Read Nzema Mɛla 11 Bible Online

Mɛla 11 - Nzema bible

Mɛla 11

¹“Zɔhane ati bɛhulo Ɛdɛnkɛma bɛ Nyamenle ne na bɛli ye mɛla nee ye ngyehyɛlɛ ne mɔ azo dahuu.

²Ɛnɛ kenle ye, bɛdwenledwenle mɔɔ bɛdabɛ bɛnwu ye wɔ Ɛdɛnkɛma bɛ Nyamenle ne anwo la anwo. Tɛ bɛ mra yɛɛ nwunle mɔɔ bɛnwu ye la a. Bɛdabɛ bɛ nye dua debie biala. Bɛnwunle ye bedevinli ne, ye tumi kpole ne, ye anwosesebɛ ne,

³nee ye nwanwane sɛkɛlɛneɛ ne mɔ nee gyima mɔɔ ɔlile wɔ Yigyibiti ɔmanle Yigyibiti belemgbunli ne nee ye maanlema ne la.

⁴Bɛze mɔɔ ɔvale ɔyɛle Yigyibiti ɛlɔnema, bɛ mgbɔnwɔ nee bɛ konle ehwili ne mɔ, nee kɛ ɔzile mɔɔ ɔmanle Ndɔ Nyevile ne yile vale Yigyibiti ɛlɔnema mɔɔ ɛnee doa bɛ ndinlizo kpondɛ ahye bɛ la. Bɛze kɛ Ɛdɛnkɛma ɛzi ɛzɛkye bɛ toonwo mɔɔ yeradwu ɛnɛ la,

⁵nee mɔɔ ɔvale ɔyɛle bɛdabɛ noko wɔ ɛsɛlɛ ne azo toonwo mɔɔ bɛradwu ɛke la.

⁶Bɛkakye mɔɔ ɔvale ɔyɛle Yilayabe amra Deetan nee Abaelam mɔɔ bɔ Wulubɛn abusua ekpunli ne bie la. Yizilayɛma kɔsɔɔti anye zo, ɔmanle azɛlɛ kpukele nwiɔ menle bɛ nee bɛ awuke nu amra, ɔminlinle bɛ azua, nyɛmoa, nee debie biala mɔɔ ɛnee bɛlɛ la.

⁷Bɛdabɛ bɛ nye ɛnwu ninyɛne mgbole mɔɔ Ɛdɛnkɛma yɛle la amuala.

⁸“Bɛli mɛla ne mɔ mɔɔ meva memaa bɛ ɛnɛ la amuala azo, amaa bɛ nwo ayɛ se, bɛahola bɛahɔva azɛlɛ ne mɔɔ bɛkava bɛayɛ bɛ ɛdeɛ la,

⁹na bɛanyi bɛahyɛ wɔ azɛlɛ kpalɛ ne mɔɔ kye aleɛ mɔɔ Ɛdɛnkɛma bɛ Nyamenle ne vale bɔle bɛ ze mɔ ɛwɔkɛ kɛ ɔfa yeamaa bɛ nee bɛ bo zo amra la azo.

¹⁰Ɔluakɛ azɛlɛ ne mɔɔ bɛlɛkɔ bɛahɔva la ɛnle kɛ Yigyibiti azɛlɛ ne mɔɔ bɛvi zolɛ bɛra la, mɔɔ bɛdua ninyɛne a ɛnee ɔwɔ kɛ bɛgugua zolɛ nzule kɛ asɛɛ bɛyɛ ndɔlɔra tola bie la.

¹¹Na azɛlɛ ne mɔɔ bɛlɛkɔ bɛahɔva la le awoka nee mbɔnza, yɛɛ ezule tɔ a ɔmeme.

¹²Ɔle azɛlɛ mɔɔ Ɛdɛnkɛma bɛ Nyamenle ne anye wɔ zo a. Dahuu biala ɔ nye wɔ zo, ɔvi ɛvolɛ ne mɔlebɛbo ɔkɔdwu ye awieleɛ.

¹³“Saa bɛdi mɛla mɔɔ melɛfa meamaa bɛ la azo, bɛkulo Ɛdɛnkɛma bɛ Nyamenle ne, bɛfa bɛ ahonle muala nee bɛ ɛkɛla muala bɛsonle ye a,

¹⁴ɔbadɔ ezule yeagua azɛlɛ ne azo wɔ bɛ ɛlobɔ nloa. Alumua ezule ne badɔ yɛɛ amozi ezule ne noko badɔ, amaa bɛanyia aleɛ dɔɔnwo nee nwanye nee nwole.

¹⁵Ɔbamaa bɛ ndile mɔɔ bɛ nlankɛ bali a, na bɛanyia aleɛ bɛali bɛ ko ayi.

¹⁶Bɛnlea boɛ noko na bɛambɛlɛbɛla bɛ nwo, bɛandwe bɛ nwo bɛanvi Ɛdɛnkɛma anwo bɛangɔnzonle bɛanyeyɛ awozonle.

