Read Nzema Luk 1 Bible Online

Luk 1 - Nzema bible

Luk 1

¹Nana Tiyɔfelɛse. Menli dɔɔnwo ɛbɔ mɔdenle ɛhɛlɛ ninyɛne mɔɔ ɛsisi yɛ nwo ɛke la anwo bie.

²Bɛhɛlɛle ninyɛne mɔɔ bɛdabɛ mɔɔ mɔlebɛbo ne bɛnwunle ye bɛ nye zo na bɛbɔle ye nolo la hanle hilele yɛ la.

³Zɔhane ati, Nana, kɛmɔ medame noko menleɛnlea ninyɛne ɛhye mɔ anu boɛ, ɔvi bɛ mɔlebɛbo ne la, medwenle nwolɛ kɛ ɔle kpalɛ kɛ menwɔhɛlɛ ye fɔɔnwo ne ala menwɔmaa wɔ.

⁴Meyɛ ɛhye amaa wɔanwu nɔhalɛ mɔɔ wɔ ninyɛne ɛhye mɔ mɔɔ bɛhilehilele wɔ la anu.

⁵Mekɛ mɔɔ Hɛlɔdo di belemgbunli wɔ Dwudiya maanle ne anu la, ɛnee sɛlɛvolɛ bie wɔ ɛkɛ, bɛfɛlɛ ye Zɛkalaya.[1] Sɛlɛvolɛ ɛhye vi Abaegya sɛlɛvolɛma ekpunli ne anu. Bɛfɛlɛ ɔ ye Ɛlezabɛte. Ɔdaye noko ɔvi Sɛlɛvolɛ Kpanyinli ne mɔɔ lumua, mɔɔ bɛfɛlɛ ye Aalɔn la abusua nu.

⁶Bɛ mu nwiɔ bɛbɔle ɛbɛla kpalɛ mɔɔ nwolɛ te la wɔ Nyamenle anyunlu, na bɛlile Nyamenle mɛla ne mɔ azo bɔkɔɔ.

⁷Bɛnlɛ ralɛ, ɔluakɛ ɛnee Ɛlezabɛte le mota, yɛɛ bɛ mu nwiɔ bɛwie mrelera yɛ.

⁸Kenle ko bie, ɛnee Zɛkalaya sɛlɛvolɛ ekpunli ne a yɛ gyima a, na eza yedwu Zɛkalaya anwo zo wɔ bɛ dahudahu ɛzonlenlɛ gyima ne anu, na ɔlɛyɛ ye sɛlɛvolɛ gyima ne wɔ Nyamenle anyunlu.

⁹Kɛmɔ sɛlɛvolɛma ngyehyɛlɛ ne de la, bɛguale nzeleba ne la ɔbɔle Zɛkalaya kɛ yemɔ a ɔwɔ kɛ ɔkpu ɛyɛlɛ wɔ azukponle ne azo a. Yemɔti ɔhɔwolole Ɛzonlenlɛ Sua ne anu na ɔhɔle Awulae azukponle ne anwo

¹⁰kɛ ɔkakpu ɛyɛlɛ. Mekɛ ne anu ɛnee menli gua alie nwo nehane na bɛlɛsɛlɛ.

¹¹Arɛlevilɛ nu ala Nyamenle soanvolɛ bie yele ɔ nwo hilele ye, ɔragyinlanle azukponle ne fema zo, ɛleka mɔɔ bɛkpu ɛyɛlɛ ne la.

¹²Zɛkalaya nwunle ye la, ɔbɔle mgbatike na ɛzulolɛ hanle ye.

¹³Nyamenle soanvolɛ ne zele ye kɛ, “Zɛkalaya, mmasulo! Nyamenle ɛde wɔ nzɛlɛlɛ ne, ɛ ye Ɛlezabɛte bawo ralɛ nrenya, na ɛbavɛlɛ ye Dwɔn.

¹⁴Bɛwo ye a ɛ nye balie, yɛɛ menli dɔɔnwo noko bali fɛlɛko kɛ bɛwo ye a.

¹⁵Ɔbayɛ sonlakpole wɔ Awulae anyunlu. Ɔnle kɛ ɔno nwanye anzɛɛ nza ɛsesebɛ biala. Sunsum Nwuanzanwuanza ne bawolo ye, bɔbɔ, wɔ mekɛ mɔɔ ɔla ɔ nli akunlu la.

¹⁶Na ɔbahwe Yizilayɛma dɔɔnwo yeamaa bɛazia bɛara Awulae bɛ Nyamenle ne ɛkɛ.

