Read Nzema Mat 20 Bible Online

Mat 20 - Nzema bible

Mat 20

¹Gyisɛse vale zɔle zolɛ kɛ, “Kɛ Anwuma Belemgbunlililɛ ne de la a le ɛhye: Kenle ko nwonlomɔ nrenya bie vindele kɛ ɔkabɔ menli ɛkpa yeamaa bɛahɔyɛ gyima wɔ ye vanye egyinli nu.

²Ɔ nee bɛ lile ɔ nloa kɛ kenle ko ɔkɛdua bɛ etaku nna, na ɔmanle bɛhɔle ye egyinli ne anu.

³Ɔvindele bieko kɛyɛ dɔne ngɔnla mekɛ ne anu na ɔhɔnwunle kɛ awie mɔ gyigyi ye mgbovonle nu wɔ gua ne anu.

⁴Na ɔzele bɛ kɛ, ‘Bɛdabɛ noko bɛhɔ me vanye egyinli ne anu bɛhɔyɛ gyima na menwɔdua bɛ kakɛ mɔɔ fɛta la.’

⁵Na bɛhɔle. Eza bɛbɔle dɔne bulu nee nwiɔ nee dɔne nsa la ɔvindele na ɔhɔyɛle zɔhane ala.

⁶Mɔɔ ɔka ekyii bɛbɔ dɔne nnu la ɔvindele bieko ɔhɔle gua ne azo na ɔnwunle awie mɔ kɛ bɛgyigyi ɛkɛ ne. Ɔbizale bɛ kɛ, ‘Duzu ati a aleɛ bedevinli ye mɔɔ ɛhye la bɛgyigyi ye mgbovonle nu zɛhae ɛ?’

⁷Bɛbuale ye kɛ, ‘Ɔboalekɛ awie biala ɛtɛbɔle yɛ ɛkpa.’ Na ɔzele bɛ kɛ, ‘Ɛnee bɛdabɛ noko bɛhɔyɛ gyima wɔ me vanye egyinli ne anu.’

⁸ “Mɔɔ aleɛ ne yɛle nɔsolɛ la, egyinli menle ne zele ye sonvolɛ kpanyinli ne kɛ, ‘Fɛlɛ gyimayɛvoma ne na tua bɛ kakɛ, bɔ ɔ bo fi amozi amra anwo zo kɔkpula alumuama anwo zo.’

⁹Yemɔti bɛdabɛ mɔɔ bɛbɔle gyima ne abo dɔne nnu la biala nyianle ahatualɛ etaku nna.

¹⁰Mɔɔ alumuama rale la, bɛdwenlenle kɛ bɛkɛnyia ahatualɛ kpole; na bɛdabɛ bɛnyianle etaku nna nna.

¹¹Bɛduale bɛ kakɛ bɛwiele la, bɛdendɛle bɛ nzo abo bɛtiale egyinli menle ne kɛ,

¹²‘Amozi amra mɔɔ yɛle gyima dɔnehwele kokye la wɔmaa bɛ nee yɛdayɛ mɔɔ alehyenlɛ ye anu yɛyɛ gyima dɔɔnwo na ewia ɛbɔ yɛ dedee la ɛzɛ ahatualɛ!’

¹³“Na egyinli menle ne buale bɛ nuhua ko kɛ, ‘Ayi, metɛsisile wɔ; wɔamkponle zolɛ kɛ ɛkɛlie kenle ko etaku nna ɔ?

¹⁴Wɔmɔ die wɔ ahatualɛ ne na kɔ sua nu. Mekola metua amozi amra kakɛ ko ne ala, kɛmɔ menduale wɔ la.

¹⁵Ɛkpondɛ wɔaze kɛ menlɛ adenle kɛ mefa me ezukoa meyɛ mɔɔ medame mekulo la ɔ? Anzɛɛ ɔyɛ wɔ anyebolo kɛ me ti akunlu le kpalɛ la ɔ?’ ”

¹⁶ Na Gyisɛse dwulale ye edwɛkɛ ne zɛhae, “Yemɔti amozi amra balumua, na alumuama ali amozi.”

