Read Nzema Mat 18 Bible Online

Mat 18 - Nzema bible

Mat 18

¹ Mekɛ ne anu ɛdoavolɛma ne rale Gyisɛse ɛkɛ rabizale ye kɛ, “Nwane a le kpole kpalɛ wɔ Anwuma Belemgbunlililɛ nu a?”

²Gyisɛse vɛlɛle kakula ko na ɔmanle ɔragyinlanle bɛ nyunlu ɛkɛ ne,

³ na ɔzele bɛ kɛ, “Bɛhakye ɛhye! Kyesɛ bɛkakyi bɛ nyɛleɛ na bɛyɛ kɛ ngakula la, anrɛɛ bɛnrɛnwu Anwuma Belemgbunlililɛ ne ɛlɛ.

⁴Mɔɔ le kpole kpalɛ wɔ Anwuma Belemgbunlililɛ nu la a le sonla ne mɔɔ bɛlɛ ɔ nwo aze na ɔyɛ kɛ kakula ɛhye la.

⁵Awie biala mɔɔ kɛlie kakula zɛhae ko wɔ me duma nu la, ɛlie medame noko.

⁶“Awie ko biala mɔɔ kɛmaa ngakula ɛhye mɔ anu ko kɛgyakyi ye diedi mɔɔ ɔlɛ ye wɔ me nu la anu na ɔkɛkpo aze la, ɛnee noko ɔle kpalɛ kɛ anrɛɛ bɛdwele ɛdibolɛ ɛlomboɛ kpalɛ bɛhendanle ɔ kɔme na bɛhɔdole ye nyevile kɔme zo lɔ.

⁷Munzule ɛha aleɛabo amra kɛ ninyɛne mɔɔ maa sonla diedi kakyi la dɔɔnwo wɔ ewiade ye anu a! Kɛ ɔkɛyɛ biala la, zɛhae ngyegyelɛ ne mɔ bara, noko sonla ne mɔɔ ɔkɛlua ɔ nwo zo ɔkɛra la, ye gyakɔ!

⁸ “Saa ɛ sa anzɛɛ ɛ gyakɛ gyegye wɔ yeamaa wɔaminli wɔ diedi a, pɛ ye to! Ɔle kpalɛ kɛ ɛ sa anzɛɛ ɛ gyakɛ kɛyɛ sinli na ɛkɛnyia ngoane mɔɔ ɛnlɛ awieleɛ tɛla kɛ ɛ sa nwiɔ anzɛɛ ɛ gyakɛ nwiɔ na bɛkɛhɔdo wɔ senle ne mɔɔ ɛnnu ɛlɛ la anu a.

⁹ Saa ɛ nye ko a gyegye wɔ yeamaa wɔaminli wɔ diedi a, tu ye to! Ɔle kpalɛ kɛ ɛ nye ko na ɛkɛnyia ngoane mɔɔ ɛnlɛ awieleɛ tɛla kɛ ɛ nye nwiɔ na bɛkɛhɔdo wɔ senle ne mɔɔ ɛnnu ɛlɛ la anu a.

¹⁰“Bɛnlea na bɛambu ngakula ɛhye mɔ anu biala, kɛ ɔle mgbane, ɔluakɛ anwuma lɔ, bɛ soanvolɛma nwu Egya mɔɔ wɔ anwuma la anyunlu dahuu. [

¹¹“Ɔluakɛ medame Sonla Ra, membale kɛ mebalie bɛdabɛ mɔɔ bɛminli la ngoane.][8]

¹²“Na duzu a bɛdwenle kɛ awie mɔɔ lɛ mboane ɛya ko na nuhua ko kɛminli la kɛyɛ a? Ɔgyakyi abulahɔnla nee ngɔnla ne wɔ bɛ adidileka ne na ɔkɔkpondɛ ko ne mɔɔ ɛminli la.

¹³Mese, saa ɔnwu ye a, ɔdi fɛlɛko kpole wɔ nwo ɔtɛla abulahɔnla nee ngɔnla ne mɔɔ bɛamminli la.

¹⁴“Zɔhane ala noko yɛɛ bɛ Ze mɔɔ wɔ anwuma la ɛmkpondɛ kɛ ngakula ɛhye mɔ anu ko minli a.

¹⁵ “Saa ɛ diema bie fo wɔ a, kɔ na ɛ nee ye bɛ mu nwiɔ bɛhɔha na kile ye deɛ mɔɔ yemɔti yevo la. Saa ɔtie wɔ edwɛkɛ a ɛnee ɛ sa ɛha ɛ diema ne.

¹⁶ Saa yeamkponle a, fa sonla ko anzɛɛ menli nwiɔ boka ɛ nwo, amaa saa edwɛkɛ bie a menli nwiɔ ne anzɛɛ nsa ne ali wɔ daselɛ, kɛmɔ Nyamenle Edwɛkɛ ne se la.

¹⁷Saa yeandie bɛ edwɛkɛ a, ka kile asɔnema amuala. Eza saa ɔnrɛdie asɔnema amuala noko edwɛkɛ a, ɛnee fa ye kɛ ɔnze Nyamenle anzɛɛ ɔle kɛ adwuledievolɛ la.

