Read Nzema Luk 11 Bible Online

Luk 11 - Nzema bible

Luk 11

¹Kenle ko Gyisɛse hɔle ɛleka bie kɛ ɔkayɛ nzɛlɛlɛ. Ɔwiele la, ye ɛdoavolɛma ne anu ko hanle hilele ye kɛ, “Awulae, kile yɛ kɛ bɛsi bɛyɛ nzɛlɛlɛ la, kɛmɔ Dwɔn hilele ye ɛdoavolɛma ne mɔ la.”

²Gyisɛse zele bɛ kɛ, “Saa bɛyɛ nzɛlɛlɛ a bɛha ɛhye: ‘Egya, Wɔ duma ne anwo ɛde; wɔ belemgbunlililɛ ɛrɛla.

³Maa yɛ kenle biala yɛ dahuu aleɛ.

⁴Na fa yɛ ɛtane ne mɔ kyɛ yɛ, ɔluakɛ awie mɔɔ fo yɛ la, yɛfa yɛkyɛ ye. Na mmamaa yɛkɔ sɔnea nu.’ ”

⁵Na Gyisɛse zele ye ɛdoavolɛma ne kɛ, “Saa bɛ nuhua bie lɛ ɔ gɔnwo na ɔkɔ ɔ nwo ɛkɛ ne alevinli mu nwiɔ avinli ɔkɔse ye kɛ, ‘Agɔnwolɛ, fɛne me kpanwo ahunguma nsa,

⁶ɔluakɛ me gɔnwo bie vi adenle zo ɛra; menlɛ debie biala mɔɔ mefa meamaa ye a’

⁷na ɔ gɔnwo ne fea ye sua ne anu bua ye kɛ, ‘Mmagyegye me! Bɛdo anlenkɛ ne anu dɛbadɛba, yɛɛ me nee me mra yɛla; menrɛhola dwazo na meamaa wɔ debie biala.’

⁸Meka meahile bɛ: Saa anrɛɛ ɔnrɛdwazo ɔnrɛmaa wɔ kpanwo ne bie kɛmɔ ɛle agɔnwolɛ la ati bɔbɔ a, saa wɔanze ɛvɛlɛ na ɛkɔ zo ɛbiza ye a, ɔbadwazo yeamaa wɔ debie biala mɔɔ ɛhyia nwolɛ la.

⁹“Yemɔti meka meahile bɛ: Bɛbiza, na bɛ sa kɛha ye; bɛkpondɛ, na bɛkɛnwu ye; bɛbɔ nu, na bɛkɛbuke anlenkɛ ne bɛkɛmaa bɛ.

¹⁰Ɔluakɛ awie biala mɔɔ biza la asa ka ye, mɔɔ kpondɛ la nwu ye, yɛɛ bɛkɛdukue anlenkɛ ne bɛkɛmaa awie biala mɔɔ kɛbɔ nu la.

¹¹Bɛ nuhua boni yɛɛ saa ɔ ra biza ye fɛlɛ a, ɔkɛmaa ye ɛwɔlɛ a?

¹²Anzɛɛ saa ɔbiza ye kolonvia a, ɔkɛmaa ye nyamenleakɛlɛ a?

¹³Na saa bɛmɛ bɔbɔ mɔɔ bɛle ɛtanevolɛma la, bɛze kɛ ɔwɔ kɛ bɛfa ninyɛne kpalɛ bɛmaa bɛ mra a, ɛnee fane nyɛ yɛɛ Selɛ ne mɔɔ wɔ anwuma la ɛnrɛva Sunsum Nwuanzanwuanza ne ɛnrɛmaa bɛdabɛ mɔɔ bɛkɛbiza ye la ɛ?”

¹⁴Mekɛ ne anu ɛnee Gyisɛse ɛlɛtu sunsum ɛtane bie mɔɔ le mumule la avi nrenya bie anwo. Ɔdule sunsum ɛtane ne la nrenya ne bɔle ɔ bo kɛ ɔtendɛ, na ɛhye zinle menli ɛwolaa ne anwo kpole,

¹⁵ na bɛ nuhua bie mɔ zele kɛ, “Ɔdua mbɔnsam kpanyinli ne mɔɔ bɛfɛlɛ ye Biyɛlezɛbɛle la anwo zo a ɔtu mbɔnsam ne mɔ a.”

