Read Nzema Mak 4 Bible Online

Mak 4 - Nzema bible

Mak 4

¹ Gyisɛse eza bɔle ɔ bo bieko hilehilele wɔ Galeli Tandane ne anloa. Menli dɔɔnwo rayiale ɔ nwo ɛkɛ. Bɛzonle somaa la ati ɔhɔdɛnlanle ɛlɛne nu wɔ azule ne anye, yɛɛ menli ne noko dede azule ne anloa.

²Ɔvale mrɛlɛbulɛ ɔhilehilele bɛ ninyɛne dɔɔnwo, na ye ngilehilelɛ ne anu ɔzele bɛ kɛ:

³“Bɛdie! Nrenya bie hɔle kɛ ɔkagua ma.

⁴Ɔgua la, ma ne bie guale adenle nu, na nloma rasusole.

⁵Bie guale awolɛ nu, ɛleka mɔɔ anwea anzo la, na ndɛndɛ ne ala bɛfifile, ɔluakɛ azɛlɛ ne ɛmpi;

⁶na mɔɔ ewia ne vile hanle bɛ la, bɛyelale, ɔluakɛ bɛ ndinli ne andwu azɛlɛ bo.

⁷Bie mɔ guale mbowule nu, na mbowule ne nyinle hedale bɛ nwo zo, yemɔti bɛanzo ma.

⁸Akee ma ne bie noko guale azɛlɛ kpalɛ zo, na bɛfifile, bɛnyinle, na bɛzole ma: bie mɔnwo abulasa, bie mɔnwo abulasia, yɛɛ bie mɔnwo ɛya.”

⁹Gyisɛse hanle zɔle zolɛ kɛ, “Bɛdabɛ mɔɔ bɛlɛ ɛnzonlɛ la, bɛdie!”

¹⁰Akee mɔɔ ɔhale Gyisɛse angome la, menli mɔɔ li ɔ nzi la bie mɔ mɔɔ dele ye edwɛkɛ ne la nee ye ɛdoavolɛma bulu nee nwiɔ ne rabizale ye ɛrɛlɛ ne abo.

¹¹Ɔbuale bɛ kɛ, “Bɛmɛ, Nyamenle ɛla ye belemgbunlililɛ ne anwo edwɛkɛ ne mɔɔ vea la ali wienyi ɛhile bɛ, na bɛdabɛ mɔɔ bɛmbikye me la, bɛte ye wɔ mrɛlɛ nu,

¹² amaa ‘Bɛnea, bɛnea a, bɛannwu ye, bɛtie, bɛtie a, bɛande ɔ bo. Anrɛɛ bɛkɛzia bɛkɛra Nyamenle ɛkɛ, na ɔkɛva bɛ ɛtane ne mɔ ɔkɛhyɛ bɛ.’ ”

¹³Akee Gyisɛse bizale bɛ kɛ, “Bɛnde ɛrɛlɛ ɛhye abo ɔ? Ɛnee kɛ ɔkɛyɛ na bɛade ɛrɛlɛ biala abo ɛ?

¹⁴Nrenya ne gua Nyamenle edwɛkɛ ne.

¹⁵Menli ne bie mɔ le kɛ ma ne mɔɔ gua adenle nu la; menli ɛhye mɔ te edwɛkɛ ne a, ndɛndɛ ne ala Seetan baye fi bɛ adwenle nu.

¹⁶Zɔhane ala yɛɛ menli ne bie mɔ le kɛ ma ne mɔɔ gua awolɛ nu la a. Menli ɛhye mɔ te edwɛkɛ ne a, ndɛndɛ ne ala bɛfa fɛlɛko bɛdie bɛto nu.

¹⁷Na kɛmɔ edwɛkɛ ne ɛnnyia debie mɔɔ le kɛ ndinli wɔ bɛ nu la ati, bɛngyinla bɛngyɛ. Saa anwongyelelɛ ba anzɛɛ edwɛkɛ ne ati aleɛabo amra yɛ bɛ kpɔdekpɔde a, ɛnee bɛkpo aze.

¹⁸Menli ne bie mɔ le kɛ ma ne mɔɔ gua mbowule nu la, menli ɛhye mɔ te edwɛkɛ ne,

¹⁹na ɛbɛlabɔlɛ ye anwo adwenleadwenle, anyiabɛnwo ɛhulolɛ, nee ninyɛne mgbane mgbane nwo atiakunluwɔzo fo keda edwɛkɛ ne azo, ɛhye ati bɛnzo ma.

²⁰Akee menli ne bie mɔ noko le kɛ ma ne mɔɔ gua azɛlɛ kpalɛ zo la. Menli ɛhye mɔ te edwɛkɛ ne, bɛdie bɛto nu, na bɛso ma: bie mɔnwo abulasa, bie mɔnwo abulasia, yɛɛ bie mɔnwo ɛya.”

