Read Nzema Luk 23 Bible Online

Luk 23 - Nzema bible

Luk 23

¹Menli ne amuala dwazole na bɛvale Gyisɛse bɛhɔle Paelɛte anyunlu,

²na bɛbɔle ɔ bo kɛ bɛtoɔdoa ye kɛ, “Yɛhyele nrenya ɛhye kɛ ɔlɛsɛkye yɛ menli ne mɔ adwenle, ɔse bɛmmatua adwule bɛmaa Maanle Maanle Belemgbunli ne na eza ɔkilehile kɛ ɔdaye mumua ne ɔle Kelaese, belemgbunli bie.”

³Na Paelɛte bizale ye kɛ, “Wɔmɔ a ɛle Dwuuma belemgbunli ne la ɔ?” Gyisɛse buale kɛ, “Yemɔ ala a wɔha la.”

⁴Paelɛte zele sɛlɛvolɛ mgbanyinli ne nee menli dɔɔnwo ne kɛ, “Mennwu ɛtane biala mɔɔ nrenya ye ɛyɛ a.”

⁵Na bɛ nye bolole ɛsesebɛ bɛzele kɛ, “Ɔlɛfa ye ngilehilelɛ ne yeamaa menli ne ado nzaka wɔ Dwudiya amuala. Ɔbɔle ɔ bo wɔ Galeli yɛɛ yeradwu ɛke a.”

⁶Paelɛte dele ɛhye la, ɔbizale kɛ, “Na nrenya ɛhye le Galelinli ɔ?”

⁷Na mɔɔ ɔdele ɔ bo kɛ Gyisɛse vi maanzinli ne mɔɔ Hɛlɔdo a nea zo la anu la, ɔmanle bɛvale ye bɛhɔmanle Hɛlɔdo; mekɛ ne anu ɛnee Hɛlɔdo ɔdaye yera Gyɛlusalɛm.

⁸Hɛlɔdo nwunle Gyisɛse la ɔlile fɛlɛko kpole, ɔluakɛ ɛnee yede ye nganeɛ na dɛba dɛba ye amuala ɔkpondɛ kɛ ɔnwu ye. Eza ɔ nye la kɛ ɔkɛnwu Gyisɛse kɛ ɔlɛyɛ nwanwane debie.

⁹Yemɔti Hɛlɔdo bizebizale Gyisɛse edwɛkɛ dɔɔnwo, na Gyisɛse ambua ye.

¹⁰Sɛlɛvolɛ mgbanyinli ne nee mɛla kilehilevolɛma ne mɔ zile gyinlanle, bɔle bɛ nyunlu bile, totonle Gyisɛse ɛzonle mgbole.

¹¹Hɛlɔdo nee ye ɛlɔnema ne noko golole Gyisɛse anwo na bɛzile ye amgbu. Bɛvale tɛladeɛ kɛnlɛma bie mɔɔ arelemgbunli ala a wula la bie bɛwulale ye, na ɔzianenle ye ɔhɔmanle Paelɛte.

¹²Ɔvi kenle ko ne ala Paelɛte nee Hɛlɔdo yɛle agɔnwolɛ, ɔluakɛ ɛnee bɛ mu nwiɔ bɛnga.

¹³Paelɛte vɛlɛle sɛlɛvolɛ mgbanyinli ne, mgbanyima ne mɔ yɛɛ ɛlɔne ne amuala manle bɛyiale,

¹⁴na ɔzele bɛ kɛ, “Bɛvale nrenya ɛhye bɛrɛlɛle me kɛ ɔlɛsɛkye menli adwenle. Kɛkala, mebizebiza ye edwɛkɛ wɔ bɛ nyunlu ɛke, na mennwu debie biala mɔɔ tia ye wɔ edwɛkɛ mɔɔ bɛha bɛdo ɔ nwo zo la anwo a.

¹⁵Hɛlɔdo ɔdaye yeambua ye fɔlɛ, ɔluakɛ yeziane ye yerɛlɛ yɛ. Ɔtɛyɛle debie biala mɔɔ fɛta ewule a.

¹⁶Yemɔti memaa bɛabila ye mbaka na meagyakyi ye meamaa yeahɔ.” [

¹⁷Akpabɛnwo Ɛvoyia ne dwu a ɔwɔ kɛ Paelɛte gyakyi sonla ko mɔɔ bɛdo ye efiade la maa bɛ.]

¹⁸Menli ne amuala deɛdeanle nuhua zele kɛ, “Ku ye! Ye Balabase maa yɛ!”

¹⁹(Balabase, ɔlua nzaka mɔɔ bɛdole wɔ suakpole ne azo, nee ye kɔdiawu ti yɛɛ bɛhyele ye bɛdole efiade a.)

