Read Nzema Luk 18 Bible Online

Luk 18 - Nzema bible

Luk 18

¹Akee Gyisɛse bule ɛrɛlɛ ɛhye hilele ye ɛdoavolɛma ne mɔ vale hilele kɛ ɔwɔ kɛ bɛyɛ nzɛlɛlɛ dahuu na ɔnle kɛ bɛkpo aze.

²Ɔse, “Ndɛnebuavolɛ bie woale suakpole bie azo. Ndɛnebuavolɛ ɛhye ɛnzulo Nyamenle yɛɛ ɔmbu sonla biala.

³Kunlanvolɛ raalɛ bie noko wɔ sua ne azo; dahuu ɔkɔ ndɛnebuavolɛ ne ɛkɛ ɔfa ye edwɛkɛ ɔkɔto ɔ nyunlu kɛ, ‘Awie ɛlɛgyegye me, di me edwɛkɛ ye maa me.’

⁴Mekɛ dɔɔnwo ne ala ɛnee ɔngulo kɛ ɔkɛboa raalɛ ne, na nzinlii ɔhanle ɔhilele ɔ nwo kɛ, ‘Menzulo Nyamenle, yɛɛ membu sonla bɔbɔ ɛdeɛ,

⁵noko kɛ raalɛ kunlanvolɛ ɛhye ɛlɛsi agyegye me la, mebanlea ye edwɛkɛ ne meamaa ye, anrɛɛ ɔnrɛmaa me nwo ɛnrɛdɔ me.’ ”

⁶Na Awulae vale zɔle zolɛ kɛ, “Bɛdie mɔɔ ndɛnebuavolɛ alane ne hanle a.

⁷Asoo Nyamenle ɛnrɛli ɔdaye ye menli ne mɔɔ kpondɛ moalɛ na bɛtea bɛfɛlɛ ye nɔɔzo nee ewiazo la ati edwɛkɛ? Asoo ɔkɛhwenlehwenle ɔ bo aze wɔ bɛ moalɛ nwo?

⁸Meka meahile bɛ, ɔkɛli bɛ edwɛkɛ ɔkɛmaa bɛ ndɛndɛ zo somaa. Na asoo saa medame Sonla Ra meba a, menwɔnwu awie mɔɔ ɔ rɛle wɔ Nyamenle anu la?”

⁹Eza Gyisɛse bule ɛrɛlɛ ɛhye hilele bɛdabɛ mɔɔ bɛbu bɛ nwo na bɛmbu awie biala la.

¹⁰Ɔse, “Menli nwiɔ bie hɔle Ɛzonlenlɛ Sua ne anu kɛ bɛkazɛlɛ; ko le Falasiinli yɛɛ ko le adwuledievolɛ.

¹¹“Falasiinli ne gyinlanle nzisi na ɔzɛlɛle kɛ, ‘Nyamenle, meyɛ wɔ mo kɛ membɔ apo, menli nzisi yɛɛ mendo awuvolɛvalɛ mɛla ne kɛ awie biala de la; meyɛ wɔ mo kɛ menle kɛ adwuledievolɛ ɛhye bɔbɔ mɔɔ wɔ lɔ la.

¹²Dapɛne ko anu mekye ɛhɔne fane nwiɔ, yɛɛ mebu me ezukoa mɔɔ menyia ye la anu bulu metu ko memaa wɔ.’

¹³“Na adwuledievolɛ ne gyinlanle ahane ɛleka bie, yeangulo kɛ ɔkɛkpogya ɔ ti zo bɔbɔ. Ɔvale ɔ sa ɔguale ye ɛbolɛ zo na ɔzele kɛ, ‘O Awulae Nyamenle, nwu me anwunvɔne na mele ɛtanevolɛ!’ ”

¹⁴ Na Gyisɛse vale zɔle zolɛ kɛ, “Meka meahile bɛ, adwuledievolɛ ne zɔle Nyamenle anye wɔ mekɛ mɔɔ ɔlɛkɔ sua nu la dɛlale Falasiinli ne. Ɔluakɛ awie biala mɔɔ memaa ɔ nwo zo la Nyamenle bɛlɛ ye aze, yɛɛ mɔɔ bɛlɛ ɔ nwo aze la Nyamenle kpogya ye zo.”

¹⁵Menli bie vale bɛ mra rale kɛ Gyisɛse ɛva ɔ sa ɛgua bɛ nwo zo na ɔyila bɛ. Ɛdoavolɛma ne nwunle bɛ la bɛdendɛle bɛ.

¹⁶Na Gyisɛse vɛlɛle ngakula ne mɔ wɔ ɔ nwo ɛkɛ ne na ɔzele kɛ, “Bɛgyakyi ngakula ne mɔ bɛmaa bɛrɛla me nwo, bɛmmatua bɛ, ɔboalekɛ bɛdabɛ mɔɔ bɛle kɛ ɛhye mɔ zɛhae la yɛɛ Nyamenle Belemgbunlililɛ ne le bɛ ɛdeɛ a.

¹⁷Bɛhakye ɛhye, awie biala mɔɔ anyɛ ɔ nwo kɛ kakula anlie Nyamenle Belemgbunlililɛ ne ando nu la ɛnrɛnyia ye.”

¹⁸Dwuu kpanyinli bie bizale Gyisɛse kɛ, “Kilehilevolɛ kpalɛ, duzu a menyɛ na meanyia ngoane mɔɔ ɛnlɛ awieleɛ a?”

