Read Nzema Mat 22 Bible Online

Mat 22 - Nzema bible

Mat 22

¹Eza Gyisɛse bule bɛ ɛrɛlɛ ɛhye, ɔse,

²“Anwuma Belemgbunlililɛ ne le kɛ belemgbunli bie mɔɔ liele atɔfolɛ manle ɔ ra nrenya la.

³Ɔzoanle ye sonvolɛma kɛ bɛhɔvɛlɛvɛlɛ bɛdabɛ mɔɔ ɔdole ɛsalɛ ɔvɛlɛle bɛ la kɛ bɛrɛla atɔfolɛlielɛ ne abo, na bɛamba.

⁴Eza ɔzoanle sonvolɛma fofolɛ na ɔzele bɛ kɛ bɛze menli mɔɔ yeyieyia bɛ la kɛ, ‘Medo me aleɛ ne mewie, mehu me nlankɛ nee me nane mɔɔ ɛlɔ la mewie; bɛwie debie biala siezie na bɛrɛla atɔfolɛlielɛ ne abo.’

⁵Na bɛbule bɛ nye bɛguale zolɛ na bɛhɔle bɛ gyima: bie hɔle ye ɛya nu, yɛɛ bie hɔle ye gualilɛ,

⁶bɛdabɛ mɔɔ bɛhale la, bɛhyele sonvolɛma ne mɔ bɛzale bɛ na bɛhunle bɛ.

⁷Mɔɔ belemgbunli ne dele ɛhye la ɔvale ɛya, ɔzoanle ye ɛlɔnema ɔmanle bɛhɔhunle ahɔdiawu ne mɔ na bɛyelale bɛ suakpole ne.

⁸Akee ɔzele ye sonvolɛma ne kɛ, ‘Bɛwie atɔfolɛ aleɛ ye siezie, noko bɛdabɛ mɔɔ bɛyieyiale bɛ la anwo anfɛta.

⁹Yemɔti bɛhɔ awɔdenle ne mɔ azo na menli dɔɔnwo biala mɔɔ bɛkɛnwu bɛ la bɛvɛlɛ bɛ muala bɛmaa bɛrɛla atɔfolɛlielɛ ye abo.’

¹⁰Zɔhane ati sonvolɛma ne hɔle awɔdenle ne mɔ azo hɔsesale bɛdabɛ mɔɔ bɛnwunle bɛ la kɔsɔɔti, menli mɔɔ le kpalɛ nee bɛdabɛ mɔɔ bɛnle kpalɛ la amuala, na bɛvale bɛ bɛrayile atɔfolɛlielɛ sua ne tɛkɛɛ.

¹¹“Akee belemgbunli ne hɔle sua ne anu kɛ ɔkanlea ye nyɛvolɛ ne mɔ, na ɔnwunle kɛ nrenya ko wɔ nu mɔɔ ɔnwula atɔfolɛlielɛ tɛladeɛ ne mɔɔ belemgbunli ne ɛva ɛmaa ye nyɛvolɛ ne mɔ la bie a.

¹²Na ɔbizale ye kɛ, ‘Ayi, kɛ ɛzile ɛrale ɛke, mɔɔ ɛnwula atɔfolɛlielɛ tɛladeɛ ye bie ɛ?’ Na nrenya ne andɛ ɔ nloa anu.

¹³ Belemgbunli ne zele ye sonvolɛma ne kɛ, ‘Bɛkyekye ɔ sa nee ɔ gyakɛ, na bɛva ye bɛhɔdo alie nwo lɔ awozinli kpole ne anu. Ɛkɛ ne yɛɛ menli bazu na bɛadedɛ bɛ nwo bonrane nu a.’ ”

¹⁴Na Gyisɛse dwulale ye edwɛkɛ ne kɛ, “Bɛvɛlɛ dɔɔnwo, na ekyi bie a bɛva bɛ a.”

¹⁵Falasiima ne hɔle Gyisɛse ati akpamo kɛ bɛdua kpuyia ɛbizalɛ zo bɛahye ye.

¹⁶Yemɔti bɛzoanle bɛ ɛdoavolɛma ne bie mɔ nee belemgbunli Hɛlɔdo asa zo ne mɔ bie wɔ Gyisɛse anwo ɛkɛ na bɛhɔbizale ye kɛ, “Kilehilevolɛ, yɛze kɛ wɔmɔ ɛka nɔhalɛ. Ɛkilehile Nyamenle adenle ne nɔhalɛ nu mɔɔ ɛndwenle mɔɔ menli ka la anwo a, ɔboalekɛ ɛnnea sonla nyunlu.

¹⁷Zɔhane ati yɛbiza wɔ, kɛ ɛdwenle ɛhye anwo ɛ? Asoo ɔfa yɛ mɛla ne adenle zo kɛ yɛkɛdua adwule yɛkɛmaa Wulomu Maanle Maanle Belemgbunli ne?”

¹⁸Na Gyisɛse nwunle bɛ nwulowula ne, na ɔzele bɛ kɛ, “Bɛmɛ nabalabama, duzu ati a bɛsɔ me bɛanlea ɛ?

¹⁹Bɛva ezukoa ne mɔɔ bɛfa bɛtua adwule ne la bie bɛmaa menea.” Bɛvale bie bɛmanle ye;

²⁰na ɔbizale bɛ kɛ, “Nwane nvoninli nee ye duma a le ɛhye?”

