Read Nzema Mak 12 Bible Online

Mak 12 - Nzema bible

Mak 12

¹ Gyisɛse akee dendɛle hilele bɛ wɔ mrɛlɛ nu zele kɛ, “Nrenya bie zonle ye ɛya, ɔluale vanye ma wɔ nu na ɔhyele nwolɛ, ɔdule kuma mɔɔ bɛbahwihwi vanye ma ne anu nzule bɛagua nu la, na ɔzile tawa mɔɔ bɛfo zo bɛsinza egyinli ne la wɔ nu. Akee ɔvale egyinli ne ɔwulale abunsama asa anu na ɔdule ye adenle.

²Ɛbuhenle ne dwule la, ɔzoanle ye akɛlɛ ko wɔ abunsama ne ɛkɛ kɛ ɔhɔlie ye ɛkpɔ ɛdeɛ ne ɔrɛlɛ ye.

³Abunsama ne zɔle akɛlɛ ne nu, bɛbole ye na bɛmanle ɔvale ɔ sa mgbane ɔziale ɔhɔle.

⁴Egyinli menle ne zoanle akɛlɛ fofolɛ, na ɔdaye noko bɛbole ye, bɛbobɔle ɔ ti anwo mbaka na bɛzale ye.

⁵Eza ɔzoanle akɛlɛ bieko, na abunsama ne hunle ye, zɔhane ala yɛɛ bɛyɛle ngɛkɛlɛ dɔɔnwo ne ala a; bɛbole bie mɔ yɛɛ bɛhunle bie mɔ.

⁶Akee ɔhale egyinli menle ne ara kokye ne mɔɔ ɔwɔ kɛ ɔsoa ye a. Na nzinlii ɔzoanle ye wɔ abunsama ne ɛkɛ, ɔse, ‘Medie medi kɛ bɛkɛli me ra ye eni.’

⁷Na abunsama ne hanle hilele bɛ nwo kɛ, ‘Kɔliagya ne ɛne; bɛmaa yɛyɛ ko yɛhu ye, na ye agyadeɛ ne ɛyɛ yɛ ɛdeɛ.’

⁸Na bɛhyele ye bɛhunle ye, na bɛvuandinle ye bɛdole egyinli ne bane ne anzi lɔ.”

⁹Gyisɛse bizale kɛ, “Ɛnee bɛdabɛ bɛnea a, duzu a vanye egyinli menle ne kɛyɛ a? Ɔkɛra na ɔkɛrahu menli zɔhane mɔ na ɔkɛva egyinli ne ɔkɛwula abunsama fofolɛ asa anu.

¹⁰ Meze kɛ bɛgenga Nyamenle Edwɛkɛ ɛhye: ‘Bolɛ ko ne ala mɔɔ suasivoma ne kpole la ɛrayɛ bolɛ mɔɔ anwo hyia kpole kpalɛ kɛ sua mgbɛnezo sika la.

¹¹Ɛhye, Awulae a yɛle a; na yɛnea a ɔyɛ nwanwane kpole!’ ”

¹²Dwuu mgbanyima ne yɛle kɛ bɛkye ye, ɔluakɛ bɛnwunle kɛ ɔbule ɛrɛlɛ ne ɔtiale bɛ. Noko bɛzulole menli dɔɔnwo ne, yemɔti bɛgyakyile ye na bɛhɔle.

¹³Bɛzoanle Falasiima nee Hɛlɔdo asa zo ne bie mɔ wɔ Gyisɛse anwo ɛkɛ ne kɛ bɛhɔdo ye abɛla bɛhye ye wɔ edwɛkɛ ɛhanlɛ nu.

¹⁴Bɛrale la bɛbizale ye kɛ, “Kilehilevolɛ, yɛze kɛ wɔmɔ ɛnnea sonla nyunlu, yɛɛ ɛndie menli ngehanleɛ, na ɛkilehile Nyamenle ɛhulolɛdeɛ ne nɔhalɛ nu. Na ɛnea a, ɛnee ɔtia yɛ mɛla ne kɛ yɛkɛdua adwule yɛkɛmaa Maanle Maanle Belemgbunli ne ɔ? Ɔwɔ kɛ yɛtua anzɛɛ ɔnle kɛ yɛtua? Ka kile yɛ.”

¹⁵Gyisɛse nwunle bɛ nzi na ɔbizale bɛ kɛ, “Duzu ati a bɛra bɛbado me abɛla ɛ? Bɛva dwɛtɛ ne mɔɔ bɛdi la ko bɛrɛla bɛmaa menea.”

