Read Nzema Mɛla 1 Bible Online

Mɛla 1 - Nzema bible

Mɛla 1

¹Edwɛkɛ mɔɔ Mosisi hanle hilele Yizilayɛma wɔ mekɛ mɔɔ ɛnee bɛwɔ ɛsɛlɛ ne azo wɔ Azule Dwɔdan ne aduduleɛ la ɛne. Ɛnee bɛwɔ Dwɔdan Bɔnza ne anu ɛleka mɔɔ bikye Sɛfe, mɔɔ wɔ Pɛlan nee Tofɛle, Leeban, Hazilo, yɛɛ Daezahade avinli la.

²(Saa awie vi Saenae Boka kɛ ɔfa Yidɔm awoka ne mɔ anu yeahɔ Keedɛhye Baanɛya a ɔdi kenle bulu nee ko wɔ adenle nu.)

³Yizilayɛma zile nu wɔ Yigyibiti la, ye ɛvolɛ abulanla ne azo, siane bulu nee ko ne kenle ne mɔɔ lumua la azo yɛɛ Mosisi dendɛle hilele menli ne na ɔhanle edwɛkɛ biala mɔɔ Ɛdɛnkɛma ɛze ye la ɔhilele bɛ a.

⁴Mekɛ ne anu ɛnee Mosisi ɛli Amɔle Belemgbunli Saehɔn mɔɔ de Hɛhyebɔn la anwo zo konim. Ɛnee eza yeli Beehyan Belemgbunli Ɔɔgo mɔɔ de Ahyetalo nee Ɛdelɛyae la anwo zo konim.

⁵Mosisi vale ziele ɔ nyunlu na ɔhilehilele Nyamenle Mɛla ne anu ɔhilele bɛ wɔ mekɛ mɔɔ ɛnee bɛwɔ Mowabe azɛlɛ zo, wɔ Dwɔdan ne anzi lɔ mɔɔ di kɔ aduduleɛ la. Ɔzele bɛ kɛ,

⁶“Mekɛ mɔɔ yɛwɔ Saenae Boka la, Ɛdɛnkɛma yɛ Nyamenle ne zele yɛ kɛ, ‘Bɛdɛnla boka ye azo bɛhyɛ somaa;

⁷bɛzia bɛhɔzɔ bɛ adendulɛ ne azo na bɛhɔ Amɔle maanle nu awoka ne mɔ azo nee maanle maanle mɔɔ zuozua ɛkɛ ne la anu, Dwɔdan Bɔnza, awoka ne mɔ nee azɛlɛ sɛsɛ ne mɔ azo, nyiakɛ maanzinli nu, nee Mɛdetɛlenia Nyevile ne anloa. Bɛhɔ Keenama nee Lɛbanɔnoma azɛlɛ ne mɔ azo toonwo bɛhɔkpula Azule kpole Yufileti ne anloa.

⁸Meva azɛlɛ ne amuala memaa bɛ. Bɛhɔ na bɛhɔva azɛlɛ ne bɛyɛ bɛ ɛdeɛ. Medame Ɛdɛnkɛma yɛɛ menvale membɔle bɛ nlenya mɔ ɛwɔkɛ a. Menganle ndane mengilele bɛ ze mɔ, Ebileham, Ayezeke, nee Gyekɔbo kɛ mebava meamaa bɛ nee bɛ bo zo amra.’ ”

⁹Mosisi zele menli ne kɛ, “Mekɛ zɔhane anu menzele bɛ kɛ, ‘Me ngome menrɛhola bɛ nwo zo nea.

¹⁰Ɛdɛnkɛma bɛ Nyamenle ne ɛmaa bɛ nwo ɛzo, na kɛkala bɛ somaa le kɛ anwomanyunlu nwɔlɔra.

¹¹Mesɛlɛ kɛ Ɛdɛnkɛma, bɛ nlenya mɔ Nyamenle ne, ɛmaa bɛzo bɛyɛ mɔnwo apenle apenle na ɔyila bɛ, kɛmɔ ye ɛwɔkɛ ne se la.

¹²Kɛ menwɔyɛ na me ngomekye meahola bɛ nwo zo nea na meaziezie bɛ edwɛkɛ ne mɔ ɛ?

¹³Bɛye menli mɔɔ ze nrɛlɛbɛ, mɔɔ lɛ ndelebɛbo, na bɛ ti ɛdi la bɛvi bɛ mbusua ekpunli ekpunli ne mɔ anu bɛmaa me, na menye bɛ memaa bɛyɛ bɛ mbusua mgbanyinli.’

¹⁴Na bɛkponlenle zolɛ bɛzele kɛ, ‘Edwɛkɛ ne mɔɔ wɔha la le kpalɛ na ɔwɔ kɛ yɛyɛ.’

¹⁵Yemɔti menvale bɛ mbusua mgbanyinli mɔɔ ze nrɛlɛbɛ na bɛ ti ɛdi la menziele mgbanyinli mɔɔ nea menli apenle, ɛya, abulanlu, nee bulu la anwo zo, yɛɛ menyɛle bie mɔ noko mbɔlɔba mgbanyinli wɔ bɛ mbusua ekpunli ekpunli ne mɔ kɔsɔɔti anu.