²¹Bɛzele kɛ, “Siza[13] ɔ.” Gyisɛse zele bɛ kɛ, “Ɛnee bɛva mɔɔ le Siza ɛdeɛ la bɛmaa ye ɛ, na bɛva mɔɔ le Nyamenle ɛdeɛ noko la bɛmaa ye.”

²²Bɛdele ɛhye la ɔzinle bɛ nwo, na bɛgyakyile ye bɛhɔle.

²³ Kenle ko ne ala Sadusiima bie rale Gyisɛse anwo ɛkɛ ne. (Sadusiima le menli bie mɔɔ ɛnlie ewudwazo ne ɛnli a.)

²⁴ Bɛrabizale Gyisɛse kɛ, “Kilehilevolɛ, Mosisi kile kɛ, ‘Saa nrenya wu na ɔgyakyi ɔ ye mɔɔ ɔ nee ye anwo la a, ɔwɔ kɛ ɔ diema nrenya gya kunlanvolɛ ne na ɔwo mralɛ ɔmaa ɔ diema ne mɔɔ ɛwu la.’

²⁵Mediema mrenya nsuu bie woale ɛkɛ. Bɛ nuhua kpanyinli ne gyale raalɛ na ɔ nee ye anwo yɛɛ ɔwule a, yemɔti ɔgyakyile kunlanvolɛ ne ɔmanle ɔ diema.

²⁶Na mɔɔ zile alumua ɛdeɛ ne anwo zo la yɛɛ zile mɔɔ tɔ zo nwiɔ ne nee nsa ne, toonwo ɔhɔdwule nsuu ne anwo zo a. Bɛ muala bɛwule; bɛ biala nee raalɛ ne anwo.

²⁷Nzinlii raalɛ ne ɔdaye ɔwule.

²⁸Ɛnee ewudwazo mekɛ ne, boni a raalɛ ne kɛyɛ ɔ ye a? Bɛdabɛ nsuu ne amuala bɛgyale ye bie.”

²⁹Gyisɛse buale bɛ kɛ, “Bɛvo kpole! Ɔboalekɛ bɛnze Nyamenle Edwɛkɛ ne anzɛɛ Nyamenle tumi ne kɛ si de la.

³⁰Ɔluakɛ ewudwazo mekɛ ne anu, bɛbayɛ kɛ anwuma soanvolɛma la, agyalɛ ɛnle ɛkɛ.

³¹Bɛtɛkengale mɔɔ Nyamenle ɛha, mɔɔ fane mɔwuamra ɛdwazolɛ nwo la ɛlɛ ɔ? Ɔse,

³² ‘Mame a mele Ebileham Nyamenle ne, Ayezeke Nyamenle ne, nee Gyekɔbo Nyamenle ne a.’ Ɛhye kile kɛ ɔle teasema Nyamenle, na ɔnle mɔwuamra Nyamenle.”

³³Mɔɔ menli dɔɔnwo ne dele Gyisɛse ngilehilelɛ ɛhye la, ɔyɛle bɛ nwanwane.

³⁴Mɔɔ Falasiima ne dele kɛ Gyisɛse ɛmaa Sadusiima ne ɛha bɛ nloa ɛdo nu la, bɛdabɛ bɛlile bɛ nloa bɛrayiale ye.

³⁵ Bɛ nuhua ko mɔɔ le mɛla kilehilevolɛ la zɔle ye nleanle na ɔbizale ye kɛ,

³⁶“Kilehilevolɛ, Mɛla ne boni a le titile kpalɛ kpalɛ a?”

³⁷ Gyisɛse buale ye kɛ, “Fa wɔ ahonle muala, wɔ ɛkɛla muala, nee wɔ adwenle muala kulo Awulae wɔ Nyamenle ne.

³⁸Ɛhye a le mɛla titile kpalɛ mɔɔ hyia a.

³⁹ Mɔɔ tɔ zo nwiɔ la le kɛ ɛhendeɛ ne la, ɔse: Kulo ɛ gɔnwo kɛ ɛdawɔ ɛ nwo la.

⁴⁰Mɛla nwiɔ ye azo yɛɛ Mosisi mɛla ne kpokpoti nee Nyamenle kpɔmanvolɛma ngilehilelɛ ne mɔ amuala gyi a.”

⁴¹Mɔɔ Falasiima ne wiele yia la, Gyisɛse bizale bɛ kɛ,

⁴²“Kɛ bɛsi bɛdwenle Mɛzaya ne anwo ɛ? Nwane dehelɛ ɔ?” Bɛbuale kɛ, “Devidi dehelɛ ɔ.”

⁴³Ɔbizale bɛ kɛ, “Ɛnee akee kɛ ɔyɛle mɔɔ Sunsum ne manle Devidi vɛlɛle ye ‘Awulae’ ɛ? Ɔluakɛ Devidi hanle kɛ,

⁴⁴ ‘Awulae zele me Awulae kɛ: Tɛnla me sa fema zo ɛke, kɔkpula kɛ menwɔva wɔ kpɔvolɛma menwɔwula ɛ gyakɛ abo.’

⁴⁵Na saa Devidi vɛlɛle ye ‘Awulae’ a, ɛnee kɛ Mɛzaya ne si yɛ Devidi dehelɛ ɛ?”

⁴⁶Awie biala angola ɔ nloa ye, na ɔvi kenle ko ne awie biala angola anzi ye ɛbolɛ ambiza ye edwɛkɛ bieko.