¹⁶Bɛvale bie bɛmanle ye, na ɔbizale bɛ kɛ, “Nwane nvoninli nee ye duma a le ɛhye mɔ?” Bɛbuale kɛ, “Siza[9] ɔ.”

¹⁷Na Gyisɛse zele bɛ kɛ, “Aa, ɛnee noko bɛva mɔɔ le Siza ɛdeɛ la bɛmaa ye ɛ, na bɛva mɔɔ le Nyamenle ɛdeɛ la bɛmaa ye.” Na Gyisɛse anwo yɛle bɛ ɛzulolɛ kpole.

¹⁸ Mgbanyinli bie mɔɔ boka Sadusiima fane ne anwo la rale Gyisɛse ɛkɛ ne. Menli ɛhye mɔ se saa sonla wu a Nyamenle ɛnrɛdwazo ye.

¹⁹ Bɛbizale Gyisɛse kɛ, “Kilehilevolɛ, Mosisi hɛlɛle mɛla ɛhye manle yɛ, ɔse, ‘Saa nrenya wu na ɔgyakyi ɔ ye mɔɔ ɔ nee ye anwo la a, ɔwɔ kɛ ɔ diema gya kunlanvolɛ raalɛ ne na ɔ nee ye wo mralɛ maa ɔ diema ne mɔɔ ɛwu la.’

²⁰Na ɛnee mediema nsuu bie wɔ ɛkɛ. Bɛ nuhua kpanyinli ne gyale raalɛ na ɔ nee ye anwo na yeawu.

²¹Adiema ne mɔɔ tɔ zolɛ nwiɔ la gyale raalɛ ne, na ɔdaye noko ɔ nee ye anwo na yeawu.

²²Zɔhane ala yɛɛ adiema ne mɔɔ tɔ zolɛ nsa nee mediema mɔɔ hale la amuala gyale raalɛ ne a, noko biala nee ye anwo na yeawu.

²³Ɛnee akee saa mɔwuamra dwazo ba ngoane nu wɔ ewudwazo kenle ne a, nwane aye a le raalɛ ye mɔɔ mediema nsuu ne amuala gyale ye bie la?”

²⁴Gyisɛse buale bɛ kɛ, “Bɛvo kpole! Na bɛze ɔ bo ɔ? Yemɔ a le kɛ bɛnze Nyamenle Edwɛkɛ ne, yɛɛ bɛnze ye tumi ne.

²⁵Ɔluakɛ saa mɔwuamra dwazo ba ngoane nu a, bɛbayɛ kɛ anwuma soanvolɛma la, agyalɛ biala ɛnle ɛkɛ.

²⁶ Akee mɔɔ fane mɔwuamra ɛdwazolɛ ne, asoo bɛtɛkengale ye Mosisi buluku ne anu kɛ Nyamenle hanle hilele ye wɔ ɛbɔ ne anu kɛ, ‘Mame a mele Ebileham nee Ayezeke nee Gyekɔbo Nyamenle ne a?’

²⁷Ɛhye kile kɛ ɔle teasema Nyamenle, na ɔnle bɛdabɛ mɔɔ bɛwu la Nyamenle. Bɛvo kpole kpalɛ.”

²⁸ Ɛnee mɛla kilehilevolɛ ko bie wɔ ɛkɛ. Ɔdele edwɛkɛbizalɛ ne na ɔnwunle kɛ Gyisɛse ɛmaa Sadusiima mualɛ kɛnlɛma gyɛlɛɛnye, yemɔti ɔbizale ye kɛ, “Mɛla ne anu boni a le titile kpalɛ kpalɛ a?”

²⁹ Gyisɛse buale kɛ, “Ɛhye a le mɛla ne anu titile kpalɛ kpalɛ a: ‘Yizilayɛma, bɛdie! Awulae yɛ Nyamenle ne a le Awulae kokye ne a.

³⁰Fa wɔ ahonle muala, wɔ ɛkɛla muala, wɔ adwenle muala, nee wɔ anwosesebɛ muala kulo Awulae wɔ Nyamenle ne.’

³¹ Mɛla ne anu titile kpalɛ kpalɛ mɔɔ tɔ zolɛ nwiɔ la a le ɛhye: ‘Kulo ɛ gɔnwo sonla kɛ ɛdawɔ ɛ nwo la.’ Mɛla bieko ɛnle ɛkɛ mɔɔ le titile kpalɛ kpalɛ tɛla nwiɔ ɛhye mɔ a.”