¹⁷Gyisɛse kɔ Gyɛlusalɛm la, ɔvɛlɛle ye ɛdoavolɛma ne ahane na mɔɔ ɛnee bɛ gyakɛ wɔ zo la, ɔzele bɛ kɛ,

¹⁸“Bɛdie, yɛlɛkɔ Gyɛlusalɛm. Ɛkɛ ne, bɛbaye medame Sonla Ra bɛamaa sɛlɛvolɛ mgbanyinli nee mɛla kilehilevolɛma ne mɔ. Bɛbabua me ewule fɔlɛ,

¹⁹na bɛava me bɛawula menli mɔɔ ɛnle Dwuuma la asa anu. Bɛdabɛ noko bɛbazi me amgbu, bɛabila me empele, na bɛabɔ me meanubaka nu bɛahu me; na ye kenle nsa ne azo bɛbadwazo me bɛara ngoane nu.”

²⁰Akee Zɛbɛdi aye ne nee ɔ mra mrenya nwiɔ ne rale Gyisɛse ɛkɛ, na ɔrahotole ɔ nyunlu ɛkɛ ne kɛ ɔsɛlɛ ye debie.

²¹Gyisɛse bizale ye kɛ, “Duzu a ɛkpondɛ a?” Ɔbuale kɛ, “Bɔ me ɛwɔkɛ kɛ saa ɛdi wɔ belemgbunli ne a me mra mrenya nwiɔ ye, ko kɛdɛnla wɔ fema zo na ko noko adɛnla wɔ bɛne zo.”

²²Gyisɛse buale kɛ, “Bɛnze mɔɔ bɛlɛbiza bɛalie la. Asoo amaneɛnwunlɛ dwora ne mɔɔ mebanlo nu la, bɛkɛhola nu no?” Bɛbuale kɛ, “Yɛkɛhola.”

²³Gyisɛse zele bɛ kɛ, “Nɔhalɛ, bɛkɛhola bɛkɛnlo amaneɛnwunlɛ dwora ne mɔɔ mebanlo nu la anu, noko tɛ me a meye sonla mɔɔ badɛnla me fema zo anzɛɛ me bɛne zo la a, ɔluakɛ ɛleka zɔhane mɔ le menli mɔɔ Egya ɛziezie ɛmaa bɛ la ɛdeɛ.”

²⁴Mɔɔ ɛdoavolɛma bulu ne mɔɔ ɛha la dele ɛhye la, bɛvale ɛya.

²⁵ Yemɔti Gyisɛse vɛlɛle bɛ muala wɔ ɔ nwo ɛkɛ na ɔzele bɛ kɛ, “Bɛze kɛ maanle maanle arelemgbunli si yɛ bɛ menli kpɔdekpɔde la, yɛɛ kɛ bɛ mgbanyima si di bɛ nwo zo tumi la.

²⁶ Na bɛmɛ, ɛhye ɛmbɔnle bɛ nwo. Saa bɛ nuhua bie kpondɛ kɛ ɔyɛ kpole wɔ bɛ nu a, ɛnee ɔyɛ sonvolɛ ɔmaa mɔɔ ɛha la;

²⁷yɛɛ saa bɛ nuhua bie kpondɛ kɛ ɔdi bɛ ti a ɛnee ɔyɛ bɛ akɛlɛ;

²⁸ɔluakɛ medame Sonla Ra bɔbɔ, meamba kɛ bɛzonle me; membale kɛ mebazonle, na meava me ngoane meayɛ ɛkpɔnedeɛ meamaa menli dɔɔnwo.”

²⁹Mɔɔ bɛvi Gyɛleko bɛkɔ la, menli dɔɔnwo kpalɛ doale Gyisɛse.

³⁰Anyenzinliravolɛma nwiɔ mɔɔ ɛnee dede adehane ne la dele kɛ Gyisɛse ɛlɛpɛ nu, na bɛbɔle ɔ bo kɛ bɛteɛdea nuhua kɛ, “Devidi Ara, nwu yɛ anwunvɔne!”

³¹Menli ne dendɛle bɛ na bɛzele bɛ kɛ bɛyɛ koonwu. Noko anyenzinliravolɛma ne deɛdeanle nuhua kpalɛ kɛ, “Devidi Ara, nwu yɛ anwunvɔne!”

³²Gyisɛse gyinlanle, ɔvɛlɛle bɛ na ɔbizale bɛ kɛ, “Duzu a bɛkulo kɛ meyɛ memaa bɛ a?”

³³Bɛbuale kɛ, “Yɛmenle, yɛkulo kɛ ɛbuke yɛ nye ɛmaa yɛnwu debie.”

³⁴Gyisɛse nwunle bɛ anwunvɔne na ɔvale ɔ sa ɔhehanle bɛ nye ne mɔ, na ɛkɛ ne ala bɛ nye ne mɔ bukebukele manle bɛnwunle debie, na bɛdoale ye.