Read Nzema Mat 11 Bible Online

Mat 11 - Nzema bible

Mat 11

¹Mɔɔ Gyisɛse wiele ye ɛdoavolɛma bulu nee nwiɔ ne folɛ tu la, ɔvi ɛkɛ ne ɔhɔle na ɔhɔhilehilele, ɔhanle Edwɛkpa ne wɔ azua mɔɔ zuozua ɛkɛ ne la azo.

²Gyisɛse gyima mɔɔ ɛnee ɔlɛdi la nganeɛ dwule Dwɔn Sɔnevolɛ ne anzo nu wɔ mekɛ mɔɔ ɛnee ɔla efiade la. Yemɔti ɔzoanle ye ɛdoavolɛma ne bie mɔ wɔ Gyisɛse ɛkɛ ne;

³bɛhɔbizale ye kɛ, “Ɛnee wɔmɔ a ɛle ahenle ne mɔɔ Dwɔn zele kɛ ɔbara la anzɛɛ yɛmaa yɛ nye ɛla sonla fofolɛ ade ɔ?”

⁴Gyisɛse buale kɛ, “Bɛzia bɛhɔha mɔɔ bɛde nee mɔɔ bɛnwu ye la bɛhile Dwɔn:

⁵ anyenzinliravolɛma nwu debie, abuburama tia, kokobɛvolɛma anwo sa, anzondiliravolɛma te edwɛkɛ, bɛdwazo mɔwuamra bɛba ngoane nu bieko, yɛɛ bɛka Edwɛkpa ne bɛkile ehyianvolɛma.

⁶Nyilalɛ ɛha bɛdabɛ mɔɔ bɛ ti anu ɛnyɛ bɛ kesee wɔ me nwo la.”

⁷Mɔɔ Dwɔn ɛdoavolɛma ne ziale kɛ bɛkɔ la, Gyisɛse bɔle ɔ bo kɛ ɔka Dwɔn anwo edwɛkɛ yeahile menli dɔɔnwo ne. Ɔse, “Mɔɔ bɛhɔle Dwɔn anwo lɔ wɔ fienemgbole ne anu la, duzu a ɛnee bɛ nye la kɛ bɛkɛnwu ye a? Ɛhonle mɔɔ anwoma ɛlɛkpusu ye la ɔ?

⁸Na duzu a bɛhɔle ye ɛnleanlɛ a? Awie mɔɔ heda ɛdakpa la ɔ? Bɛdabɛ mɔɔ bɛheda ɛdakpa la dede arelemgbunli azua nu.

⁹Bɛha bɛhile me ɛ; ɛnee akee duzu a bɛhɔle ye ɛnleanlɛ a? Nyamenle kpɔmanvolɛ ɔ? Ɛhɛe, na meka meahile bɛ kɛ bɛnwunle awie mɔɔ tɛla Nyamenle kpɔmanvolɛ bɔbɔ la.

¹⁰ Ɔluakɛ Dwɔn a Nyamenle Edwɛkɛ ne ka ye ɔ nwo kɛ: ‘Nyamenle se, mebazoa me ɛbɔfoɔ meamaa yealumua ɛ nyunlu na yeahɔziezie adenle ne anu yeamaa wɔ’ la.

¹¹Nɔhalɛ, meka meahile bɛ, wɔ menli mɔɔ bɛwo bɛ bɛgua ɛbɛla azɛlɛ ɛhye azo la anu, awie ɛtɛdwazole mɔɔ le kpole tɛla Dwɔn Sɔnevolɛ ne a. Noko akee awie mɔɔ le ekyi wɔ Anwuma Belemgbunlililɛ nu la le kpole tɛla ye.

¹² Ɔvi mekɛ mɔɔ Dwɔn Sɔnevolɛ ne bɔle ye nolobɔlɛ bo mɔɔ ɛradwu ɛnɛ la, ngyegyelɛ dɔɔnwo ɛra Anwuma Belemgbunlililɛ ne anwo ɛsesebɛ, na menli mɔɔ di mgbonde la ɛlɛbɔ mɔdenle kɛ bɛkɛpemgbe bɛkɛnyia ye.

¹³Ɔluakɛ Nyamenle kpɔmanvolɛma ne mɔ amuala nee Mosisi mɛla ne hanle Belemgbunlililɛ ne anwo edwɛkɛ dole ɛkɛ kolaa na Dwɔn ara;

¹⁴ na saa bɛkɛlie bɛkɛli a, anrɛɛ mese, Dwɔn a le Yilaegya ne mɔɔ bɛhanle ye edwɛkɛ kɛ ɔbara la.

¹⁵Mɔɔ lɛ ɛnzonlɛ la ɛdie.

