Read Nzema Mat 12 Bible Online

Mat 12 - Nzema bible

Mat 12

¹ Mekɛ ekyi guale nu la, ɛnee Gyisɛse lua abɛlɛ ɛya bie anu wɔ Ɛnwomenlelielɛ Kenle ne. Ɛhɔne hunle ye ɛdoavolɛma ne, yemɔti bɛbubule bie bɛlile.

²Falasiima bie mɔ nwunle ɛhye la bɛzele Gyisɛse kɛ, “Nea, kɛ wɔ ɛdoavolɛma ne ɛlɛyɛ mɔɔ bɛnyɛ la wɔ Ɛnwomenlelielɛ Kenle ɛ; ɔtia yɛ mɛla ne!”

³ Gyisɛse buale bɛ kɛ, “Asoo bɛtɛkengale mɔɔ Devidi yɛle, wɔ mekɛ mɔɔ ɛnee ɛhɔne ɛlɛku ye nee ye menli mɔɔ ɔ nee bɛ lua la?

⁴ Se Devidi hɔle Nyamenle Sua ne anu na ɔhɔvale azu kpanwo ne bie ɔlile, wɔ mekɛ mɔɔ adenle ɛnla ɛkɛ kɛ awie di bie kyesɛ sɛlɛvolɛma ala la.

⁵ Anzɛɛ bɛtɛkengale ye wɔ Mosisi mɛla ne anu kɛ sɛlɛvolɛma mɔɔ wɔ Ɛzonlenlɛ Sua ne anu la to Ɛnwomenlelielɛ Kenle mɛla ne mekɛ biala, noko akee bɛnli fɔlɛ ɔ?

⁶Meka meahile bɛ, awie mɔɔ le kpole tɛla Ɛzonlenlɛ Sua ne la wɔ ɛke.

⁷ Nyamenle Edwɛkɛ ne se, ‘Mekpondɛ anwunvɔnezelɛ na tɛ nane azubɔlɛ ɔ.’ Saa bɛte ɛhye abo kpalɛ a, anrɛɛ bɛmbu bɛdabɛ mɔɔ bɛnze nwolɛ bie la fɔlɛ.

⁸Ɔluakɛ medame, Sonla Ra, melɛ tumi wɔ Ɛnwomenlelielɛ Kenle ne azo noko.”

⁹Gyisɛse vi ɛkɛ ne la, ɔhɔle bɛ nyianu sua ne anu.

¹⁰Nrenya bie wɔ ɛkɛ ne mɔɔ ɔ sa ko ɛdwe a. Menli bie noko bɛdabɛ bɛra ɛkɛ ne kɛ bɛtɛ Gyisɛse na bɛahɔdoa ye. Yemɔti bɛbizale ye kɛ, “Asoo ɔtia yɛ mɛla ne kɛ bɛkɛyɛ ayile wɔ Ɛnwomenlelielɛ Kenle?”

¹¹ Gyisɛse buale bɛ kɛ, “Bɛ nuhua boni yɛɛ saa ɔlɛ ye boane na ɔtɔ kuma nu Ɛnwomenlelielɛ Kenle a, ɔnrɛye ye a?

¹²Sonla noko sonle bolɛ tɛla nane! Yemɔti yɛ mɛla ne ɛndua kɛ yɛmmaboa awie wɔ Ɛnwomenlelielɛ Kenle.”

¹³Akee ɔzele nrenya ne kɛ, “Tenrɛ ɛ sa nu.” Nrenya ne denrɛle ɔ sa ne anu, na ɔyɛle kpalɛ kɛ ɔ sa ɛhendeɛ ne ala la.

¹⁴Yemɔti Falasiima ne vindele na bɛhɔbɔle kpɔkɛ kɛ bɛku Gyisɛse.

¹⁵Mɔɔ Gyisɛse nwunle kɛ bɛhɔ ɔ ti akpamo la, ɔvi ɛkɛ ne ɔyele ɔ nwo; na menli dɔɔnwo doale ye. Ɔyɛle bɛdabɛ mɔɔ bɛnde kpɔkɛ la ayile

¹⁶na ɔbɔle bɛ nloa kɛ bɛmmaka bɛmaa bɛte ye nganeɛ.

¹⁷Ɔyɛle ɛhye amaa mɔɔ Nyamenle kpɔmanvolɛ Ayezaya hanle la ayɛ nɔhalɛ kɛ:

¹⁸ “Bɛnlea, me sonvolɛ ne mɔɔ mekpa nu meye ye la ɛne, yemɔ a ɔle sonla mɔɔ mekulo ye na me nye die ɔ nwo a. Mebava me Sunsum meawula ye, na yeabɔ me ndɛnebualɛ ne nolo yeahile maanle maanle muala.

