Read Nzema Luk 16 Bible Online

Luk 16 - Nzema bible

Luk 16

¹Gyisɛse zele ye ɛdoavolɛma ne mɔ kɛ, “Sukoavolɛ bie mɔɔ lɛ sonla mɔɔ nea ye gya zo la woale ɛkɛ. Bɛdoanle gyaneavolɛ ne bɛhilele ɔ menle ne kɛ ɔlɛsɛkye ye ezukoa ne.

²Yemɔti nrenya sukoavolɛ ne vɛlɛle ye na ɔzele ye kɛ, ‘Duzu edwɛkɛ a metete ye ɛ nwo la? Bɛla babu me ninyɛne mɔɔ wɔ ɛ sa nu la anwo mgbonda kile me, ɔluakɛ ɔvi ɛnɛ mɔɔ kɔ la ɛnle me gyaneavolɛ bieko.’

³Na gyaneavolɛ ne hanle ye ɔ ti akunlu kɛ, ‘Duzu a menyɛ a, ɔluakɛ me menle ɛlɛdie me gyima ye avi me sa nu? Ɛyazonlɛ a, menlɛ nwolɛ anwosesebɛ, asɛlɛ noko yɛ me nyiane.

⁴Meze mɔɔ mebayɛ a, amaa saa bɛdie gyima ye wɔ me sa nu a me gɔnwo mɔ alie me wɔ bɛ azua nu.’

⁵“Zɔhane ati ɔvɛlɛvɛlɛle ɔ menle ne kavolɛma ne mɔ ngoko ngoko na ɔbizale mɔɔ lumua la kɛ, ‘Wɔmɔ, ɛtua me menle ɛzɛ?’

⁶Ɔbuale kɛ, ‘Nwole angola ɛya ko.’ Gyaneavolɛ ne hanle kɛ, ‘Wɔ mgbonda ne ɛne, tɛnla aze na kɛlɛ abulanlu.’

⁷Akee ɔbizale ko noko kɛ, ‘Na ɛdawɔ noko ɛ, ɛtua ɛzɛ?’ Ɔbuale kɛ, ‘Abɛlɛ ahodoku apenle ko.’ Gyaneavolɛ ne hanle hilele ye kɛ, ‘Wɔ mgbonda ne ɛne, kɛlɛ ɛya mɔtwɛ.’

⁸“Na nrenya sukoavolɛ ne hanvole gyaneavolɛ anyebolo ne wɔ ye nrɛlɛbɛ mɔɔ ɔbɔle ɔyɛle ye alane gyima ne la anwo, ɔluakɛ ɔnwunle kɛ ɛtane ewiade ye anu amra ze awule nwo nrɛlɛbɛ fa yɛ nwule ninyɛne nea bɛ nwo tɛla wienyi nu amra.”

⁹Na Gyisɛse hɔle zo zele kɛ, “Yemɔti meka meahile bɛ, ezukoa ɛnle kpalɛ ɛdeɛ, noko anrɛɛ bɛva bɛ ezukoa nee bɛ anwonyia bɛdila agɔnwolɛ, amaa saa bɛkpo aze a, bɛalie bɛ wɔ awuke mɔɔ ɛmbɔ ɛlɛ la anu.

¹⁰Sonla biala mɔɔ di nɔhalɛ wɔ debie nretee biala anwo la di nɔhalɛ noko wɔ ninyɛne mgbole nwo, yɛɛ sonla biala mɔɔ le awule wɔ debie nretee nwo la le awule wɔ ninyɛne mgbole nwo.

¹¹Na saa bɛngola bɛnli nɔhalɛ wɔ ewiade ye anyiabɛnwo nwo a, ɛnee kɛ ɔkɛyɛ na bɛava nɔhalɛ anwonyia ne bɛawula bɛ sa nu ɛ?

¹²Saa bɛnli nɔhalɛ wɔ awie debie nwo a ɛnee nwane a kɛva mɔɔ le bɛdabɛ noko bɛ ɛdeɛ la kɛmaa bɛ a?

¹³ “Sonvolɛ biala ɛnrɛhola ɛmenlenlɛ nwiɔ sonle, ɔluakɛ ɔbakpɔ ko na yeahulo ko; ɔbali nɔhalɛ yeamaa ko na yeakpɔ ko. Zɔhane ala noko yɛɛ ɔde ɔmaa bɛ a, bɛnrɛhola Nyamenle nee ezukoa[10] sonle.”

¹⁴Falasiima ne mɔ dele ɛhye amuala la, bɛgolole Gyisɛse anwo, ɔboalekɛ bɛkulo ezukoa kpalɛ.

¹⁵Gyisɛse zele bɛ kɛ, “Bɛmɛ, bɛle menli bie mɔɔ bu bɛ nwo wɔ menli nyunlu kɛ asɛɛ bɛdi pɛlepɛle, noko Nyamenle ze bɛ ahonle ne mɔ anu. Ɔluakɛ mɔɔ menli dwenle a ɔsonle bolɛ wɔ bɛ nye zo la le debie mgbane wɔ Nyamenle anye zo.

