Read Nzema Luk 22 Bible Online

Luk 22 - Nzema bible

Luk 22

¹ Mɔɔ Angye Ɛvoyia ne, mɔɔ ye ko ne ala a le Akpabɛnwo Ɛvoyia ne la bikyele la,

²sɛlɛvolɛ mgbanyinli ne nee mɛla kilehilevolɛma ne mɔ bɔle adwenle kɛ bɛfa adenle bie azo kɛ bɛ sa kɛha Gyisɛse bɛkɛhu ye bɛkɛvea, ɔluakɛ bɛsulo menli ne.

³Seetan wolole Dwudase, mɔɔ eza bɛfɛlɛ ye Yesekaleɔto na ɔle ɛdoavolɛma bulu nee nwiɔ ne anu ko la.

⁴Yemɔti ɔhɔle na ɔ nee sɛlɛvolɛ mgbanyinli ne nee Ɛzonlenlɛ Sua ne sinzavolɛma mgbanyinli ne mɔ hɔdwenlenle nwolɛ kɛ ɔkɛzi ɔkɛyɛ na yeaye Gyisɛse yeamaa bɛ la.

⁵Ɛhye yɛle bɛ fɛ, na bɛbɔle ɛwɔkɛ kɛ bɛkɛmaa ye ezukoa.

⁶Dwudase kponlenle zolɛ na ɔbɔle ɔ bo kɛ ɔkpondɛ mekɛ kpalɛ yeaye Gyisɛse yeamaa bɛ mɔɔ menli ne ɛnrɛde nwolɛ bie a.

⁷Angye Ɛvoyia ne dwule na ɔwɔ kɛ bɛku mboane mɔɔ bɛfa bɛado Akpabɛnwo Ɛvoyia aleɛ ne la,

⁸Gyisɛse zoanle Pita nee Dwɔn kɛ, “Bɛhɔ bɛhɔziezie yɛ Akpabɛnwo Ɛvoyia aleɛ ne bɛmaa yɛli.”

⁹Bɛbizale ye kɛ, “Nienwu a ɛkulo kɛ yɛsiezie ye a?”

¹⁰Ɔzele bɛ kɛ, “Bɛhɔ suakpole ne azo na bɛ nee nrenya bie mɔɔ zo nzule wɔ buakɛ nu la bayia. Bɛdoa ye bɛ nee ye ɛhɔ awuke ne mɔɔ ɔkɛwolo nu la anu,

¹¹na bɛze awuke menle ne kɛ, ‘Kilehilevolɛ ne se, ekpumgbunli ne boni anu a me nee me ɛdoavolɛma ne bali Akpabɛnwo Ɛvoyia aleɛ ne a?’

¹²Na ɔkɛhile bɛ ekpumgbunli kpole bie wɔ ɛbolɔnsam ne azo mɔɔ bɛziezie nuhua a, na ɛkɛ ne yɛɛ bɛziezie aleɛ ne a.”

¹³Na ɛdoavolɛma ne hɔle na bɛhɔnwunle ye, kɛmɔ Gyisɛse hanle hilele bɛ ala la, na bɛzieziele Akpabɛnwo Ɛvoyia aleɛ ne.

¹⁴Mekɛ ne dwule la, Gyisɛse nee ye ɛdoavolɛma ne dɛnlanle aze wɔ ɛkponle nwo,

¹⁵na ɔzele bɛ kɛ, “Mɔɔ mekpondɛ ye ɛsesebɛ ɛsesebɛ a le kɛ me nee bɛ kɛli Akpabɛnwo Ɛvoyia aleɛ ɛhye kolaa na meazɔ me nyanenwunlɛ sa!

¹⁶Ɔluakɛ meka meahile bɛ kɛ, menrɛli ye bieko kɔkpula kɛ ye kpɔkɛ mɔɔ ɔgyi zo la ɛli munli wɔ Nyamenle Belemgbunlililɛ nu.”

¹⁷Akee Gyisɛse vale dwora ne, ɔyɛle Nyamenle mo, na ɔzele kɛ, “Bɛlie ɛhye bɛnlo.

¹⁸Ɔluakɛ meka meahile bɛ, ɔvi ɛnɛ mɔɔ kɔ la menrɛnlo vanye ma nu nzule bieko kɔkpula kɛ Nyamenle Belemgbunlililɛ ne kɛra la.”