¹⁷ Ɔbalumua Awulae anyunlu wɔ sunsum nee tumi nu kɛ Nyamenle kpɔmanvolɛ Yilaegya la. Ɔbamaa selɛma nee bɛ mra abɔ nu bieko; ɔbamaa anzosesebɛma azia arava Nyamenle adenle fɔɔnwo ne azo, na yeaziezie Awulae menli ne yeamaa ye.”

¹⁸Zɛkalaya bizale Nyamenle soanvolɛ ne kɛ, “Kɛkala mɔɔ me nee me ye yɛwie mrelera yɛ la, ɛnee kɛ ɔkɛyɛ na meanwu ɛhye nɔhalɛ ɛ?”

¹⁹Nyamenle soanvolɛ ne buale kɛ, “Mame a mele Nyamenle soanvolɛ kpanyinli ne mɔɔ bɛfɛlɛ ye Geebeleɛle la. Mame a megyi Nyamenle anyunlu a, yɛɛ yezoa me kɛ menva nrɛlaleɛ fɛlɛko ɛhye membɛlɛ wɔ a.

²⁰Na wɔanlie me nrɛlaleɛ ne mɔɔ ye mekɛ dwu a ɔbayɛ zɔhane la wɔanli. Zɔhane ati sɛkɛlɛneɛ ne mɔɔ ɛkpondɛ la, yemɔ ɛne! Ɛbadɔ mumule kɔkpula mekɛ mɔɔ ɛwɔkɛ ne kɛyɛ ɛkɛ la.”

²¹Menli ne hendɛle dedee na Zɛkalaya ɛmba la, ɔyɛle bɛ azibɛnwo kɛ yehyɛ Ɛzonlenlɛ Sua ne anu zɛhae a.

²²Nzinlii mɔɔ ɔvindele la, yeangola yeandendɛ yeangile bɛ, ɔvale ɔ sa a ɔyɛle sɛkɛlɛneɛ ɔhilele bɛ a, na bɛnyianle adwenle kɛ yenwu ɛnyelɛzodeɛnwunlɛ bie wɔ Ɛzonlenlɛ Sua ne anu.

²³Mɔɔ ye ɛzonlenlɛ gyima mekɛ ne wiele la, ɔhɔle ye sua nu.

²⁴Yeangyɛ biala yɛɛ Ɛlezabɛte nrenzɛle a, ɔveale sua nu toonwo siane nnu

²⁵na ɔzele kɛ, “Awulae ɛboa me kpole, yeamaa menli angɔ zo anzi me amgbu kɛ mele mota.”

²⁶Ɛlezabɛte nyianle siane nsia la Nyamenle zoanle ye soanvolɛ Geebeleɛle wɔ Galeli maanzinli nu, wɔ sua ne mɔɔ bɛfɛlɛ ye Nazalɛte la azo.

²⁷Ɔvale nrɛlaleɛ ɔhɔmanle bɛlɛra bie mɔɔ ɛnee ɛnze nrenya na nrenya bie mɔɔ bɛfɛlɛ ye Dwosefi, mɔɔ vi Belemgbunli Devidi abusua nu la ɛyia ye la. Bɛlɛra ne duma a le Mɛle.

²⁸Nyamenle soanvolɛ ne rale ɔ nwo ɛkɛ ne na ɔzele ye kɛ, “Ɔmɔ mɔɔ Nyamenle ɛlo wɔ a, ahye o! Awulae nee wɔ de, na yeyila wɔ kpole!”[2]

²⁹Mɛle dele soanvolɛ ne ahyebizalɛ ne la, ɔ ti akunlu yɛle ye kesee, na ɔdwenlenle deɛ mɔɔ zɛhae ahyebizalɛ ne kile la anwo.

³⁰Nyamenle soanvolɛ ne zele ye kɛ, “Mɛle, mmasulo, ɔluakɛ Nyamenle ɛlo wɔ kpole.

³¹ Nea, ɛbanrenzɛ wɔawo ralɛ nrenya, na ɛbavɛlɛ ye Gyisɛse.

³² Ɔbayɛ kpole na bɛavɛlɛ ye Anwuma Anwuma Nyamenle ne Ara. Awulae Nyamenle bayɛ ye belemgbunli kɛ ɔ nlenya Devidi la,

³³na ɔbali Gyekɔbo abo zo amra anwo zo belemgbunli mekɛ mɔɔ ɛnlɛ awieleɛ. Ye belemgbunlililɛ ɛnrɛbɔ aze ɛlɛ.”

³⁴Mɛle hanle hilele Nyamenle soanvolɛ ne kɛ, “Yɛmenle, menze nrenya, na kɛ ɔkɛyɛ na ɛhye ayɛ ɛkɛ ɛ?”

