Read Nzema Luk 17 Bible Online

Luk 17 - Nzema bible

Luk 17

¹Gyisɛse zele ye ɛdoavolɛma ne kɛ, “Ɔwɔ kɛ ninyɛne mɔɔ twehwe sonla kɔ ɛtane nu la sisi, na mɔɔ ɔkɛlua ɔ nwo zo ɔkɛzi la, ye gyakɔ.

²Ɔle kpalɛ kɛ anrɛɛ bɛkɛdwe ɛdibolɛ kpole bɛkɛhenda ɔ kɔme na bɛkɛhɔdo ye nyevile nu tɛla kɛ ɔkɛmaa awie mɔɔ ye diedi wɔ me nu kɛ ngakula ɛhye mɔ la ko kɛyɛ ɛtane.

³ Yemɔti bɛnlea mɔɔ bɛyɛ la. “Saa ɛ diema fo wɔ a, tea ye, na saa ɔnu ɔ nwo a, fa ye ɛtane kyɛ ye.

⁴Saa kenle ko bɔbɔ ɔfo wɔ fane nsuu, na ɔsia ɔba fane nsuu ɔbaka ɔkile wɔ kɛ, ‘Menlu me nwo’ a, ɔwɔ kɛ ɛfa ye ɛtane ɛkyɛ ye.”

⁵Ɛzoanvolɛma ne hanle hilele Awulae kɛ, “Maa yɛ diedi ɛnyi.”

⁶Awulae buale bɛ kɛ, “Saa bɛlɛ diedi mɔɔ ye kpole le kɛ ‘mɛsetade’ baka ma ekyi bie bɔbɔ la a, anrɛɛ bɛkɛhola bɛkɛha bɛkɛhile baka kpole ɛhye mɔɔ bɛfɛlɛ ye ‘sekamɔ’ la kɛ, ‘Tu kɔgyinla nyevile nu lɔ’ a, ɔkɛyɛ zɔhane.”

⁷“Saa bɛ nuhua bie lɛ ye sonvolɛ wɔ ye egyinli nu anzɛɛ mɔɔ ka ye mboane na saa ɔvi ɛbɔ nu ɔba a, asoo ɔkɛze ye kɛ, ‘Ka ɛ nwo bɛla badɛnla aze di debie’ ɔ?

⁸Kyɛkyɛ! Ɔbaze ye kɛ, ‘Siezie me aleɛ ne na kendɛ maa menli debie na mewie a wɔahɔli wɔ ɛdeɛ ne.’

⁹Sonvolɛ ɛnfɛta moyɛlɛ wɔ mɔɔ ɔ menle kɛze ye kɛ ɔyɛ na yeyɛ la anwo.

¹⁰Zɔhane ala yɛɛ bɛdabɛ noko saa bɛyɛ mɔɔ bɛkɛze bɛ kɛ bɛyɛ la amuala bɛwie a, bɛha kɛ, ‘Yɛle sonvolɛma mɔɔ yɛ nwo ɛnlɛ nvasoɛ a; yɛyɛ yɛ gyima mɔɔ ɔwɔ kɛ yɛyɛ la.’ ”

¹¹Mɔɔ Gyisɛse kɔ Gyɛlusalɛm la, ɔpenle Samɛlea nee Galeli ɛweɛne zo.

¹²Na mɔɔ ɔka ekyii ɔdwu namule bie azo la, mrenya bulu mɔɔ le kokobɛvolɛma la yiale ye. Bɛgyinlanle moa moa

¹³na bɛdeanle nu bɛzele kɛ, “Gyisɛse! Awulae! Nwu yɛ anwunvɔne.”

¹⁴ Gyisɛse nwunle bɛ la ɔzele bɛ kɛ, “Bɛhɔ na bɛva bɛ nwo bɛhɔhile sɛlɛvolɛma ne mɔ.” Mɔɔ bɛlua adenle zo bɛlɛkɔ la, bɛ nwo zale.

¹⁵Na bɛ nuhua ko nwunle kɛ ɔ nwo ɛza, yemɔti ɔziale ɔ nzi, ɔyele Nyamenle ayɛlɛ.

¹⁶na ɔradule ɔdɔle Gyisɛse agyakɛ anu mutule nu na ɔyɛle ye mo somaa. Nrenya ɛhye le Samɛleanli.

¹⁷Gyisɛse hanle kɛ, “Menli bulu a menyɛle bɛ ayile a, na ngɔnla ne wɔ nienwu?

