Read Nzema Luk 19 Bible Online

Luk 19 - Nzema bible

Luk 19

¹Gyisɛse hɔle Gyɛleko na ɔlɛpɛ nu sua ne azo.

²Adwuledievolɛ kpanyinli bie noko wɔ sua ne azo mɔɔ ɛnyia ɔ nwo kpole a; bɛfɛlɛ ye Zakeɛse.

³Nrenya ɛhye bɔle mɔdenle kɛ ɔkɛnwu Gyisɛse sonla holɛ na kɛmɔ ɔle adwola na menli ne zonle la ati ɛnee ɔnnwu ye.

⁴Yemɔti ɔnriandile ɔlumuale ɛlɔne ne anyunlu na ɔhɔvole baka bie mɔɔ bɛfɛlɛ ye “sekamɔ” la azo saa ɔkɛnwu ye a, ɔluakɛ ɛkɛ ne ala a Gyisɛse bape a.

⁵Gyisɛse dwule ɛkɛ ne la, ɔdole ɔ nye anwuma na ɔzele Zakeɛse kɛ, “Zakeɛse, ka ɛ nwo dwu aze, na ɛnɛ mebazokoɛ wɔ.”

⁶Ndɛndɛ ne ala Zakeɛse dwule aze na ɔvale fɛlɛkolilɛ kpole ɔliele Gyisɛse.

⁷Menli mɔɔ nwunle ye la amuala dendɛle bɛ nzo abo kɛ, “Akee ɛtanenli ɛhye sua nu a nrenya ye ɛhɔ kazokoɛ a!”

⁸Na Zakeɛse dwazole na ɔhanle ɔhilele Awulae kɛ, “Awulae, mebabu me ninyɛne mɔɔ melɛ la anu nwiɔ na meava ko meamaa ehyianvolɛma, na saa meli awie ndunlumi a, mebadua ye kakɛ mɔnwo nna.”

⁹Gyisɛse zele ye kɛ, “Ɛnɛ kenle ye, bɛlie wɔ ngoane, ɛdawɔ noko ɛle Ebileham anlɔnra.

¹⁰ Ɛhye ala ati yɛɛ medame Sonla Ra membale a. Membale kɛ mebakpondɛ bɛdabɛ mɔɔ bɛminli la na mealie bɛ ngoane.”

¹¹ Menli mɔɔ ɛnee ɛlɛtie edwɛkɛ ɛhye mɔ la zuzule ye bɛ ti anu kɛ, kɛmɔ bɛbikye Gyɛlusalɛm la, Nyamenle Belemgbunlililɛ ne asɛɛ ɛra ɛwie. Yemɔti Gyisɛse bule bɛ ɛrɛlɛ ɛhye.

¹²Ɔse, “Nrenya bie mɔɔ lɛ duma la yɛle kɛ ɔkɔ maanle zo moa moa yeamaa bɛazie ye belemgbunli na akee yeazia yeara sua nu.

¹³Mɔɔ ɔbanyia nwo la, ɔvɛlɛle ye sonvolɛma bulu ne, ɔmanle ko biala sɔnvɛlɛ ko na ɔzele bɛ kɛ, ‘Menle ɛke, yemɔti bɛva ezukoa ɛhye bɛli gua bɛnlea mɔɔ bɛkɛnyia ye nwolɛ la.’

¹⁴Kɛmɔ ɔdaye ye maanle ne anu amra kpɔ ye la ati, bɛdule menli bɛmanle bɛhɔzele kɛ, ‘Yɛngulo kɛ nrenya ɛhye di yɛ belemgbunli.’

¹⁵“Noko bɛziele nrenya ne belemgbunli na ɔziale ɔrale sua nu. Ɔradwule ala la, ɔmanle bɛvɛlɛvɛlɛle ye sonvolɛma ne kɛ bɛrabu bɛ mgbonda bɛmaa ɔnwu nvasoɛ mɔɔ bɛnyianle ye la.

¹⁶Mɔɔ lumua la rale rahanle kɛ, ‘Yɛmenle, menyia sɔnvɛlɛ bulu meboka wɔ ɛdeɛ ko ne mɔɔ ɛvale ɛmanle me la anwo.’

