Read Nzema Luk 7 Bible Online

Luk 7 - Nzema bible

Luk 7

¹Mɔɔ Gyisɛse hanle ɛhye mɔ amuala hilele menli ne mɔ na ɔwiele la, ɔhɔle Kapɛnayɛm.

²Wulomu sogya kpanyinli bie mɔɔ wɔ ɛkɛ ne la lɛ ye sonvolɛ ko mɔɔ ɔkulo ye edwɛkɛ kpole kpalɛ a. Akɛlɛ ɛhye anwo ɛdo ye na ɔlɛdie adenle yeawu.

³Mɔɔ sogya kpanyinli ne dele Gyisɛse nganeɛ la, ɔzoanle Dwuu mgbanyinli bie wɔ ɔ nwo lɔ kɛ bɛhɔzɛlɛ ye bɛmaa ɔrayɛ ye akɛlɛ ne ayile.

⁴Mgbanyinli ne mɔ rale Gyisɛse anwo ɛkɛ ne na bɛbodole ye ɛsesebɛ kɛ, “Nrenya ɛhye fɛta wɔ moalɛ bɔkɔɔ.

⁵Ɔkulo yɛ menli ne edwɛkɛ yɛɛ ɔdaye a ɔzile nyianu sua ne ɔmanle yɛ a.”

⁶Yemɔti Gyisɛse nee bɛ hɔle. Na mɔɔ ɔka ekyii ɔdwu sua nu ɛkɛ ne la, Wulomu sogya kpanyinli ne zoanle ɔ gɔnwo mɔ manle bɛhɔyiale Gyisɛse na bɛzele ye kɛ, “Yɛmenle, mmafa ɛvɛlɛ ɛhye ɛto ɛ nwo zo na menfɛta kɛ wɔmɔ ɛkɛra me kpɔda ye abo.

⁷Eza menea a medame bɔbɔ menfɛta kɛ menwɔra ɛ nyunlu. Zɔhane ati wɔmɔ ka ɛ nloa edwɛkɛ ne ala na me sonvolɛ ne anwo kɛza.

⁸Melɛ sogyama bɔbɔ wɔ me bo ɛdeɛ, mɔɔ meka mekile bie kɛ, ‘Kɔ’ a, ɔkɔ; meka mekile bie noko kɛ, ‘Yɛ ɛhye’ a, ɔyɛ, noko medame mumua ne mewɔ tumi bo.”

⁹Gyisɛse dele ɛhye la ɔzinle ɔ nwo; ɔhakyile ɔ nye wɔ menli dɔɔnwo ne mɔɔ doa ye la anwo na ɔzele kɛ, “Meka meahile bɛ kɛ metɛnwunle diedi kpole zɛhae bie ɛlɛ, bɔbɔ wɔ Yizilayɛma avinli.”

¹⁰Menli mɔɔ bɛzoanle bɛ la ziale hɔle Wulomu sogya kpanyinli ne sua nu, na bɛhɔnwunle kɛ sonvolɛ ne ɛde kpɔkɛ.

¹¹Aleɛ hyenle la Gyisɛse hɔle suakpole bie mɔɔ bɛfɛlɛ ye Neeyen la azo. Ye ɛdoavolɛma ne nee menli dɔɔnwo nee ye a hɔle a.

¹²Ɔhɔdwule sua ne kandiba la ɛnee bɛdo ɛlɔnwɔne na bɛ nee funli vi sua ne azo anuhɔlɛ kpole ne anu ɛlɛfinde. Ahenle mɔɔ ɛwu la le raalɛ kunlanvolɛ bie ara nrenya kokye, ɛhye ati ɛnee sua ne azo amra dɔɔnwo doa raalɛ ne.

¹³Mɔɔ Awulae nwunle raalɛ ne la alɔbɔlɛ hunle ye, na ɔzele ye kɛ, “Mmasu.”

¹⁴Akee ɔhɔvale ɔ sa ɔhanle ɛlɛka ne na bɛdabɛ mɔɔ bɛzo funli ne la gyinlanle na bɛzokoɛle. Gyisɛse zele kɛ, “Kpavolɛ! Mese, dwazo!”

¹⁵Sonla ne mɔɔ ɛwu la dwazole dɛnlanle aze na ɔbɔle ɔ bo kɛ ɔtendɛ, na Gyisɛse vale ye manle ɔ nli.

¹⁶Ɛzulolɛ hanle bɛdabɛ mɔɔ bɛwɔ ɛkɛ ne la amuala, na bɛyele Nyamenle ayɛlɛ bɛzele kɛ, “Nyamenle kpɔmanvolɛ kpole bie ɛvinde yɛ avinli! Nyamenle ɛra baboa ye menli.”

¹⁷Gyima ɛhye mɔɔ Gyisɛse lile la nganeɛ hɔle Dwudiya maanle ne anu amuala, na ɔdwule maanle maanle mɔɔ bikye ye la kɔsɔɔti anu noko.

