Read Nzema Luk 9 Bible Online

Luk 9 - Nzema bible

Luk 9

¹Mekɛ guale nu ekyii la, Gyisɛse vɛlɛle ɛdoavolɛma bulu nee nwiɔ ne na ɔmanle bɛ tumi kɛ bɛva bɛdu sunsum ɛtane ne mɔ na bɛyɛ ewule ngakyile ayile.

²Akee ɔzoanle bɛ kɛ bɛhɔbɔ Nyamenle Belemgbunlililɛ ne nolo na bɛyɛ wuleravolɛma ayile;

³na ɔzele bɛ kɛ, “Wɔ bɛ adendulɛ ne anu bɛmmafa debie biala mɔɔ le kɛ kpɔma anzɛɛ kodoku, aleɛ anzɛɛ ezukoa, yɛɛ bɛmmafa tɛladeɛ bieko bɛboka mɔɔ bɛwula la anwo.

⁴Awuke biala mɔɔ bɛkɛlie bɛ nu la, bɛdɛnla ɛkɛ ne kɔkpula mekɛ mɔɔ bɛkɛvi sua ne azo la,

⁵ na ɛleka biala mɔɔ menli ne anlie bɛ la, bɛvi sua ne azo bɛhɔ na bɛkpokpo bɛ gyakɛ abo anwea ne bɛgua zolɛ bɛmaa ɔyɛ daselɛ ɔtia bɛ.”

⁶Ɛdoavolɛma ne hɔle na bɛhɔkpɔsɛkpɔsale namunamu ne mɔ amuala azo, bɛbɔle Edwɛkpa ne nolo na bɛyɛle menli ayile.

⁷ Hɛlɔdo mɔɔ ɛnee le Galeli maanzinli zo neavolɛ la dele mɔɔ ɛlɛkɔ zolɛ la amuala, na ye adwenle zɛkyele. Ɔluakɛ ɛnee bie mɔ ɛlɛka kɛ, Dwɔn Sɔnevolɛ ne ɛzia ɛra ngoane nu.

⁸Bie mɔ noko se Yilaegya ɛye ɔ nwo ɛhile, yɛɛ bie mɔ eza se mɔmoane Nyamenle kpɔmanvolɛma ne mɔ anu ko a ɛra ngoane nu bieko la.

⁹Hɛlɔdo zele kɛ, “Memanle bɛpɛle Dwɔn ati, na nwane noko a le ɛhye mɔɔ bɛlɛka ye edwɛkɛ la?” Na ɔbɔle mɔdenle kɛ ɔkɛnwu Gyisɛse.

¹⁰Ɛdoavolɛma ne ziale rale rahanle mɔɔ bɛyɛle la amuala bɛhilele Gyisɛse. Na ɔvale bɛ ɔ nee bɛ hɔle sua bie mɔɔ bɛfɛlɛ ye Bɛteseeyeda la azo.

¹¹Mɔɔ menli ne mɔ dele la, bɛdoale ye wɔ lɔ. Na ɔliele bɛ, ɔhanle Nyamenle Belemgbunlililɛ ne anwo edwɛkɛ ɔhilele bɛ, na ɔyɛle bɛdabɛ mɔɔ bɛnde kpɔkɛ la ayile.

¹²Mɔɔ sɛnzɛne ne ɛlɛkɔ ahɔdɔ la, ɛdoavolɛma bulu nee nwiɔ ne rahanle hilele Gyisɛse kɛ, “Maa menli ye adenle maa bɛhɔ namunamu ne mɔ mɔɔ bikye ɛke la azo kɛ bɛkɛnyia dabelɛ nee aleɛ, ɔluakɛ kpɔkɛ ye anu ɛhwee ɛnle ɛke.”

¹³Gyisɛse buale bɛ kɛ, “Bɛdabɛ bɛmaa bɛ debie bɛli.” Bɛbuale ye kɛ, “Yɛlɛ kpanwo ahunguma nnu nee fɛlɛ nwiɔ ala. Ɛkpondɛ kɛ yɛkɔtɔ aleɛ yɛmaa menli ɛwolaa ɛhye ɔ?”

¹⁴Menli ne, saa ɛye ngakula nee mraalɛ nu a bɛkɛyɛ apenle nnu. Gyisɛse zele bɛ kɛ, “Bɛmaa menli ne ɛdɛnlɛdɛnla aze ekpunli ekpunli, ekpunli ko biala anu amra ɛyɛ abulanlu.”

