Read Nzema Mat 28 Bible Online

Mat 28 - Nzema bible

Mat 28

¹Ɛnwomenlelielɛ Kenle ne anzi, mɔɔ le Molɛ aleɛbahye ne, Mɛle mɔɔ vi Magedala la nee Mɛle ko ne hɔle sɛka ne azo.

²Kenle ko ne nɔe ne, azɛlɛ kpusule kpole bie, ɔluakɛ Awulae soanvolɛ dwule aze rahundole bolɛ ne wɔ nla ne anloa na ɔdɛnlanle zolɛ.

³Ye ɛralɛ ne yɛle kɛ ɛsɛnlɛmanye mɔɔ ɛkpakye la, na ye tɛladeɛ ne dale nwohyee kɛ ezukɔtweaba.

⁴Sinzavolɛma ne zulole kpole, bɛ nwo wozole bɛ na bɛyɛle kɛ menli mɔɔ ɛwu la.

⁵Na Nyamenle soanvolɛ ne zele mraalɛ ne mɔ kɛ, “Bɛmmasulo, meze kɛ bɛkpondɛ Gyisɛse mɔɔ bɛbɔle ye meanubaka nu la.

⁶Ɔnle ɛke; bɛdwazo ye bɛvi ewule nu, kɛmɔ ɔhanle la. Bɛrɛla bɛranlea ɛleka mɔɔ ɔlale la.

⁷Bɛmaa ɔyɛ ndɛ bɛhɔze ye ɛdoavolɛma ne kɛ bɛdwazo ye bɛvi ewule nu, na kɛkala, yelumua bɛ nyunlu wɔ Galeli; ɛkɛ ne yɛɛ bɛkɛnwu ye a! Bɛhakye mɔɔ meha mehile bɛ la.”

⁸Yemɔti ndɛndɛ ne ala bɛvale ɛzulolɛ nee fɛlɛkolilɛ bɛvile sɛka ne azo bɛhɔle, na bɛvale ɛnriandilɛ kɛ bɛkabɔ Gyisɛse ɛdoavolɛma ne amaneɛ.

⁹Arɛlevilɛ nu ala Gyisɛse nee bɛ yiale adenle ne anu na ɔzele bɛ kɛ, “Anzonudwolɛ ɛha bɛ.” Bɛrale ɔ nwo ɛkɛ ne, bɛzɔle ɔ gyakɛ na bɛzonlenle ye.

¹⁰Gyisɛse zele bɛ kɛ, “Bɛmmasulo; bɛhɔze me mediema ne mɔ kɛ bɛhɔ Galeli, na ɛkɛ ne yɛɛ bɛkɛnwu me a.”

¹¹Mɔɔ mraalɛ ne mɔ kadwu la ɛnee sogyama ne mɔɔ zinzale sɛka ne la bie mɔ ɛdwu sua zo dɛbadɛba ɛraha mɔɔ ɛzi la amuala ɛhile sɛlɛvolɛ mgbanyinli ne mɔ.

¹²Sɛlɛvolɛ mgbanyinli ne mɔ noko yiale mgbanyima ne na bɛyɛle ngyehyɛlɛ bɛvale ezukoa kpole bie bɛmanle sogyama ne

¹³na bɛzele bɛ kɛ; “Bɛha ye kɛ, ‘Nɔe ne mɔɔ ɛnee yɛlafe la yɛɛ Gyisɛse ɛdoavolɛma ne rawuale ye funli ne a.’

¹⁴Na saa amɛnlado ne te a yɛkɛhɔnwu ye na awie biala ɛnrɛgyegye bɛ.”

¹⁵Sinzavolɛma ne liele ezukoa ne na bɛyɛle mɔɔ bɛhanle bɛhilele bɛ la. Yemɔti toonwo mɔɔ yeradwu ɛnɛ la, edwɛkɛ mɔɔ Dwuuma ɛva ɛkponde la ɛne.

¹⁶ Ɛdoavolɛma bulu nee ko ne hɔle Galeli wɔ boka bie mɔɔ Gyisɛse ɛhile bɛ la azo.

¹⁷Na mɔɔ bɛnwunle ye la bɛzonlenle ye; noko ɛnee bɔbɔ nuhua bie mɔ adwenle ɛngya.

¹⁸Gyisɛse bikyele bɛ na ɔzele bɛ kɛ, “Bɛva tumi muala mɔɔ wɔ anwuma nee aze la bɛmaa me.

¹⁹ Yemɔti bɛhɔ maanle ti nee maanle bo, bɛmaa menli ɛrayɛ me ɛdoavolɛma; bɛzɔne bɛ wɔ Selɛ ne, Ralɛ ne nee Sunsum Nwuanzanwuanza ne duma nu,

²⁰na bɛhilehile bɛ bɛmaa bɛli debie biala mɔɔ meha mehile bɛ la azo. Na bɛhakye kɛ me nee bɛ lua dahuu, kɔkpula ewiade awieleɛ.”