Read Nzema Mak 9 Bible Online

Mak 9 - Nzema bible

Mak 9

¹Na ɔhanle ɔzɔle zolɛ kɛ, “Bɛhakye ɛhye! Bie mɔ gyi bɛ avinli ɛke mɔɔ bɛnrɛwu kɔkpula kɛ bɛkɛnwu Nyamenle belemgbunlililɛ ne kɛ yera zo wɔ tumi nu.”

² Kenle nsia pɛle nu la, Gyisɛse vale Pita, Gyemise, yɛɛ Dwɔn hɔle boka tendenle bie azo, bɛ ngome ala a bɛwɔ ɛkɛ a. Na bɛnwunle kɛ Gyisɛse ɛhakyi bɛ nye zo,

³na ye tɛladeɛ ne ɛyɛ nwohyee mɔɔ awie biala mɔɔ wɔ aleɛabo la ɛnrɛhola ɛnrɛkpo ɛnrɛmaa ɔnrɛyɛ zɔhane a.

⁴Ɛdoavolɛma nsa ne nwunle Mosisi nee Yilaegya kɛ bɛ nee Gyisɛse ɛlɛtendɛ.

⁵Na Pita hanle hilele Gyisɛse kɛ, “Kilehilevolɛ, ɔle kpalɛ kɛ yɛwɔ ɛke a. Yɛbabɔ nzeseɛ nsa, wɔ ɛdeɛ ko, Mosisi ɛdeɛ ko, yɛɛ Yilaegya ɛdeɛ ko.”

⁶Ɛnee ɔdaye mumua ne ɔnnwu edwɛkɛ ko mɔɔ ɔha a, ɔboalekɛ ɛnee ɛzulolɛ kpole ɛha ye nee ɔ gɔnwo mɔ.

⁷ Amungu rahedale bɛ nwo zo, na ɛnelɛ bie dendɛle amungu ne anu zele kɛ, “Me ra mɔɔ mekulo ye la ɛne, bɛdie ye!”

⁸Ɛkɛ ne ala bɛtotole bɛ nye, noko bɛannwu awie biala kɛ Gyisɛse angome mɔɔ bɛ nee ye gyi ɛkɛ ne la ala.

⁹Na bɛvi boka ne azo bɛlɛdwu la, Gyisɛse bɔle ye ɛdoavolɛma ne anloa kɛ, “Bɛmmaka mɔɔ bɛnwu ye la bɛkile awie biala, kɔkpula mekɛ mɔɔ Sonla Ra ne vi ewule nu kɛdwazo la.”

¹⁰Bɛlile ye edwɛkɛ ne azo, na bɛdabɛ ngome bɛdwenledwenlenle mɔɔ zile la anwo kɛ, “Ɛnee ewudwazo ɛhye a le duzu?”

¹¹ Na bɛbizale Gyisɛse kɛ, “Duzu ati a mɛla kilehilevolɛma ne mɔ se ɔwɔ kɛ Yilaegya dumua ba ɛ?”

¹²Ɔbuale bɛ kɛ, “Ɔwɔ kɛ amgba Yilaegya dumua ba batoto ninyɛne muala boɛ. Na duzu ati a Nyamenle Edwɛkɛ ne ka kɛ Sonla Ra ne banwu amaneɛ somaa, na menli akpo ye ɛ?

¹³Memaa bɛade kɛ Yilaegya zɔhane ɛra dɛbadɛba, noko menli ambu ye, bɛyɛle ye mgbane mgbane, kɛmɔ Nyamenle Edwɛkɛ ne ka ye wɔ ɔ nwo la.”

¹⁴Mɔɔ bɛradole ɛdoavolɛma mɔɔ ɛha la, bɛnwunle kɛ menli somaa ɛbɔ ɛyia bɛ, na mɛla kilehilevolɛma nee bɛ ɛlɛsu kpolera.

¹⁵Menli ne mɔ nwunle Gyisɛse la ɔzinle bɛ nwo na bɛnriandile bɛhɔzomanle ye bie.

¹⁶Gyisɛse bizale ɛdoavolɛma ne kɛ, “Duzu anwo kpolera a bɛ nee menli ne mɔ ɛlɛsu a?”

¹⁷Nrenya ko mɔɔ wɔ menli ne anu la zele kɛ, “Kilehilevolɛ, menvale me ra nrenya membale, ɔluakɛ sunsum ɛtane mɔɔ ɔmmaa ɔngola tendɛ la wɔ ɔ nwo.