¹⁸Dwɔn Sɔnevolɛ ne ɛdoavolɛma hanle ɛhye mɔ amuala hilele ye. Yemɔti ɔvɛlɛle ye ɛdoavolɛma ne mɔ nwiɔ

¹⁹na ɔzoanle bɛ wɔ Awulae anwo ɛkɛ ne kɛ bɛhɔbiza ye kɛ, “Ɛnee wɔmɔ a ɛle ahenle ne mɔɔ ɛlɛba la, anzɛɛ yɛmaa yɛ nye ɛla awie fofolɛ ade ɔ?”

²⁰Na mɔɔ bɛhɔle Gyisɛse ɛkɛ ne la, bɛhanle kɛ, “Dwɔn Sɔnevolɛ ne zoanle yɛ kɛ yɛrabiza wɔ saa wɔmɔ a ɛle ahenle ne mɔɔ ɔdaye Dwɔn ɔhanle kɛ ɔbara la, anzɛɛ yɛmaa yɛ nye ɛla awie fofolɛ ade ɔ?”

²¹Mekɛ zɔhane, Gyisɛse yɛle menli dɔɔnwo mɔɔ ɛnde kpɔkɛ nee bɛdabɛ mɔɔ ewulenzane wɔ bɛ nwo la ayile manle bɛdele kpɔkɛ, ɔdudule sunsum ɛtane ɔvile menli nwo na ɔdukuedukuele anyenzinliravolɛma dɔɔnwo anye.

²² Na ɔbuale Dwɔn ɛdoavolɛma ne kɛ, “Bɛzia bɛhɔ na bɛhɔha mɔɔ bɛnwu ye nee mɔɔ bɛde la amuala bɛhile Dwɔn: anyenzinliravolɛma nwu debie, abuburama tia, kokobɛvolɛma anwo sa, anzondiliravolɛma te edwɛkɛ, bɛdwazo menli mɔɔ ɛwu la bɛba ngoane nu, na bɛbɔ Edwɛkpa ne nolo bɛkile ehyianvolɛma.

²³Nyilalɛ ɛha bɛdabɛ mɔɔ medame ti bɛmkpo aze wɔ diedi nu la.”

²⁴Nzinlii mɔɔ menli mɔɔ Dwɔn zoanle bɛ la hɔle la, Gyisɛse bɔle ɔ bo kɛ ɔka Dwɔn anwo edwɛkɛ yeahile menli dɔɔnwo ne kɛ, “Mɔɔ bɛhɔle Dwɔn anwo ɛkɛ ne wɔ fienemgbole ne anu la, duzu a ɛnee bɛ nye la kɛ bɛkɛnwu ye a? Ndile mɔɔ anwoma ɛlɛkpusu ye la ɔ?

²⁵Duzu a bɛhɔle ye ɛnleanlɛ a? Sonla mɔɔ heda ɛdakpa la ɔ? Nɔhalɛ, bɛdabɛ mɔɔ bɛkeda ɛdakpa na bɛde anyelielɛ nu la wɔ arelemgbunli azua nu.

²⁶Bɛha bɛhile me ɛ, duzu a ɛnee akee bɛhɔle ye ɛnleanlɛ a? Nyamenle kpɔmanvolɛ ɔ? Ɔle zɔhane, noko bɛnwunle mɔɔ tɛla Nyamenle kpɔmanvolɛ bɔbɔ la.

²⁷ Ɔluakɛ Dwɔn a Nyamenle Edwɛkɛ ne ka ye ɔ nwo kɛ, ‘Nyamenle se: Mebazoa ɛbɔfoɔ meamaa yealumua ɛ nyunlu na yeahɔziezie adenle ne yeamaa wɔ’ la.”

²⁸Na Gyisɛse hanle zɔle zolɛ kɛ, “Meka meahile bɛ, Dwɔn le kpole tɛla sonla biala mɔɔ bɛwo ye la; noko akee mɔɔ le ekyi kpalɛ wɔ Nyamenle Belemgbunlililɛ nu la le kpole tɛla ye.”

²⁹ Menli mɔɔ dele ɛhye, nee adwuledievolɛma amuala lile fɛlɛko na bɛyele Nyamenle ayɛlɛ kɛ bɛdiele Dwɔn, bɛnlunle bɛ nwo na bɛmanle ɔzɔnenle bɛ a.

³⁰Noko Falasiima nee mɛla kilehilevolɛma ɛdeɛ, bɛkpole mɔɔ Nyamenle kpondɛ kɛ bɛyɛ la na bɛkpole kɛ bɛnrɛmaa Dwɔn ɛnrɛzɔne bɛ.

³¹Gyisɛse zɔle ye edwɛkɛ ne azo zɛhae, “Duzu a menva adwuleso amra ye mendo nwo a? Kɛ bɛde la ɛne:

³²Bɛle kɛ ngakula mɔɔ ɛlɛdi nwɔhoa wɔ gua zo la. Bɛdede ye ekpunli ekpunli. Ekpunli ko tea nu se ko kɛ, ‘Yɛbɔle anyelielɛ edwɛne yɛmanle bɛ, na bɛanzi; yɛyele awolɛ, na bɛanlie zo.’

