Read Nzema Mat 9 Bible Online

Mat 9 - Nzema bible

Mat 9

¹Gyisɛse ziale hɔdɛnlanle ɛlɛne ne anu na ɔpɛle tandane ne ɔrale ɔdaye ye sua zo.

²Menli bie vale awie mɔɔ ɛdwidwe na ɔla ɛkpa zo la rɛlɛle ye kɛ ɔyɛ ye ayile. Mɔɔ Gyisɛse nwunle bɛ diedi ne la, ɔzele nrenya ne kɛ, “Me ra nrenya, to ɛ rɛle azule nu! Bɛva wɔ ɛtane ne mɔ bɛhyɛ wɔ.”

³Mɛla kilehilevolɛma bie mɔɔ wɔ ɛkɛ ne la hanle ye bɛ ti anu kɛ, “Nrenya ye ɛdindi Nyamenle anyunlu!”

⁴Gyisɛse nwunle bɛ adwenle, yemɔti ɔzele bɛ kɛ, “Duzu ati a bɛ adwenle le ɛtane zɛhae a?

⁵Boni a ye ɛhanlɛ ɛnyɛ se a, kɛ ɛse awie kɛ, ‘Bɛva wɔ ɛtane ne mɔ bɛhyɛ wɔ’, anzɛɛ ‘Dwazo na tia?’

⁶Akee memaa bɛanwu kɛ medame, Sonla Ra, melɛ tumi wɔ azɛlɛ ye azo kɛ mefa ɛtane mekyɛ.” Yemɔti ɔzele nrenya ne mɔɔ ɛdwidwe la kɛ, “Dwazo, nyenya wɔ ɛkpa ne, na kɔ sua nu!”

⁷Nrenya ne dwazole na ɔhɔle sua nu.

⁸Menli ne mɔ nwunle ye zɛhae la, ɛzulolɛ hanle bɛ, na bɛyele Nyamenle ayɛlɛ kɛ yeva tumi mɔɔ le zɛhae la yemaa sonla a.

⁹Gyisɛse vi ɛkɛ ne na ɔkɔ la, ɔnwunle adwuledievolɛ bie mɔɔ bɛfɛlɛ ye Mateyu la kɛ ɔde adwulelielɛ sua ne anu. Gyisɛse zele ye kɛ, “Bɛla maa yɛhɔ.” Mateyu dwazole na ɔdoale ye.

¹⁰ Mɔɔ Gyisɛse kpula ɔ sa wɔ Mateyu sua nu ɛkɛ ne la, adwuledievolɛma dɔɔnwo nee bɛdabɛ mɔɔ awie ɛmbu bɛ la rabokale Gyisɛse nee ye ɛdoavolɛma ne mɔ na bɛ muala bɛkpulale bɛ sa.

¹¹Falasiima bie mɔ nwunle ye na bɛzele Gyisɛse ɛdoavolɛma ne kɛ, “Duzu ati a bɛ menle nee adwuledievolɛma nee bɛdabɛ mɔɔ awie ɛmbu bɛ la to bɛ sa ɛyɛba ko anu ɛ?”

¹²Gyisɛse dele na ɔbuale bɛ kɛ, “Menli mɔɔ te kpɔkɛ la ɛngyia ninsinli nwo kɛ wuleravolɛma.

¹³ Bɛhɔ bɛhɔkpondɛ Nyamenle Edwɛkɛ ɛhye abo: ‘Mekulo anwunvɔnezelɛ, na tɛ nane azubɔlɛ ɔ.’ Meamba menli mɔɔ ɛkpazi la ɛvɛlɛlɛ; membale bɛdabɛ mɔɔ awie ɛmbu bɛ bie la ɛvɛlɛlɛ!”

¹⁴Dwɔn Sɔnevolɛ ne ɛdoavolɛma ne rale Gyisɛse ɛkɛ ne rabizale ye kɛ, “Duzu ati a yɛmɛ yɛɛ Falasiima yɛkye ɛhɔne dahudahu na wɔ ɛdoavolɛma ne ɛngye bie fee ɛ?”

¹⁵Gyisɛse buale bɛ kɛ, “Bɛdwenle kɛ saa atɔfolɛ nrenya ne wɔ ɛkɛ a, ɔ gɔnwo mɔ mɔɔ ɛra atɔfolɛlielɛ ne abo la kɛli nyane ɔ? Kyɛkyɛ! Noko saa mekɛ dwu na bɛbaye atɔfolɛ nrenya ne wɔ bɛ avinli bɛkɔ a, ɛnee bɔ zo mɔɔ yedwu mɔɔ bɛkye ɛhɔne a.

¹⁶“Awie ɛnva ɛdanlɛ fofolɛ mɔɔ bɛtɛwulale ye nzule nu ɛlɛ la ɛnda ɛdanlɛ dɛba nu; saa ɔyɛ ye zɔhane a, ɛdanlɛ fofolɛ ne kɛde dɛba ne na ɔkɛmaa tokule ne akee kɛyɛ kpole.”

¹⁷Ɔvale ɔzɔle zo kɛ, “Awie ɛnva nwanye ndokuma ɛngua nwanye nwoma kodoku dɛba nu. Saa ɔyɛ ye zɔhane na nwanye ne anu yɛ ɛsesebɛ a, nwoma kodoku dɛba ne bakpuke yeamaa nwanye ne agua aze, na nwoma ne noko azɛkye. Mɔɔ bɛyɛ la a le kɛ bɛfa nwanye ndokuma bɛgua nwoma kodoku fofolɛ nu, ɛnee bɛ mu nwiɔ bɛgyinla boɛ.”