¹⁹Akee ɔvale kpanwo, ɔyɛle Nyamenle mo, ɔbubule nuhua, ɔvale ɔmanle bɛ na ɔzele kɛ, “Ɛhye a le me nwonane ne [mɔɔ bɛva bɛmaa bɛ la. Anrɛɛ bɛyɛ ɛhye bɛva bɛhakye me.”

²⁰ Zɔhane ala noko yɛɛ mɔɔ bɛwiele debie di la, ɔvale dwora ne ɔmanle bɛ na ɔhanle kɛ, “Dwora ɛhye mɔɔ bɛlɛno nu la a le Nyamenle ngyekyeleɛ fofolɛ ne mɔɔ bɛva me mogya ne bɛzɔ ɔ nloa la; bɛlie bɛnlo.]

²¹ “Na bɛnlea, sonla ne mɔɔ ye me amaa la nee me de ɛkponle ye anwo ɛke!

²²Na medame Sonla Ra mebawu, kɛmɔ Nyamenle ɛhyehyɛ ala la, na munzule doa sonla ne mɔɔ ye me amaa la!”

²³Yemɔti bɛbɔle ɔ bo kɛ bɛbizebiza bɛ nwo kɛ bɛ nuhua boni a bayɛ deɛ ɛhye a.

²⁴ Kpolerazulɛ dɔle ɛdoavolɛma ne avinli mɔɔ fane bɛ nuhua mɔɔ le kpole kpalɛ wɔ bɛ nu la anwo.

²⁵ Na Gyisɛse zele bɛ kɛ, “Aleɛabo arelemgbunli kile tumi wɔ bɛ menli nwo zo, yɛɛ menli mɔɔ lɛ dibile la maa bɛfɛlɛ bɛ ‘nyeleyɛvolɛma.’

²⁶ Na bɛmɛ, asolo bɛ, ɔwɔ kɛ bɛ nuhua kpole kpalɛ ne yɛ ɔ nwo kakula nretee, yɛɛ ɔwɔ kɛ mɔɔ gyi bɛ ti la yɛ ɔ nwo kɛ sonvolɛ.

²⁷ Mɔɔ tɛnla aze di debie, yɛɛ mɔɔ sonle mɔɔ ɛlɛdi debie la, boni a le kpole a? Mɔɔ tɛnla aze la ɔ. Na mame, me nee bɛ de kɛ mesonle bɛ.

²⁸“Bɛ nee me ɛdɛnla ɛhyɛ wɔ me sɔnea ne mɔ anu;

²⁹yemɔti kɛmɔ Egya ɛmaa me tumi kɛ menli belemgbunli la, zɔhane ala noko yɛɛ bɛbayɛ a.

³⁰ Bɛ nee me badɛnla me ɛkponle nwo, bɛali debie na bɛanlo wɔ me Belemgbunlililɛ ne anu, na bɛbadɛnlɛdɛnla arelemgbunli mbia zo bɛabua mbusua bulu nee nwiɔ ne ndɛne.”

³¹Akee Gyisɛse zele Pita kɛ, “Saemɔn, Saemɔn! Tie! Seetan ɛnyia adenle kɛ ɔsɔ bɛ muala yeanlea, na yeakpa bɛ nu yeaye kpalɛ ne yeavi ɛtane ne anu kɛ ɛyazonlɛnli kpa abɛlɛ nu la.

³²Na mezɛlɛ memaa wɔmɔ Saemɔn, amaa wɔ diedi amkpo aze. Na saa ɛsia ɛba me nwo bieko a, si ɛ mediema ne mɔ ahonle.”

³³Pita buale kɛ, “Awulae, meziezie me nwo kɛ saa ewule nu o, efiade nla nu o, me nee wɔ kɛhɔ!”

³⁴Gyisɛse zele ye kɛ, “Pita, meka meahile wɔ, ɛnɛ nɔe, mɔɔ akɔlɛ kabɔ la ɛnee wɔha ye fane nsa kɛ ɛnze me.”

³⁵ Akee Gyisɛse bizale ye ɛdoavolɛma ne kɛ, “Ɛkenle mɔɔ menzoanle bɛ mɔɔ bɛanva ezukoa kodoku, adendulɛ kodoku, anzɛɛ mgbɔlaboa la, asoo bɛhyianle debie nwo?” Bɛbuale kɛ, “Kyɛkyɛ, yeangyia ɛhwee nwo.”