¹⁶“Ɛnee akee duzu a menva adwuleso amra ɛhye mendo nwo a? Bɛle kɛ ngakula mɔɔ ɛlɛdi nwɔhoa wɔ gua zo la. Bɛdede ye ekpunli ekpunli, na ekpunli ko tea nu se ko ne kɛ,

¹⁷‘Yɛbɔle anyelielɛ edwɛne yɛmanle bɛ, noko bɛanzi. Yɛdole ɛzɛne edwɛne la, bɛanzu.’

¹⁸Dwɔn Sɔnevolɛ ne rale na ɔhyele ɛhɔne dahuu, ɔhyile nza la, awie biala se, ‘Ɔlɛ ayɛne!’

¹⁹Medame, Sonla Ra noko mera, na melɛdi meanlo a, awie biala se, ‘Bɛnlea ɛhye! Adidikpoku, nzanli, adwuledievolɛma nee bɛdabɛ mɔɔ awie ɛmbu bɛ la agɔnwo!’ Noko Nyamenle nrɛlɛbɛ ne amra ne mɔ nyɛleɛ maa bɛnwu kɛ ɔle nɔhalɛ.”

²⁰Akee Gyisɛse bɔle ɔ bo kɛ ɔtea menli mɔɔ wɔ azua mɔɔ yeyɛ nwanwane gyima dɔɔnwo wɔ zo la azo amra, ɔluakɛ bɛannu bɛ nwo.

²¹ “Munzule ɛha bɛdabɛ mɔɔ bɛwɔ Koleezen la! Munzule ɛha bɛdabɛ mɔɔ bɛwɔ Bɛteseeyeda la! Nwanwane gyima mgbole mɔɔ bɛyɛle wɔ bɛ azua ne mɔ azo la, saa bɛyɛle bie wɔ Taya nee Saedɛn a, anrɛɛ menli mɔɔ wɔ zo la hedale ɛrele, bɔle nzonle, bɛvale bɛhilele kɛ bɛnlu bɛ nwo wɔ bɛ ɛtane ne mɔ anwo.

²²Meka meahile bɛ, Ndɛnebualɛ Kenle ne, Nyamenle baze Tayama nee Saedɛnema anwunvɔne dɔɔnwo adɛla bɛ.

²³ Na bɛmɛ mɔɔ bɛwɔ Kapɛnayɛm la, bɛkpondɛ kɛ bɛkɔ Nyamenle maanle ne anu ɔ? Kyɛkyɛ! Bɛbavuandi bɛ bɛagua ɛbolɔ senle nu. Nwanwane gyima mɔɔ bɛyɛle wɔ bɛ sua zo la, saa bɛyɛle bie wɔ Sodɔm a, anrɛɛ ɛnɛ nee ɛnɛ ala sua zɔhane tɛbɔ ɛkɛ.

²⁴ Bɛnwu ye kɛ, Ndɛnebualɛ Kenle ne, Nyamenle baze Sodɔm amra anwunvɔne dɔɔnwo adɛla bɛ!”

²⁵Mekɛ ne anu Gyisɛse zele kɛ, “Egya, anwuma nee aze Awulae, meyɛ wɔ mo kɛ ninyɛne mɔɔ wɔva wɔvea nrɛlɛbɛvolɛma nee nwomama la wɔye wɔhile menli mɔɔ ɛnze nwolɛ bie la.

²⁶Ɛhɛe, Egya, ɛnee kɛ ɛkpondɛ kɛ ɔba ye la ɛne.

²⁷ “Egya ɛva ninyɛne kɔsɔɔti ɛmaa me. Awie biala ɛnze Ralɛ ne sonla holɛ kɛ Selɛ ne ala, yɛɛ awie biala ɛnze Selɛ ne sonla holɛ kɛ Ralɛ ne nee bɛdabɛ mɔɔ Ralɛ ne kulo kɛ ɔye ye ɔkile bɛ la ala.

²⁸“Bɛdabɛ mɔɔ bɛzo ɛnlomboɛ na bɛvɛ la, bɛ muala bɛrɛla me nwo ɛke, na menwɔmaa bɛ ɛnwomenlelielɛ.

²⁹ Bɛva me gyɛnvayile ne bɛdo bɛ kɔme zo na bɛzukoa mɔɔ meyɛ la, ɔluakɛ mele bɛtɛɛ, yɛɛ memmemaa me nwo zo, na bɛ ɛkɛla ne mɔ anwo kɛdɔ bɛ.

³⁰Ɔluakɛ me gyɛnvayile ne le felafela, yɛɛ bɔlɛ mɔɔ mebava meazoa bɛ la ɛnyɛ ɛnlomboɛ.”