Read Nzema Luk 8 Bible Online

Luk 8 - Nzema bible

Luk 8

¹Nzinlii Gyisɛse hɔkpɔsale azua nee namunamu zo na ɔbɔle Edwɛkpa ne mɔɔ fane Nyamenle Belemgbunlililɛ ne nolo. Ɛdoavolɛma bulu nee nwiɔ ne nee ye hɔle.

² Mraalɛ bie mɔɔ bɛdule sunsum ɛtane wɔ bɛ nwo, nee mɔɔ bɛyɛle bɛ anwonyane ayile la noko nee ye hɔle. Bɛmɛ a le Mɛle mɔɔ vi Magedala, mɔɔ ɔ nwo a bɛdule mbɔnsam nsuu ne la;

³Twuza, mɔɔ le Hɛlɔdo suakunlu ɛkɛ ne abɔlɔba kpanyinli ne mɔɔ nea ye ninyɛne zo la aye ne mɔɔ bɛfɛlɛ ye Dwowana la, yɛɛ Susana nee mraalɛ dɔɔnwo bie mɔ. Mraalɛ ɛhye mɔ, bɛdabɛ bɛvale mɔɔ bɛlɛ ye la bɛboale Gyisɛse nee ye ɛdoavolɛma ne mɔ.

⁴Menli dɔɔnwo vi azua azua ne mɔ azo rale Gyisɛse ɛkɛ ne, na mɔɔ menli ne mɔ yɛle dɔɔnwo kpalɛ la, Gyisɛse bule bɛ ɛrɛlɛ ɛhye:

⁵“Nrenya bie hɔle kɛ ɔkagua ye ma. Mɔɔ ɔgua ma ne la, bie guale adenle nu, menli tietiale zolɛ, na nloma rasusole.

⁶Bie guale awolɛ nu, na bɛfifile la, bɛnwosonle, ɔluakɛ azɛlɛ ne abo ɛnlɛ nzule.

⁷Bie guale mbowule nu, na mbowule ne nyinle hedale bɛ nwo zo,

⁸yɛɛ bie noko guale azɛlɛ kpalɛ zo, na bɛfifile bɛzole ma mɔnwo ɛya.” Gyisɛse dwulale ye edwɛkɛ ne kɛ, “Bɛdie, mɔɔ lɛ ɛnzonlɛ la ɛdie!”

⁹Gyisɛse ɛdoavolɛma ne mɔ bizale ye ɛrɛlɛ ne abo,

¹⁰ na ɔbuale bɛ kɛ, “Bɛmɛ, Nyamenle ɛla ye belemgbunlililɛ ne anwo edwɛkɛ mɔɔ vea la ali wienyi ɛhile bɛ, na menli mɔɔ ɛha la bɛte ye wɔ mrɛlɛ nu, amaa bɛnea a bɛannwu ye, yɛɛ bɛtie a bɛande ɔ bo.

¹¹“Akee ɛrɛlɛ ne abo ɛne: Ma ne a le Nyamenle edwɛkɛ ne.

¹²Mɔɔ guale adenle nu la gyi ɛkɛ ne maa bɛdabɛ mɔɔ bɛtie edwɛkɛ ne, na Abɔnsam baye edwɛkɛ ne wɔ bɛ ahonle nu, amaa bɛanlie bɛanli na bɛanyia ngoane la.

¹³Ma ne mɔɔ guale awolɛ nu la a le bɛdabɛ mɔɔ bɛte edwɛkɛ ne a bɛfa fɛlɛko bɛdie noko ɔnwolowolo bɛ kpalɛ la. Bɛdie bɛdi wɔ mekɛ ekyi bie ala na kɛ sɔnea ba la ɛnee bɛkpo aze.

¹⁴Ma ne mɔɔ guale mbowule nu la a le bɛdabɛ mɔɔ bɛtie edwɛkɛ ne, na bɛmaa ɛbɛlabɔlɛ nwo adwenleadwenle, anwonyia nee anyelielɛ fo keda edwɛkɛ ne azo la, ɛhye ati bɛ ma ɛnyɛ kpalɛ.