²¹ Gyisɛse bizale bɛ kɛ, “Nwane a sɔ kɛnlaneɛ na ɔfa bondo ɔbutu zolɛ anzɛɛ ɔfa ɔsie mgba bo na ɔnva ɔnzie debie zo anwuma a?

²² Debie biala mɔɔ vea la bala ali wienyi, yɛɛ mɔɔ bɛheda zolɛ la anwo bala zo.

²³Bɛdabɛ mɔɔ bɛlɛ ɛnzonlɛ la, bɛdie!”

²⁴ Eza ɔzele bɛ kɛ. “Bɛdie ye boɛ! Mɔɔ ɛsuzu ɛmaa awie mɔ la yɛɛ Nyamenle banlea zolɛ azuzu amaa wɔ a, na wɔmɔ bɔbɔ ɛbanyia ye molozo.

²⁵ Ɔluakɛ mɔɔ lɛ bie la bɛbamaa ye bie yeaboka nwo, yɛɛ mɔɔ ɛnlɛ bie la, ekyi ne bɔbɔ mɔɔ ɔlɛ la, bɛbalie bɛavi ɔ sa nu.”

²⁶Gyisɛse hɔle zolɛ zele bɛ kɛ, “Nyamenle belemgbunlililɛ ne le kɛ nrenya bie mɔɔ gua ma wɔ ye ɛya nu la.

²⁷Aledwolɛ nu ɛnee yela. Aleɛ kye noko a ɔdwazo ɔduolua, na ɛnee ye ma ne mɔ mɔɔ yegua la ɛlɛfifi na bɛlɛnyi, noko ɔnze kɛ bɛyɛ bɛnyi a.

²⁸Azɛlɛ ne maa mbaka ne nyi na bɛso ma. Saa awule a, ɔbalumua yeawɔlɔ, yeanrenzɛ na nzinlii yeatulu mralɛ.

²⁹ Awule ne bolo a nrenya ne kɔte, ɔluakɛ ɛnee ɛbuhenle ne ɛdwu.”

³⁰Akee Gyisɛse bizale bɛ kɛ, “Duzu a yɛva yɛdo Nyamenle Belemgbunlililɛ ne anwo a? Duzu ɛrɛlɛ a yɛva yɛhile nu a?

³¹Ɔle kɛ baka ma nretee bie. Mekɛ mɔɔ bɛdua la ɛnee ɔle ma muala anu nretee kpalɛ kpalɛ,

³²noko nzinlii ɔfifi, ɔnyi, na ɔyɛ baka kpole ɔtɛla mbaka muala, ɔkpakye ngane mgbole na nloma bayɛ bɛ sane wɔ zolɛ.”

³³Gyisɛse vale mrɛlɛ mɔɔ le kɛ ɛhye mɔ la dɔɔnwo mɔɔ menli ne adwenle so nu la bɔle edwɛkɛ ne nolo hilele bɛ.

³⁴Mrɛlɛ nu ngome a ɔdendɛle ɔhilele bɛ a, na saa ɔka ɔdaye nee ye ɛdoavolɛma ne mɔ angome a akee yeahilehile bɛ mrɛlɛ ne mɔ abo.

³⁵Kenle ko ne nɔsolɛ nu, Gyisɛse zele ye ɛdoavolɛma ne mɔ kɛ, “Bɛmaa yɛpɛ yɛhɔ tandane ne anzi lɔ.”

³⁶Yemɔti bɛgyakyile menli dɔɔnwo ne ɛkɛ ne na bɛvole ɛlɛne ne mɔɔ Gyisɛse dɛnlanle nu la anu kɛ bɛkɔ. Nlɛne gyɛne noko bokale bɛ nwo.

³⁷Yeangyɛ biala yɛɛ ahumu kpole bie dwazole a, azɛlɛkye bule guale ɛlɛne ne anu, mɔɔ ɛnee ɔkpondɛ yeazia a.

³⁸Mekɛ ne anu ɛnee Gyisɛse la ɛlɛne ne abo lɔ, ɔ ti zɔ esumi na yelafe. Ye ɛdoavolɛma ne hɔdunwuele ye zele kɛ, “Kilehilevolɛ, ɔnvane ɛ nwo kɛ yɛwie wu ɔ?”

³⁹Gyisɛse dwazole na ɔdeanle ahumu ne nu na ɔzele azɛlɛkye ne mɔ kɛ, “Bɛgua diinyi!” Ɛkɛ ne ala ahumu ne gyakyile ɛdulɛ na maanle nu gyinlanle diinyi.

⁴⁰Na Gyisɛse bizale ye ɛdoavolɛma ne mɔ kɛ, “Duzu ati a bɛ ahonle ɛdu zɛhae ɛ? Ɛnɛ nee ɛnɛ ala bɛnlɛ diedi ɔ?”

⁴¹Na ɛzulolɛ kpole hanle bɛ manle bɛbizale bɛ nwo ngoko kɛ, “Duzu sonla bɔbɔ a le ɛhye, mɔɔ anwoma nee nyevile tie ye a?”