¹⁵Ɛdoavolɛma ne yɛle ye zɔhane na bɛmanle bɛ muala bɛdɛnlanle aze.

¹⁶Gyisɛse vale kpanwo nnu ne nee fɛlɛ nwiɔ ne, ɔnleanle anwuma, ɔyɛle Nyamenle mo, ɔbubule nuhua, ɔvale ɔmanle ye ɛdoavolɛma ne kɛ bɛhyɛ bɛmaa menli ne mɔ.

¹⁷Bɛ muala bɛlile debie bɛ ko yile, na bɛsesale ɔ bo zo ne ahɛndɛne bulu nee nwiɔ.

¹⁸Kenle ko bie mɔɔ ɛnee Gyisɛse angome a ɛlɛyɛ nzɛlɛlɛ la, ye ɛdoavolɛma ne rale ɔ nwo ɛkɛ ne, na ɔbizale bɛ kɛ, “Menli se mame a le nwane?”

¹⁹ Bɛbuale ye kɛ, “Bie mɔ se wɔmɔ a le Dwɔn Sɔnevolɛ ne, bie mɔ noko se wɔmɔ a le Yilaegya, yɛɛ bie mɔ se mɔmoane Nyamenle kpɔmanvolɛma ne mɔ anu ko a ɛzia ɛra ngoane nu a.”

²⁰ Na ɔbizale bɛ kɛ, “Na bɛdabɛ noko ɛ? Bɛse mame a le nwane?” Pita buale kɛ, “Wɔmɔ a ɛle Nyamenle Mɛzaya ne!”

²¹Na Gyisɛse duale bɛ kɛ bɛmmaka ɛhye bɛkile awie biala.

²²Akee Gyisɛse zele bɛ kɛ, “Medame Sonla Ra, ɔwɔ kɛ menwu amaneɛ somaa na mgbanyima ne, sɛlɛvolɛ mgbanyinli ne, yɛɛ mɛla kilehilevolɛma ne mɔ kpo me. Bɛbahu me, na ye kenle nsa ne anzi Nyamenle badwazo me ara ngoane nu.”

²³ Na ɔhanle ɔhilele bɛ muala kɛ, “Saa awie kpondɛ kɛ ɔ nee me dua a, ɛnee ɔkpo ɔ nwo, ɔva ye (amaneɛnwunlɛ) meanubaka ne ɔdo ɔ kɔme zo kenle biala, na ɔdoa me.

²⁴ Ɔluakɛ awie biala mɔɔ pele ye ngoane nwo la minli ye, na awie biala mɔɔ kɛminli ye ngoane wɔ me ti la kɛlie ye ɛkɛla ngoane.

²⁵Saa sonla nyia ewiade ninyɛne muala na ɔminli ɔdaye mumua ne ɔ nwo anzɛɛ bɛko bɛfa ye a, ɛnee duzu nvasoɛ a ɔnyia ye a? Ɔnnyia ɛhwee!

²⁶Awie biala mɔɔ me nwo nee me ngilehilelɛ ne kɛyɛ ye nyiane wɔ ɛtane ewiade ye anu la, ɔdaye noko ɔ nwo bayɛ medame Sonla Ra nyiane wɔ mekɛ mɔɔ menwɔra anyunlunyia nee Selɛ ne nee Anwuma soanvolɛma nwuanzanwuanza ne anyunlunyia nu la.

²⁷Bɛhakye ɛhye! Bie mɔ wɔ ɛke mɔɔ bɛnrɛwu kɔkpula kɛ bɛkɛnwu kɛ Nyamenle belemgbunlililɛ ne ɛra la.”

²⁸ Ɔhanle ɛhye mɔ ɔwiele na ye kenle mɔtwɛ ne anzi, Gyisɛse vale Pita, Dwɔn, yɛɛ Gyemise na ɔ nee bɛ hɔle boka bie azo kɛ ɔkazɛlɛ.

²⁹Mɔɔ ɔwɔ zo ɔlɛsɛlɛ la, ɔ nyunlu hakyile, na ye tɛladeɛ ne mɔɔ ɔwula la yɛle fufule nwohyee mɔɔ wowɔ ɛnyelɛ zo a.

³⁰Na nea, menli nwiɔ nee ye dendɛle, bɛmɛ a le Mosisi nee Yilaegya.