¹⁵Ma ne mɔɔ guale azɛlɛ kpalɛ zo la a le bɛdabɛ mɔɔ saa bɛtie edwɛkɛ ne a bɛsɔ nu kpundii wɔ ahonle kpalɛ nu, na bɛfa abotane bɛyɛ tieyɛ bɛgyinla kpundii kɔkpula kɛ bɛkɛzo ma la.

¹⁶ “Sonla ɛnzɔ kɛnlaneɛ na ɔnva bondo ɔmbutu zolɛ, anzɛɛ ɔnva ɔnzie mgba bo; ɔfa ɔsie debie zo anwuma, amaa menli mɔɔ ba sua ne anu la anwu wienyi ne.

¹⁷ “Debie biala mɔɔ vea la bala ali wienyi; yɛɛ mɔɔ bɛheda zolɛ la anwo bala zolɛ.

¹⁸ “Zɔhane ati bɛdie ye boɛ, ɔboalekɛ mɔɔ lɛ bie la, ɔbanyia bie dɔɔnwo yeaboka nwolɛ, na mɔɔ ɛnlɛ bie la, ekyi ne bɔbɔ mɔɔ ɔdwenle kɛ ɔlɛ la, bɛbalie bɛavi ɔ sa nu.”

¹⁹Gyisɛse ɔ nli nee ɔ mediema ne mɔ rale ɛleka mɔɔ ɔwɔ la, na kɛmɔ menli mɔɔ wɔ ɔ nwo ɛkɛ ne la zonle la ati, bɛangola bɛandwu ɔ nwo ɛkɛ ne.

²⁰Awie hanle hilele Gyisɛse kɛ, “Ɛ nli nee ɛ mediema ne mɔ gyi alie nwo lɔ, na bɛkulo kɛ bɛnwu wɔ.”

²¹Gyisɛse zele bɛ kɛ, “Me nli nee me mediema a le bɛdabɛ mɔɔ bɛtie Nyamenle edwɛkɛ ne na bɛdi zolɛ la.”

²²Kenle ko Gyisɛse nee ye ɛdoavolɛma ne hɔvole ɛlɛne nu na ɔzele bɛ kɛ, “Bɛmaa yɛpɛ yɛhɔ tandane ne anzi lɔ.” Yemɔti bɛdule.

²³Mɔɔ bɛlɛkɔ la Gyisɛse lafele. Arɛlevilɛ nu ala ahumu kpole bie vale bɛ, na nzule bɔle ɔ bo kɛ ɔbu yeagua ɛlɛne ne anu. Ɛzulolɛ kpole hanle bɛdabɛ mɔɔ bɛwɔ ɛlɛne ne anu la.

²⁴Ɛdoavolɛma ne hɔdunwuele Gyisɛse na bɛzele kɛ, “Yɛmenle, Yɛmenle, yɛwie wu!” Gyisɛse dwazole na ɔdeanle ahumu ne nee azule ne mɔɔ ɛyɛ begyebegye la nu, na bɛguale diinyi, na maanle nu gyinlanle.

²⁵Akee ɔzele ye ɛdoavolɛma ne kɛ, “Bɛ diedi ne wɔ nienwu?” Na ɔyɛle bɛ azibɛnwo na bɛzulole, na bɛhanle bɛhilele bɛ nwo ngoko kɛ, “Duzu sonla a le ɛhye? Ɔtendɛ a anwoma nee azule bɔbɔ tie ye!”

²⁶Gyisɛse nee ye ɛdoavolɛma ne hɔdwule aze wɔ Gɛlasa[6] maanle nu wɔ Galeli tandane ne anzi lɔ.

²⁷Gyisɛse dwule aze ala la, nrenya bie mɔɔ vi sua ne azo na sunsum ɛtane dɔɔnwo ɛva ye la yiale ye. Mekɛ dɔɔnwo mɔɔ ɛze la, nrenya ɛhye ɛngeda bie yɛɛ ɔmmo bie. Ɔnla sua nu, ye dabelɛ a le azie zo sɛka ne mɔ anu.

²⁸Mɔɔ ɔnwunle Gyisɛse la, ɔdeanle nu kpole bie, ɔradule ɔdɔle ɔ nyunlu na ɔhanle ye kpole kpalɛ kɛ, “Anwuma Anwuma Nyamenle Ara Gyisɛse, ɛ nee me lɛ bie ɔ? Mekpa wɔ kyɛlɛ, mmatea me!”