¹⁸Duzu ati a ɛyɛvolɛ ye ala a ɛzia ɛra bayɛ Nyamenle mo a?”

¹⁹Na Gyisɛse zele nrenya ne kɛ, “Dwazo kɔ; wɔ diedi ɛyɛ wɔ ayile.”

²⁰Falasiima bie bizale Gyisɛse kenle mɔɔ Nyamenle Belemgbunlililɛ ne kɛra la. Gyisɛse buale kɛ, “Nyamenle Belemgbunlililɛ ne ɛnrɛra ye mɔɔ awie anye dua ye a.

²¹Awie ɛnrɛha kɛ, ‘Nea, yemɔ ɛne!’ anzɛɛ ‘Yemɔ a wɔ lɔ la!’ ɔboalekɛ Nyamenle Belemgbunlililɛ ne ɛra na ɔde bɛ ahonle nu.”

²²Akee ɔzele ye ɛdoavolɛma ne kɛ, “Mekɛ bara mɔɔ bɛ kunlu a anrɛɛ bɛkɛnwu Sonla Ra ne mekɛ ne anu kenle ko bɔbɔ, na bɛnrɛnwu ye.

²³Bie mɔ baze bɛ kɛ, ‘Nea, ɔwɔ nehane’ anzɛɛ ‘Nea, ɔwɔ ɛke!’ Noko bɛmmafinde kɛ bɛkanlea.

²⁴Kɛ ɛsɛlɛmanye si kpakye wienyi ta anwomanyunlu vi ɔ ti kɔkpula ɔ bo la, zɔhane ala yɛɛ medame Sonla Ra, mebara wɔ mekɛ ne anu a.

²⁵Noko ɔwɔ kɛ medumua menwu amaneɛ dɔɔnwo na adwuleso amra kpo me.

²⁶ Kɛmɔ Nowa mekɛ zo ɔyɛle la, zɔhane ala yɛɛ medame Sonla Ra, me mekɛ zo ɔbayɛ a.

²⁷ Awie biala hɔle zolɛ lile, nlonle; mraalɛ ɛgyalɛ nee agyalɛ ɛhɔlɛ liele ebia hɔkpulale kenle mɔɔ Nowa hɔvole ɛlɛne ne anu na ezule ne dɔle bule aze na ɔhunle bɛ muala la.

²⁸Ɔbayɛ kɛ Lɔɔto mekɛ zo ala la. Menli hɔle zolɛ lile, nlonle, bɛlile gua, bɛyɛle egyinli na bɛsisile azua.

²⁹Na kenle ko ne mɔɔ Lɔɔto vile Sodɔm la, Nyamenle manle senle nee sɔlefe vi anwuma dɔle kɛ ezule la rahunle bɛ muala.

³⁰Zɔhane ala yɛɛ kenle mɔɔ medame Sonla Ra, mebara la ɔbayɛ a.

³¹ “Kenle zɔhane, awie mɔɔ wɔ ye sua ti zo la mmadwu aze kɛ ɔkɔ ye sua ne anu yeahɔva ye ninyɛne; zɔhane ala yɛɛ mɔɔ wɔ ye ɛya nu la mmasia ba sua zo a.

³² Bɛhakye mɔɔ zile Lɔɔto aye ne anwo zo la!

³³ Awie biala mɔɔ pele ye ngoane nwo la minli ye; na mɔɔ kɛminli ye ngoane wɔ mame me ti la kɛnyia ngoane mɔɔ ɛnlɛ awieleɛ.

³⁴Meka meahile bɛ, kenle ko ne nɔe ne, menli nwiɔ mɔɔ la ɛkpa ko azo la, bɛbava ko bɛahɔ bɛagyakyi ko.

³⁵Mraalɛ nwiɔ bahɔ abɛlɛ ɛdinlɛ wɔ ɛleka ko, bɛbava ko bɛahɔ bɛagyakyi ko. [

³⁶Menli nwiɔ bahɔ ɛya nu, bɛbava ko bɛahɔ bɛagyakyi ko.”]

³⁷Ɛdoavolɛma ne bizale ye kɛ, “Awulae, ɛnee nienwu ɔ?” Gyisɛse buale kɛ, “Ɛleka mɔɔ debie funli la la, ɛkɛ ne a mgbɔtɛ kuohua bɛ nloa a.”