³¹Bɛyele bɛ nwo bɛhilele wɔ anwuma anyunlunyia nu, na bɛ nee Gyisɛse hanle Nyamenle ngyehyɛlɛ ne mɔɔ fane Gyisɛse ewule mɔɔ ɔbawu Gyɛlusalɛm la anwo edwɛkɛ.

³²Mekɛ ne anu ɛnee Pita nee bɛdabɛ mɔɔ bɛwɔ ɔ nwo ɛkɛ ne la ɛlafe. Bɛdunwuele la bɛnwunle Gyisɛse anyunlunyia ne nee menli nwiɔ ne mɔɔ nee ye gyi ɛkɛ ne la.

³³Mɔɔ menli nwiɔ ne kpondɛ avi Gyisɛse anwo ɛkɛ ne ahɔ la, Pita zele Gyisɛse kɛ, “Yɛmenle, ɔle kpalɛ kɛ yɛwɔ ɛke a. Maa yɛbɔ nzeseɛ nsa, wɔ ɛdeɛ ko, Mosisi ɛdeɛ ko yɛɛ Yilaegya ɛdeɛ ko.” (Ɛnee Pita ɛnze edwɛkɛ mɔɔ ɔdaye mumua ne ɔlɛka la.)

³⁴Mɔɔ Pita anloa wɔ zolɛ ɔlɛtendɛ la, amungu rahedale bɛ nwo zo, na ɛzulolɛ hanle bɛ.

³⁵ Ɛnelɛ bie vi amungu ne anu zele kɛ, “Me Ra mɔɔ mekpa nu meye ye la ɛne, bɛdie ye!”

³⁶Ɛnelɛ ne dendɛle wiele la, ɔhale Gyisɛse angome. Ɛdoavolɛma ne hanle bɛ nloa dole nu, na bɛanga mɔɔ bɛnwunle ye la anwo bie bɛangile awie biala wɔ mekɛ ne anu.

³⁷Aleɛ hyenle la Gyisɛse nee ɛdoavolɛma nsa ne vi boka ne azo tolole rale, na menli dɔɔnwo kpalɛ rayiale ye.

³⁸Nrenya bie vi menli ne anu deanle nu kɛ, “Kilehilevolɛ, mesɛlɛ wɔ, nea me ra nrenya ye maa me, me ra ala ɛne.

³⁹Sunsum ɛtane bie bawolo ye maa ɔteɛdea nu, ɔpɛ ɔfi, na ɔ nloa wu awubue, yɛɛ kɛ ɔgyi ɔ nwo ɔbodɛboda ye ala ɛne. Ɔngyakyi ye fee zɛhae.

⁴⁰Membodole wɔ ɛdoavolɛma ne mɔ kɛ bɛdu ye wɔ ɔ nwo bɛmaa me, noko bɛangola.”

⁴¹Gyisɛse buale kɛ, “Bɛmɛ mɔɔ bɛnlɛ diedi na ɛvonlɛ ala a bɛfo a! Me nee bɛ ɛdɛnla ɔhɔkpula kenlenzu? Menyia bɛ nwo abotane ɔhɔkpula kenlenzu?” Na ɔzele nrenya ne kɛ, “Fa ɛ ra ne bɛla ɛke.”

⁴²Mɔɔ kakula ne ɛlɛba la, sunsum ɛtane ne manle ɔpɛle ɔfinle na ye mgbutike ne rale. Gyisɛse deanle sunsum ɛtane ne nu, ɔdule ye, ɔyɛle kakula ne ayile, na ɔvale ye ɔmanle ɔ ze.

⁴³Na Nyamenle tumi kpole ne yɛle menli dɔɔnwo ne amuala azibɛnwo. Mɔɔ ɛnee menli ne anye ɛha Gyisɛse anwo wɔ ye nwanwane ninyɛne mɔɔ ɔlɛyɛ la anwo la, ɔzele ye ɛdoavolɛma ne kɛ,

⁴⁴“Bɛmaa ɛhye ɛhɔ bɛ nzo nu! Bɛbaye medame Sonla Ra bɛawula menli sa nu.”

⁴⁵Na ɛdoavolɛma ne ande ɛhye abo. Bɛvale bɛveale bɛ, yemɔti bɛande ɔ bo, eza bɛzulole kɛ bɛkɛbiza ye mɔɔ ɔhanle la anwo bie.