¹⁹Gyisɛse bizale ye kɛ, “Duzu ati a ɛse mele kpalɛ a? Awie biala ɛnle kpalɛ kɛ Nyamenle angomekye.

²⁰ Ɛze mɛla ne mɔ: mmato awuvolɛvalɛ mɛla ne, mmayɛ kɔdiawu, mmadi daselɛ adalɛ, mmawua, di ɛ ze nee ɛ nli eni.”

²¹Nrenya ne buale kɛ, “Sumunli me nretee ne ala yɛɛ menvale mɛla ɛhye mɔ azo ɛlilɛ a.”

²²Gyisɛse dele ɛhye la, ɔzele ye kɛ, “Yeha wɔ debie ko. Tɔne debie biala mɔɔ ɛlɛ la amuala na kyɛ ezukoa ne maa ehyianvolɛma, na ɛkɛnyia anwonyia wɔ Nyamenle anwo lɔ, na akee bɛla badoa me bo zo.”

²³Nrenya ne dele ɛhye la nyane hunle ye kpole, ɔluakɛ ɔle sukoavolɛ kpole.

²⁴Gyisɛse nleanle ye koonwu na ɔzele kɛ, “Ɔyɛ se ɔmaa bɛdabɛ mɔɔ bɛnyia bɛ nwo la kɛ bɛkɛnyia Nyamenle Belemgbunlililɛ ne a.

²⁵Ɔluakɛ ɔnyɛ se kɛ afunlumu kɛwolo agbuyia tokule nu tɛla kɛ sukoavolɛ kɛnyia Nyamenle Belemgbunlililɛ ne a.”

²⁶Menli mɔɔ dele mɔɔ Gyisɛse hanle la bizale kɛ, “Ɛnee nwane bɔbɔ a kɛnyia ngoane a?”

²⁷Gyisɛse buale kɛ, “Mɔɔ yɛ se maa sonla la ɛnyɛ se ɛmmaa Nyamenle.”

²⁸Na Pita zele kɛ, “Nea o, yɛgyakyi debie biala yɛɛ yɛdoa ɛbo zo o!”

²⁹Gyisɛse zele bɛ kɛ, “Ɛhɛe, ɔle zɔhane, noko bɛdie: Awie biala mɔɔ ɛgyakyi ye sua, ɔ ye nee ɔ mediema, ye awovolɛ anzɛɛ ɔ mra wɔ Nyamenle Belemgbunlililɛ ne ati la

³⁰banyia ye mɔnwo wɔ mekɛ ɛhye ala anu nee ngoane mɔɔ ɛnlɛ awieleɛ, wɔ mekɛ mɔɔ bara la anu.”

³¹Gyisɛse vale ɛdoavolɛma bulu nee nwiɔ ne hɔle ahane na ɔzele bɛ kɛ, “Bɛdie! Yɛlɛkɔ Gyɛlusalɛm, na ɛkɛ ne yɛɛ debie biala mɔɔ Nyamenle kpɔmanvolɛma hɛlɛle wɔ medame Sonla Ra me nwo la bayɛ zɔhane a.

³²Bɛbaye me bɛawula menli mɔɔ ɛnle Dwuuma la asa anu, na bɛbazi me amgbu, bɛayɛ me aholoba na bɛatoto nyɛlɛ me nyunlu.

³³Bɛbabila me mbaka na bɛahu me, na ye kenle nsa ne anzi, mebadwazo meara ngoane nu.”

³⁴Ɛdoavolɛma ne ande ninyɛne ɛhye mɔ biala abo; bɛvale edwɛkɛ ne anwo ndelebɛbo bɛveale bɛ, yemɔti bɛannwu mɔɔ Gyisɛse ɛlɛka la anzi.

³⁵Mɔɔ Gyisɛse bikyele Gyɛleko la, ɛnee anyenzinliravolɛ bie de adehane ne ɛlɛsɛlɛzɛlɛ ninyɛne,

³⁶na ɔdele menli dɔɔnwo ne mɔɔ ɛlɛse la ane la, ɔbizale kɛ, “Duzu ɔ?”

³⁷Bɛbuale ye kɛ, “Gyisɛse mɔɔ vi Nazalɛte la a ɛlɛse a.”

³⁸Na ɔdeanle nu ɔzele kɛ, “Gyisɛse, Devidi ara! Nwu me anwunvɔne!”

³⁹Menli mɔɔ lumua la deɛdeanle ye nu na bɛzele ye kɛ ɔyɛ koonwu; na akee ɔdeanle nu kpole kpalɛ kɛ, “Devidi ara, nwu me anwunvɔne!”

⁴⁰Yemɔti Gyisɛse gyinlanle na ɔzele kɛ, “Bɛva nrenya anyenzinliravolɛ ne bɛrɛla.” Mɔɔ ɔrale la, Gyisɛse bizale ye kɛ,

⁴¹“Duzu a ɛkulo kɛ meyɛ memaa wɔ a?” Na ɔbuale kɛ, “Yɛmenle, mekulo kɛ menwu debie bieko.”

⁴²Na Gyisɛse zele ye kɛ, “Nwu debie! Wɔ diedi ɛyɛ wɔ ayile.”

⁴³Na ɛkɛ ne ala ɔnwunle debie, na ɔdoale Gyisɛse ɔyele Nyamenle ayɛlɛ. Mɔɔ menli dɔɔnwo ne nwunle ɛhye la, bɛ muala bɛyele Nyamenle ayɛlɛ.