¹⁸ “Nɔhalɛ, meka meahile bɛ: Debie biala mɔɔ bɛkɛkyekye ye wɔ azɛlɛ ye azo la bɛkɛkyekye ye wɔ anwuma lɔ, yɛɛ debie biala mɔɔ bɛkɛtulu ye wɔ azɛlɛ ye azo la bɛkɛtulu ye wɔ anwuma lɔ.

¹⁹“Eza meka meahile bɛ: Saa bɛ nuhua nwiɔ yɛ ko wɔ azɛlɛ ye azo na bɛbɔ nu bɛsɛlɛ debie ko anwo a, Egya mɔɔ wɔ anwuma la kɛyɛ kɛmaa bɛ.

²⁰Ɔluakɛ ɛleka biala mɔɔ menli nwiɔ anzɛɛ nsa kɛyia nu wɔ me duma nu la, ɛnee mewɔ bɛ avinli ɛkɛ ne bie.”

²¹ Akee Pita hɔle Gyisɛse anwo ɛkɛ hɔbizale ye kɛ, “Awulae, fane nyɛ yɛɛ me diema fo me a menva mengyɛ ye a? Fane nsuu, anzɛɛ...?”

²²Gyisɛse buale ye kɛ, “Kyɛkyɛ, tɛ fane nsuu, na abulasuu fane nsuu.

²³Zɔhane ati bɛbava Anwuma Belemgbunlililɛ ne bɛado belemgbunli bie mɔɔ yɛle kɛ ɔ nee ye sonvolɛma bu mgbonda la anwo.

²⁴Mekɛ mɔɔ bɛhɔle mgbondabulɛ ne azo la, bɛvale ko mɔɔ tua ye kakɛ nzunza apenle nsa la bɛrale.

²⁵Sonvolɛ ɛhye ɛnlɛ bie, yemɔti yeannyia bie yeandua kakɛ ne bie. Na ɔ menle ne zele kɛ bɛhɔdɔne ɔdaye sonvolɛ mumua ne nee ɔ ye nee ɔ mra kɛ ahanra, na bɛdɔne ye ninyɛne mɔɔ ɔlɛ la kɔsɔɔti bɛdua ye kakɛ ne.

²⁶Sonvolɛ ne dule dɔle ɔ menle ne agyakɛ anu na ɔzɛlɛle ye kɛ, ‘Yɛmenle, nyia me nwo abotane na mebadua wɔ ezukoa ne amuala!’

²⁷Alɔbɔlɛ hanle belemgbunli ne na ɔgyakyile ye ɔmanle ɔhɔle, ɔvale ye kakɛ ne amuala ɔhyɛle ye.

²⁸“Sonvolɛ ne vindele la, ɔnwunle ɔ gɔnwo sonvolɛ ko noko mɔɔ tua ye kakɛ etaku nna nna ɛya ko la. Ɔhɔzɔle ɔ kɔmenzia na ɔzele ye kɛ, ‘Tua me ezukoa ne maa me!’

²⁹Ɔ gɔnwo sonvolɛ ne ɔdaye ɔdule ɔdɔle ɔ gyakɛ anu ɛkɛ ne na ɔzɛlɛle ye kɛ, ‘Ayi, nyia me nwo abotane na mebadua ɔ muala meamaa wɔ!’

³⁰Noko yeamkponle; ɔhyele ye ɔhɔdole efiade kɔkpula kɛ ɔkɛdua kakɛ ne amuala la.

³¹Mɔɔ ɔ gɔnwo sonvolɛma ne mɔ nwunle mɔɔ yeyɛ la nyane hanle bɛ, na bɛrale bɛrahanle edwɛkɛ mɔɔ zile la bɛhilele belemgbunli ne.

³²Belemgbunli ne vɛlɛle ye na ɔzele ye kɛ, ‘Ɛdawɔ akɛlɛ ɛhye, ɛ ti mɔɔ zo wɔ la yɛ se kpalɛ! Ɛbodole me la, mame menvale wɔ kakɛ ne amuala mengyɛle wɔ.

³³Anrɛɛ ɛnee ɔwɔ kɛ ɛdawɔ noko ɛnwu ɛ gɔnwo sonvolɛ ne anwunvɔne, kɛmɔ menzele wɔ anwunvɔne la.’

³⁴Belemgbunli ne vale ɛya kpole na ɔmanle bɛhɔdole ye efiade kɛ bɛdea ye kɔkpula mekɛ mɔɔ ɔkɛdua ye kakɛ ne amuala la.”

³⁵Na Gyisɛse dwulale ye edwɛkɛ ne kɛ, “Zɔhane ala yɛɛ saa bɛdabɛ noko bɛanyeye bɛ ahonle nu bɛanva bɛ gɔnwo mɔ anwo edwɛkɛ bɛangyɛ bɛ a Egya mɔɔ wɔ anwuma la bayɛ bɛ nuhua ko biala a.”