⁴⁶ Kpolerazulɛ radɔle ɛdoavolɛma ne avinli kɛ bɛkpondɛ kɛ bɛnwu bɛ nuhua ko mɔɔ le sonlakpole kpalɛ a.

⁴⁷Gyisɛse nwunle mɔɔ bɛlɛdwenledwenle nwolɛ la, yemɔti ɔzɔle kakula ko ɔziele ɔ nwo ɛkɛ ne,

⁴⁸ na ɔzele bɛ kɛ, “Awie biala mɔɔ kɛlie kakula ɛhye wɔ me duma nu la, ɛlie medame; yɛɛ awie biala mɔɔ kɛlie me la, ɛlie ahenle mɔɔ zoanle me la noko. Ɔluakɛ mɔɔ le bɛ nuhua ekyi la a le sonlakpole kpalɛ wɔ bɛ avinli a.”

⁴⁹Ɛdoavolɛma ne ko mɔɔ bɛfɛlɛ ye Dwɔn la hanle hilele Gyisɛse kɛ, “Yɛmenle, yɛnwunle nrenya bie kɛ ɔlɛ wɔ duma ɔlɛtu mbɔnsam na yɛduale ye, ɔluakɛ ɔmboka yɛ nwo.”

⁵⁰Gyisɛse zele ye nee ɛdoavolɛma ne amuala kɛ, “Bɛmmatua ye, ɔluakɛ sonla mɔɔ ɛngyi bɛ la wɔ bɛ afoa.”

⁵¹Mɔɔ ɛnee mekɛ asɛɛ ɛdwu kɛ Nyamenle fa Gyisɛse kɔ anwuma la, Gyisɛse zile ye ahonle kɛ akee ɔkɔ Gyɛlusalɛm.

⁵²Yemɔti ɔzoanle menli ɔmanle bɛlumuale ɔ nyunlu wɔ Samɛlea sua bie azo kɛ bɛhɔziezie ɛkɛ ne bɛmaa ye.

⁵³Na menli ne anlie ye, ɔluakɛ ɛnee yela ali wienyi kɛ ɔkɔ Gyɛlusalɛm.

⁵⁴ Mɔɔ ye ɛdoavolɛma, Gyemise nee Dwɔn, nwunle ɛhye la bɛzele kɛ, “Awulae, ɛkulo kɛ yɛka yɛmaa senle vi anwuma bayela bɛ ɔ?”[8]

⁵⁵Gyisɛse hakyile ɔ nwo na ɔhwile bɛ nyunlu [na ɔzele bɛ kɛ, “Bɛnze sunsum holɛ ko mɔɔ bɛle ye ɛdeɛ la, ɔluakɛ Medame Sonla Ra, meamba kɛ mebazɛkye menli ngoane, membale kɛ mebalie bɛ ngoane.”]

⁵⁶Na Gyisɛse nee ye ɛdoavolɛma ne hɔle sua fofolɛ zo.

⁵⁷Mɔɔ bɛlua adenle zo bɛlɛkɔ la, nrenya bie zele Gyisɛse kɛ, “Ɛleka biala mɔɔ ɛkɔ la me nee wɔ bahɔ.”

⁵⁸Gyisɛse zele ye kɛ, “Ɛzonlɛ lɛ bɛ mbɔne, yɛɛ nloma lɛ bɛ sane, na mame Sonla Ra, menlɛ ɛleka mɔɔ meto me ti a.”

⁵⁹Ɔzele awie ko noko kɛ, “Bɛla maa yɛhɔ.” Na sonla zɔhane zele ye kɛ, “Yɛmenle, maa menlumua mengɔnzie egya kolaa na meara.”

⁶⁰Gyisɛse buale ye kɛ, “Gyakyi menli mɔɔ ɛnde Nyamenle Edwɛkɛ ne abo la ati, bɛle kɛ avunli la maa bɛzie bɛ avunli. Wɔmɔ kɔ na kɔbɔ Nyamenle Belemgbunlililɛ ne nolo.”

⁶¹ Awie ko noko hanle hilele Gyisɛse kɛ, “Yɛmenle, mekulo kɛ me nee wɔ kɔ; noko maa menlumua mengɔngɛla me sua nu amra.”

⁶²Gyisɛse zele ye kɛ, “Awie biala mɔɔ kɛzɔ koanlɛ nu wɔ ye ɛya nu na ɔkɛtoto ɔ nye ɔ nzi la ɛnfɛta Nyamenle Belemgbunlililɛ ne.”