Read Nzema Luk 6 Bible Online

Luk 6 - Nzema bible

Luk 6

¹ Ɛnwomenlelielɛ Kenle ko bie ɛnee Gyisɛse lua atoko ɛya bie anu. Ye ɛdoavolɛma ne bubule atoko ne bie lile.

²Falasiima ne bie mɔ bizale bɛ kɛ, “Kɛmɔti a bɛlɛyɛ mɔɔ yɛ mɛla ne tua kɛ yɛmmayɛ ye wɔ Ɛnwomenlelielɛ Kenle ne la ɛ?”

³ Na Gyisɛse buale bɛ kɛ, “Asoo bɛtɛkengale mɔɔ Devidi yɛle wɔ mekɛ mɔɔ ɛhɔne hunle ye nee ye menli ne mɔ la?

⁴ Ɔhɔle Nyamenle sua ne anu na ɔhɔvale kpanwo ne mɔɔ bɛva bɛbɔ azu bɛmaa Nyamenle la, ɔlile bie na ɔvale bie ɔmanle ye menli ne mɔ lile. Noko yɛ mɛla ne tua kɛ awie gyɛne mmadi bie kyesɛ sɛlɛvolɛma ne mɔ ala.”

⁵Na Gyisɛse dwulale ye edwɛkɛ ne kɛ, “Medame Sonla Ra, melɛ tumi wɔ Ɛnwomenlelielɛ Kenle ne azo.”

⁶Ɛnwomenlelielɛ Kenle bieko Gyisɛse hɔle nyianu sua ne anu hɔhilehilele. Nrenya ko wɔ ɛkɛ ne mɔɔ ɔ sa fema ne ɛdwe a.

⁷Mɛla kilehilevolɛma nee Falasiima bie mɔ ɛnee kpondɛ adenle alua zo adoa Gyisɛse la ati, bɛnleanle saa ɔkɛyɛ nrenya ne ayile wɔ Ɛnwomenlelielɛ Kenle ne a.

⁸Gyisɛse nwunle bɛ adwenle na ɔzele nrenya ne mɔɔ asa ɛdwe la kɛ, “Dwazo bagyinla yɛ nyunlu ɛke.” Nrenya ne dwazole ragyinlanle ɛkɛ ne.

⁹Gyisɛse zele bɛ kɛ, “Mebiza bɛ, duzu a yɛ mɛla ne maa nwolɛ adenle kɛ yɛyɛ wɔ Ɛnwomenlelielɛ Kenle ne a? Yɛyɛ ahunlunyele anzɛɛ yɛli ɛtane? Yɛlie sonla ngoane anzɛɛ yɛzɛkye ye?”

¹⁰Akee ɔnleanle bɛ nyunlu ɔyiale na ɔzele nrenya ne kɛ, “Tenrɛ ɛ sa ne anu!” Nrenya ne denrɛle ɔ sa ne anu na ɔ sa ne yɛle kpalɛ bieko.

¹¹Ɛhye anwo ɛya hunle menli ne kpole na bɛvale mɔɔ bɛbava bɛayɛ Gyisɛse la anwo adwenle.

¹²Mekɛ ne anu Gyisɛse hɔle boka bie azo kɛ ɔkazɛlɛ; na ɔzɛlɛle Nyamenle nɔe ne amuala.

¹³Aleɛ hyenle la, ɔvɛlɛle ye ɛdoavolɛma ne amuala na ɔkpale bɛ nuhua bulu nee nwiɔ, na ɔvɛlɛle bɛ ɛzoanvolɛma.

¹⁴Bɛmɛ a le: Saemɔn mɔɔ ɔmanle ye duma fofolɛ kɛ bɛfɛlɛ ye Pita la, nee ɔ diema Andelu; Gyemise nee Dwɔn, Felepe yɛɛ Baatɔlomiyu,

¹⁵Mateyu nee Tɔmase, Afeɛse ara Gyemise nee Saemɔn mɔɔ le Maanle Kulovolɛ ne,

¹⁶Gyemise ara Dwudase, yɛɛ Dwudase Yesekaleɔto, mɔɔ yele Gyisɛse manle la.

¹⁷Gyisɛse nee ye ɛzoanvolɛma ne vi boka ne azo tolole, ɔ nee ye ɛdoavolɛma dɔɔnwo hɔgyinlanle ɛleka bie mɔɔ la aze fɛɛnye la. Menli dɔɔnwo kpalɛ noko mɔɔ bie mɔ vi Dwudiya maanzinli ne kodoka biala anu, nee bie mɔ mɔɔ vi Gyɛlusalɛm nee ɛnweanloa azua mɔɔ le Taya nee Saedɛn la azo rayiale ye wɔ ɛkɛ ne;

¹⁸bɛrale kɛ bɛbadie ye na bɛamaa yeayɛ bɛ ayile. Bɛdabɛ mɔɔ sunsum ɛtane gyegye bɛ la noko rale, na ɔyɛle bɛ ayile.