¹⁷Bɛyɛ ye zɔhane a, Ɛdɛnkɛma bava bɛ nwo ɛya, ɔnrɛmaa ezule ɛnrɛdɔ na bɛ ɛya ne mɔ anyia nzule ayɛ kpalɛ. Ɛhye bamaa bɛ muala bɛawu ndɛndɛ wɔ azɛlɛ kpalɛ ne mɔɔ Ɛdɛnkɛma ɛlɛfa amaa bɛ la azo.

¹⁸“Yemɔti bɛva me edwɛkɛ ɛhye mɔ bɛzie bɛ ti anu kpalɛ na bɛhɛlɛ bɛ debie zo bɛkyekye bɛ sa, bɛva bie bɛhendɛhenda bɛ ndo avinli.

¹⁹Bɛhilehile bɛ mra na bɛha nwolɛ edwɛkɛ bɛhile bɛ wɔ mekɛ biala mɔɔ bɛkɛdɛnla aze wɔ bɛ azua nu, anzɛɛ bɛlua adenle zo, anzɛɛ bɛkɛhɔ nla nu, anzɛɛ bɛkɛdwazo la.

²⁰Bɛhɛlɛ bɛ wɔ bɛ azua nu nlenkɛ felɛmo ne mɔ anwo nee bɛ nlenkɛ mgbole ne mɔ anwo,

²¹amaa bɛdabɛ nee bɛ mra bɛanyi bɛahyɛ na bɛ nwo azo wɔ azɛlɛ ne mɔɔ Ɛdɛnkɛma bɛ Nyamenle ne vale bɔle bɛ ze mɔ ɛwɔkɛ kɛ ɔbava yeamaa bɛ la azo wɔ mekɛ tendenle mɔɔ ewiade ne ɛtɛsɛkyele la.

²²“Ɔluakɛ saa bɛnea boɛ, bɛdi mɛla ɛhye mɔ mɔɔ melɛfa meamaa bɛ la azo, bɛkulo Ɛdɛnkɛma bɛ Nyamenle ne, bɛdua ye adenle ne anu, na bɛfa bɛ nwo bɛmaa ye bɔkɔɔ a,

²³Ɛdɛnkɛma bavoa maanle maanle mɔɔ kɛkala wɔ zolɛ la, na bɛaho bɛava maanle maanle mɔɔ le mgbole, bɛ nwo yɛ se tɛla bɛ la.

²⁴Ɛleka biala mɔɔ bɛ gyakɛ kɛtia la bayɛ bɛ ɛdeɛ. Bɛ azɛlɛ ne tɛtɛlɛ bɔ ye ɛsɛlɛ ne anloa ɔkɔ Lɛbanɔn, na ɔvi Azule Yufileti ne anloa ɔkɔgua adɔleɛ nyevile ne anloa.

²⁵Awie biala ɛnrɛhola bɛ nyunlu gyinla. Ɛdɛnkɛma bɛ Nyamenle ne bamaa bɛ nwo ɛzulolɛ adɔ menli mɔɔ wɔ azɛlɛ ne azo la amuala anwo zo, kɛmɔ ɔvale ɔbɔle bɛ ɛwɔkɛ la.

²⁶“Bɛnlea o, na kɛkala meva nyilalɛ nee munzule mezie bɛ nyunlu.

²⁷Saa bɛdi Ɛdɛnkɛma bɛ Nyamenle ne mɛla ne mɔ mɔɔ melɛfa meamaa bɛ ɛnɛ la azo a, ɔbayɛ nyilalɛ.

²⁸Na saa bɛanli Ɛdɛnkɛma bɛ Nyamenle ne mɛla ne mɔ azo na bɛkakyi bɛ nzi bɛsi mɔɔ melɛka meahile bɛ ɛnɛ la, bɛsonle awozonle[5] mɔɔ bɛnze bɛ la a, ɔbayɛ munzule.

²⁹Saa Ɛdɛnkɛma bɛ Nyamenle ne fa bɛ dwu azɛlɛ ne mɔɔ bɛlɛkɔ bɛahɔva la azo a, bɛva nyilalɛ ne bɛzie Gɛlaezem Boka na bɛva munzule ne bɛzie Yibale Boka.

³⁰(Awoka nwiɔ ɛhye wɔ Azule Dwɔdan ne adɔleɛ afoa nu, wɔ Keenama mɔɔ de Dwɔdan Bɔnza la maanle nu. Bɛwɔ mɔɔ kɔne adɔleɛ la; bɛ nee Moli mbaka ne mɔ mɔɔ menli kɔsonle bɛ bo la anwa yɛɛ bɛbikye Gelegale.)

³¹Ɔnrɛhyɛ biala na bɛapɛ Dwɔdan ne bɛahɔ kɛ bɛkava azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo. Na saa bɛ sa ka ye bɛtɛnla zolɛ a,

³²anrɛɛ bɛnlea na bɛli mɛla ne mɔ nee ngyehyɛlɛ ne mɔ kɔsɔɔti mɔɔ melɛfa meamaa bɛ ɛnɛ la azo.