³⁵Nyamenle soanvolɛ ne buale ye kɛ, “Sunsum Nwuanzanwuanza ne bara ɛ nwo zo, na Nyamenle tumi ne baheda ɛ nwo zo. Ɛhye ati bɛbavɛlɛ kakula ne Nwuanzanwuanza, yɛɛ Nyamenle Ara.

³⁶Nea, wɔ busuanli Ɛlezabɛte, mɔɔ ɛnee bɛfɛlɛ ye mota na yewie ɛrelera yɛ bɔbɔ la ɛnrenzɛ, ye siane nsia a la zolɛ la.

³⁷Ɔluakɛ debie biala ɛnle ɛkɛ mɔɔ Nyamenle ɛnrɛhola ɛnrɛyɛ a.”

³⁸Mɛle hanle kɛ, “Yɛmenle, Awulae sonvolɛ a le me; mɔɔ wɔha la ɛyɛ zɔhane ɛmaa me.” Na Nyamenle soanvolɛ ne hɔle.

³⁹Mekɛ ne anu Mɛle hanle ɔ nwo hɔle Zɛkalaya sua zo wɔ Dwudiya maanzinli nu suakpole bie azo. Dwudiya le maanle mɔɔ awoka wɔ nu kpalɛ a.

⁴⁰Mɛle dwule ala la, ɔhɔle Zɛkalaya sua nu na ɔhɔbizale Ɛlezabɛte ahye.

⁴¹Mɔɔ Ɛlezabɛte dele Mɛle ahyebizalɛ ne la, ɔ ra ne mɔɔ la ɔ kunlu la hanle ɔ nwo, Sunsum Nwuanzanwuanza ne wolole Ɛlezabɛte

⁴²na ɔmanle ɔ ne zo ɔzele kɛ, “Bɛyila wɔ kpole wɔ mraalɛ muala avinli, na bɛyila ralɛ ne mɔɔ la ɛ kunlu la.

⁴³Debie kpole ɛhye vi nienwu a ɛrado me a, kɛ me Awulae ɔ nli kɛra me ɛkpɔlalɛ?

⁴⁴Mɔɔ mendele wɔ ahyebizalɛ ne ala la yɛɛ ralɛ ye mɔɔ la me kunlu la vale fɛlɛkolilɛ hanle ɔ nwo a.

⁴⁵Nyilalɛ ɛha wɔ kɛ ɛliele ɛlile kɛ mɔɔ Awulae hanle hilele wɔ la bayɛ zɔhane a.”

⁴⁶ Na Mɛle hanle kɛ, “Me ɛkɛla yeyɛ Awulae

⁴⁷yɛɛ me sunsum di fɛlɛko wɔ Nyamenle, me Ngoanedievolɛ ne ati,

⁴⁸ɔluakɛ yebu ye sonvolɛ awienvolɛ mɔɔ le kɛ medame la bie, na ɔvi ɛnɛ mɔɔ kɔ la awolɛndoazo kɔsɔɔti bavɛlɛ me saleɛnli.

⁴⁹Tumivolɛ Nyamenle ne ɛyɛ ninyɛne mgbole ɛmaa me. Ye duma a le Nwuanzanwuanza;

⁵⁰mekɛ biala ɔse bɛdabɛ mɔɔ bɛsulo ye la anwunvɔne.

⁵¹Yedenrɛ ye tumi ɛsalɛ ne, na yebɔ bɛdabɛ mɔɔ bɛmemaa bɛ nwo zo la asande, yezɛkye bɛ ngyehyɛlɛ ne mɔ.

⁵²Yemaa katakyiema vi bɛ arelemgbunli mbia zo ɛdu ɛgua, na yekpogya awienvolɛma zo.

⁵³Yemaa bɛdabɛ mɔɔ ɛhɔne ɛlɛku bɛ la ninyɛne kpalɛ yemaa bɛ ko ɛyi, na yeye sukoavolɛma ali yemaa bɛlɛ bɛ sa mgbane.

⁵⁴Yeli ye ɛwɔkɛ ne mɔɔ ɔbɔle yɛ nlenya mɔ la azo, na yera kɛ ɔbaboa ye sonvolɛ Yizilayɛ.

⁵⁵Ɔ rɛle anvi kɛ ɔkɛze Ebileham nee ɔ bo zo amra anwunvɔne kɔkpula mekɛ mɔɔ ɛnlɛ awieleɛ.”

⁵⁶Mɛle nee Ɛlezabɛte dɛnlanle kɛyɛ siane nsa na yeazia yeahɔ ye sua zo.

⁵⁷Mekɛ dwule kɛ ɔwɔ kɛ Ɛlezabɛte bɔ ɛkolɛ, na ɔwole ralɛ nrenya.

⁵⁸Ye kpalɛzo amra nee ɔ nwo amra dele kɛ Awulae ɛhile ye ɛlolɛ kpole na bɛ nee ye lile nwolɛ fɛlɛko.