¹⁹Menli dɔɔnwo ne amuala pelele kɛ bɛkɛva bɛ sa bɛkɛha ye, ɔluakɛ ɛnee tumi vi ye nu ɛlɛyɛ bɛ muala ayile.

²⁰Gyisɛse manle ɔ nye zo nleanle ye ɛdoavolɛma ne na ɔzele kɛ, “Nyilalɛ ɛha bɛdabɛ ehyianvolɛma; Nyamenle bamaa bɛanyia ye belemgbunlililɛ ne.

²¹“Nyilalɛ ɛha bɛdabɛ mɔɔ ɛhɔne ɛlɛku bɛ kɛkala la; Nyamenle bamaa bɛ ko ayi. “Nyilalɛ ɛha bɛdabɛ mɔɔ bɛlɛsu kɛkala la; Nyamenle bamaa bɛazele.

²² “Nyilalɛ ɛha bɛ, wɔ mekɛ mɔɔ menli kɛkpo bɛ, kɛyɛ bɛ aholoba, na bɛkɛze bɛ kɛ bɛle musuofoɔ, wɔ mame Sonla Ra me ti la!

²³ Saa ɔba ye zɔhane a, bɛli fɛlɛko, bɛzi agole, na bɛmaa bɛ nye ɛlie, ɔboalekɛ Nyamenle ɛva nwolɛ ahatualɛ kpole bie ɛzie bɛ wɔ anwuma. Ɔluakɛ kɛ bɛ nlenya mɔ yɛle Nyamenle kpɔmanvolɛma mɔɔ lumua la ɛne.

²⁴“Noko akee munzule ɛha bɛdabɛ mɔɔ bɛnyia bɛ nwo kɛkala la, ɔluakɛ bɛmɛ, bɛli bɛ ti bɛwie.

²⁵“Munzule ɛha bɛdabɛ mɔɔ bɛ ko ɛyi kɛkala la, ɔluakɛ ɛhɔne bahu bɛ. “Munzule ɛha bɛdabɛ mɔɔ bɛlɛsele kɛkala la, ɔluakɛ bɛbazu bɛadedɛ bɛ nwo bonrane nu.

²⁶“Munzule ɛha bɛ kɛ menli muala kɛyileyila bɛ kosoɛ a, ɔluakɛ zɔhane ala a bɛ nlenya mɔ yɛle Nyamenle kpɔmanvolɛma alane ne mɔ a.

²⁷“Na meka meahile bɛdabɛ mɔɔ bɛlɛtie me la kɛ: Bɛhulo menli mɔɔ kpɔ bɛ la na bɛyɛ kpalɛ bɛmaa bɛ.

²⁸Bɛyileyila menli mɔɔ wa bɛ amonle la, na bɛzɛlɛ bɛmaa menli mɔɔ yɛ bɛ kpɔdekpɔde la.

²⁹Saa awie bɔ ɛ nzo ko anu a, kakyi ko ne noko maa ɔbɔ nu. Saa awie die wɔ anwuma tɛladeɛ ne a, fa bubu ne noko maa ye.

³⁰Awie biza wɔ debie na ɛlɛ bie a, maa ye bie, yɛɛ awie fa wɔ debie a, mmabiza ɔ bo zo bieko.

³¹ Mɔɔ ɛkpondɛ kɛ awie mɔ yɛ maa wɔ la, yɛ zɔhane ala maa bɛdabɛ noko.

³²“Na saa bɛkulo menli mɔɔ kulo bɛ la angome a, ɛnee duzu nyilalɛ a bɛnyia ye a? Ɛtanevolɛma bɔbɔ kulo menli mɔɔ kulo bɛ la.

³³Saa bɛyɛ kpalɛ bɛmaa menli mɔɔ yɛ kpalɛ maa bɛ la angome a, duzu nyilalɛ a bɛnyia ye a? Ɛtanevolɛma bɔbɔ, bɛdabɛ kɛ bɛyɛ ye ala la ɛne.

³⁴Saa bɛbɔ menli mɔɔ bɛ nye la bɛ nwo zo kɛ bɛkɛdua la angome bosea a, ɛnee duzu nyilalɛ a bɛnyia ye a? Ɛtanevolɛma bɔbɔ bɔ ɛtanevolɛma bosea na bɛdie bɛ ezukoa ne ala.