¹⁸Mɔɔ Gyisɛse anloa wɔ zo ɔlɛtendɛ yeahile bɛ la, nyianu sua ne neavolɛ kpanyinli ne rale na ɔrahotole Gyisɛse anyunlu ɛkɛ na ɔzɛlɛle ye kɛ, “Me ra raalɛ ɛwu kɛkala; noko bɛla bava ɛ sa to ɔ nwo zo maa ɔnyia ngoane.”

¹⁹Yemɔti Gyisɛse dwazole na ɔ nee ye ɛdoavolɛma ne nee nrenya ne hɔle.

²⁰Raalɛ bie mɔɔ mogya ɛdudu ye toonwo ɛvolɛ bulu nee nwiɔ la ralile Gyisɛse anzi na ɔvale ɔ sa ɔhanle ye tɛladeɛ ne anloa.

²¹Ɔhanle ye ɔ ti anu kɛ, “Saa mefa me sa meka ye tɛladeɛ ne bɔbɔ a, me nwo kɛza.”

²²Gyisɛse hakyile ɔ nye na ɔnwunle ye la, ɔzele raalɛ ne kɛ, “Ralɛ raalɛ, maa ɛ rɛle ɛdɔ wɔ azule nu. Wɔ diedi ɛmaa ɛ nwo ɛza.” Na ɛkɛ ne ala raalɛ ne anwo zale.

²³Gyisɛse dwule nyianu sua ne kpanyinli ne sua nu la, ɔnwunle agolehanlɛma, nee menli dɔɔnwo mɔɔ ɛra bayɛ ɛzɛne ne la.

²⁴Ɔzele bɛ kɛ, “Bɛhwe bɛ nwo! Bɛlɛra ne ɛtɛwule; ɔlɛdafe ala!” Na bɛzelele ye bɛzile ye amgbu.

²⁵Mɔɔ bɛyele menli ne mɔ bɛvindele la, Gyisɛse wolole sua ne anu na ɔzɔle bɛlɛra ne asa, na bɛlɛra ne dwazole.

²⁶Gyima ɛhye mɔɔ ɔlile la nganeɛ hɔle maanzinli ne anu ɛleka biala.

²⁷Gyisɛse vi ɛkɛ ne na ɔkɔ la, anyenzinliravolɛma nwiɔ doale ye na bɛdeɛdeanle nu bɛzele kɛ, “Gyisɛse, Devidi ara, nwu yɛ anwunvɔne!”

²⁸Nzinlii mɔɔ Gyisɛse hɔle sua nu la, bɛrale ɔ nwo ɛkɛ ne. Na Gyisɛse bizale bɛ kɛ, “Bɛdie bɛdi kɛ menwɔhola bɛ ayile yɛ ɔ?” Bɛzele ye kɛ, “Ɛhɛe, Yɛmenle!”

²⁹Yemɔti Gyisɛse vale ɔ sa hehanle bɛ nye ne mɔ na ɔzele bɛ kɛ, “Ɔyɛ zɔ ɔmaa bɛ, kɛmɔ bɛ diedi ne de la.”

³⁰Na bɛ nye ne mɔ dukuedukuele. Gyisɛse bɔle bɛ nloa kɛ, “Bɛmmabɔ zo bɛmaa awie biala te.”

³¹Noko bɛvile ɛkɛ ne la, bɛvale Gyisɛse gyima kpalɛ nwo edwɛkɛ bɛhɔle maanzinli ne anu amuala.

³²Mɔɔ menli ne mɔ finde ahɔ la, menli bie vale mumule bie mɔɔ sunsum ɛtane ɛva ye la rɛlɛle Gyisɛse.

³³Ɔdule sunsum ɛtane ne la, mumule ne dendɛle. Na ɔyɛle menli dɔɔnwo ne nwanwane na bɛzele kɛ, “Yɛtɛnwunle ɛhye bie ɛlɛ wɔ Yizilayɛ!”

³⁴ Noko Falasiima ne mɔ zele kɛ, “Ɔdua mbɔnsam kpanyinli ne tumi zo a ɔtu mbɔnsam ne mɔ a.”

³⁵ Gyisɛse hɔkpɔsale maanzinli ne anu azua nee namunamu ne mɔ amuala azo, ɔhilehilele wɔ nyianu azua ne mɔ anu, ɔhanle Edwɛkpa ne mɔɔ fane Anwuma Belemgbunlililɛ ne anwo la ɔhilele menli ne. Ɔmanle menli mɔɔ ewule ngakyile ɛha bɛ nee mɔɔ anwonyane ɛbɔ bɛ la amuala anwo zale.

³⁶ Ɔnwunle menli somaa ne la, alɔbɔlɛ hunle ye, ɔluakɛ bɛbɔ asande na bɛluolua nu mgbane mgbane kɛ mboane mɔɔ ɛnlɛ neavolɛ la.

³⁷ Na ɔzele ye ɛdoavolɛma ne kɛ, “Nɔhalɛ, Nyamenle bɛyɔba ne ɛbolo kpole, na menli mɔɔ bu la le ekyi.

³⁸Zɔhane ati bɛzɛlɛ egyinli menle ne kɛ ɔkɛva gyimayɛvoma dɔɔnwo ɔkɛmaa bɛkɛhɔbu bɛyɔba ne.”