Read Nzema Mat 4 Bible Online

Mat 4 - Nzema bible

Mat 4

¹ Akee Sunsum ne vale Gyisɛse hɔle fienemgbole ne anu kɛ abɔnsam ɛzɔ ye ɛnlea.

²Gyisɛse hyele ɛhɔne alehyenlɛ nee aledwolɛ kenle abulanla na ɛhɔne hunle ye.

³Abɔnsam bikyele ye na ɔzele ye kɛ, “Saa wɔmɔ a ɛle Nyamenle Ara ne a, ɛnee maa awolɛ ɛhye mɔ ɛhakyi kpanwo.”

⁴ Gyisɛse buale kɛ, “Bɛhɛlɛ ye kɛ, ‘Tɛ aleɛ ngome a sonla di a ɔnyia ngoane a, na Nyamenle anloa edwɛkɛ biala maa ngoane.’ ”

⁵Abɔnsam vale Gyisɛse hɔle suakpole nwuanzanwuanza Gyɛlusalɛm azo, ɔvale ye ɔziele Ɛzonlenlɛ Sua ne ati zo twɔɔnwo ne azo anwuma,

⁶ na ɔzele ye kɛ, “Saa wɔmɔ a ɛle Nyamenle Ara ne a, ɛnee gyakyi ɛ nwo te aze, ɔluakɛ bɛhɛlɛ ye kɛ, ‘Nyamenle bamaa ye anwuma soanvolɛma arabɔ ayia wɔ, bɛbazɔ wɔ bɛ sa nu gyɛlɛɛnye, amaa ɛ gyakɛ amkpula bolɛ.’ ”

⁷ Gyisɛse buale ye kɛ, “Eza bɛhɛlɛ kɛ, ‘Mmasɔ Awulae wɔ Nyamenle ne ɛnea.’ ”

⁸Eza abɔnsam vale Gyisɛse hɔle boka tendenle bie azo na ɔvale aleɛabo arelemgbunli maanle maanle ne mɔ amuala nee bɛ anyunlunyia ɔhilele ye,

⁹na ɔzele ye kɛ, “Saa ɛkoto me, ɛsonle me a, menwɔva ɛhye mɔ amuala menwɔmaa wɔ.”

¹⁰ Gyisɛse buale kɛ, “Seetan, dwazo ɛkɛ ne kɔ! Ɔluakɛ bɛhɛlɛ kɛ, ‘Yeyɛ Awulae wɔ Nyamenle ne na sonle ɔdaye ɔ ngome ala!’ ”

¹¹Abɔnsam akee gyakyile Gyisɛse hɔle, na nea, Nyamenle soanvolɛma raboale ye.

¹² Mɔɔ Gyisɛse dele kɛ bɛhye Dwɔn la ɔhwenle ɔ nwo ɔhɔle Galeli.

¹³ Yeandɛnla Nazalɛte na ɔhɔdɛnlanle Kapɛnayɛm mɔɔ wɔ Galeli tandane ne anloa, mɔɔ bikye Zɛbulɛn nee Nafetalae afoa nu la.

¹⁴Ɛhye manle mɔɔ Nyamenle luale ye kpɔmanvolɛ Ayezaya anwo zo hanle la yɛle nɔhalɛ kɛ,

¹⁵ “Zɛbulɛn nee Nafetalae maanlema, mɔɔ wɔ nyiakɛ, wɔ Azule Dwɔdan ne anzi, Galelima mɔɔ ɛmboka Dwuuma awo a!

¹⁶Bɛmɛ mɔɔ bɛde awozinli nu la, bɛbanwu wienyi kpole bie! Bɛmɛ mɔɔ bɛde ewule alubo nu la, wienyi bada bɛ nwo zo.”

¹⁷ Ɔvi mekɛ zɔhane Gyisɛse bɔle ɔ bo kɛ ɔbɔ nolo kɛ, “Bɛnlu bɛ nwo na Anwuma Belemgbunlililɛ ne ɛbikye!”

¹⁸Gyisɛse lua Galeli Tandane ne anloa la, ɔnwunle mediema nwiɔ kɛ bɛlɛgua asawu wɔ tandane ne anu. Bɛmɛ a le Saemɔn mɔɔ eza bɛfɛlɛ ye Pita la nee ɔ diema Andelu.

¹⁹Gyisɛse zele bɛ kɛ, “Bɛrɛla bɛmaa yɛhɔ na mebahilehile bɛ meamaa bɛahye menli kɛ bɛkye fɛlɛ la.”

²⁰Na ɛkɛ ne ala bɛgyakyile bɛ asawu ne mɔ na bɛdoale ye.

²¹Ɔhɔle ɔ nyunlu ekyii la ɔnwunle mediema nwiɔ bieko. Bɛmɛ a le Gyemise nee ɔ diema Dwɔn mɔɔ le Zɛbɛdi amra ne mɔ. Ɛnee bɛ nee bɛ ze Zɛbɛdi wɔ ɛlɛne nu bɛlɛsa bɛ avonle. Gyisɛse vɛlɛle bɛ,

²²na ɛkɛ ne ala bɛgyakyile ɛlɛne ne nee bɛ ze na bɛdoale ye.

²³ Gyisɛse hɔkpɔsale Galeli maanzinli ne anu amuala na ɔhilehilele wɔ bɛ nyianu azua ne mɔ anu, ɔhanle Anwuma Belemgbunlililɛ ne anwo Edwɛkpa ne, na ɔmanle menli mɔɔ ewule nee anwondolɛ ngakyile ɛha bɛ la anwo zale.

²⁴Ye nganeɛ dendenle hɔle Selea maanle ne anu amuala, na bɛvale bɛdabɛ mɔɔ ewule ngakyile ɛha bɛ na bɛlɛnwu amaneɛ: mɔɔ ɛbubu, mɔɔ awozonle ɛva bɛ, yɛɛ mɔɔ tɔ mgbutike la amuala bɛrɛlɛle ye, na ɔyɛle bɛ muala ayile.

²⁵Akee menli dɔɔnwo ne ala mɔɔ vi Galeli nee Azuamgbole Bulu ne azo, Gyɛlusalɛm nee Dwudiya maanzinli nu nee Azule Dwɔdan ne anzi lɔ la amuala doale ye.