²⁹Ɔhanle ɛhye, ɔluakɛ ɛnee Gyisɛse ɛze sunsum ɛtane ne kɛ ɔvi ɔ nwo ɔdu. Mekɛ dɔɔnwo sunsum ɛtane zɛhae ɛvo nrenya ne ɛmaa bɛhye ye bɛdo sua nu, bɛgua ɔ sa nee ɔ gyakɛ nwɔnzɔnwɔnzɔ, noko sunsum ɛtane ne ɛmaa yebubu nwɔnzɔnwɔnzɔ ne na yeva ye yedɔ ɛbɔ nu wɔ fienemgbole ne anu.

³⁰Gyisɛse bizale ye kɛ, “Kɛ bɛfɛlɛ wɔ ɛ?” Nrenya ne buale kɛ, “Bɛfɛlɛ me ɛlɔne”, ɔluakɛ ɛnee sunsum ɛtane dɔɔnwo kpalɛ a gyi ɔ nwo a.

³¹Sunsum ɛtane ne mɔ zɛlɛle Gyisɛse kɛ ɔmmagua bɛ azɛlɛ bo kuma kpole ne mɔɔ bɛfɛlɛ ye “abese” la anu.

³²Ɛnee agbolike kpolane bie bikye ɛleka mɔɔ bɛwɔ la, na bɛlɛdidi wɔ boka bie abati. Sunsum ɛtane ne mɔ bodole Gyisɛse kɛ ɔmaa bɛ adenle ɔmaa bɛhɔwolo agbolike ne mɔ, na Gyisɛse kponlenle zolɛ.

³³Sunsum ɛtane ne mɔ vile nrenya ne anwo na bɛhɔwolole agbolike ne mɔ, na agbolike ne mɔ pianle bɛ nwo vi boka ne abati radule guale tandane ne anu na bɛwule bɔkɔɔ.

³⁴Menli mɔɔ ka agbolike ne mɔ la nwunle mɔɔ zile la, bɛnriandile bɛhɔhanle ye wɔ sua ne azo bɛmanle ɔdwule menli mɔɔ wɔ namunamu ne mɔ mɔɔ zuozua ɛkɛ ne la amuala anzo nu.

³⁵Menli hɔle kɛ bɛkanlea mɔɔ ɛzi la. Bɛrale Gyisɛse anwo ɛkɛ ne la bɛnwunle nrenya ne mɔɔ bɛdule sunsum ɛtane ne mɔ wɔ ɔ nwo la kɛ ɔde Gyisɛse anwo ɛkɛ ne na ɔheda ɛdanlɛ, ye adwenle la ɛkɛ ne wienyi; na bɛzulole.

³⁶Bɛdabɛ mɔɔ bɛnwunle mɔɔ zile la hanle kɛ nrenya ne mɔɔ sunsum ɛtane ne wɔ ɔ nwo la zile dele kpɔkɛ la hilele menli ne.

³⁷Ɛzulolɛ kpole mɔɔ hanle Gɛlasa maanlema la manle bɛzele Gyisɛse kɛ ɔvi bɛ maanle ne anu ɔhɔ. Yemɔti Gyisɛse vole ɛlɛne nu kɛ ɔkɔ.

³⁸Nrenya ne mɔɔ mbɔnsam ne mɔ vi ɔ nwo dule la bodole Gyisɛse kɛ, “Maa me nee wɔ ɛhɔ.” Gyisɛse amkponle zolɛ na ɔzele ye kɛ,

³⁹“Sia kɔ sua nu na kɔha mɔɔ Nyamenle ɛyɛ ɛmaa wɔ la.” Nrenya ne ziale hɔle na ɔhɔhanle mɔɔ Gyisɛse ɛyɛ ɛmaa ye la amuala wɔ sua bɔdenle ne azo amuala.

⁴⁰Gyisɛse ziale ɔ nzi pɛle rale azule nzi nehae la, menli ne rayiale ye, ɔluakɛ ɛnee bɛ muala bɛlɛkendɛ ye.

