Read Nzema Mak 13 Bible Online

Mak 13 - Nzema bible

Mak 13

¹Mɔɔ Gyisɛse vi Ɛzonlenlɛ Sua ne anu finde la, ye ɛdoavolɛma ne mɔ ko hanle kɛ, “Kilehilevolɛ! Nea awolɛ mgbole ngɛnlɛma bie mɔɔ bɛvale bɛzile azua mgbole ɛhye mɔ a!”

²Gyisɛse buale ye kɛ, “Wɔnwu azua mgbole ɛhye mɔ? Bolɛ ko bɔbɔ ɛnrɛla bolɛ zo mɔɔ bɛnrɛdwula ye aze a.”

³Gyisɛse hɔdɛnlanle Ɔlivi Boka ne azo, ɛleka mɔɔ ɔnwu Ɛzonlenlɛ Sua ne la. Pita, Gyemise, Dwɔn, yɛɛ Andelu rahanle hilele ye kɛ,

⁴“Ka kenle mɔɔ ɛhye mɔ kɛzi la kile yɛ, na ka debie mɔɔ bazi ahile kɛ mekɛ ɛdwu mɔɔ ɔwɔ kɛ ninyɛne ɛhye mɔ sisi la noko kile yɛ.”

⁵Gyisɛse zele bɛ kɛ, “Bɛnlea boɛ na awie ambɛlɛbɛla bɛ.

⁶Menli dɔɔnwo balua me duma nu ara, na bɛaraha kɛ, ‘Mame a mele Mɛzaya ne!’ na bɛabɛlɛbɛla dɔɔnwo ne ala.

⁷Noko saa konle si na ɔbikye bɛ, anzɛɛ bɛte kɛ konle ɛzi moa moa maanle bie anu a, bɛmmamaa bɛ ahonle tu. Ninyɛne ɛhye mɔ bazi, noko ɛnee awieleɛ ne ɛtɛdwule ɛkɛ.

⁸Maanle nee maanle baho, na arelemgbunli adwazo atia bɛ nwo. Azɛlɛ bakpusu ɛleka biala, yɛɛ ɛhɔne bara, noko ninyɛne ɛhye mɔ le kɛ awolɛ nyane la.

⁹ “Na bɛmɛ, bɛnlea bɛ nwo boɛ kpalɛ. Bɛbahye bɛ bɛahɔ kɔɔto. Bɛbabo bɛ wɔ nyianu azua ne mɔ anu; ɔlua me ti, bɛbagyinla mgbanyima nee arelemgbunli nyunlu na bɛaha Edwɛkpa ne bɛahile bɛ.

¹⁰Na saa ɔkɛra ye zɔhane bɔbɔ a, kyesɛ bɛdumua bɛbɔ Edwɛkpa ne nolo bɛkile maanle maanle kɔsɔɔti.

¹¹Saa bɛkye bɛ bɛ nee bɛ kɔ kɔɔto a, bɛmmadumua bɛdwenledwenle edwɛkɛ mɔɔ bɛbaha la anwo. Mekɛ ne dwu a bɛdendɛ, ɔluakɛ edwɛkɛ mɔɔ bɛbaha la vi Sunsum Nwuanzanwuanza ne.

¹²Mediema baye mediema amaa kɛ bɛhu bɛ, yɛɛ selɛma baye bɛ mra amaa. Ngakula badwazo bɛ awovolɛma anwo zo na bɛaye bɛ bɛamaa bɛahu bɛ.

¹³ Ɔlua me ti, awie biala bakpɔ bɛ. Na mɔɔ kɛgyinla kpundii kɛhɔ awieleɛ la kɛnyia ngoane mɔɔ ɛnlɛ awieleɛ.

¹⁴ “Saa bɛnwu ‘Munzudeɛ ne mɔɔ bɔ maanle la’ kɛ ɔgyi ɛleka mɔɔ ɔnle kɛ ɔgyinla la a, (Kengavolɛ, te ɛhye abo!) ɛnee bɛdabɛ mɔɔ bɛwɔ Dwudiya la, bɛnriandi bɛhɔ awoka ne mɔ azo.

¹⁵ Awie mɔɔ gyi ye sua ti zo la mmaka kɛ ɔdwu aze yeahɔ ye sua ne anu kɛ ɔkava debie.

¹⁶Mɔɔ ɛhɔ ɛbɔ nu noko la mmasia ba sua zo kɛ ɔbava ye tɛladeɛ.

¹⁷Mekɛ ne anu, mraalɛ mɔɔ ɛva ɛkolɛ nee mrɛladane mraalɛ mɔɔ bɛ mra no nyɛfonlɛ la, bɛ gyakɔ!

