Read Nzema Mat 6 Bible Online

Mat 6 - Nzema bible

Mat 6

¹ “Bɛnlea boɛ na bɛanyɛ bɛ Nyamenle ɛzonlenlɛ gyima ne ɛnyelɛ zo. Saa bɛyɛ ye zɔ a bɛnrɛnyia ahatualɛ wɔ bɛ anwuma Selɛ ne ɛkɛ.

²“Zɔhane ati saa bɛfa debie bɛahyɛ a bɛmmabɔ nwolɛ awuye, kɛmɔ nabalabama ne mɔ yɛ ye wɔ nyianu azua ne mɔ anu nee awɔdenle ne mɔ azo la. Bɛyɛ ye zɔhane amaa bɛanyia bɛ nyunlu wɔ menli nyunlu. Nɔhalɛ, meka meahile bɛ kɛ bɛnyia bɛ ahatualɛ bɛwie.

³Na bɛmɛ, saa bɛfa debie bɛahyɛ a, bɛmmamaa bɛ sa bɛne ne nwu mɔɔ fema ne ɛlɛyɛ la,

⁴amaa bɛ nyɛleɛ kpalɛ ne ayɛ fealera nu debie na bɛ Ze mɔɔ wɔ anwuma mɔɔ nwu fealera nu debie biala la ayila bɛ.

⁵ “Saa bɛyɛ nzɛlɛlɛ a, bɛmmayɛ ye kɛ nabalabama ne mɔ yɛ ye la. Menli zɔhane mɔ kulo kɛ bɛgyinla nyianu azua ne mɔ anu nee mgbata ne mɔ azo bɛyɛ bɛmaa menli kɔsɔɔti nwu bɛ kɛ bɛlɛyɛ nzɛlɛlɛ. Nɔhalɛ, meka meahile bɛ kɛ bɛnyia bɛ ahatualɛ bɛwie.

⁶Na bɛmɛ, saa bɛyɛ nzɛlɛlɛ a, bɛhɔvea bɛ sua kunlu ɛkɛ ne, bɛdo anlenkɛ ne anu na bɛyɛ nzɛlɛlɛ bɛvɛlɛ bɛ Ze mɔɔ wɔ anwuma mɔɔ bɛnnwu ye la, na bɛ Ze mɔɔ wɔ anwuma na ɔnwu fealera nu edwɛkɛ la bayila bɛ.

⁷“Wɔ bɛ nzɛlɛlɛ nu, bɛmmaka edwɛkɛ dɔɔnwo kɛmɔ bɛdabɛ mɔɔ bɛnze Nyamenle la yɛ ye la. Ɔluakɛ bɛmɛ, bɛdwenle kɛ saa bɛka edwɛkɛ dɔɔnwo a yɛɛ Nyamenle kɛdie bɛ a.

⁸Bɛmmayɛ ye kɛ menli zɔhane mɔ yɛ ye la, ɔluakɛ bɛ Ze mɔɔ wɔ anwuma la ze mɔɔ bɛhyia nwolɛ la amuala kolaa na bɛabiza ye.

⁹Zɔhane ati, bɛmɛ, bɛyɛ nzɛlɛlɛ a bɛyɛ ye zɛhae: ‘Yɛ Ze mɔɔ wɔ anwuma: Wɔ duma nwo ɛde;

¹⁰Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.

¹¹Maa yɛ ɛnɛ yɛ dahuu aleɛ,

¹²Na fa yɛ ɛtane kyɛ yɛ, Kɛmɔ yɛfa yɛkyɛ bɛdabɛ mɔɔ bɛfo yɛ la;

¹³Mmamaa yɛkɔ ngyegyelɛ nu, Ye yɛ fi munzule[5] nu.’

¹⁴ “Ɔluakɛ saa bɛfa menli mɔɔ ɛvo bɛ la ɛtane bɛkyɛ bɛ a, yɛɛ bɛ anwuma Selɛ ne ɔdaye ɔkɛva bɛ ɛtane ɛdeɛ ne mɔ ɔkɛhyɛ bɛ a.

¹⁵Na saa bɛanva menli mɔɔ ɛvo bɛ la ɛtane ne mɔ bɛangyɛ bɛ a, bɛ Ze mɔɔ wɔ anwuma la ɔdaye ɔnrɛva bɛ ɛtane ne mɔ ɔnrɛhyɛ bɛ.

¹⁶“Saa bɛkye ɛhɔne a, bɛmmayɛ bɛ nyunlu alɔbɔlɛ alɔbɔlɛ, kɛmɔ nabalabama ne mɔ yɛ la. Bɛsie bɛ nwo evinli bɛfa bɛkile bɛmaa awie biala nwu kɛ bɛlɛkye ɛhɔne. Bɛnwu ye kɛ bɛdua bɛ nwolɛ kakɛ bɛwie.