¹⁶ Menli ne bie mɔ noko mɔɔ ɛnee kpondɛ kɛ bɛsɔ Gyisɛse bɛnea la hanle kɛ ɔyɛ nwanwane sɛkɛlɛneɛ mɔɔ kile kɛ Nyamenle die ye to nu la ɔhile bɛ.

¹⁷Na Gyisɛse nwunle bɛ adwenle, na ɔzele bɛ kɛ, “Maanle biala mɔɔ anu kɛhyɛ nwiɔ la bɔ.

¹⁸Yemɔti saa Seetan ɔdaye noko ye belemgbunlililɛ ne anu gyigya na bɛko bɛtia bɛ nwo a, ɛnee kɛ ɔkɛyɛ na yeagyinla ɛ? Bɛse medua Biyɛlezɛbɛle anwo zo a metu mbɔnsam a;

¹⁹na saa adenle ɛhye azo a medua metu mbɔnsam a, ɛnee bɛmɛ, kɛ bɛ mra si tu bɛ mbɔnsam ɛ? Bɛdabɛ bɛ mra ne mɔ kile kɛ bɛvo!

²⁰Na saa medua Nyamenle tumi ne azo a metu mbɔnsam a, ɛnee ɛhye kile kɛ Nyamenle Belemgbunlililɛ ne ɛdwu bɛ nwo ɛke dɛbadɛba.

²¹“Saa katakyie siezie ɔ nwo kɛ ɔsinza ye sua a, ɛnee ye ninyɛne mɔɔ ɔlɛ la amuala anwo le kɔlɔnwo.

²²Na saa awie mɔɔ anwo yɛ se tɛla ye la ba na ɔ nee ye bɛko na ɔfo ɔ nwo zo a, ɔsesa ye konle ninyɛne ne mɔɔ le ye nzuzuguazo la ɔkɔ na ɔ nee ye ɛlɔnema bɛkyɛ ninyɛne ne mɔɔ ɔwuale la.

²³ “Awie mɔɔ ɛnle me afoa la tia me, yɛɛ mɔɔ ɛmboa ɛmmaa yɛnguohua la bɔ bɛ asande.”

²⁴Gyisɛse zɔle zolɛ hanle kɛ, “Saa sunsum ɛtane fi sonla nwo tu a, ɔduolua ɛleka reresee kɛ ɔkpondɛ ɛleka yealie ye ɛnwomenle, na saa yeannyia bie a, ɔka ɔkile ɔ nwo kɛ, ‘Mesia meahɔ me sua ne mɔɔ mevi nu menvindele la anu.’

²⁵Ɔsia ɔba na ɔbanwu kɛ bɛkpoɔkpoa nuhua bɛziezie nuhua, noko awie ɛnle nu a,

²⁶akee ɔfinde ɔkɔ na ɔkɔfa sunsum ɛtane nsuu mɔɔ le amumuyɛ tɛla ɔdaye mumua ne la ɔba na bɛbatɛnla ɛkɛ ne, na nzinlii sonla zɔhane gyinlabelɛ sɛkye kpalɛ tɛla alumua ne.”

²⁷Mɔɔ Gyisɛse hanle edwɛkɛ ɛhye la, raalɛ bie manle ɔ ne zo wɔ menli ne anu na ɔhanle kɛ, “Nyilalɛ ɛha raalɛ ne mɔɔ wole wɔ na ɔlile wɔ adane la!”

²⁸Na Gyisɛse buale kɛ, “Bɔbɔ, nyilalɛ ɛha bɛdabɛ mɔɔ bɛtie Nyamenle edwɛkɛ ne na bɛdi zolɛ la!”

²⁹ Akee mɔɔ menli ne rabɔle yiale Gyisɛse la, ɔzele bɛ kɛ, “Adwuleso amra ye le ɛtanevolɛma! Bɛkpondɛ nyamenlezo sɛkɛlɛneɛ bɛanlea, na bɛnrɛnyia bie kyesɛ Dwona sɛkɛlɛneɛ ɛdeɛ ne ala.