¹⁷Belemgbunli ne zele ye kɛ, ‘Mo, ɛle sonvolɛ kpalɛ! Kɛmɔ wɔli nɔhalɛ wɔ ninyɛne ngyikyi nwo la, mebamaa wɔanlea azuamgbole bulu azo.’

¹⁸Mɔɔ tɔ zo nwiɔ la rahanle kɛ, ‘Yɛmenle, menyia sɔnvɛlɛ nnu meboka ko ne mɔɔ ɛvale ɛmanle me la anwo.’

¹⁹Belemgbunli ne zele ye kɛ, ‘Ɛdawɔ noko ɛbanlea azuamgbole nnu azo.’

²⁰“Sonvolɛ ko noko rale na ɔrahanle kɛ, ‘Yɛmenle, wɔ sɔnvɛlɛ ko ne ɛne; membɔle ye duku nloa menziele.

²¹Mesulo wɔ, ɔboalekɛ ɛle sonla mɔɔ ɛ ti yɛ se; ɛfa mɔɔ ɛnle wɔ ɛdeɛ la yɛɛ ɛbu mɔɔ wɔanlua la.’

²²Belemgbunli ne zele ye kɛ, ‘Wɔmɔ sonvolɛ ɛhye, ɛnle kpalɛ! Mefa ɛdawɔ ɛ nloa edwɛkɛ meabua wɔ ndɛne. Ɛse me kɛ me ti yɛ se, mefa mɔɔ ɛnle me ɛdeɛ yɛɛ mebu mɔɔ tɛ me a menluale la.

²³Duzu ati a wɔanva me ezukoa ne wɔangɔndo bange ɛ? Anrɛɛ mera la, mehɔlie me ezukoa ne boka nwolɛ nzinwo ne amuala.’

²⁴“Na ɔzele menli mɔɔ gyigyi ɛkɛ ne la kɛ, ‘Bɛlie sɔnvɛlɛ ko ne wɔ ɔ sa nu bɛva bɛmaa mɔɔ lɛ bulu ne la.’

²⁵Bɛzele ye kɛ, ‘Yɛmenle, yemɔ, ɔlɛ sɔnvɛlɛ bulu dɛba.’

²⁶ Na ɔbuale bɛ kɛ, ‘Meka meahile bɛ: Mɔɔ lɛ bie la, bɛmaa ye bie dɔɔnwo bɛboka mɔɔ ɔlɛ la anwo; na mɔɔ ɛnlɛ bie la, ekyi ne bɔbɔ mɔɔ ɔlɛ la, bɛdie ye wɔ ɔ sa nu.

²⁷Akee me agbɔvolɛ ne mɔ mɔɔ se bɛngulo kɛ medi bɛ belemgbunli la, bɛva bɛ bɛrɛla bɛrahu bɛ wɔ me nyunlu ɛke!’ ”

²⁸Gyisɛse hanle ɛhye na akee ɔlumuale bɛ nyunlu kɛ ɔkɔ Gyɛlusalɛm.

²⁹Ɔbikyele Bɛtefagyi nee Bɛtani, wɔ Ɔlivi Boka ne azo la, ɔzoanle ye ɛdoavolɛma ne nwiɔ ɔmanle bɛlumuale ɔ nyunlu,

³⁰na ɔzele bɛ kɛ, “Bɛhɔ namule ne mɔɔ wɔ bɛ nyunlu lɔ la azo. Saa bɛdwu ɛkɛ ne a, bɛkɛnwu asoaso ralɛ mɔɔ awie ɛtɛtɛnlanle zo ɛlɛ la kɛ ɔhenda ɛkɛ; bɛzianyi ye bɛrɛla.

³¹Saa awie biza bɛ kɛ duzu ati a bɛlɛsianyi ye a, bɛze ye kɛ, ‘Awulae[11] ɛhyia nwolɛ.’ ”

³²Bɛhɔle na bɛhɔnwunle debie biala, kɛmɔ Gyisɛse hanle hilele bɛ la.

