Read Nzema Luk 3 Bible Online

Luk 3 - Nzema bible

Luk 3

¹Mɔɔ bɛvale Taebileɛse bɛziele Wulomu Maanle Maanle Belemgbunli na ɔnyianle ɛvolɛ bulu nee nnu la, ɛnee Pɔnteɛse Paelɛte a le amɛnlado wɔ Dwudiya a, yɛɛ Hɛlɔdo noko a ɛnee nea Galeli maanzinli ne azo a. Hɛlɔdo adiema Felepe ɔdaye ɛnee ɔnea Ayetulia nee Telakonaetɛse maanzinli zo, yɛɛ Laeseenease noko nea Abelin maanzinli zo.

²Mekɛ ne anu ɛnee Anase nee Kayafase a le sɛlɛvolɛ mgbanyinli wɔ Yizilayɛ a, na Nyamenle edwɛkɛ ne razile Zɛkalaya ara Dwɔn anwo zo wɔ fienemgbole ne anu.

³Dwɔn hɔle azua mɔɔ gua Azule Dwɔdan ne anloa la azo na ɔbɔle nolo ɔzele kɛ, “Bɛnlu bɛ nwo na bɛrɛla bɛmaa bɛzɔne bɛ, na Nyamenle kɛva bɛ ɛtane ne mɔ kɛhyɛ bɛ.”

⁴ Kɛmɔ bɛhɛlɛ ye wɔ Nyamenle kpɔmanvolɛ Ayezaya buluku ne anu la: “Awie ɛlɛtea nu wɔ fienemgbole ne anu kɛ: ‘Bɛziezie Awulae adenle ne; bɛdenrɛdenrɛ ye ndenle ne mɔ!

⁵Bɛdua bɔnza biala, bɛha awoka mgbole nee ngyikyi kpokpoti aze. Bɛdenrɛdenrɛ ndenle ahyeɛhyealera ne mɔ, na bɛduodua ahuma ne mɔ.

⁶Na menli kɔsɔɔti kɛnwu Nyamenle ngoanelielɛ ne!’ ”

⁷ Menli dɔɔnwo rale Dwɔn ɛkɛ ne kɛ ɔzɔne bɛ. Na ɔzele bɛ kɛ, “Bɛmɛ ɛkyelebenle mralɛ! Nwane a zele bɛ kɛ bɛnriandi bɛvi Nyamenle ndeanlɛ ne mɔɔ bara la anwo a?

⁸ Bɛbɔ ɔ bo bɛyɛ debie mɔɔ kile kɛ bɛnlu bɛ nwo, na bɛmmakɔ zo bɛka kɛ, ‘Yɛle Ebileham amra.’ Meka meahile bɛ kɛ Nyamenle kola maa awolɛ ɛhye mɔ yɛ Ebileham abo zo amra!

⁹Baka biala mɔɔ anzo ma kpalɛ la, bɛkɛpɛ ye bɛkɛwula senle nu. Bɛhakye kɛ, kɛkala bɔbɔ, bɛziezie akuma mɔɔ bɛfa bɛadudu mbaka wɔ bɛ ndinli bo a.”

¹⁰Menli ne mɔ bizale ye kɛ, “Ɛnee duzu a yɛyɛ a?”

¹¹Dwɔn buale bɛ kɛ, “Bɛmaa mɔɔ lɛ ndanlɛ nwiɔ la ɛva ko ɛmaa mɔɔ ɛnlɛ bie la, na mɔɔ lɛ aleɛ la nee ɔ gɔnwo mɔ ɛli.”

¹²Adwuledievolɛma bie rale kɛ bɛba bɛamaa bɛazɔne bɛ, na bɛbizale Dwɔn kɛ, “Kilehilevolɛ, duzu a yɛyɛ a?”

¹³Na ɔzele bɛ kɛ, “Bɛmmadie adwule mɔɔ ɛngɔ mɛla nu la.”

¹⁴Sogyama bie noko bizale ye kɛ, “Na yɛdayɛ noko ɛ? Duzu a yɛyɛ a?” Dwɔn zele bɛ kɛ, “Bɛmmabɔ awie apo bɛdie ye ezukoa, anzɛɛ bɛmmato awie biala ɛzonle. Bɛmaa bɛ kunlu ɛdwo bɛ ezukoa mɔɔ bɛtua bɛ la anwo.”

¹⁵Kɛmɔ ɛnee menli dɔɔnwo anye la Mɛzaya ne ɛralɛ zo la, bɛdwenlenle kɛ bekezɛ yemɔ a le Dwɔn.

¹⁶Yemɔti Dwɔn zele bɛ kɛ, “Mame, mefa nzule a mesɔne bɛ a, na awie ɛlɛba mɔɔ ɔle kpole ɔtɛla me a. Sonla zɔhane mgbɔlaboa bɔbɔ, menfɛta kɛ menwɔzianyi zolɛ nyɛma. Na yemɔ, ɔbava Sunsum Nwuanzanwuanza ne nee senle a yeazɔne bɛ a.