³⁰ Kɛmɔ Nyamenle kpɔmanvolɛ Dwona yɛle sɛkɛlɛneɛ manle Nenɛvɛma la, zɔhane ala yɛɛ medame Sonla Ra, mebayɛ sɛkɛlɛneɛ meamaa adwuleso amra noko a.

³¹ Ndɛnebualɛ Kenle ne Hyiba maanle nu Belemgbunli Raalɛ ne badwazo adoɔdoa adwuleso amra, ɔboalekɛ ɔvi ye maanle nu moa moa lɔ ɔdiale asɛɛ azɛlɛ ye foa ko na ɔradiele Sɔlɔmɔn nrɛlɛbɛ ngilehilelɛ ne; noko meka meahile bɛ, awie mɔɔ le kpole tɛla Sɔlɔmɔn la wɔ ɛke.

³² Ndɛnebualɛ Kenle ne, Nenɛvɛma badwazo adoɔdoa bɛmɛ adwuleso amra, ɔluakɛ mɔɔ bɛdele kɛ Dwona ɛlɛbɔ Nyamenle edwɛkɛ ne nolo la, bɛnlunle bɛ nwo wɔ bɛ ɛtane nwo; noko meka meahile bɛ, awie mɔɔ le kpole tɛla Dwona la wɔ ɛke!

³³ “Awie biala ɛnzɔ kɛnlaneɛ na ɔnva bondo ɔmbutu zolɛ; ɔfa ɔsie kɛnlaneɛbaka zo anwuma, amaa bɛdabɛ mɔɔ bɛba sua ne anu la bɛanwu aze.

³⁴Ɛnyelɛ le sonlabaka ne kɛnlaneɛ. Saa zolɛ te nwaanye a, sonlabaka ne anu le wienyi, yɛɛ saa zolɛ le kisii a, sonlabaka ne anu le awozinli.

³⁵Zɔhane ati bɛnlea boɛ na mɔɔ maa wienyi wɔ bɛ nu la annu, na awozinli anva bɛ.

³⁶Ɔluakɛ saa bɛ sonlabaka ne anu le wienyi, mɔɔ awozinli ɛnle ye kodoka biala anu la a, yɛɛ ɔbada kɛ kɛnlaneɛ la a.”

³⁷Gyisɛse wiele tendɛ la, Falasiima bie dole ɛsalɛ vɛlɛle ye kɛ ɔrɛla ɔmaa bɛkpula bɛ sa. Yemɔti Gyisɛse hɔle na ɔhɔdɛnlanle ɛkponle ne anwo kɛ ɔdi debie.

³⁸Falasiinli ne nwunle kɛ Gyisɛse annrinzi ɔ sa anwo, kɛmɔ bɛ mɛla ne kile la na yeabɔ ɔ bo kɛ ɔdi debie, yemɔti ɔzinle ɔ nwo.

³⁹Na Awulae zele ye kɛ, “Bɛmɛ Falasiima, bɛkpuda bɛ kanrɛlɛ nee bɛ ɛyɛba nwo, noko bɛ ahonle ne mɔ anu, atisesebɛ nee ɛtane ngome ɛyi bɛ tetɛkɛɛ.

⁴⁰Ahɔnwɔne! Asoo tɛ Nyamenle mɔɔ yɛle nwolɛ ne la a yɛle ɔ kunlu ne noko a?

⁴¹Bɛva mɔɔ ɛyi bɛ kanrɛlɛ ne mɔ nee bɛ ɛyɛba ne mɔ la bɛmaa ehyianvolɛma na debie biala anwo kɛde kɛmaa bɛ.