¹⁹Ɔnrɛzu kpolera, yɛɛ ɔnrɛdeɛdea nu; awie ɛnrɛde ɔ ne wɔ gua zo.

²⁰Ɔnrɛbu baka mɔɔ bɛkposo ye la, yɛɛ ɔnrɛgua nzule senle mɔɔ asɛɛ ɛnlu la anu, kɔkpula kɛ ɔkɛmaa pɛlepɛlelilɛ kɛli konim,

²¹na menli muala kɛnyia anyelazo wɔ ye nu.”

²²Menli bie vale nrenya bie mɔɔ sunsum ɛtane wɔ ɔ nwo na eza ɔle anyenzinliravolɛ nee mumule la rɛlɛle Gyisɛse. Gyisɛse yɛle ye ayile na nrenya ne dendɛle na ɔnwunle debie.

²³Ɛhye zinle menli ne anwo, na bɛbizale kɛ, “Asoo tɛ Devidi Ara ne ɛne?”

²⁴ Noko mɔɔ Falasiima ne dele ɛhye la bɛzele kɛ, “Mbɔnsam kpanyinli ne mɔɔ bɛfɛlɛ ye Biyɛlezɛbɛle la ala a maa ye tumi mɔɔ ɔfa ɔtu mbɔnsam a.”

²⁵Gyisɛse nwunle bɛ adwenle la, ɔzele bɛ kɛ, “Maanle biala mɔɔ anu kɛhyɛ nwiɔ na bɛko bɛtia bɛ nwo la ɛngyinla, yɛɛ sua anzɛɛ abusua biala mɔɔ anu kɛhyɛ nwiɔ na bɛko bɛtia bɛ nwo la ɛngyɛ na yeabɔ.

²⁶Yemɔti saa Seetan ɔdaye noko ye belemgbunlililɛ ne anu ɛhyɛ nwiɔ, na bɛlɛko bɛatia bɛ nwo a, ɛnee ɔkile kɛ ɔnrɛgyinla.

²⁷Na saa mame, medua Biyɛlezɛbɛle anwo zo a metu mbɔnsam a, ɛnee nwane anwo zo a bɛ ɛdoavolɛma ne dua tu bɛ a? Mɔɔ bɛdabɛ bɛ ɛdoavolɛma ne yɛ la kile kɛ bɛvo.

²⁸Na saa medua Nyamenle Sunsum ne tumi zo a metu mbɔnsam a, ɛnee noko Anwuma Belemgbunlililɛ ne ɛdwu bɛ nwo ɛke dɛbadɛba.

²⁹“Awie biala ɛnrɛhola ɛnrɛwolo sonla mɔɔ anwo yɛ se la sua nu ɛnrɛva ye ninyɛne mɔɔ ɔlɛ la, kyesɛ ɔdumua ɔkyekye ye na yeahola yeawua ye.

³⁰ “Awie biala mɔɔ ɛmboka me nwo la tia me, yɛɛ mɔɔ nee me ɛnguohua la sande nu.

³¹Zɔhane ati meka meahile bɛ, bɛbava ɛtane mɔɔ menli yɛ, nee mgbane mgbane mɔɔ bɛkeha la bɛahyɛ bɛ; na mɔɔ kɛha ɛtane kɛtia Sunsum Nwuanzanwuanza ne la, bɛnrɛva bɛnrɛhyɛ ye.

³² Awie biala mɔɔ tendɛ tia medame, Sonla Ra la, bɛbava bɛahyɛ ye, na mɔɔ kɛdendɛ kɛtia Sunsum Nwuanzanwuanza ne la, bɛnrɛva bɛnrɛhyɛ ye wɔ ɛnɛ anzɛɛ kenle bie.

³³ “Baka kpalɛ biala so ma kpalɛ, yɛɛ baka ɛtane biala so ma ɛtane. Baka ne ma a kile ye baka holɛ a.

³⁴ Bɛmɛ ɛkyelebenle mralɛ! Bɛnle kpalɛ la ati bɛngola bɛnga edwɛkɛ kpalɛ. Ɔluakɛ mɔɔ ɛyi ɛbulu zo wɔ bɛ ahonle ne mɔ anu la a finde bɛ nloa a.

³⁵Sonlakpalɛ biala yɛ debie kpalɛ, yɛɛ sonlatane biala yɛ ninyɛndane.