¹⁶“Mekɛ ne anu menzele bɛ ndɛnebuavolɛma ne mɔ kɛ, ‘Bɛli edwɛkɛ biala mɔɔ kɛrala bɛ mediema ne bie mɔ avinli la, na bɛbua ye fɔɔnwo. Edwɛkɛ biala mɔɔ kɛvinde bɛ nyunlu la, saa ɔle mediema ngome edwɛkɛ o, saa ɛyɛvolɛ noko wɔ nu bɔbɔ a, bɛli ye ɔ nye.

¹⁷Bɛmmakyea bɛ nzo bɛdi edwɛkɛ anzɛɛ bɛmmadi bɛkɔ afoa. Bɛdie ahoahweabane nee mgbolema kɔsɔɔti na bɛli bɛ edwɛkɛ bɛmaa bɛ. Bɛmmasulo sonla yɛɛ bɛmmanea awie biala anyunlu, ɔluakɛ Nyamenle ɔdaye a ɔbabua ndɛne ne a. Edwɛkɛ biala mɔɔ kɛyɛ se kɛmaa bɛ, na bɛnrɛhola ye di la, bɛva bɛrɛlɛ me na menwɔli.’

¹⁸Akee debie biala mɔɔ ɔwɔ kɛ bɛyɛ la, menganle ye kɔsɔɔti mengilele bɛ wɔ mekɛ zɔhane anu.

¹⁹“Na kɛmɔ Ɛdɛnkɛma yɛ Nyamenle ne zele yɛ la, yɛyɛle ye zɔhane. Yɛvi Saenae Boka yɛdule yɛ bo yɛhɔpɛle ɛsɛlɛ kpole anu ɛzulolɛ ne, kɛmɔ bɛdabɛ bɛnwunle ye la. Yɛhɔle Amɔle maanle nu wɔ awoka ne mɔ azo lɔ na yɛradwule Keedɛhye Baanɛya.

²⁰Na menzele bɛ kɛ, ‘Kɛkala, bɛra Amɔlema maanle nu. Ɔle azɛlɛ mɔɔ Ɛdɛnkɛma yɛ Nyamenle ne, mɔɔ le yɛ nlenya mɔ Nyamenle ne, ɛva ɛmaa yɛ a. Bɛnlea, yemɔ a wɔ lɔ la, bɛhɔva bɛdɛnla zolɛ, kɛmɔ Ɛdɛnkɛma hanle la. Bɛmmasulo yɛɛ bɛmmamaa bɛ ahonle tu.’

²¹

²²“Na bɛrazele me kɛ, ‘Bɛmaa yɛlumua yɛzoa menli yɛmaa bɛhɔli busia bɛnlea azɛlɛ ne na bɛraha adenle holɛ ko mɔɔ yɛdua nu a yɛkɛhola zolɛ kɔ, nee kɛ azuamgbole mɔɔ yɛbahɔva la si de la bɛhile yɛ.’

²³“Meneanle la ɛnee bɛ nzuzulɛ ne le kpalɛ, yemɔti mendule menli bulu nee nwiɔ, ko vi abusua ekpunli ko anu,

²⁴na bɛhɔle maanle ne anu awoka ne mɔ azo lɔ bɛhɔnleanle nu toonwo bɛhɔdwule Ɛhyekɔlo Bɔnza.

²⁵Bɛvale zolɛ mbakama ne bie bɛrahilele yɛ na bɛzele kɛ ɔle azɛlɛ kpalɛ bɔkɔɔ mɔɔ Ɛdɛnkɛma ɛva ɛmaa yɛ a.

²⁶“Noko bɛkpole Ɛdɛnkɛma bɛ Nyamenle ne anloa edwɛkɛ; bɛangɔnva azɛlɛ ne.

²⁷Bɛveale bɛ ndanlɛ azua ne mɔ anu na bɛdendɛle bɛ nzo abo kɛ, ‘Ɛdɛnkɛma kpɔ yɛ la ati yɛɛ yeye yɛ yevi Yigyibiti a, kɛ ɔbava yɛ yeawula Amɔlema asa anu yeamaa bɛahu yɛ.

²⁸Nienwu ɛleka a yɛhɔ a? Mediema mɔɔ hɔle rale la edwɛkɛ mɔɔ ɛha bɔbɔ la ɛmaa yɛ ahonle ɛdu. Bɛkile kɛ menli ne le mgbole na bɛwowale bɛtɛla yɛ. Bɛ azuamgbole ne mɔ le mgbole yɛɛ bɛhye nwolɛ bɛmaa yehɔ anwuma kpalɛ.’

²⁹“Noko menganle kɛ, ‘Bɛmmamaa bɛ ahonle tu yɛɛ bɛmmasulo menli ne.