⁵⁹Ye kenle mɔtwɛ ne azo, bɛyɛle kakula ne mrenyanu nzonlɛ, na bɛyɛle kɛ bɛfa ye bɛado ɔ ze Zɛkalaya.

⁶⁰Na ɔ nli hanle kɛ, “Kyɛkyɛ, ye duma a le Dwɔn.”

⁶¹Bɛzele ye kɛ, “Awie ɛnle wɔ abusua ne anu mɔɔ bɛfɛlɛ ye zɔhane a!”

⁶²Yemɔti bɛyɛle sɛkɛlɛneɛ bɛhilele ɔ ze bɛbizale ye duma holɛ ko mɔɔ ɔkulo kɛ bɛfa bɛfɛlɛ kakula ne la.

⁶³Zɛkalaya bizale bɛ liele taboa mɔɔ bɛkɛlɛ zolɛ la, na ɔhɛlɛle zo kɛ, “Ye duma a le Dwɔn.” Ɛhye yɛle bɛ muala azibɛnwo.

⁶⁴Ɛkɛ ne ala Zɛkalaya holale dendɛle bieko na ɔbɔle ɔ bo kɛ ɔye Nyamenle ayɛlɛ.

⁶⁵Ɛzulolɛ hanle ye kpalɛzo amra amuala, na bɛhɔhanle mɔɔ ɛzi la wɔ Dwudiya maanzinli ne anu amuala.

⁶⁶Awie biala mɔɔ dele la dwenlenle nwolɛ, ɔluakɛ ɛnee yela ɛkɛ ne wienyi kɛ Awulae tumi ne wɔ kakula ne anwo zo. Yemɔti bɛhanle kɛ, “Nɔhalɛ, kakula ɛhye bayɛ sonlakpole!”

⁶⁷Sunsum Nwuanzanwuanza ne wolole Dwɔn ɔ ze Zɛkalaya na ɔbɔle Nyamenle Edwɛkɛ ne nolo kɛ,

⁶⁸“Bɛmaa yɛye Awulae, Yizilayɛ Nyamenle ne ayɛlɛ! Yeraboa ye menli na yekpɔne bɛ.

⁶⁹Yemaa yɛ Ngoanedievolɛ kpole bie mɔɔ vi ye sonvolɛ Devidi abusua nu a.

⁷⁰Ɔluale ye kpɔmanvolɛma nwuanzanwuanza ne mɔ anwo zo ɔbɔle yɛ ɛwɔkɛ dɛba kɛ,

⁷¹ɔbalie yɛ yeavi yɛ agbɔvolɛ asa nu, nee bɛdabɛ mɔɔ bɛkyi yɛ la tumi bo.

⁷²Ɔhanle kɛ ɔbaze yɛ nlenya mɔ anwunvɔne, na ɔ rɛle ɛnrɛvi ye ngyekyeleɛ nwuanzanwuanza ne.

⁷³Ɔvuale ɔhilele yɛ nlenya Ebileham, na ɔbɔle ɛwɔkɛ kɛ ɔkɛlie yɛ ɔkɛvi yɛ agbɔvolɛ asa nu, amaa yɛazonle ye, mɔɔ ɛzulolɛ biala ɛnle nu,

⁷⁴

⁷⁵wɔ anwondelɛ nee fɔɔnwoyɛlɛ nu wɔ ɔ nyunlu wɔ mekɛ mɔɔ yɛde ngoane nu la.

⁷⁶ “Na wɔmɔ, me awolɛ, bɛbavɛlɛ wɔ Anwuma Anwuma Nyamenle ne kpɔmanvolɛ, ɔluakɛ ɛbalumua Awulae anyunlu wɔahɔziezie ye ndenle ne mɔ,

⁷⁷na wɔamaa ye menli ne anwu kɛ bɛbava bɛ ɛtane bɛahyɛ bɛ na bɛalie bɛ ngoane.

⁷⁸Ɔlua yɛ Nyamenle ne ahunlunyele kpole ti, ɔbamaa ngoanelielɛ kenle ne ado yɛ;

⁷⁹ ye wienyi ne bada bɛdabɛ mɔɔ bɛde awozinli nu nee bɛdabɛ mɔɔ bɛlɛkɔ ewule nu la anwo zo, na yealie yɛ yeava anzonudwolɛ adenle ne azo.”

⁸⁰Na kakula ne nyinle na ɔyɛle se wɔ sunsum nu. Ɔdɛnlanle fienemgbole ne anu toonwo ɔhɔkpulale kenle mɔɔ ɔyele ɔ nwo ɔhilele Yizilayɛma wɔ bagua nu la.