³⁶“Meka meahile bɛ: Edwɛkɛ mgbane mgbane biala mɔɔ awie biala kɛha la ɔbabu nwolɛ mgbonda wɔ Ndɛnebualɛ Kenle ne.

³⁷Ɔluakɛ Nyamenle balua bɛdabɛ bɛ nloa edwɛkɛ zo a yeabua bɛ benle anzɛɛ yeabua bɛ ewule fɔlɛ a.”

³⁸ Mɛla kilehilevolɛma bie mɔ nee Falasiima bie zele Gyisɛse kɛ, “Kilehilevolɛ, yɛkulo kɛ ɛyɛ nwanwane sɛkɛlɛneɛ bie ɛmaa yɛnea.”

³⁹ Gyisɛse buale bɛ kɛ, “Adwuleso amra ye le munzule menli, bɛnze Nyamenle! Bɛbiza bɛanlea nwanwane sɛkɛlɛneɛ? Bɛnrɛnwu bie, kyesɛ Nyamenle kpɔmanvolɛ Dwona ɛdeɛ ne ala.

⁴⁰ Kɛmɔ Dwona lile ewiazo nee nɔɔzo kenle nsa wɔ nyevizonle ne akunlu la, zɔhane ala yɛɛ medame, Sonla Ra, mebali ewiazo nee nɔɔzo kenle nsa wɔ azɛlɛ ti anu a.

⁴¹ Wɔ Ndɛnebualɛ Kenle ne Nenɛvɛma badwazo adoa bɛmɛ adwuleso amra, ɔboalekɛ Dwona edwɛkɛ ne manle bɛnlunle bɛ nwo; noko meka meahile bɛ, awie mɔɔ le kpole tɛla Dwona la wɔ ɛke!

⁴² Ndɛnebualɛ Kenle ne, Hyiba maanle nu belemgbunli raalɛ ne badwazo adoa bɛmɛ adwuleso amra, ɔboalekɛ ɔvi ye maanle nu wɔ nyiakɛ nehane ɔdiale dedee ɔradiele nrɛlɛbɛ ngilehilelɛ ɔvile Belemgbunli Sɔlɔmɔn ɛkɛ; noko meka meahile bɛ, awie mɔɔ le kpole tɛla Sɔlɔmɔn la wɔ ɛke!

⁴³“Saa sunsum ɛtane fi sonla nwo tu a, ɔkɔduolua ɛleka reresee kɛ ɔkpondɛ ɛleka yeabɔ ye nzeseɛ. Na saa yeannyia bie a,

⁴⁴ɔka ɔkile ɔ nwo kɛ, ‘Mesia meahɔ me sua dɛba ne mɔɔ mevi nu menvindele la anu.’ Ɔsia ɔba na ɔbanwu kɛ ɛhwee ɛnle nu, bɛkpoɔkpoa nu bɛyɛ nu bɔkɔbɔkɔ a,

⁴⁵akee ɔfinde na ɔkɔfa sunsum ɛtane nsuu mɔɔ le amumuyɛ tɛla ɔdaye mumua ne la ɔba na bɛbatɛnla ɛkɛ ne. Nzinlii sonla ɛhye akee sɛkye kpalɛ bɔkɔɔ tɛla alumua ne. Zɔhane ala yɛɛ ɔbazi adwuleso amra munzule anwo zo a.”

⁴⁶Mɔɔ Gyisɛse anloa wɔ zo ɔlɛtendɛ yeahile menli ne mɔ la, ɔ nli nee ɔ mediema mrenya ne mɔ rale alie nwo ɛkɛ ne na bɛhanle kɛ bɛkpondɛ ye bɛ nee ye adendɛ.

⁴⁷Yemɔti menli ne mɔ ko zele Gyisɛse kɛ, “Nea, ɛ nli nee ɛ mediema mrenya ne mɔ gyi alie nwo lɔ, na bɛkulo kɛ bɛ nee wɔ tendɛ.”

⁴⁸Gyisɛse buale kɛ, “Me nli a le nwane? Me mediema mrenya a le nwane mɔ?”

⁴⁹Akee ɔdendenle ɔ sa wɔ ye ɛdoavolɛma ne mɔ anwo na ɔhanle kɛ, “Bɛnlea, me nli nee me mediema ɛne.

⁵⁰Awie biala mɔɔ yɛ mɔɔ me Ze mɔɔ wɔ anwuma la kpondɛ la le me diema nrenya, me diema raalɛ, nee me nli.”