³³Mɔɔ bɛlɛsianyi asoaso ne la, ɔ menle mɔ bizale bɛ kɛ, “Duzu ati a bɛlɛsianyi asoaso ne ɛ?”

³⁴Ɛdoavolɛma ne buale kɛ, “Awulae ɛhyia nwolɛ.”

³⁵Na bɛvale asoaso ne bɛrɛlɛle Gyisɛse. Akee bɛsesɛle bɛ ndanlɛ wɔ asoaso ne azo na bɛmanle Gyisɛse dɛnlanle zolɛ.

³⁶Na mɔɔ ɔlɛkɔ la, bɛsesɛle ndanlɛ azɛlɛ nwo bɛmanle ɔluale zolɛ.

³⁷Ɔbikyele Gyɛlusalɛm wɔ Ɔlivi Boka ne ndololeɛ nu la, ye ɛdoavolɛma bebelebe ne bɔle ɔ bo vale fɛlɛkolilɛ yɛle Nyamenle mo yele ye ayɛlɛ wɔ ninyɛne mgbole ne mɔ mɔɔ bɛnwunle bɛ la ati,

³⁸ na bɛzele kɛ, “Nyamenle ɛyila belemgbunli ne mɔɔ lua Awulae duma nu ɛlɛba la! Anzonudwolɛ wɔ anwuma na anyunlunyia ɛha Nyamenle!”

³⁹Falasiima mɔɔ wɔ menli ne anu la bie mɔ zele Gyisɛse kɛ, “Kilehilevolɛ, maa wɔ ɛdoavolɛma ne ɛmua bɛ nloa!”

⁴⁰Gyisɛse buale kɛ, “Meka meahile bɛ, saa bɛmua bɛ nloa bɔbɔ a, awolɛ bɔbɔ kɛdeɛdea nuhua.”

⁴¹Gyisɛse bikyele Gyɛlusalɛm na ɔnwunle sua ne la, ɔzunle,

⁴²na ɔzele kɛ, “Anrɛɛ ɛnɛ kenle ye bɔbɔ wɔahola wɔanwu deɛ mɔɔ maa anzonudwolɛ la! Na kɛkala ɛdeɛ, ɛnrɛhola ɛnrɛnwu ye!

⁴³Mekɛ bara mɔɔ wɔ kpɔvolɛma bapɛ ɛ bo kuma ayia; bɛbadua wɔ adenle, na bɛvi ɛbɔ nu nee ɛnweazo bɛaraholo ɛ nwo zo.

⁴⁴Bɛbagologolo wɔ bɛagua na bɛazɛkye menli mɔɔ wɔ zolɛ la amuala; bɛnrɛgyakyi bolɛ ko bɔbɔ wɔ ɔ bo zo ne, ɔboalekɛ wɔannwu mekɛ ne mɔɔ Nyamenle rale kɛ ɔbalie wɔ ngoane la.”

⁴⁵Akee Gyisɛse wolole Ɛzonlenlɛ Sua ne anu, na ɔbɔle ɔ bo kɛ ɔfoa gualilɛma ne mɔ,

⁴⁶ na ɔzele bɛ kɛ, “Bɛhɛlɛ ye wɔ Nyamenle Edwɛkɛ ne anu kɛ, Nyamenle se, ‘Bɛbavɛlɛ me Ɛzonlenlɛ Sua ne Nzɛlɛlɛ Sua!’ Na bɛmɛ, bɛhakyi ye nwule fealeka.”

⁴⁷ Kenle biala Gyisɛse kilehile wɔ Ɛzonlenlɛ Sua ne anu. Sɛlɛvolɛ mgbanyinli ne, mɛla kilehilevolɛma ne, yɛɛ mgbanyima ne mɔ kpondɛle kɛ bɛkɛhu ye,

⁴⁸na bɛannyia nwolɛ adenle, ɔboalekɛ ɛnee menli ne amuala kulo kɛ bɛtie ye, amaa ye edwɛkɛ ne kpɔkɛ ko bɔbɔ andɛla bɛ nzo.