Read Nzema Mat 7 Bible Online

Mat 7 - Nzema bible

Mat 7

¹“Bɛmmabua awie mɔ ndɛne na Nyamenle ambua bɛ ndɛne,

² ɔboalekɛ ndɛne mɔɔ bɛkɛva bɛkɛbua awie mɔ la yɛɛ Nyamenle bava abua bɛdabɛ noko a, yɛɛ mɔɔ bɛkɛzuzu bɛkɛmaa awie la yɛɛ bɛbanyia ye a.

³Duzu ati a ɛnwu mumunli mɔɔ la ɛ diema anye zo, na ɛndwenle dubinli ne mɔɔ la ɛ nye zo la anwo ɛ?

⁴Anzɛɛ duzu ati yɛɛ ɛse ɛ diema kɛ, ‘Mebodo wɔ, maa menye ɛ nye zo mumunli ne’, wɔ mekɛ mɔɔ dubinli la ɛdawɔ mumua ne ɛ nye zo la ɛ?

⁵Wɔmɔ nabalabanli! Dumua ye dubinli ne mɔɔ la ɛ nye zo la na wɔanwu debie kpalɛ, na wɔahola wɔaye mumunli ne mɔɔ la ɛ diema ne anye zo la.

⁶“Bɛmmafa debie mɔɔ anwo te la bɛmaa ahwea, na bɛkɛpɛ bɛ nwo bɛkɛkeka bɛ; bɛmmafa bɛ anwoneɛ bɛgua agbolike nyunlu, na bɛkɛtietia zolɛ bɛkɛzɛkye bɛ mgbane.

⁷“Bɛbiza na bɛ sa kɛha ye; bɛkpondɛ na bɛkɛnwu ye; bɛbɔ nu na bɛkɛbuke bɛ.

⁸Ɔluakɛ awie biala mɔɔ biza la asa ka ye; mɔɔ kpondɛ la nwu ye, yɛɛ mɔɔ bɔ nu la, bɛbuke ye.

⁹Bɛ nuhua boni yɛɛ saa ɔ ra biza ye kpanwo a ɔkɛva bolɛ ɔkɛmaa ye a?

¹⁰Anzɛɛ saa ɔbiza ye fɛlɛ a ɔkɛmaa ye ɛwɔlɛ a?

¹¹Na saa bɛmɛ mɔɔ bɛle ɛtanevolɛma la bɛze kɛ ɔwɔ kɛ bɛfa ninyɛne kpalɛ bɛmaa bɛ mra a, ɛnee fane nyɛ yɛɛ bɛ Ze mɔɔ wɔ anwuma la ɛnrɛva ninyɛne kpalɛ ɛnrɛmaa bɛdabɛ mɔɔ bɛbiza ye la ɛ?

¹² “Zɔhane ati mɔɔ bɛkpondɛ kɛ menli yɛ maa bɛ la, bɛdabɛ noko bɛyɛ zɔhane ala bɛmaa bɛ. Mosisi mɛla ne nee Nyamenle kpɔmanvolɛma ngilehilelɛ ne kɛ kɔ ye la ɛne.

¹³“Bɛva anuhɔlɛ ɛdenraa ne anu bɛwolo, ɔluakɛ anuhɔlɛ kpolomgbolo ne kɔ abɔnsam sua zo yɛɛ ye adenle ne anu ɛvalɛ ɛnyɛ se, yemɔti menli dɔɔnwo kpalɛ a fa zɔhane anuhɔlɛ ne anu a.

¹⁴Na anuhɔlɛ ne mɔɔ kɔ ngoane mɔɔ ɛnlɛ awieleɛ la anu la le ɛdenraa, ye adenle ne anu ɛvalɛ ɛnla aze, yɛɛ menli ekyi bie a nwu ye a.

¹⁵“Bɛnlea bɛ nwo boɛ wɔ Nyamenle kpɔmanvolɛma alanema anwo; bɛle menli bie mɔɔ bɛyɛ bɛ nwo kɛ asɛɛ bɛnze nwolɛ bie, noko bɛ kunlu le bile.

¹⁶Menli zɔhane mɔ nyɛleɛ yɛɛ bɛbava bɛanwu bɛ a. Kolokolonyɛma ɛnzo ‘vanye’ ma, yɛɛ evileni ɛnzo ‘feege’ ma.

¹⁷Baka kpalɛ biala so ma kpalɛ, yɛɛ baka ɛtane so ma ɛtane.

¹⁸Baka kpalɛ ɛnzo ma ɛtane, yɛɛ baka ɛtane ɛnzo ma kpalɛ.

¹⁹ Baka biala mɔɔ ɛnzo ma kpalɛ la bɛpɛ ye bɛto na bɛfa bɛwuda senle.

²⁰ Zɔhane ala yɛɛ bɛbalua Nyamenle kpɔmanvolɛma alanema nyɛleɛ zo bɛanwu bɛ a.

²¹“Tɛ awie biala mɔɔ kɛvɛlɛ me kɛ, ‘Awulae, Awulae’ la a banyia Anwuma Belemgbunlililɛ ne a, na bɛdabɛ mɔɔ bɛyɛ mɔɔ Egya mɔɔ wɔ anwuma la kpondɛ kɛ bɛyɛ la a banyia ye a.

²²Saa Ndɛnebualɛ Kenle ne dwu a, dɔɔnwo ne ala baha ahile me kɛ, ‘Awulae, Awulae! Yɛluale wɔ duma nu yɛbɔle Edwɛkpa ne nolo, yɛluale wɔ duma nu yɛdudule mbɔnsam dɔɔnwo na yɛyɛle nwanwane ninyɛne!’

²³ Na mebaze bɛ kɛ, ‘Menze bɛ. Bɛvi ɛkɛ ne bɛhɔ. Nindavoma!’

²⁴“Zɔhane ati awie biala mɔɔ tie me edwɛkɛ ne na ɔdi zolɛ la le kɛ nrɛlɛbɛvolɛ bie mɔɔ zile ye sua wɔ bodane zo la.

²⁵Ezule kpole dɔle na azule yile bule aze, na ahumu kpole dule bɔle sua ne, noko yeambu, ɔboalekɛ ɔgyi bodane zo.

²⁶“Awie noko mɔɔ tie me edwɛkɛ ne na ɔnli zolɛ la le kɛ kɔnwɔne bie mɔɔ zile ye sua wɔ ɛnwea nu la.

²⁷Ezule dɔle, azule yile bule aze, ahumu dule kpole bɔle sua ne, na ɔbule ɔguale aze. Na ye azedɔlɛ ne yɛle ɛzulolɛ!”

²⁸ Mɔɔ Gyisɛse wiele ɛhye mɔ ka la, ye ngilehilelɛ ne zinle menli dɔɔnwo ne anwo,

²⁹ɔluakɛ ɔngilehile kɛ bɛ mɛla kilehilevolɛma ne mɔ la; ɔkilehile kɛ sonla mɔɔ lɛ tumi la.