¹⁷Na bɛmɛ, saa bɛkye ɛhɔne a anrɛɛ bɛnrinzi bɛ nwo, na bɛziezie bɛ nwo,

¹⁸amaa awie mɔ annwu kɛ bɛlɛkye ɛhɔne. Na bɛ Ze mɔɔ wɔ anwuma na ɔze fealera nu debie biala la bayila bɛ.

¹⁹ “Bɛmmakpondɛ bɛ anwonyia bɛsie azɛlɛ ye azo, anrɛɛ ɛlɛtɛba nee nrɛnlana[6] kɛzɛkye ye, na nwule noko kola wua.

²⁰Bɛkpondɛ bɛ anwonyia bɛzie anwuma maanle ne anu na ɛlɛtɛba nee nrɛnlana anzɛkye ye, na nwule noko angɔnwua.

²¹Bɛnwu ye kɛ ɛleka mɔɔ bɛ anwonyia wɔ la, ɛkɛ ne yɛɛ bɛ ahonle noko wɔ a.

²²“Ɛnyelɛ a le sonlabaka ne kɛnlaneɛ a. Saa ɛ nye le kpalɛ a, wɔ sonlabaka ne anu le wienyi.

²³Na saa ɛ nye ɛnle kpalɛ a, wɔ sonlabaka ne anu le awozinli. Na saa wienyi ne mɔɔ wɔ wɔ nu la le awozinli a, ɛnee noko ye awozinli ne kɛyɛ kabii kpalɛ.

²⁴“Awie biala ɛnrɛhola ɛnrɛzonle menlenlɛ nwiɔ, ɔluakɛ saa ɔyɛ ye zɔhane a ɔbahulo ko na yeakpɔ ko, anzɛɛ ɔbali ko eni na yeakpo ko. Zɔhane ala yɛɛ bɛnrɛhola Nyamenle nee ezukoa sonle a.

²⁵“Ɛhye ati meka meahile bɛ, bɛmmadwenle mɔɔ bɛbali anzɛɛ mɔɔ bɛbanlo bɛanyia ngoane, anzɛɛ ɛdanlɛ mɔɔ bɛbaheda la anwo. Asoo ngoane ɛngyia ɛndɛla aleɛ, anzɛɛ nwonane ye ɛngyia ɛndɛla ɛdanlɛ?

²⁶Bɛnlea nloma mɔɔ luolua anwomanyunlu la. Bɛnlua, bɛmbu, yɛɛ bɛnlɛ bonwolo; Selɛ ne mɔɔ wɔ anwuma la a yɛne bɛ a. Na asoo bɛ nwo ɛngyia ɛndɛla nloma?

²⁷Bɛ nuhua boni yɛɛ kɛhola kɛlua ye adwenleadwenle zo kɛva mekɛ ekyi kɛboka ye mekɛ nwo a, anzɛɛ kɛva waa ko kɛdo ye tendenle zo a?

²⁸“Duzu ati bɔbɔ yɛɛ bɛdwenle ndanlɛ nwo ɛ? Bɛnlea ɛhoayelɛ nu aloa, bɛnyɛ gyima yɛɛ bɛnwo ndanlɛ.

²⁹ Noko meka meahile bɛ, Belemgbunli Sɔlɔmɔn bɔbɔ, wɔ ye anwonyia mekɛ ne anu, yeangeda ɛdanlɛ anzɛɛ bɛanziezie ye bɛandɛla aloa ɛhye mɔ anu ko.

³⁰Na saa Nyamenle siezie ndile, mɔɔ nyi ɛnɛ na ɛhyema bɛpɛ bɛwuda la zɛhae a, ɛnee fane nyɛ yɛɛ akee bɛmɛ, Nyamenle ɛnrɛhola bɛ ɛdanlɛ keda ɛ? Bɛ diedi le ekyi somaa!

³¹“Yemɔti bɛmmadwenle kɛ, ‘Duzu yɛɛ yɛbali a’, anzɛɛ ‘Duzu a yɛbanlo a’, anzɛɛ ‘Duzu a yɛbaheda a’,

³²(Ɛhye mɔ le ninyɛne mɔɔ bɛdabɛ mɔɔ bɛnze Nyamenle la a dwenle nwolɛ a.) Bɛ Ze mɔɔ wɔ anwuma la ze kɛ bɛhyia ninyɛne ɛhye mɔ amuala anwo.

³³Bɛbɔ mɔdenle bɛdwenle Nyamenle belemgbunlililɛ ne nee mɔɔ Nyamenle kpondɛ kɛ bɛyɛ la anwo kpalɛ, na ɔkɛva mɔɔ bɛhyia nwolɛ la ɔkɛmaa bɛ.

³⁴Ɛhye ati bɛmmadwenle ɛhyema anwo; ɛhyema ɔdaye ɔ nee ɔ ti anwo adwenleadwenle ɛdeɛ lua. Ɔngyia kɛ bɛkɛva kenle ko anwo adwenleadwenle ɛdeɛ bɛkɛboka ko ɛdeɛ nwo.