⁴² “Munzule ɛha bɛdabɛ Falasiima, ɔluakɛ bɛmɛ, bɛkyɛ aledonlɛ nya nya evuanlɛ mɔɔ le kɛ kabɛle nee nya nya evuanlɛ mɔɔ ɛha, mɔɔ bɛfa bɛto aleɛ la anu bulu bɛtu ko bɛmaa Nyamenle, na bɛbu bɛ nye bɛgua pɛlepɛlelilɛ nee Nyamenle anwo ɛhulolɛ zo. Ninyɛne nwiɔ ɛhye yɛɛ ɔwɔ kɛ bɛyɛ a, yɛɛ eza ɔnle kɛ bɛbu bɛ nye bɛgua alumua ɛdeɛ ne mɔ azo.

⁴³“Munzule ɛha bɛdabɛ Falasiima! Bɛmɛ, bɛkulo nyianu azua ne mɔ anu mbia ne mɔ mɔɔ wɔ ɔ nyunlu la azo ɛdɛnlanlɛ nee gua zo ahyebizalɛ mɔɔ menli bɔ bɛ ti aze abiza bɛ ahye la.

⁴⁴Munzule ɛha bɛ, ɔluakɛ bɛle kɛ aziezo sɛka mɔɔ bɛanyɛ ye nzonlɛ la, menli ɛnze la ati bɛtietia zolɛ na bɛmaa evinli ka bɛ.”

⁴⁵Mɛla kilehilevolɛma ne mɔ anu ko zele ye kɛ, “Kilehilevolɛ, saa ɛka ɛhye a, ɛnee wɔtia yɛ o!”

⁴⁶Gyisɛse buale kɛ, “Munzule ɛha bɛdabɛ mɛla kilehilevolɛma noko! Bɛmɛ, bɛkyekye adesoa ɛnlomboɛ mɔɔ bɛngola bɛ la bɛsoa menli, noko bɛndenrɛ bɛ sa ɛrɛlɛsɛka ko bɔbɔ bɛnzɔ nu bɛmmaa menli ne ɛnzoa adesoa zɔhane mɔ.

⁴⁷Munzule ɛha bɛ! Bɛmɛ, bɛyɛ sɛka ngɛnlɛma bɛmaa Nyamenle kpɔmanvolɛma ne mɔɔ bɛ nlenya mɔ hunle bɛ la.

⁴⁸Yemɔti bɛdi daselɛ, yɛɛ bɛ kunlu dwo mɔɔ bɛ nlenya mɔ yɛle la anwo, ɔluakɛ bɛ nlenya mɔ hunle Nyamenle kpɔmanvolɛma ne mɔ, yɛɛ bɛmɛ bɛdole bɛ nla ne mɔ.

⁴⁹Ɛhye ati a Nyamenle Nrɛlɛbɛ ne hanle la, ɔse: ‘Bɛbayɛ Nyamenle kpɔmanvolɛma nee bɛdabɛ mɔɔ mebazoa bɛ wɔ bɛ nwo la kpɔdekpɔde na bɛahu bie mɔ.’

⁵⁰Zɔhane ati bɛbadea adwuleso amra noko wɔ Nyamenle kpɔmanvolɛma kɔsɔɔti mɔɔ sumunli kɛ bɛbɔle ewiade la bɛhu bɛ la anwo,

⁵¹ ɔvi mekɛ mɔɔ bɛhunle Ebulu, bakpula Zɛkalaya, mɔɔ bɛhunle ye wɔ azukponle ne nee Ɛleka Nwuanzanwuanza ne avinli la anwo zo. Ɛhɛe, mese, bɛbadea adwuleso amra wɔ ɛhye mɔ amuala anwo.

⁵²“Munzule ɛha bɛdabɛ mɛla kilehilevolɛma! Bɛmɛ, bɛdo nrɛlɛbɛ sua ne anlenkɛ ne anu, bɛva ye sanvɛ ne bɛvea; bɛmɛ a bɛnrɛwolo nu, yɛɛ bɛnrɛmaa awie noko ɛnrɛwolo nu!”

⁵³Mɔɔ Gyisɛse vile ɛkɛ ne la, mɛla kilehilevolɛma ne nee Falasiima ne mɔ vale edwɛkɛbizalɛ zɔle ye na bɛgyegyele ye dɔɔnwo,

⁵⁴kɛ saa ɔ nloa kɛhoati a bɛazɔ ye nu.