Read Nzema Mak 2 Bible Online

Mak 2 - Nzema bible

Mak 2

¹Kenle ekyi guale nu la, Gyisɛse rale Kapɛnayɛm bieko, na menli dele kɛ yera sua nu.

²Yemɔti bɛ dɔɔnwo ne ala rayiale ɛkɛ ne mɔɔ ɛnee bɛnnyia adenle bɔbɔ wɔ anuhɔlɛ ne a. Ɔgua zolɛ ɔlɛka Nyamenle edwɛkɛ ne yeahile bɛ la,

³mrenya nna bie zoale nrenya bie mɔɔ ɛdwidwe la rale.

⁴Menli ne kɛ si zonle la ati, bɛannyia adenle bɛangɔ Gyisɛse anwo ɛkɛ ne. Zɔhane ati bɛhɔpɛle tokule wɔ sua ne ati zo, ɛleka mɔɔ Gyisɛse de la, na bɛdwulale nrenya ne ɛkpa nu wɔ ɛkɛ.

⁵Gyisɛse nwunle menli ne mɔ diedi la, ɔzele nrenya ne mɔɔ ɛdwidwe la kɛ, “Me ra, bɛva wɔ ɛtane ne mɔ bɛhyɛ wɔ.”

⁶Mɛla kilehilevolɛma ne bie mɔ mɔɔ dede ɛkɛ ne la dwenlenle ye bɛ ti anu kɛ,

⁷“Duzu munzule edwɛkɛ a sonla ye ɛlɛka atia Nyamenle la? Nyamenle ala a fa ɛtane kyɛ a!”

⁸Ndɛndɛ ne ala Gyisɛse nwunle bɛ ti anu edwɛkɛ, na ɔbizale bɛ kɛ, “Duzu ati a bɛdwenle ninyɛne ɛhye mɔ ɛ?

⁹Boni a ye ɛhanlɛ ɛnyɛ se kpalɛ a, kɛ ɛka wɔahile nrenya ye mɔɔ ɛdwidwe la kɛ, ‘Bɛva wɔ ɛtane ne mɔ bɛhyɛ wɔ’, anzɛɛ ‘Dwazo, nyenya wɔ ɛkpa ne na kɔ?’

¹⁰Akee memaa bɛanwu kɛ medame Sonla Ra, melɛ tumi wɔ azɛlɛ ye azo kɛ mefa ɛtane mekyɛ.” Na ɔhanle ɔhilele nrenya ne mɔɔ ɛdwidwe la kɛ,

¹¹“Mese, dwazo, nyenya wɔ ɛkpa ne na kɔ sua nu!”

¹²Menli ne mɔ anye zo ɛkɛ ne ala, nrenya ne mɔɔ ɛdwidwe la dwazole, ɔnyenyanle ye ɛkpa ne na ɔhɔle ndɛndɛ. Ɛhye yɛle menli ne amuala nwanwane kpole na bɛyele Nyamenle ayɛlɛ bɛzele kɛ, “Yɛtɛnwunle debie mɔɔ le zɛhae la bie ɛlɛ.”

¹³Gyisɛse ziale hɔle Galeli Tandane ne anloa bieko. Menli dɔɔnwo rale ɔ nwo ɛkɛ ne na ɔhilehilele bɛ.

¹⁴Wɔ ye ɛkpɔsalɛ ne anu, ɔnwunle Alefiyɛse ara Livae, adwuledievolɛ ne kɛ ɔde ɛkponle nwo wɔ ye gyima nu. Gyisɛse zele ye kɛ, “Bɛla maa yɛhɔ” Na Livae dwazole doale ye.

¹⁵Nzinlii Livae dole Gyisɛse ɛkponle. Adwuledievolɛma nee menli mɔɔ bɛdabɛ noko awie ɛmbu bɛ bie la dɔɔnwo mɔɔ ɛnee doa Gyisɛse la anu bie mɔ nee ɛdoavolɛma ne wɔ ɛkponledolɛ ne abo bie.

¹⁶Mɛla kilehilevolɛma ne bie mɔ mɔɔ le Falasiima la nwunle kɛ ɔ nee menli zɛhae mɔ ɛlɛdi debie la, bɛbizale ye ɛdoavolɛma ne kɛ, “Duzu ati a ɔ nee menli zɛhae mɔ to bɛ sa ɛyɛba ko anu ɛ?”

