Read Nzema Mɛla 10 Bible Online

Mɛla 10 - Nzema bible

Mɛla 10

¹“Mekɛ ne anu akee Ɛdɛnkɛma zele me kɛ, ‘Se awolɛ ndɛbandɛba nwiɔ mɔɔ le kɛ alumua ɛdeɛ ne mɔ la na fa bɛlɛ me wɔ boka ye azo, na akee fa taboa bobɔ ɛlɛka.

²Na mebahɛlɛ edwɛkɛ mɔɔ ɛnee wɔ alumua awolɛ ndɛbandɛba ne mɔ mɔɔ ɛbubule bɛ la azo la meagua zo, na wɔava wɔagua ɛlɛka ne anu.’

³“Yemɔti menvale baka bie mɔɔ bɛfɛlɛ ye ‘akasea’ la taboa membobɔle ɛlɛka na menzele awolɛ ndɛbandɛba nwiɔ kɛ alumua ɛdeɛ ne la menlɛle me sa nu mengɔle boka ne azo.

⁴Na Ɛdɛnkɛma hɛlɛle Mɛla Bulu ne mɔɔ ɔhanle ɔvile sendɔlɔra ne anu ɔhilele bɛ, wɔ mekɛ mɔɔ yɛyiale boka ne azo la ɔguale zolɛ kɛ alumua ɛdeɛ ne la, na ɔvale ɔmanle me.

⁵Akee mengakyile me nwo na mevi boka ne azo mentolole membale. Menvale awolɛ ndɛbandɛba nwiɔ ne menguale ɛlɛka ne mɔɔ mebobɔ la anu, kɛmɔ Ɛdɛnkɛma zele me ala la na bɛtɛgua nu kɛkala.”

⁶(Yizilayɛma vile Gyeeyakanema bula ne mɔ anwo na bɛhɔle Mosɛla. Ɛkɛ ne yɛɛ Aalɔn wule na bɛziele ye a. Ɔ ra Ɛlieza lile ye agya yɛle sɛlɛvolɛ.

⁷Bɛvi ɛkɛ ne la bɛhɔle Gɛdegoda. Bɛvi Gɛdegoda la bɛhɔle Dwɔtobata. Azɛlɛ ɛhye azo lɛ nzule mɔɔ senze la dɔɔnwo.

⁸Mekɛ ne anu yɛɛ Ɛdɛnkɛma yele Livae abusua ekpunli ne kɛ bɛzoa Ɛdɛnkɛma Ngyekyeleɛ Ɛlɛka ne, na bɛgyinla ɔ nyunlu bɛzonle ye, na bɛva ye duma bɛyila menli ne a. Bɛyɛ debie zɛhae toonwo a yeradwu ɛnɛ a.

⁹Ɛhye ati Livae abusua ekpunli ne anu amra ɛnlɛ azɛlɛ anzɛɛ agyadeɛ, kɛmɔ bɛ mediema ne mɔ lɛ ye la. Bɛ agyadeɛ anzɛɛ azɛlɛ ɛdeɛ mɔɔ bɛdidi zolɛ la a le kɛ, bɛle Ɛdɛnkɛma sɛlɛvolɛma, kɛmɔ ɔdaye Ɛdɛnkɛma bɛ Nyamenle ne zele la.)

¹⁰“Menlile kenle kɔkɔlɛ abulanla wɔ boka ne azo, kɛmɔ alumua ne menlile la; Ɛdɛnkɛma diele me bieko na yeangulo kɛ ɔkɛzɛkye bɛ.

¹¹Na Ɛdɛnkɛma zele me kɛ, ‘Dwazo kɔli menli ne ati maa bɛdu bɛ adenle ne na bɛhɔva azɛlɛ ne mɔɔ menvale membɔle bɛ ze mɔ ɛwɔkɛ la.’

¹²“Yizilayɛma, akee bɛdie. Mɔɔ Ɛdɛnkɛma bɛ Nyamenle ne kpondɛ wɔ bɛ ɛkɛ ne la a le kɛ: bɛzulo Ɛdɛnkɛma bɛ Nyamenle ne, bɛlua ye ndenle ne mɔ anu, bɛhulo ye, na bɛva bɛ ahonle nee bɛ ɛkɛla muala bɛzonle ye,

¹³na bɛli ye mɛla ne mɔ mɔɔ melɛfa meamaa bɛ ɛnɛ la azo wɔ bɛdabɛ bɛ boɛyɛlɛ ti.

¹⁴Bɛnwu ye kɛ, Ɛdɛnkɛma bɛ Nyamenle ne yɛɛ anwuma nee anwuma anwuma lɔ, nee azɛlɛ ye nee debie biala mɔɔ wɔ zolɛ la le ye ɛdeɛ a.

¹⁵Noko Ɛdɛnkɛma vale ye ahonle hulole bɛ ze mɔ na ɔkpale nu ɔyele bɛ bo zo amra, mɔɔ le bɛdabɛ, ɔvile menli kɔsɔɔti anu, kɛmɔ kɛkala ɔde la.

¹⁶Zɔhane ati, bɛmmayɛ anzosesebɛ bieko na bɛmaa bɛ ahonle nu ɛde.

¹⁷ Ɔluakɛ Ɛdɛnkɛma bɛ Nyamenle ne le nyamenle kɔsɔɔti bɛ Nyamenle nee awulae mɔ Awulae; ɔle kpole, ɔle bedevinli na ɔle Nyamenle anwo ɛzulolɛ, mɔɔ ɔnli mɔguazo yɛɛ ɔnlie ndoloboa a.

¹⁸Ɔdi mɔɔ ɛnlɛ ɔ ze la nee kunlanvolɛ edwɛkɛ ɔmaa bɛ, na ɔkulo ɛyɛvolɛ; ɔmaa ye aleɛ nee adɛladeɛ.

¹⁹Yemɔti bɛdabɛ noko bɛhulo nyɛvolɛ anzɛɛ adendulɛma, ɔluakɛ ɛnee bɛdabɛ noko bɛle nyɛvolɛ wɔ Yigyibiti.

²⁰Bɛzulo Ɛdɛnkɛma bɛ Nyamenle ne, bɛzonle ye na bɛva bɛ nwo bɛmaa ye, na bɛva ye duma ne ala bɛha ndane.

²¹Bɛye ye ayɛlɛ, ɔle bɛ Nyamenle mɔɔ ɛyɛ ninyɛne mgbole nee nwanwane ninyɛne ɛmaa bɛ, mɔɔ bɛdabɛ bɛ nye dua a.

²² Bɛ nlenya mɔ kɔ Yigyibiti la, bɛlua menli abulasuu. Na ɛnɛ noko ɛ? Ɛdɛnkɛma bɛ Nyamenle ne ɛmaa bɛ nwo ɛzo bɛyɛ dɔɔnwo kɛ anwomanyunlu nwɔlɔra.