⁴¹Nrenya bie mɔɔ bɛfɛlɛ ye Gyeeyaelɛse la rale ɛkɛ ne. Nrenya ɛhye le sua ne azo nyianu sua ne neavolɛ. Ɔdule ɔdɔle Gyisɛse agyakɛ anu na ɔbodole ye kɛ ɔmaa bɛhɔ ye sua nu,

⁴²ɔluakɛ ɔ ra raalɛ kokye mɔɔ ɛli ɛvolɛ bulu nee nwiɔ la ɛlɛdie ewule awu. Gyisɛse nee nrenya ne bɛlɛkɔ la, menli dɔɔnwo doale ye na bɛhyelele ɔ nwo zo kpalɛ.

⁴³Raalɛ bie wɔ ɛlɔne ne anu mɔɔ mogya ɛdudu ye toonwo ɛvolɛ bulu nee nwiɔ, yezɛkye ye ezukoa muala wɔ ninsinlima asa anu,[7] noko awie biala angola ye ayile yɛ a.

⁴⁴Ɔbɔle mɔdenle ɔralile Gyisɛse anzi na ɔvale ɔ sa ɔhanle ye tɛladeɛ ne anloa, na ɛkɛ ne ala mogya ne pɛle.

⁴⁵Na Gyisɛse bizale kɛ, “Nwane a ɛva ɔ sa ɛha me la?” Awie biala zale, na Pita zele kɛ, “Yɛmenle, ɛgyi menli avinli yɛɛ bɛhyele zo kpalɛ!”

⁴⁶Na Gyisɛse zele kɛ, “Awie ɛva ɔ sa ɛha me, ɔluakɛ mede ye me nu kɛ tumi vi me nuhua ɛhɔ.”

⁴⁷Raalɛ ne nwunle kɛ ɔfea ɔ nwo a ɔnyɛ boɛ, yemɔti ɔvale anwowozolɛ ɔradule ɔdɔle Gyisɛse agyakɛ anu, ɔkpale ye edwɛkɛ nwo ɛdanlɛ wienyi wɔ menli ɛwolaa ne anyunlu na ɔhanle deɛ mɔɔ yemɔti ɔvale ɔ sa ɔhanle ye, nee ɔ nwo mɔɔ ɛza ɛkɛ ne ala la noko.

⁴⁸Gyisɛse zele ye kɛ, “Me ra raalɛ, wɔ diedi ɛlie wɔ ngoane; kɔ anzonudwolɛ nu.”

⁴⁹Gyisɛse anloa wɔ ɛhye azo la, nrenya bie vi nyianu sua ne neavolɛ ne sua nu razele Gyeeyaelɛse kɛ, “Ɛ ra raalɛ ne ɛwu, yemɔti mmagyegye kilehilevolɛ ne.”

⁵⁰Gyisɛse dele edwɛkɛ ne na ɔzele Gyeeyaelɛse kɛ, “Mmasulo, wɔmɔ die di ala na ɔbade kpɔkɛ.”

⁵¹Mɔɔ Gyisɛse dwule sua nu ɛkɛ ne la, yeamaa awie biala adenle yeamaa yeanwolo ɛkɛ ne kɛ Pita, Dwɔn nee Gyemise, yɛɛ kakula ne ɔ ze nee ɔ nli ala.

⁵²Ɛnee awie biala mɔɔ wɔ sua nu ɛkɛ ne la ɛlɛsu aye awolɛ wɔ kakula ne mɔɔ ɛwu la ati. Na Gyisɛse zele bɛ kɛ, “Bɛmmasu na kakula ne ɛtɛwule; ɔlɛdafe ala!”

⁵³Bɛ muala bɛzelele ye, ɔboalekɛ bɛze kɛ kakula ne ɛwu.

⁵⁴Na Gyisɛse zɔle kakula ne asa na ɔzele kɛ, “Kakula raalɛ, dwazo!”

⁵⁵Ɛkɛ ne ala ɛnwomenle ziale rale kakula ne nu bieko na ɔdwazole. Gyisɛse manle bɛmanle ye debie ɔlile.

⁵⁶Na ɔyɛle kakula ne awovolɛ ne azibɛnwo. Na ɔduale bɛ kɛ mɔɔ ɛzi la, bɛmmabɔ zolɛ bɛkile awie biala.