²⁰Ɛnee Paelɛte kpondɛ kɛ ɔgyakyi Gyisɛse, yemɔti ɔdendɛle ɔhilele menli ne bieko.

²¹Na bɛdeɛdeanle nuhua bieko kɛ, “Bɔ ye meanubaka nu! Bɔ ye meanubaka nu!”

²²Paelɛte hanle ye fane nsa ne azo hilele bɛ kɛ, “Na duzu ɛtane a nrenya ye ɛyɛ a? Mennwu debie biala mɔɔ yeyɛ mɔɔ fɛta ewule a. Yemɔti memaa bɛabila ye mbaka na meagyakyi ye.”

²³Na bɛhɔle zolɛ bɛdeɛdeanle nuhua ɛsesebɛ kɛ ɔwɔ kɛ bɛbɔ Gyisɛse meanubaka nu, na nzinlii bɛlile konim.

²⁴Yemɔti Paelɛte buale Gyisɛse ndɛne, kɛmɔ bɛkpondɛ la.

²⁵Ɔyele sonla ne mɔɔ ɔlua ye kɔdiawu nee ye maamɔlɛ nzakadolɛ zo bɛdole ye efiade na bɛse bɛkpondɛ ye la ɔmanle bɛ, na ɔvale Gyisɛse ɔmanle bɛ kɛ mɔɔ bɛkulo la, bɛyɛ.

²⁶Sogyama ne vale Gyisɛse hɔle. Mɔɔ bɛkɔ la, bɛ nee nrenya bie mɔɔ bɛfɛlɛ ye Saemɔn mɔɔ vi Saelin la yiale kɛ ɔvi ye namule zo ɔlɛba suakpole ne azo. Bɛhyele ye nuokɛ na bɛvale meanubaka ne bɛzoale ye kɛ ɔli Gyisɛse anzi.

²⁷Menli dɔɔnwo kpalɛ doale Gyisɛse. Mraalɛ mɔɔ ɛnee ɛlɛsu ye ye ye awolɛ la noko boka nwo.

²⁸Na Gyisɛse hakyile ɔ nye wɔ bɛ nwo na ɔzele bɛ kɛ, “Gyɛlusalɛm mraalɛ! Bɛmmasu me, bɛzu bɛ nwo nee bɛ mra.

²⁹Ɔluakɛ mekɛ ɛlɛba mɔɔ menli baze kɛ, ‘Mraalɛ mɔɔ le mota, mɔɔ anwo mralɛ, yɛɛ bɛtɛnoanle ngakula nyɛfolɛ ɛlɛ la ati ɛyɛ boɛ!’

³⁰ Mekɛ ne anu, menli baze awoka mgbole kɛ, ‘Bɛdu bɛgua yɛ nwo zo!’ Na bɛaze awoka ngyikyi kɛ, ‘Bɛva yɛ bɛvea!’

³¹Ɔluakɛ saa bɛyɛ ninyɛne ɛhye mɔ wɔ mekɛ mɔɔ baka ne le amolɛ la a, ɛnee saa baka ne wu a, duzu a bɛkɛyɛ a?”

³²Bɛvale menli nwiɔ mɔɔ le maamɔvoma la bɛbokale Gyisɛse anwo bɛhɔle kɛ bɛkahu bɛ.

³³Mɔɔ bɛdwule ɛleka bie mɔɔ bɛfɛlɛ ye “Etile Kanrɛlɛ”[12] la, bɛbɔle Gyisɛse meanubaka nu wɔ ɛkɛ ne, yemɔ yɛɛ maamɔvoma nwiɔ ne, ko wɔ ye fema zo yɛɛ ko noko wɔ ye bɛne zo.

³⁴ Na Gyisɛse zele kɛ, “Egya, fa bɛ ɛtane kyɛ bɛ! Bɛnze mɔɔ bɛlɛyɛ la.” Bɛguale ye adɛladeɛ ne mɔ anwo nzeleba na bɛhyɛle.

³⁵ Mekɛ mɔɔ menli ne gyi ɛkɛ ne ɛlɛnea la ɛnee Dwuu mgbanyima ne mɔ mɔɔ wɔ bɛ nu la ɛlɛsi ye amgbu kɛ, “Se ɔliele awie mɔ ngoane o; saa yemɔ a ɔle Mɛzaya ne mɔɔ Nyamenle ɛkpa nu ɛye ye la amgba a, bɛmaa ɔlie ɔ nwo ngoane ɔmaa yɛnlea!”