¹⁷Ɔlɛ ye akegyebɛ ɔ sa nu, ɔbava yeahegye ye ma. Ɔbazoa kpalɛ ne yeahɔgua ye bonwolo ne azo, na yeayela abonle ne wɔ senle ne mɔɔ ɛnnu ɛlɛ la anu.”

¹⁸Dwɔn luale ndenle dɔɔnwo azo bɔle Edwɛkpa ne nolo hilele menli ne na ɔdule bɛ folɛ kɛ bɛhakyi bɛ subane.

¹⁹Na Dwɔn hwile Hɛlɔdo mɔɔ le Galeli maanzinli zo neavolɛ la anyunlu, ɔluakɛ ɛnee Hɛlɔdo ɛgya ɔ diema aye. Raalɛ ne bɛfɛlɛ ye Hɛlɔdease; eza ɛnee Hɛlɔdo ɛyɛ ninyɛndane dɔɔnwo.

²⁰Ɛtane kpole bɔbɔ mɔɔ bo ɛhye mɔ amuala azo, mɔɔ Hɛlɔdo akee yɛle la a le kɛ ɔhyele Dwɔn ɔdole efiade.

²¹Mɔɔ bɛzɔnenle menli ne amuala bɛwiele la, nzinlii bɛzɔnenle Gyisɛse ɔdaye noko, na mɔɔ ɔyɛ nzɛlɛlɛ la, anwuma bukele,

²² na Sunsum Nwuanzanwuanza ne le kɛ abubule la dwule ɔ nwo zo. Ɛnelɛ bie vi anwuma zele kɛ, “Wɔmɔ a ɛle me Ra mɔɔ mekulo wɔ kpalɛ a. Me nye die ɛ nwo kpole.”

²³Mɔɔ Gyisɛse bɔle ye gyima ne abo la ɛnee yeli ɛvolɛ kɛyɛ abulasa, na ɛnee menli ze kɛ Dwosefi ara ɔ. Dwosefi le Hilae ara.

²⁴Hilae le Matate ara, Matate le Livae ara, Livae le Mɛlekae ara, Mɛlekae le Gyanae ara, Gyanae le Dwosefi ara.

²⁵Dwosefi le Matatayase ara, Matatayase le Emɔso ara. Emɔso le Neehum ara, Neehum le Ɛselae ara, Ɛselae le Nagae ara.

²⁶Nagae le Meeyate ara, Meeyate le Matatayase ara, Matatayase le Semɛyɔn ara, Semɛyɔn le Dwosɛke ara, Dwosɛke le Dwoda ara.

²⁷Dwoda le Dwowanan ara, Dwowanan le Rilisa ara, Rilisa le Zɛlubabɛle ara, Zɛlubabɛle le Hyealeteɛle ara, Hyealeteɛle le Nilae ara.

²⁸Nilae le Mɛlekae ara, Mɛlekae le Adae ara, Adae le Kosam ara, Kosam le Ɛlemadam ara, Ɛlemadam le Ɛɛ ara,

²⁹Ɛɛ le Dwɔhyua ara, Dwɔhyua le Ɛleyizɛ ara, Ɛleyizɛ le Dwolem ara, Dwolem le Matate ara, Matate le Livae ara,

³⁰Livae le Semɛyɔn ara, Semɛyɔn le Dwuda ara, Dwuda le Dwosefi ara, Dwosefi le Dwonam ara, Dwonam le Yilayakem ara,

³¹Yilayakem le Mɛlɛya ara, Mɛlɛya le Mina ara, Mina le Matata ara, Matata le Neetan ara, Neetan le Devidi ara.

³²Devidi le Gyɛsi ara, Gyɛsi le Obɛde ara, Obɛde le Bowaze ara, Bowaze le Salemɔn ara, Salemɔn le Nahyɔn ara.

³³Nahyɔn le Amenadabe ara, Amenadabe le Ademen ara, Ademen le Aanae ara, Aanae le Hɛzelɔn ara, Hɛzelɔn le Pɛlɛze ara, Pɛlɛze le Dwuda ara,

³⁴Dwuda le Gyekɔbo ara, Gyekɔbo le Ayezeke ara, Ayezeke le Ebileham ara, Ebileham le Tɛla ara, Tɛla le Neehɔ ara.

³⁵Neehɔ le Sɛlɛge ara, Sɛlɛge le Riliyu ara, Riliyu le Pɛlɛge ara, Pɛlɛge le Yibɛ ara, Yibɛ le Hyɛla ara.

³⁶Hyɛla le Keenan ara, Keenan le Aafazade ara, Aafazade le Hyɛm ara, Hyɛm le Nowa ara, Nowa le Leemɛke ara,

³⁷Leemɛke le Matusɛla ara, Matusɛla le Yinɔko ara, Yinɔko le Gyɛlɛde ara, Gyɛlɛde le Mahalɛli ara, Mahalɛli le Kinan ara,

³⁸Kinan le Yinɔhye ara, Yinɔhye le Sɛte ara, Sɛte le Adam ara, yɛɛ Adam le Nyamenle ara.