ninyɛne ne mɔ mɔɔ bɛkyɛ nu bulu bɛtu ɛkpɔ ngoko bɛmaa me la anu.

⁹Bɛbɔ munzule, bɛdabɛ maanlema amuala, ɔluakɛ bɛlɛwua me.

¹⁰ Ɛkpɔ ne mɔ mɔɔ le me ɛdeɛ la, bɛva bɛ kɔsɔɔti bɛrɛla bɛragua ɛleka mɔɔ mesie me ninyɛne ne la, amaa aleɛ ara me sua nu. Bɛzɔ me bɛnlea wɔ ɛhye anwo na bɛnlea saa menrɛbuke anwuma nlenkɛ menrɛgua nwolɛ menrɛmaa bɛnrɛnyia nyilalɛ dɔɔnwo a.

¹¹Menrɛmaa ngɛkɛba ɛnrɛli bɛ aleɛ, yɛɛ bɛ vanye mbaka ɛnrɛkpolo bɛ ndotolo nee ma ɛnrɛgua.

¹²Na maanle maanle kɔsɔɔti baha kɛ Nyamenle ɛlo bɛ, ɔluakɛ bɛ maanle nu bayɛ anyelielɛ.”

¹³Ɛdɛnkɛma se, “Bɛheha ɛtane ɛtane bɛtietia me! Noko bɛbiza kɛ, ‘Duzu edwɛkɛ a yɛha yɛtia wɔ a?’

¹⁴Bɛha kɛ, ‘Nyamenle ɛzonlenlɛ le debie mgbane. Duzu nvasoɛ yɛɛ yɛnyia ye wɔ ye ɛhulolɛdeɛ zo ɛlilɛ nwo, nee yɛ nwo alɔbɔlɛ alɔbɔlɛ mɔɔ yɛyɛ wɔ Tumivolɛ Ɛdɛnkɛma anyunlu, kɛ asɛɛ nyane bie ɛdo yɛ la anwo a?

¹⁵Noko nea, ɛnɛ, yɛfa sonla mɔɔ le mgbanyizonle la kɛ Nyamenle ɛyila ye. Menli mɔɔ di ɛtane la kpazi, yɛɛ bɛdabɛ mɔɔ bɛfa bɛ ɛtane bɛsɔ Nyamenle bɛnea la anwo dwɔɔ.’ ”

¹⁶Na bɛdabɛ mɔɔ bɛsulo Ɛdɛnkɛma la dule bɛ nwo azukue. Ɛdɛnkɛma diele bie, yɛɛ ɔdele ɔ muala. Bɛdabɛ mɔɔ bɛsulo Ɛdɛnkɛma na bɛdwenle ɔ nwo la, bɛhɛlɛle bɛ muala aluma wɔ ngakyelɛ buluku nu, ɔla Nyamenle anyunlu.

¹⁷Tumivolɛ Ɛdɛnkɛma se, “Bɛbayɛ me ɛdeɛ. Bɛbayɛ me agyadeɛ mɔɔ anwo hyia a, wɔ kenle mɔɔ menwɔha me nwo la. Mebanwu bɛ anwunvɔne, kɛmɔ sonla nwu ɔ ra mɔɔ sonle ye la anwunvɔne la.

¹⁸Na akee bɛbanwu ngakyile mɔɔ wɔ sonla mɔɔ di pɛlepɛle nee mɔɔ yɛ amumuyɛ la avinli la, nee ngakyile mɔɔ wɔ sonla mɔɔ sonle Nyamenle nee mɔɔ ɛnzonle Nyamenle la avinli la.”