³⁶ Sogyama ne bɛdabɛ bɛzile ye amgbu; bɛhɔle ɔ nwo ɛkɛ ne na bɛvale nwanye ɛnwonle bie bɛmanle ye,

³⁷na bɛzele kɛ, “Saa wɔmɔ a ɛle Dwuuma belemgbunli ne a ɛnee die ɛ nwo ɛ!”

³⁸Bɛhɛlɛle debie bɛbɔle ɔ ti zo anwuma kɛ, “Dwuuma belemgbunli ne ɛne.”

³⁹Maamɔvoma ne mɔ mɔɔ ɛnee bɛbɔ bɛ meanubaka nu la anu ko dendɛle tiale Gyisɛse kɛ, “Tɛ wɔmɔ a ɛle Kelaese ne la ɔ? Die ɛ nwo na die yɛdayɛ noko ɛ!”

⁴⁰Na ko ne hwile ɔ nyunlu zele kɛ, “Wɔmɔ ɛnzulo Nyamenle? Bɛbua wɔ ewule fɔlɛ kɛ ɔdaye ala la.

⁴¹Na yɛmɛ yɛ ɛdeɛ ne le fɔɔnwo, ɔboalekɛ mɔɔ yɛyɛ la yɛɛ bɛlɛtua yɛ nwolɛ kakɛ a; na yemɔ, ɔtɛyɛle ɛtane biala.”

⁴²Akee ɔhanle ɔhilele Gyisɛse kɛ, “Yɛmenle Gyisɛse, saa ɛdi wɔ belemgbunli ne a kakye me.”

⁴³Gyisɛse zele ye kɛ, “Mebɔ wɔ ɛwɔkɛ kɛ, ɛnɛ kenle ye, me nee wɔ bahɔ Paladaese.”

⁴⁴ Kɛyɛ sɛnzɛngyinla yɛɛ ewia ne nlunle a, na awozinli hedale maanle ne amuala azo toonwo ewiazo dɔne nsa. Ɛzonlenlɛ Sua ne anu mgbɛnu ɛdanlɛ ne dele sinli nwiɔ.

⁴⁵

⁴⁶ Na Gyisɛse deanle nu kpole kɛ, “Egya! Me ɛkɛla wɔ ɛ sa nu!” Ɔhanle ɛhye na ɔwule.

⁴⁷Sogya kpanyinli ne nwunle mɔɔ ɛzi la, na ɔyele Nyamenle ayɛlɛ ɔhanle kɛ, “Amgba, nrenya ne ati anu fufule!”

⁴⁸Menli dɔɔnwo ne mɔɔ rale ɛkɛ ne kɛ bɛbanlea bie la nwunle mɔɔ zile la, bɛbɔle bɛ sa ati na bɛziale bɛhɔle.

⁴⁹ Manivolɛma mɔɔ ze Gyisɛse, nee mraalɛ ne mɔ mɔɔ doale ye vi Galeli rale la gyinlanle ahane moa moa nleanle mɔɔ ɛlɛkɔ zolɛ la.

⁵⁰Nrenya bie wɔ ɛkɛ, bɛfɛlɛ ye Dwosefi. Ɔvi Arelematia mɔɔ wɔ Dwudiya maanzinli nu la. Nrenya ne le sonlakpalɛ, ɔdi nɔhalɛ na ɔlɛkendɛ Nyamenle Belemgbunlililɛ ne ɛralɛ. Ɔboka Ayiama ne anwo, noko yeanlie bɛ kpɔkɛbɔlɛ ne nee mɔɔ bɛyɛle la yeando nu.

⁵¹

⁵²Ɔhɔle Paelɛte ɛkɛ ne na ɔhɔzɛlɛle ye Gyisɛse funli ne.

⁵³Ɔdwulale funli ne aze, ɔvale lenen ɛdanlɛ ɔkyekyele funli ne na ɔvale ye ɔdole nla bie mɔɔ bɛpɛ ye wɔ bolɛ bie anu na bɛtɛsiele awie biala nu la anu.

⁵⁴Kenle ne le Yalɛ, na Ɛnwomenlelielɛ Kenle ne ɛbikye.

⁵⁵Mraalɛ ne mɔ mɔɔ nee Gyisɛse vi Galeli rale la nee Dwosefi hɔle hɔnwunle sɛka ne nee kɛ bɛzile bɛziele ye la.

⁵⁶ Akee bɛziale bɛhɔle sua nu bɛhɔkpondɛle alufuanlɛ nee sakyeɛ evuanlɛ mɔɔ bɛfa bɛakpokpa funli ne la. Akee bɛliele bɛ ɛnwomenle wɔ Ɛnwomenlelielɛ Kenle ne, kɛmɔ mɛla ne se la.