Read Nzema Mak 10 Bible Online

Mak 10 - Nzema bible

Mak 10

¹Gyisɛse vile ɛkɛ ne rale Dwudiya maanzinli nu na ɔpɛle ɔdɔle Azule Dwɔdan ne anzi. Menli dɔɔnwo rayiale ye bieko, na kɛmɔ ɔta ɔyɛ la, ɔhilehilele bɛ.

²Falasiima bie rale kɛ bɛbazɔ ye bɛanlea, na bɛbizale ye kɛ, “Asoo yɛ mɛla ne maa nrenya adenle maa ɔbɔ ɔ ye ewole? Ka maa yɛdie.”

³Gyisɛse bizale bɛ kɛ, “Duzu mɛla a Mosisi vale manle bɛ a?”

⁴ Bɛbuale kɛ, “Mosisi manle adenle kɛ nrenya ne ɛhɛlɛ ewolebɔlɛ kɛlata ɛmaa ɔ ye na ɔgyakyi ye.”

⁵Gyisɛse zele bɛ kɛ, “Ɔlua bɛ anzosesebɛ ti yɛɛ Mosisi hɛlɛle mɛla ɛhye manle bɛ a.

⁶ Na aloa kabɔ ɔ bo la, Nyamenle Edwɛkɛ ne se, ‘Nyamenle bɔle bɛ nrenya nee raalɛ.

⁷ Ɛhye ati nrenya ne bade ɔ nwo avi ɔ ze nee ɔ nli bɛ nwo na ɔ nee ɔ ye ahɔdɛnla,

⁸na bɛ mu nwiɔ bɛayɛ nwonane ko.’ Yemɔti ɛnee bɛnle nwiɔ bieko na bɛle nwonane ko.

⁹Zɔhane ati mɔɔ Nyamenle ɛha ɛbɔ nu la, awie biala mmakpakye nu.”

¹⁰Bɛziale bɛhɔle sua nu la, ɛdoavolɛma ne bizale Gyisɛse ewolebɔlɛ ne anwo edwɛkɛ bieko.

¹¹ Na ɔzele bɛ kɛ, “Saa nrenya bɔ ɔ ye ewole na ɔgya fofolɛ a, ɛnee yeyɛ ɛtane.

¹²Zɔhane ala yɛɛ saa raalɛ gyakyi ɔ hu ɔkɔ agyalɛ fofolɛ a, ɛnee ɔdaye noko yeyɛ ɛtane a.”

¹³Menli bie vale ngakula rale kɛ Gyisɛse ɛva ɔ sa ɛgua bɛ nwo zo, na ye ɛdoavolɛma ne duale bɛ kɛ bɛmmagyegye ye.

¹⁴Mɔɔ Gyisɛse nwunle ye la, ɔvale ɛya na ɔzele ye ɛdoavolɛma ne mɔ kɛ, “Bɛgyakyi ngakula ne mɔ bɛmaa bɛrɛla me nwo, bɛmmatua bɛ, na bɛdabɛ mɔɔ bɛle kɛ ɛhye mɔ zɛhae la yɛɛ Nyamenle Belemgbunlililɛ ne le bɛ ɛdeɛ a.

¹⁵ Bɛhakye ɛhye! Awie biala mɔɔ anyɛ ɔ nwo kɛ kakula, anlie Nyamenle Belemgbunlililɛ ne ando nu la ɛnrɛnwu Nyamenle Belemgbunlililɛ ne.”

¹⁶Na ɔmanle ngakula ne mɔ zo ngoko ngoko ɔziele ɔ gyakɛ azo, ɔvale ɔ sa ɔguale bɛ nwo zo na ɔyilale bɛ.

¹⁷Gyisɛse zile nu bieko kɛ ɔkɔ la, nrenya bie lɛ ɛnriandilɛ rahotole ɔ nyunlu ɛkɛ ne na ɔzele ye kɛ, “Kilehilevolɛ kpalɛ, duzu a menyɛ na meanyia ngoane mɔɔ ɛnlɛ awieleɛ a?”

¹⁸Gyisɛse bizale ye kɛ, “Duzu ati a ɛse mele kpalɛ ɛ? Awie biala ɛnle kpalɛ kɛ Nyamenle angomekye.

¹⁹ Ɛze mɛla ne mɔ: ‘Mmayɛ kɔdiawu, mmafa awuvolɛ, mmawua, mmadi daselɛ adalɛ, mmadi nzisi, di ɛ ze nee ɛ nli eni.’ ”

²⁰Nrenya ne buale kɛ, “Kilehilevolɛ, sumunli me ngakula nu yɛɛ menvale ɛhye mɔ azo ɛlilɛ a.”