³² Mɛla kilehilevolɛ ne zele Gyisɛse kɛ, “Kilehilevolɛ, mo! Ɔle nɔhalɛ, kɛmɔ ɛlɛka la, Awulae angome a le Nyamenle a, nyamenle bieko ɛnle ɛkɛ.

³³ Na ɔwɔ kɛ sonla biala fa ye ahonle muala, ye adwenle muala, nee ye anwosesebɛ muala kulo Nyamenle, na ɔkulo ɔ gɔnwo sonla kɛ ɔdaye ɔ nwo la. Ɔhyia kpalɛ kɛ ɛkɛli mɛla nwiɔ ɛhye azo tɛla kɛ ɛkɛva nane nee ninyɛne ɛkɛbɔ azu ɛkɛmaa Nyamenle.”

³⁴Gyisɛse nwunle kɛ yeye edwɛkɛ ne anloa nrɛlɛbɛ nu, yemɔti ɔzele ye kɛ, “Ɛ nee Nyamenle Belemgbunlililɛ ne avinli anwa.” Ɔvi ɛhye azo awie biala angola anzi ye ahonle ambiza Gyisɛse edwɛkɛ bieko.

³⁵Gyisɛse kilehile wɔ Ɛzonlenlɛ Sua ne anu la, ɔbizale kɛ, “Kɛ ɔyɛ mɔɔ mɛla kilehilevolɛma ne ka kɛ Mɛzaya ne le Devidi anlɔnra ɛ?

³⁶ Devidi luale Sunsum Nwuanzanwuanza ne azo hanle kɛ, ‘Awulae zele me Awulae kɛ, tɛnla me fema zo ɛke, kɔkpula kɛ menwɔva wɔ agbɔvolɛ menwɔwula ɛ gyakɛ abo.’

³⁷“Na saa Devidi ɔdaye mumua ne ɔvɛlɛle ye ‘Awulae’ a, ɛnee kɛ ɔyɛ mɔɔ Mɛzaya ne yɛ ye anlɔnra ɛ?” Ɛnee menli dɔɔnwo lɛ fɛlɛko ɛlɛtie Gyisɛse.

³⁸Na mɔɔ ɔlɛkilehile la ɔhanle kɛ, “Bɛnlea boɛ wɔ mɛla kilehilevolɛma anwo. Ninyɛne mɔɔ bɛkulo la a le adɛladeɛ ndendenle ɛwulalɛ nee gua zo ɛkpɔsalɛ, amaa menli abɔ bɛ ti aze abiza bɛ ahye.

³⁹Kenle biala bɛkulo kɛ bɛkɛnyia nyianu azua ne mɔ anu mbia kpalɛ ne mɔ azo bɛkɛdɛnla.

⁴⁰Bɛbɛlɛbɛla ahunlanvolɛ mraalɛ bɛbɔ bɛ awuke ne mɔ na bɛakpati bɛayɛ nwolɛ nzɛlɛlɛ ndendenle. Bɛ ndeanlɛ bayɛ kpole kpalɛ!”

⁴¹Gyisɛse dɛnlanle Ɛzonlenlɛ Sua ne anu ɛleka mɔɔ gya nlɛka ne mɔ gyigyi la, na ɔnleanle menli mɔɔ lɛ ezukoa ɛlɛgua gya ne anu la. Sukoavolɛma dɔɔnwo vale ezukoa mgbole raguale nu,

⁴²akee raalɛ kunlanvolɛ ehyianli bie ɔdaye ɔvale ɛkpɔsɛba nwiɔ ɔraguale nu.

⁴³Gyisɛse vɛlɛle ye ɛdoavolɛma ne amuala na ɔzele bɛ kɛ, “Nɔhalɛ, raalɛ kunlanvolɛ ehyianli ɛhye ɛva mɔɔ le kpole tɛla awie biala ɛdeɛ ne la ɛgua gya ne anu.

⁴⁴Ɔluakɛ bɛdabɛ kɔsɔɔti, mɔɔ bɛlɛ ye la anwo nvasoɛ ne bie a bɛvale bɛraguale gya ne anu a, na raalɛ kunlanvolɛ ne, yemɔ ye kpokpoti ne ala a yeva yeragua nu la.”