¹⁸Kenle biala mɔɔ sunsum ɛtane ne kɛdwu aze la, ɔmaa kakula ne pɛ fi, ɔ nloa wu awubue, ɔtwi ɔ gye na ɔsa ketee. Menzele wɔ ɛdoavolɛma ne mɔ kɛ bɛdu sunsum ɛtane ne wɔ ɔ nwo, na bɛangola.”

¹⁹Gyisɛse zele bɛ kɛ, “Bɛmɛ mɔɔ bɛnlɛ diedi a! Me nee bɛ ɛdɛnla ɔhɔkpula kenlenzu? Menyia bɛ nwo abotane ɔhɔkpula kenlenzu? Bɛva kakula ne bɛrɛlɛ me!”

²⁰Na bɛvale ye bɛrale. Sunsum ɛtane ne nwunle Gyisɛse ala la yɛɛ ɔmanle kakula ne dɔle mgbutike a. Ɔhundohundole ɔ nwo aze na ɔ nloa wule awubue.

²¹Na Gyisɛse bizale kakula ne ɔ ze kɛ, “Ɔvale zɛhae ɛyɛlɛ la yehyɛ ɔ?” Nrenya ne buale kɛ, “Ye nretee ne anu ala yɛɛ ɔvale ye a.

²²Mekɛ dɔɔnwo, yevuandi ye yedo nzule nee senle nu, mɔɔ anrɛɛ ɔwɔ kɛ ɔwu a. Na saa ɛkola debie biala yɛ a, ɛnee nwu yɛ anwunvɔne na boa yɛ.”

²³Gyisɛse zele ye kɛ, “Saa ɛkola a? Sonla mɔɔ lɛ diedi la kola yɛ debie biala.”

²⁴Na ndɛndɛ ne ala kakula ne ɔ ze hanle kɛ,[6] “Melɛ diedi, na ɔle ekyi. Boa me maa me diedi ɛnyi.”

²⁵Gyisɛse nwunle kɛ menli dɔɔnwo ɛlɛba arahyele bɛ nwo zo la, ɔdeanle sunsum ɛtane ne nu na ɔzele ye kɛ, “Sunsum mumule, ɛvi kakula nrenya ye anwo tu, mmabawolo ye bieko!”

²⁶Na sunsum ɛtane ne deɛdeanle nuhua maanle kakula ne dɔle mgbutike bieko, na ɔvi ɔ nwo ɔdule. Kakula ne yɛle kɛ sonla mɔɔ ɛwu la, na awie biala hanle kɛ, “Yewu!”

²⁷Na Gyisɛse zɔle ɔ sa manle ye zo na ɔdwazole ɔgyinlanle.

²⁸Gyisɛse hɔle sua nu la ye ɛdoavolɛma ne bizale ye kɛ, “Duzu ati a yɛangola sunsum ɛtane ne tu ɛ?”

²⁹Ɔbuale bɛ kɛ, “Debie biala ɛngola sunsum ɛtane ɛhye tu, kyesɛ nzɛlɛlɛ ala.”[7]

³⁰Gyisɛse nee ye ɛdoavolɛma ne vile ɛkɛ ne na bɛhɔvale Galeli bɛhɔle. Yeangulo kɛ awie biala kɛnwu ɛleka mɔɔ ɔwɔ la,

³¹ɔboalekɛ ɛnee ɔlɛkilehile ye ɛdoavolɛma ne kɛ, “Bɛbaye Medame Sonla Ra bɛawula menli sa nu bɛamaa bɛahu me, na ye kenle nsa ne anzi mebadwazo meara ngoane nu.”

³²Ɛdoavolɛma ne ande ngilehilelɛ ɛhye abo, noko akee bɛzulole kɛ bɛkɛbiza ye ɔ bo.

³³Nzinlii bɛrale Kapɛnayɛm, na bɛhɔle sua nu la Gyisɛse bizale ye ɛdoavolɛma ne kɛ, “Duzu a bɛzule nwolɛ kpolera wɔ adenle nu la?”

³⁴ Na bɛanye ye ɔ nloa, ɔluakɛ bɛlua adenle ne anu la ɛnee bɛlɛsu kpolera kɛ bɛ nuhua boni a le kpole wɔ bɛ avinli a.

³⁵ Yemɔti Gyisɛse dɛnlanle aze, ɔvɛlɛle ye ɛdoavolɛma bulu nee nwiɔ ne na ɔzele bɛ kɛ, “Awie biala mɔɔ kpondɛ menli ti ali la ɛli bɛ nzi na ɔzonle awie biala.”