³⁶Gyisɛse zele bɛ kɛ, “Na kɛkala, mɔɔ lɛ ezukoa kodoku anzɛɛ adendulɛ kodoku la ɛva; yɛɛ mɔɔ ɛnlɛ dadeɛ la ɛdɔne ye tɛladeɛ ne na ɔdɔ bie.

³⁷ Ɔluakɛ meka meahile bɛ, ɔwɔ kɛ mɔɔ Nyamenle Edwɛkɛ ne ɛha ye wɔ me nwo la yɛ nɔhalɛ. Ɔse, ‘Bɛdianle ye bɛbokale maamɔvoma anwo,’ ɔboalekɛ mɔɔ bɛhɛlɛle mɔɔ fane me nwo la ɛlɛba arape zolɛ.”

³⁸Ɛdoavolɛma ne zele ye kɛ, “Awulae, nea, yɛlɛ dadeɛ nwiɔ wɔ ɛke!” Ɔbuale bɛ kɛ, “Yeyɛ boɛ!”

³⁹Gyisɛse vile suakpole ne azo na ɔhɔle Ɔlivi Boka ne azo, kɛmɔ ɔyɛ ye dɛba ne ala la, na ye ɛdoavolɛma ne doale ye.

⁴⁰Ɔdwule ɛkɛ ne la, ɔzele bɛ kɛ, “Bɛzɛlɛ na bɛangɔ ngyegyelɛ nu.”

⁴¹Akee ɔvile bɛ nwo ɛkɛ ne ɔhɔle ɔ nyunlu ekyii na ɔhotole ɔzɛlɛle kɛ,

⁴²“Egya, saa ɔyɛ wɔ ɛhulolɛ a, ye nyanenwunlɛ dwora ɛhye fi me nloa; tɛ me ɛhulolɛdeɛ ɔ, na wɔ ɛhulolɛdeɛ ɛyɛ ɛkɛ.” [

⁴³Nyamenle soanvolɛma vi anwuma rale na bɛramanle ye anwosesebɛ.

⁴⁴Ɔvale nyane kpole kpalɛ ɔzɛlɛle ɛsesebɛ ɛsesebɛ, na ɛhɛlɛnra mɔɔ dule ye la le kɛ mogya ndɔkɛ tetele guale aze.]

⁴⁵Ɔwiele nzɛlɛlɛ ne yɛ la, ɔdwazole ɔrale ye ɛdoavolɛma ne mɔ anwo ɛkɛ na ɔnwunle kɛ nyane dɔɔnwo mɔɔ ɛlɛku bɛ la ɛmaa bɛlafe.

⁴⁶Na ɔzele bɛ kɛ, “Duzu ati a bɛlɛdafe ɛ? Bɛdwazo na bɛzɛlɛ na bɛangɔ ngyegyelɛ nu.”

⁴⁷Gyisɛse anloa wɔ zo ɔlɛtendɛ la yɛɛ ɛlɔne vindele ɛkɛ ne a. Dwudase mɔɔ le bulu nee nwiɔ ne anu ko la li bɛ nyunlu. Ɔbikyele Gyisɛse na ɔvole ɔ nloa anwo.

⁴⁸Na Gyisɛse bizale ye kɛ, “Dwudase, ɛfo me nloa anwo wɔaye medame Sonla Ra wɔamaa ɔ?”

⁴⁹Ɛdoavolɛma mɔɔ wɔ Gyisɛse anwo ɛkɛ ne la nwunle mɔɔ ɛlɛba arazi la, bɛzele kɛ, “Awulae, yɛva yɛ dadeɛ ne yɛho ɔ?”

⁵⁰Ɛkɛ ne ala bɛ nuhua ko hwenle dadeɛ pɛle sɛlɛvolɛ kpanyinli ne sonvolɛ ne anzo fema ne.

⁵¹Na Gyisɛse zele bɛ kɛ, “Yeyɛ boɛ!” Na ɔvale ɔ sa ɔhanle nrenya ne anzo ɔyɛle ye ayile.

⁵²Akee Gyisɛse zele sɛlɛvolɛ mgbanyinli ne nee Ɛzonlenlɛ Sua ne neavolɛ mgbanyinli ne nee mgbanyima ne mɔ mɔɔ hɔle kɛ bɛkahye ye la kɛ, “Na ɔhyia kɛ bɛkɛva dadeɛ nee ahoholombaka bɛkɛra me ɛhyelɛ ɔ?