³⁰ Ɛdɛnkɛma bɛ Nyamenle mumua ne mɔɔ li bɛ ti la baho amaa bɛ, kɛmɔ ɔyɛle wɔ Yigyibiti nee fienemgbole ne anu mɔɔ bɛdabɛ bɛnwunle ye la. Bɛdabɛ bɛnwunle kɛ Ɛdɛnkɛma bɛ Nyamenle ne zile zɔle bɛ gyɛlɛɛnye wɔ ɛleka biala mɔɔ bɛluoluale la, kɛ selɛ si sɔ ɔ ra nrenya, toonwo mɔɔ bɛradwu ɛke la.’

³¹

³²Noko ɛhye mɔ amuala anzi, bɛanlie Ɛdɛnkɛma bɛ Nyamenle ne bɛanli.

³³Yemɔ yɛɛ ɔlile bɛ ti wɔ adenle nu kɛ ɔkpondɛ ɛleka yeamaa bɛayɛ bɛ azokoɛleɛ a, ɔyɛle sendɔlɔra ɔlile bɛ nyunlu nɔɔzo ɔhilele bɛ adenle mɔɔ bɛva zolɛ la yɛɛ alehyenlɛ nu ɔyɛle amungu ɔhedale bɛ nwo zo.

³⁴“Ɛdɛnkɛma dele bɛ ɛdendɛlɛ ne na ɔvale ɛya, na ɔhanle ndane kɛ,

³⁵‘Awolɛndoazo munzule ɛhye anu amra biala ɛnrɛnwu azɛlɛ kpalɛ ne mɔɔ menganle ndane kɛ mefa meamaa bɛ ze mɔ la,

³⁶kyesɛ Gyɛfɛni ara Kalɛbe angomekye ala. Ɔbanwu ye, na mebava azɛlɛ ne mɔɔ yehɔluolua zolɛ la meamaa ye nee ɔ bo zo amra, ɔboalekɛ yeli Ɛdɛnkɛma anzi nɔhalɛ nu.’

³⁷Bɛmɛ bɛ ti, Ɛdɛnkɛma vale medame noko me nwo ɛya na ɔzele kɛ,

³⁸‘Ɛdawɔ noko ɛ gyakɛ ba ɛnrɛtia ɛkɛ ne ɛlɛ. Nɛn ara Dwɔhyua mɔɔ boa wɔ la, yemɔ a ɔbahɔ azɛlɛ ne azo a. Si ye ahonle, ɔluakɛ ɔbamaa Yizilayɛma ahɔva azɛlɛ ne.’

³⁹“Ɛdɛnkɛma zele me kɛ, ‘Akee bɛ mra ne mɔ mɔɔ bɛdwenle kɛ bɛkɛhye bɛ bɛkɛhu bɛ, nee bɛ mra ngyikyi ne mɔ mɔɔ kɛkala bɛnze ɛtane a bɛnze kpalɛ la, bɛmɛ yɛɛ bɛbahɔ azɛlɛ ne azo a. Na mebava azɛlɛ ne meamaa bɛ na bɛadɛnla zolɛ bɛava bɛayɛ bɛ ɛdeɛ bɔkɔɔ.

⁴⁰Na bɛmɛ, bɛzia bɛ nzi bɛhɔluolua azɛlɛ ne azo na bɛbɔ bɛ ti Ndɔ Nyevile ne anloa lɔ.’

⁴¹“Na bɛbuale kɛ, ‘Mosisi, yɛyɛ ɛtane yɛtia Ɛdɛnkɛma. Yɛkɔ yɛahɔho, kɛmɔ Ɛdɛnkɛma yɛ Nyamenle ne zele yɛ la.’ Na bɛ nuhua ko biala vale ye konle ninyɛne na bɛdwenlenle kɛ bɛkɔ bɛahɔva menli mɔɔ wɔ awoka ne mɔ azo la adufudeɛ.

⁴²“Na Ɛdɛnkɛma zele me kɛ, ‘Ka kile bɛ kɛ bɛmmakɔ anzɛɛ bɛmmakɔko, ɔluakɛ memboka bɛ nwo. Bɛkɔ a bɛ kpɔvolɛma ne bali bɛ nwo zo konim.’

⁴³Yemɔti menganle mengilele bɛ, noko bɛandie. Bɛkpole Ɛdɛnkɛma edwɛkɛ ne na adubɛnwo nu ala bɛhɔle awoka ne mɔ azo lɔ.

⁴⁴Na Amɔlema mɔɔ ɛnee de ɛkɛ ne maanle ne anu la vindele rayiale bɛ na bɛvoanle bɛ kɛ wolɛ foa menli la, bɛbole bɛ toonwo bɛradwule Hɔɔma, na bɛlile bɛ nwo zo konim wɔ Yidɔm awoka ne mɔ azo.

⁴⁵Na bɛvale ɛzunlɛ bɛziale bɛrale Ɛdɛnkɛma ɛkɛ, noko Ɛdɛnkɛma andie bɛ yɛɛ yeannea bɛ nyunlu bɔbɔ.

⁴⁶“Yemɔti bɛdɛnlanle Keedɛhye bɛhyɛle dɔɔnwo. Nzinlii mɔɔ ɛnee bɛdɛnla ɛkɛ ne bɛhyɛ kpalɛ la,