²¹Gyisɛse nleanle ye koonwu, ɔhulole ye na ɔzele ye kɛ, “Yeha wɔ debie ko. Kɔ na kɔdɔne ninyɛne mɔɔ ɛlɛ la amuala, na kyɛ ezukoa ne maa ehyianvolɛma na ɛkɛnyia anwonyia wɔ anwuma, na akee bɛla badoa me bo zo.”

²²Nrenya ne dele edwɛkɛ ɛhye la, ɔ nyunlu zale, na ɔvale nyane ɔhɔle, ɔluakɛ ɔle sukoavolɛ kpole.

²³Gyisɛse hakyile ɔ nye nleanle ye ɛdoavolɛma ne mɔ na ɔzele bɛ kɛ, “Ɔbayɛ se yeamaa sukoavolɛma kɛ bɛkɛnyia Nyamenle Belemgbunlililɛ ne a.”

²⁴Edwɛkɛ ɛhye hwenle ɛdoavolɛma ne nu kpalɛ, na Gyisɛse hɔle zolɛ zele kɛ, “Ayi mɔ, Nyamenle Belemgbunlililɛ ne ɛnyianlɛ yɛ se kpalɛ!

²⁵Na ɔyɛ se noko kpalɛ ɔmaa sukoavolɛ kɛ ɔkɛnyia Nyamenle Belemgbunlililɛ ne, tɛla kɛ afunlumu kɛwolo agbuyia nye nu a.”

²⁶Edwɛkɛ ne zinle ɛdoavolɛma ne mɔ anwo kpole na bɛbizale bɛ nwo ngoko ngoko kɛ, “Ɛnee nwane bɔbɔ a kɛnyia ngoane a?”

²⁷Gyisɛse nleanle bɛ koonwu na ɔzele bɛ kɛ, “Mɔɔ yɛ se bo sonla nwo zo la ɛnyɛ se ɛmmaa Nyamenle, ɔluakɛ Nyamenle kola yɛ debie biala.”

²⁸Pita hanle kɛ, “Nea o, na yɛgyakyi debie biala yɛɛ yɛdoa wɔ o!”

²⁹Gyisɛse zele bɛ kɛ, “Ɔle zɔhane, noko bɛdie! Awie biala mɔɔ me ti, nee Edwɛkpa ne ati yegyakyi sua, mediema mrenya anzɛɛ mediema mraalɛ, ninli anzɛɛ selɛ, mralɛ anzɛɛ azɛlɛ la

³⁰banyia bɛ molozo wɔ kɛkala mekɛ ye anu. Ɔbanyia azua, mediema mrenya nee mraalɛ, ninlima nee mralɛ nee azɛlɛ mɔnwo mɔnwo. Bɛbayɛ ye kpɔdekpɔde ɛdeɛ, noko kenle bie ɔkɛnyia ngoane mɔɔ ɛnlɛ awieleɛ.

³¹ Bɛdabɛ dɔɔnwo ne ala mɔɔ ɛnɛ lumua la bali amozi, na amozi amra alumua.”

³²Akee Gyisɛse nee ye ɛdoavolɛma ne dɔle adenle zo kɛ bɛkɔ Gyɛlusalɛm, na ɛnee Gyisɛse lumua bɛ nyunlu. Ɛdoavolɛma ne akunlu ɛdu kpalɛ, yɛɛ ɛzulolɛ noko ɛha menli mɔɔ doa bɛ la. Na Gyisɛse eza vale ye ɛdoavolɛma bulu nee nwiɔ ne hɔle ahane na ɔhanle ninyɛne mɔɔ bɛbava bɛayɛ ye la amuala ɔhilele bɛ.

³³Ɔzele bɛ kɛ, “Bɛdie, yɛlɛkɔ Gyɛlusalɛm, na bɛbaye medame Sonla Ra bɛawula sɛlɛvolɛ mgbanyinli nee mɛla kilehilevolɛma ne mɔ asa anu. Bɛbabua me fɔlɛ kɛ bɛhu me na bɛaye me bɛawula bɛdabɛ mɔɔ bɛnle Dwuuma la asa anu.

³⁴Menli ɛhye mɔ noko bagolo me nwo, atoto me nwo nyɛlɛ, abila me mbaka na bɛahu me. Na ye kenle nsa ne anzi, mebadwazo meara ngoane nu.”

³⁵Gyemise nee Dwɔn, mɔɔ le Zɛbɛdi amra ne mɔ rale Gyisɛse ɛkɛ rahanle kɛ, “Kilehilevolɛ, yɛkulo kɛ yɛsɛlɛ wɔ debie ko.”

³⁶Gyisɛse bizale bɛ kɛ, “Duzu a bɛkpondɛ kɛ meyɛ memaa bɛ a?”