⁵³ Dahuu me nee bɛ a wɔ Ɛzonlenlɛ Sua ne anu a, na bɛangola bɛangye me. Na awozinli nu tumi ne ɛdwazo, yemɔti bɛ mekɛ ne ala ɛne!”

⁵⁴Bɛhyele Gyisɛse bɛ nee ye hɔle Sɛlɛvolɛ Kpanyinli ne sua nu; na Pita doale bɛ nanamogya.

⁵⁵Ɛnee menli bie ɛwuda senle wɔ suakunlu ɛkɛ ne na bɛde nwolɛ, na Pita hɔdɛnlanle bɛ nwo ɛkɛ ne.

⁵⁶Mɔɔ sonvolɛ mbɛlɛra ne mɔ anu ko nwunle ye kɛ ɔde senle ne anwo la, ɔnleanle ye koonwu na ɔzele kɛ, “Nrenya ɛhye noko nee Gyisɛse a lua a!”

⁵⁷Pita zale na ɔzele kɛ, “Ɔmɔ, menze ye bɔbɔ!”

⁵⁸Ɔ nzi hyɛle ekyii la, nrenya bie ɔdaye ɔranwunle Pita na ɔzele kɛ, “Ɛdawɔ noko ɛboka bɛ nwo!” Pita zele kɛ, “Ayi, memboka nwo!”

⁵⁹Kɛyɛ dɔnehwele ko anzi nrenya ko ɔdaye ɔrahanle ye ndinlizo kɛ, “Ɔle nɔhalɛ bɔkɔɔ kɛ nrenya ɛhye nee Gyisɛse a lua a; ɔle Galelinli!”

⁶⁰Na Pita buale kɛ, “Yɛmenle, menze mɔɔ ɛlɛka la anwo bie fee!” Na ɛkɛ ne ala, mɔɔ ɛnee ɔ nloa wɔ zolɛ ɔlɛtendɛ la, akɔlɛ bɔle.

⁶¹Awulae hakyile ɔ nye nleanle Pita, na Pita hakyele Awulae edwɛkɛ ne mɔɔ ɔhanle kɛ, “Mɔɔ akɔlɛ kabɔ la, ɛnee wɔha ye fane nsa kɛ ɛnze me” la.

⁶²Na Pita vindele hɔzunle alɔbɔlɛ ɛzunlɛ.

⁶³Menli mɔɔ ɛnee ɛlɛsinza Gyisɛse la zile ye amgbu na bɛbole ye.

⁶⁴Bɛkyekyele ɔ nye na bɛlile ye ahodomgbole. Bɛbɔ ye na bɛabiza ye kɛ, “Nwane a bɔle wɔ a? Ye ahenle!”

⁶⁵Na bɛhanle edwɛkɛ ɛtane ɛtane dɔɔnwo bɛtietiale ye.

⁶⁶Mɔɔ maanle nu tetele la, mgbanyima ne, sɛlɛvolɛ mgbanyinli ne, yɛɛ mɛla kilehilevolɛma ne mɔ yiale nu na bɛvale Gyisɛse bɛraziele ayia ne anyunlu.

⁶⁷Bɛbizale ye kɛ, “Ka maa yɛdie bie, wɔmɔ a ɛle Mɛzaya ne ɔ?” Gyisɛse buale kɛ, “Saa meka a, bɛnrɛlie me bɛnrɛli,

⁶⁸yɛɛ mebiza bɛ edwɛkɛ a, bɛnrɛye me ɔ nloa.

⁶⁹Na ɔvi ɛnɛ mɔɔ kɔ la medame Sonla Ra, mebadɛnla Tumivolɛ Nyamenle ne asa fema zo.”

⁷⁰Bɛ muala bɛhanle kɛ, “Ɛnee wɔmɔ a ɛle Nyamenle Ara ne a?” Ɔbuale bɛ kɛ, “Ɛhɛe, yemɔ ala a bɛdabɛ bɛha la.”

⁷¹Na bɛhanle kɛ, “Yɛngyia alasevolɛ biala! Yɛdayɛ mumua ne yɛde ɔ nloa edwɛkɛ!”