¹⁸Bɛzɛlɛ Nyamenle na anwongyelelɛ ɛhye amba fɔsɛlɛ nu.

¹⁹ Ɔluakɛ mekɛ ne anu anwongyelelɛ ne bayɛ ɛzulolɛ kpalɛ mɔɔ sumunli kɛ Nyamenle bɔle ewiade toonwo mɔɔ yeradwu bekezɛ la, bie ɛtɛsile ɛlɛ, yɛɛ bie noko ɛnrɛzi ɛlɛ.

²⁰Na Awulae ɛnlea ye menli ne mɔɔ yekpa nu yeye bɛ la ati yede mekɛ ne azo, anrɛɛ sonla ko bɔbɔ ɛnrɛha.

²¹“Saa awie biala se bɛ kɛ, ‘Nea, Mɛzaya ne wɔ ɛke’ anzɛɛ ‘Nea, yemɔ a wɔ nehane la’ a, bɛmmadie ye bɛdi.

²²Ɔluakɛ Mɛzayama nee Nyamenle kpɔmanvolɛma alane dɔɔnwo bara. Bɛbaye ngonyia, bɛayɛ nwanwane ninyɛne mgbole kɛ bɛfa bɛabɛlɛbɛla Nyamenle menli ne mɔɔ yekpa nu yeye bɛ la saa ɔkɛyɛ boɛ a.

²³Bɛnlea bɛ nwo boɛ! Kɛ meha debie biala mehile bɛ kolaa na ɛhye mɔ azi ɛ!

²⁴ “Mekɛ ne anu, wɔ anwongyelelɛ ne anzi, awozinli baheda sɛnzɛne ne azo, siane ɛnrɛda bieko,

²⁵ nwɔlɔra badudu agua aze, yɛɛ bɛbadudu anwumaneamra bɛavi bɛ ndenle ne mɔ azo.

²⁶ Akee bɛbanwu medame Sonla Ra kɛ melua amungu nu melɛba wɔ tumi bedevinli nee anyunlunyia nu.

²⁷Mebamaa anwuma soanvolɛma ahɔ ewiade muleɛ ne amuala azo ahɔhuohua Nyamenle menli ne mɔɔ yekpa nu yeye bɛ la anloa, ɔvi ewiade ye ati yeahɔkpula ɔ bo.

²⁸“Bɛnlea feege baka ne na bɛzukoa nrɛlɛbɛ wɔ nwolɛ. Mekɛ mɔɔ ɔkɛbolo na ye ngane ne kɛze kɛ bɛfefɛ nya la, ɛnee bɛze kɛ wawaa ɛbikye.

²⁹Zɔhane ala yɛɛ mekɛ mɔɔ bɛkɛnwu kɛ ninyɛne ɛhye mɔ ɛbɔ ɔ bo ɛlɛsisi la, ɛnee bɛhakye kɛ Mɛzaya ne ɛralɛ ɛbikye a.

³⁰Bɛhakye ɛhye! Ninyɛne ɛhye mɔ basisi wɔ bɛdabɛ mɔɔ kɛkala bɛde aze la dɔɔnwo ne ala anye zo.

³¹Anwuma nee aze bapɛ nu aze, na me nloa edwɛkɛ ɛdeɛ, ɔnrɛpɛ nu ɛlɛ.

³² “Awie biala ɛnze kenle ne anzɛɛ dɔnehwele ko ne. Anwuma soanvolɛma yɛɛ Ralɛ ne bɔbɔ ɛnze. Selɛ ne angome ala a ze a.

³³Bɛzinza na bɛnlea boɛ, ɔluakɛ bɛnze kenle ne mɔɔ mekɛ ne kɛdwu la.

³⁴ Ɛhye le kɛ nrenya bie mɔɔ ɛlɛtu adenle na yeva ye awuke yewula ye sonvolɛma asa nu la. Biala nee ye gyima, na ɔse mɔɔ nea anlenkɛ kpole ne la kɛ ɔzinza.

³⁵Zɔhane ati bɛzinza, ɔluakɛ bɛnze mekɛ mɔɔ awuke menle ne bara la, saa nɔsolɛ nu anzɛɛ alevinli mu nwiɔ avinli o, saa akɔlɛmɔleɛ anzɛɛ sɛnzɛnduduleɛ o.

³⁶Saa ɔba arɛlevilɛ nu a, ɔnle kɛ ɔbato bɛ kɛ bɛdeda.

³⁷Mɔɔ meka meahile bɛ la, meka meahile awie biala: Bɛzinza!”