¹⁶ “Ɛnee Mosisi mɛla ne nee mɔɔ Nyamenle kpɔmanvolɛma hɛlɛle la gyi kpundii hɔkpulale mekɛ mɔɔ Dwɔn Sɔnevolɛ ne rale la; ɔvi mekɛ ne anu toonwo mɔɔ ɛrakpula ɛnɛ, mɔɔ bɛvale Edwɛkpa ne mɔɔ fane Nyamenle Belemgbunlililɛ ne anwo la nolobɔlɛ la, awie biala ɛlɛpele kɛ ɔkɛnyia ye.

¹⁷ Na ɔnyɛ se kɛ anwuma nee aze kɛpɛ nu kɛze, tɛla kɛ mɛla ne anu edwɛkɛkpɔkɛ nretee ko kɛminli a.

¹⁸ “Nrenya biala mɔɔ kɛbɔ ɔ ye ewole na ɔkɛgya raalɛ fofolɛ la ɛdo awuvolɛvalɛ mɛla ne; yɛɛ nrenya mɔɔ kɛgya raalɛ mɔɔ ɔ hu ɛbɔ ye ewole la ɛdo awuvolɛvalɛ mɛla ne.

¹⁹“Nrenya sukoavolɛ bie woale ɛkɛ; ɔhedale ndanlɛ ngɛnlɛma mɔɔ awolɛ yɛ se la na ɔlile ɔ ti dahuu.

²⁰Nrenya ehyianli bie noko ɔdaye ɔwoale ɛkɛ, bɛfɛlɛ ye Lazalɛse. Nganlɛ ɛdudu ye, na bɛfa ye bɛbatɛnla sukoavolɛ ne anuhɔlɛ dahuu,

²¹saa ɔkɛnyia mgbokpoloka ne mɔɔ vi sukoavolɛ ne ɛkponle ne azo gua aze la bie ɔkɛli a; na dahuu ahwea ne mɔ batafe ye nganlɛ ne mɔ anu.

²²“Nrenya ehyianli ne wule na anwuma soanvolɛma ravale ye ɛkɛla anyelielɛ nu hɔdole Ebileham akɛnra anu. Nzinlii, sukoavolɛ ne ɔdaye ɔwule na bɛziele ye.

²³Ɛbolɔ nehane, mɔɔ ɛnee ɔlɛnwu amaneɛ la, ɔmanle ɔ nye zo na ɔnwunle Ebileham wɔ moa moa lɔ na Lazalɛse de ɔ nwo ɛkɛ ne.

²⁴Yemɔti ɔdeanle nu ɔhanle kɛ, ‘Egya Ebileham, nwu me anwunvɔne, na soa Lazalɛse maa ɔva ɔ sa ɛrɛlɛsɛka ko ɔbɔ nzule nu na ɔva ɔrape me tafinlima azo, ɔluakɛ me ɛbolɛ ɛlɛte wɔ sendɔlɔra ye anu!’

²⁵“Na Ebileham zele ye kɛ, ‘Me ra, kakye kɛ mekɛ mɔɔ ɛde aze la ɛnyianle ɛbɛla nu ninyɛne kpalɛ ngome, yɛɛ Lazalɛse nyianle ninyɛne ɛtane ngome. Na kɛkala, wɔ ɛke, ɔ rɛle ɛkyekye, yɛɛ wɔmɔ ɛlɛnwu amaneɛ a.

²⁶Saa ɛtu ɛhye bɔbɔ ɛsie ahane a, eza kuma kpole bie la wɔ nee yɛ avinli, amaa awie angola anvi ɛke amba ɛ nwo lɔ, na awie noko vi nehane ara ɛke.’

²⁷Nrenya sukoavolɛ ne hanle kɛ, ‘Saa zɔhane ɛdeɛ a, ɛnee mesɛlɛ wɔ, soa Lazalɛse wɔ me sua nu ɛkɛ.

²⁸Melɛ mediema nnu wɔ ɛkɛ ne, maa ɔhɔbɔ bɛ kɔkɔ, amaa bɛdabɛ noko bɛamba abodelɛ ɛleka ɛhye.’

²⁹“Ebileham zele ye kɛ, ‘Bɛlɛ menli wɔ bɛ nwo lɔ ɛlɛkakyehakye bɛ Mosisi mɛla ne nee Nyamenle kpɔmanvolɛma ngilehilelɛ ne mɔ, na ɔwɔ kɛ ɛ mediema ne mɔ tie bɛ.’

³⁰Nrenya sukoavolɛ ne buale kɛ, ‘Egya Ebileham, ɔle kpalɛ ɛdeɛ, noko saa awie vi mɔwuamra anu dwazo kɔ kɔbɔ bɛ amaneɛ a, yɛɛ bɛkɛnlu bɛ nwo a.’

³¹Na Ebileham zele kɛ, ‘Saa bɛnrɛdie menli mɔɔ ɛlɛkilehile bɛ Mosisi mɛla ne nee mɔɔ Nyamenle kpɔmanvolɛma ne hanle la a, ɛnee saa awie vi mɔwuamra anu dwazo kɔ bɔbɔ a, bɛnrɛdie ye.’ ”