³⁵Kyɛkyɛ! Bɛhulo menli mɔɔ kpɔ bɛ la na bɛyɛ kpalɛ bɛmaa bɛ, bɛbɔ bɛ bosea, noko bɛmmamaa bɛ nye da kɛ bɛ sa kɛha ye, na Anwuma Anwuma Nyamenle ne bamaa bɛ nwolɛ ahatualɛ kpole, na yeavɛlɛ bɛ ɔ mra, ɔluakɛ ɔyɛ nyele ɔmaa anzeayɛlɛma nee angomedima amuala.

³⁶Bɛ Ze mɔɔ wɔ anwuma la se anwunvɔne, yemɔti bɛdabɛ noko bɛze anwunvɔne.

³⁷“Bɛmmabua awie mɔ ndɛne, na Nyamenle ambua bɛ ndɛne; bɛmmabua awie ewule fɔlɛ, na Nyamenle ambua bɛ ewule fɔlɛ. Bɛva ɛtane bɛhyɛ, na Nyamenle ava bɛ ɛtane ahyɛ bɛ.

³⁸Bɛmaa bɛ sa ɛdwu awie mɔ anwo zo, na Nyamenle asa adwu bɛdabɛ noko bɛ nwo zo. Nɔhalɛ, bɛkɛnyia ye dɔɔnwo kpalɛ mɔɔ kɛyi bɛ sa a, na ɔkɛbulu zolɛ bɔbɔ. Nzuzulɛ mɔɔ bɛkɛzuzu bɛkɛmaa awie mɔ la yɛɛ Nyamenle bazuzu amaa bɛdabɛ noko a.”

³⁹ Na Gyisɛse bule bɛ ɛrɛlɛ ɛhye: “Anyenzinliravolɛ ɛnrɛhola ɛnrɛhile anyenzinliravolɛ ko noko adenle; saa ɔyɛ ye zɔhane a, bɛ mu nwiɔ bɛkɛgua kuma nu.

⁴⁰ Ɛdoavolɛ ɛnle kpole ɛndɛla ye kilehilevolɛ, yɛɛ ɛdoavolɛ biala di munli wɔ ye ndetelɛ nu a, ɔyɛ kɛ ye kilehilevolɛ ne ala la.

⁴¹“Duzu ati a ɛnwu mumunli ne mɔɔ la ɛ diema bie anye zo la, na ɛndwenle dubinli ne mɔɔ la ɛ nye zo la anwo ɛ?

⁴²Na duzu ati a ɛse ɛ diema kɛ, ‘Me diema, mebodo wɔ, maa menye mumunli ne mɔɔ la ɛ nye zo la,’ wɔ mekɛ mɔɔ dubinli la ɛdawɔ mumua ne ɛ nye zo la ɛ? Wɔmɔ nabalabanli, dumua ye dubinli ne wɔ ɛ nye zo, na wɔanwu debie kpalɛ, na wɔahola wɔaye mumunli ne mɔɔ la adiema ne anye zo la.

⁴³“Baka kpalɛ biala ɛnzo ma ɛtane, yɛɛ baka ɛtane ɛnzo ma kpalɛ.

⁴⁴ Baka biala ma yɛɛ bɛfa bɛnwu ye a; bɛntete feege ma wɔ evileni zo, yɛɛ bɛntete vanye ma wɔ andɔma zo.

⁴⁵ Sonlakpalɛ biala ninyɛne kpalɛ mɔɔ yezie bɛ wɔ ye ahonle nu la finde ye ɛbɛlabɔlɛ nu, yɛɛ sonlatane biala ninyɛndane mɔɔ yezie bɛ wɔ ye ahonle nu la finde ye ɛbɛlabɔlɛ nu. Ɔluakɛ mɔɔ ɛyi sonla ahonle nu tɛkɛɛ la yɛɛ ɔ nloa ka a.

⁴⁶“Kɛmɔti a bɛfɛlɛ me ‘Awulae, Awulae,’ noko bɛnyɛ mɔɔ menwɔze bɛ kɛ bɛyɛ la ɛ?

⁴⁷Awie mɔɔ ba me nwo na ɔtie me edwɛkɛ ne na ɔdi zolɛ la kɛ de la ɛne:

⁴⁸Ɔle kɛ nrenya bie mɔɔ ɛnee ɛlɛsi ye sua la, ɔpɛle kuma ne ɔmanle ɔhɔle kolaa na yeawula sua ne aze wɔ bolɛ zo. Ezule ne bule aze na ɔravale sua ne, na yeangola ye bu, ɔluakɛ bɛzile ye boɛ.

⁴⁹Na awie mɔɔ tie me edwɛkɛ ne na ɔnli zolɛ la le kɛ nrenya ne mɔɔ si ye sua ɛdeɛ ne la yeanwula ɔ bo aze kpalɛ la; ezule ne bule aze na ɔravale ye sua ne na ndɛndɛ ne ala ɔbule ɔguale ɔzɛkyele bɔkɔɔ, na ye azedɔlɛ ne yɛle ɛzulolɛ!”