¹⁷Gyisɛse dele mɔɔ bɛhanle la na ɔbuale kɛ, “Menli mɔɔ te kpɔkɛ la ɛngyia ninsinli nwo kɛ wuleravolɛma. Meamba kɛ mebavɛlɛ bɛdabɛ mɔɔ bɛkpazi la. Membale menli mɔɔ awie ɛmbu bɛ bie la ɛvɛlɛlɛ.”

¹⁸Kenle ko bie ɛnee Dwɔn Sɔnevolɛ ne ɛdoavolɛma nee Falasiima ne mɔ ɛlɛkye ɛhɔne. Na menli bie rale rabizale Gyisɛse kɛ, “Duzu ati a Dwɔn Sɔnevolɛ ne ɛdoavolɛma nee Falasiima ɛdoavolɛma ne mɔ kye ɛhɔne, na wɔmɔ wɔ ɛdoavolɛma ne mɔ ɛngye ɛhɔne ne bie ɛ?”

¹⁹Gyisɛse buale bɛ kɛ, “Asoo bɛnwu kɛ atɔfolɛ nrenya ne agɔnwo mɔ mɔɔ ɛra ye atɔfolɛlielɛ ne abo la ɛlɛ bɛ ko mgbane ɛlɛ? Bɛyɛ ye zɔhane a ɔnrɛyɛ boɛ!

²⁰Noko saa mekɛ dwu na bɛbaye atɔfolɛ nrenya ne wɔ bɛ nu a, ɛnee bɔ zo mɔɔ yedwu mɔɔ bɛbua bɛda a.”

²¹Akee ɔhanle ɔzɔle zolɛ kɛ, “Awie ɛnva ɛdanlɛ fofolɛ mɔɔ bɛtɛkpole ye ɛlɛ la ɛnda ɛdanlɛ dɛba nu. Saa ɔyɛ ye zɔhane na ɔwula ye nzule nu a fofolɛ ne nwenwe na ɔtete dɛba ne, na ɔmaa tokule ne yɛ kpole.

²²Zɔhane ala yɛɛ awie ɛnva nwanye ndokuma ɛngua nwoma kodoku dɛba nu a. Saa ɔyɛ ye zɔhane na nwanye ne anu yɛ ɛsesebɛ a, ɔkpuke nwoma ne na nwanye ne nee nwoma ne sɛkye. Nɔhalɛ, bɛfa nwanye ndokuma bɛgua nwoma kodoku fofolɛ nu.”

²³ Ɛnwomenlelielɛ Kenle ko bie ɛnee Gyisɛse lua abɛlɛ ɛya bie anu; ye ɛdoavolɛma ne mɔ mɔɔ nee ye lua la bubule abɛlɛ ne bie.

²⁴Na Falasiima ne zele Gyisɛse kɛ, “Nea, ɔtia yɛ mɛla ne kɛ wɔ ɛdoavolɛma ne mɔ kɛyɛ zɛhae debie wɔ Ɛnwomenlelielɛ Kenle ye a!”

²⁵ Gyisɛse buale bɛ kɛ, “Asoo bɛtɛkengale mɔɔ Devidi yɛle wɔ mekɛ mɔɔ ɛnee ɛhɔne ɛlɛku ye nee menli mɔɔ doa ye, na bɛnlɛ debie biala mɔɔ bɛdi la?

²⁶ Wɔ Sɛlɛvolɛ Kpanyinli Abayata mekɛ zo, Devidi hɔle Nyamenle sua ne anu na ɔ nee ye menli ne mɔ lile kpanwo ne mɔɔ bɛva bɛbɔ azu bɛmaa Nyamenle la. Yɛ mɛla ne kile kɛ ɔwɔ kɛ sɛlɛvolɛma angome ala a di zɛhae kpanwo ne a. Noko Devidi lile bie, eza ɔvale bie ɔmanle menli mɔɔ ɔ nee bɛ lua la lile. Asoo bɛtɛtele ɛhye?”

²⁷Gyisɛse hanle zɔle zolɛ kɛ, “Nyamenle hyehyɛle Ɛnwomenlelielɛ Kenle ne dole ɛkɛ manle sonla ye ɛkpazilɛ; na tɛ Ɛnwomenlelielɛ Kenle ne ati a bɛbɔle sonla a.

²⁸Zɔhane ati medame Sonla Ra, melɛ tumi wɔ Ɛnwomenlelielɛ Kenle ne azo noko.”