³⁷Bɛbuale kɛ, “Anrɛɛ ɛnee kenle mɔɔ ɛkɛdɛnla wɔ anyunlunyia belemgbunli ebia ne anu la, wɔamaa yɛ nee wɔ adɛnla, ko adɛnla wɔ fema zo na ko noko adɛnla wɔ bɛne zo.”

³⁸ Gyisɛse zele bɛ kɛ, “Bɛnze mɔɔ bɛlɛbiza bɛalie la. Asoo bɛkɛhola amaneɛnwunlɛ dwora ne mɔɔ ɔwɔ kɛ meno nu la anu no, anzɛɛ bɛkɛhola ewule ɛzɔnenlɛ ne mɔɔ ɔwɔ kɛ bɛfa bɛsɔne me la die?”

³⁹Bɛbuale kɛ, “Yɛkɛhola.” Gyisɛse zele bɛ kɛ, “Amgba, bɛkɛhola amaneɛnwunlɛ dwora ne mɔɔ ɔwɔ kɛ meno nu la anu no, bɛkɛlie ewule ɛzɔnenlɛ ne mɔɔ bɛfa bɛazɔne me la die,

⁴⁰noko me sa fema nee bɛne zo ɛdɛnlanlɛ ɛdeɛ, tɛ me a mekpa nu meye menli mɔɔ ɔwɔ kɛ tɛnla la a. Selɛ ne a bava amaa bɛdabɛ mɔɔ yeziezie yemaa bɛ la a.”

⁴¹Mɔɔ ɛdoavolɛma ne mɔ mɔɔ hale la dele ɛhye anwo bie la, bɛvale Gyemise nee Dwɔn anwo ɛya kpole.

⁴² Yemɔti Gyisɛse vɛlɛle bɛ muala ɔ nwo ɛkɛ ne na ɔzele bɛ kɛ, “Bɛze kɛ maanle maanle arelemgbunli si yɛ bɛ menli kpɔdekpɔde la, yɛɛ kɛ bɛ mgbanyima noko si di bɛ nwo zo tumi la.

⁴³ Ɛhye ɛnle zɔhane wɔ bɛ nu. Saa bɛ nuhua bie kpondɛ kɛ ɔyɛ kpole wɔ bɛ avinli a, ɔyɛ bɛ muala bɛ sonvolɛ

⁴⁴yɛɛ saa bɛ nuhua bie kpondɛ bɛ ti ali a, ɔyɛ bɛ muala bɛ akɛlɛ.

⁴⁵Medame Sonla Ra bɔbɔ, meamba kɛ bɛzonle me; membale kɛ mebazonle na meava me ngoane meado aze meakpɔne menli dɔɔnwo.”

⁴⁶Bɛrale Gyɛleko, na mɔɔ Gyisɛse nee ye ɛdoavolɛma ne mɔ nee menli dɔɔnwo vi sua ne azo bɛlɛkɔ la, ɛnee nrenya anyenzinliravolɛ bie mɔɔ bɛfɛlɛ ye Baatemeɛse, mɔɔ le nrenya Temeɛse ara ne, de adehane ne ɛlɛsɛlɛzɛlɛ ninyɛne.

⁴⁷Mɔɔ ɔdele kɛ Gyisɛse mɔɔ vi Nazalɛte la a ɛlɛse la, ɔdeanle nu kɛ, “Devidi Ara Gyisɛse! Nwu me anwunvɔne!”

⁴⁸Menli ne mɔ dɔɔnwo deanle ye na bɛzele ye kɛ ɔyɛ koonwu. Noko ɔdeanle nu kpalɛ kɛ, “Devidi Ara, nwu me anwunvɔne!”

⁴⁹Gyisɛse gyinlanle na ɔzele kɛ, “Bɛvɛlɛ ye bɛmaa me.” Bɛvɛlɛle nrenya anyenzinliravolɛ ne na bɛzele ye kɛ, “Ka wɔ ahonle to azule nu; dwazo na ɔlɛfɛlɛ wɔ.”

⁵⁰Nrenya ne dwazole, ɔvuandinle ye ɛdanlɛ ne ɔguale, na ɔrale Gyisɛse anwo ɛkɛ ne.

⁵¹Gyisɛse bizale ye kɛ, “Duzu a ɛkulo kɛ meyɛ memaa wɔ a?” Nrenya ne buale kɛ, “Kilehilevolɛ, mekulo kɛ menwu debie bieko.”

⁵²Gyisɛse zele ye kɛ, “Kɔ, wɔ diedi ɛyɛ wɔ ayile.” Na ɛkɛ ne ala ɔnwunle debie na ɔdoale Gyisɛse.