³⁶Akee ɔvale kakula ko ɔziele bɛ nyunlu ɛkɛ, ɔvale ɔ sa ɔdole ɔ kɔme na ɔzele kɛ,

³⁷ “Awie biala mɔɔ ɔlua me ti ɔkɛlie ɛhye mɔ ko la, ɛlie me, na mɔɔ kɛlie me la, ɛtɛdiele me ngome, ɛnee yelie ahenle ne mɔɔ zoanle me la noko.”

³⁸Dwɔn zele Gyisɛse kɛ, “Kilehilevolɛ, yɛnwunle nrenya bie kɛ ɔlɛ wɔ duma ɔlɛtu mbɔnsam, na yɛduale ye, ɔluakɛ ɔmboka yɛ nwo.”

³⁹Gyisɛse zele bɛ kɛ, “Bɛmmatua ye, ɔluakɛ awie biala ɛnrɛhola ɛnrɛyɛ nwanwane debie wɔ me duma nu na nzinlii yeaha me nwo edwɛkɛ ɛtane.

⁴⁰ Awie biala mɔɔ ɛngyi yɛ la wɔ yɛ afoa.

⁴¹ Bɛhakye ɛhye! Awie biala mɔɔ ɔluakɛ bɛle Kelaese ne ɛdeɛ la ati ɔkɛmaa bɛ nzule bɛkɛnlo la kɛnyia ahatualɛ wɔ nwolɛ.

⁴²“Awie biala mɔɔ kɛgyegye menli mɔɔ bɛ diedi mɔɔ wɔ me nu la le kɛ ngakula ɛhye mɔ anu ko, na ɔkɛmaa ɔkɛminli ye diedi ne la, ɛnee noko ɔle kpalɛ kɛ anrɛɛ bɛdwele ɛdibolɛ ɛnlomboɛ kpalɛ bɛhendanle ɔ kɔme na bɛvuandinle ye bɛdole nyevile nu.

⁴³ Yemɔti saa ɛ sa ko twehwe wɔ ahɔ ɛtane nu a, pɛ ye to! Ɔle kpalɛ kɛ ɛ sa ko na ɛkɛnyia ngoane tɛla kɛ ɛ sa nwiɔ na ɛkɛhɔ senle ne mɔɔ ɛnnu ɛlɛ la anu. [

⁴⁴Ɛkɛ ne azonlɛ ɛnwu ɛlɛ, yɛɛ ye ndeanlɛ senle ne ɛnnu ɛlɛ.]

⁴⁵Saa ɛ gyakɛ gyegye wɔ ahwe wɔ ahɔ ɛtane nu a, pɛ ye to! Ɔle kpalɛ kɛ ɛ gyakɛ ko na ɛkɛnyia ngoane tɛla kɛ ɛ gyakɛ nwiɔ na bɛkɛvuandi wɔ bɛkɛdo senle ne mɔɔ ɛnnu ɛlɛ la anu a. [

⁴⁶Ɛkɛ ne azonlɛ ɛnwu ɛlɛ, yɛɛ ye ndeanlɛ senle ne ɛnnu ɛlɛ.]

⁴⁷ Saa ɛ nye noko a twehwe wɔ ahɔ ɛtane nu a, tu ye to! Ɔle kpalɛ kɛ ɛ nye ko na ɛkɛnyia Nyamenle belemgbunlililɛ ne tɛla kɛ ɛ nye nwiɔ na bɛkɛvuandi wɔ bɛkɛdo senle ne mɔɔ ɛnnu ɛlɛ la anu a.

⁴⁸ Ɛkɛ ne azonlɛ ɛnwu ɛlɛ, yɛɛ ye ndeanlɛ senle ne ɛnnu ɛlɛ.

⁴⁹“Bɛbava ndɛnebualɛ senle ne bɛade awie biala anwo kɛ bɛfa ngyenle bɛte azubɔdeɛ nwo la.

⁵⁰ “Ngyenle le kpalɛ; na saa ɔta a, kɛ ɛkɛzi ɛkɛyɛ na yeayɛ menlemenle bieko ɛ? “Bɛmaa bɛ ɛbɛlabɔlɛ ne ɛyɛ kɛ ngyenle, ɛde bɛ, na bɛ nee menli kɔsɔɔti ɛdɛnla anzonudwolɛ nu.”