³³Dwɔn Sɔnevolɛ ne rale, ɔhyele ɛhɔne dahuu na ɔhyile nza la bɛse, ‘Ɔle ayɛne!’

³⁴Medame Sonla Ra noko mera, medi na meno a eza bɛse, ‘Nea ɛhye! Adidikpoku, nzanli nee adwuledievolɛma nee bɛdabɛ mɔɔ awie ɛmbu bɛ bie la agɔnwo!’

³⁵Noko, Nyamenle nrɛlɛbɛ ne amra ne mɔ nyɛleɛ maa bɛnwu kɛ ɔle nɔhalɛ.”

³⁶Falasiinli ko bie dole Gyisɛse ɛkponle. Gyisɛse hɔle na ɔdɛnlanle aze kɛ ɔdi debie.

³⁷ Raalɛ bie wɔ sua ne azo mɔɔ bɔle ɛbɛla mgbane mgbane a. Ɔdele kɛ Gyisɛse wɔ Falasiinli ne sua nu la, ɔvale anatele mɔɔ wɔ toba mɔɔ bɛvale “alabaseta” bolɛ a bɛyɛle la anu la ko ɔhɔle ɛkɛ ne;

³⁸ɔhɔhotole Gyisɛse agyakɛ anu na ɔbɔle ɔ bo kɛ ɔsu yeava ɔ nye monle yeanrinzi ɔ gyakɛ nwiɔ ne anwo. Akee ɔvale ɔ ti enrinli ɔkyikyile, ɔvole ɔ gyakɛ anwo na ɔwolale anatele ne ɔguale nwo.

³⁹Mɔɔ Falasiinli ne mɔɔ yiale Gyisɛse la nwunle ɛhye la, ɔhanle ye ɔ ti akunlu kɛ, “Saa amgba nrenya ɛhye le Nyamenle kpɔmanvolɛ a, anrɛɛ ɔkɛnwu raalɛ holɛ ko mɔɔ ɛlɛfa ɔ sa aha ye la, na ɔkɛnwu ye ɛbɛla mgbane mgbane mɔɔ ɔbɔ la.”

⁴⁰Gyisɛse zele ye kɛ, “Saemɔn, melɛ edwɛkɛ meka meahile wɔ.” Saemɔn zele kɛ, “Kilehilevolɛ, ka kile me.”

⁴¹Gyisɛse bɔle ɔ bo zɛhae: “Nrenya bie mɔɔ bɔ bosea la woale ɛkɛ, ɔlɛ kavolɛma nwiɔ. Ko tua ye etaku nna nna ɛya nnu, yɛɛ ko noko tua ye etaku nna nna abulanlu.

⁴²Kɛmɔ bɛannyia ye bɛandua la ati, ɔvale bɛ mu nwiɔ bɛ kakɛ ne ɔhyɛle bɛ. Na ɛnee ɛnea a, menli nwiɔ ɛhye, boni a kɛhulo nrenya ne edwɛkɛ kpalɛ a?”

⁴³Saemɔn buale kɛ, “Medie medi kɛ mɔɔ ɔvale ye kakɛ kpole ne ɔhyɛle ye la ɔ.” Gyisɛse zele ye kɛ, “Wɔbua ye bɔkɔɔ.”

⁴⁴Akee ɔhakyile ɔ nye wɔ raalɛ ne anwo ɛkɛ na ɔzele Saemɔn kɛ, “Wɔnwu raalɛ ɛhye? Membale wɔ sua nu ɛke la wɔammaa me nzule meanwowo me gyakɛ anwo, na yemɔ, yeva ɔ nye monle yewowo me gyakɛ anwo na yeva ɔ ti enrinli yekyikyi.

⁴⁵Wɔmɔ, wɔammiti me bie[5] wɔanyɛ me akɔaba, na yemɔ, sumunli kɛ de la ɔtɛgyakyile me gyakɛ anwo ɛvolɛ.

⁴⁶Wɔanva ɔlivi nwole wɔanyɛ me ti zo, na yemɔ, yeva anatele yegua me gyakɛ anwo.

⁴⁷Ɛhye ati meka meahile wɔ kɛ, ɛhulolɛ kpole ne mɔɔ yehile la, kile kɛ bɛva ye ɛtane bebelebe ne bɛhyɛ ye. Mɔɔ bɛkɛva ekyi bɛkɛhyɛ ye la ɛhulolɛ le ekyi bie ala.”

⁴⁸Akee Gyisɛse zele raalɛ ne kɛ, “Bɛva wɔ ɛtane ne mɔ bɛhyɛ wɔ.”

⁴⁹Bɛdabɛ mɔɔ bɛdede ɛkponle ne anwo la bɔle ɔ bo kɛ bɛka ye bɛ ti anu kɛ, “Na nwane bɔbɔ a le ɛhye, mɔɔ ɔkola ɔfa ɛtane ɔkyɛ a?”

⁵⁰Na Gyisɛse zele raalɛ ne kɛ, “Kɔ anzonudwolɛ nu; wɔ diedi ɛlie wɔ ngoane.”