Read Nzema Mɛla 12 Bible Online

Mɛla 12 - Nzema bible

Mɛla 12

¹“Mɛla ne mɔ nee ngyehyɛlɛ ne mɔ mɔɔ bɛbali zolɛ wɔ azɛlɛ ne mɔɔ bɛ ze mɔ Ɛdɛnkɛma Nyamenle ne ɛva ɛmaa bɛ kɛ bɛ ɛdeɛ bɔkɔɔ, wɔ mekɛ mɔɔ bɛde ewiade la ɛne:

²Bɛzɛkye ɛleka biala mɔɔ menli ne sonle bɛ awozonle ne mɔ la, wɔ awoka ndendenle nee awoka ngyikyi ne mɔ azo, nee mbaka bubuzuu ne mɔ abo.

³Bɛbubu bɛ azukponle ne mɔ bɛgua, bɛbubu bɛ mpila sɛkɛlɛneɛ ne mɔ dwɔkɔdwɔkɔ, na bɛyela bɛ bozonle raalɛ Ahyela ne sɛkɛlɛneɛ ne mɔ. Bɛbubu bɛ awozonle ne mɔ ananze ne mɔ mɔɔ bɛgua bɛziezie ɛkɛ ne la, na bɛminli bɛ aluma ne mɔ abo zo bɔkɔɔ mɔɔ bɛnzonle bɛ bieko ɛlɛ a.

⁴“Bɛmmasonle Ɛdɛnkɛma bɛ Nyamenle ne, kɛmɔ menli ɛhye mɔ sonle bɛ awozonle ne mɔ la.

⁵Ɛdɛnkɛma bɛ Nyamenle ne banlea aye ɛleka ko avi bɛ mbusua ekpunli ekpunli ne azɛlɛ ne mɔ anu, na yeava ye duma yeado zolɛ, yɛadɛnla ɛkɛ, na ɛkɛ ne yɛɛ ɔwɔ kɛ bɛkɔ bɛkɔsonle ye a.

⁶Ɛkɛ ne yɛɛ bɛbava bɛ ɛyelalɛ azubɔlɛ ninyɛne ne mɔ bɛahɔ a. Bɛbava bɛ azubɔlɛ ninyɛne ngakyile kɔsɔɔti, bɛ ngyɛnu bulu ɛkpɔ ngoko ne mɔ nee azubɔdeɛ biala, bɛ ahyɛlɛ ninyɛne, azubɔdeɛ mɔɔ bɛkɛyeye bɛ ahonle nu bɛkɛva bɛkɛmaa, yɛɛ bɛ nyɛmoa mralɛ mɔɔ bɛkɛlumua bɛkɛwo bɛ la noko bɛahɔ ɛkɛ.

⁷Na ɛkɛ ne, wɔ Ɛdɛnkɛma bɛ Nyamenle ne mɔɔ ɛyila bɛ la anyunlu, bɛ nee bɛ sua nu amra bali na bɛ nye alie wɔ ninyɛne kpalɛ mɔɔ Ɛdɛnkɛma ɛva ɛmaa bɛ la ati.

⁸“Saa mekɛ ne dwu a, bɛnrɛyɛ ye kɛmɔ yɛlɛyɛ ye ɛnɛ wɔ ɛke, mɔɔ awie biala yɛ debie biala mɔɔ ɔdaye ɔkulo la.

⁹Ɔluakɛ bɛtɛbadwule ɛleka mɔɔ bɛdie bɛ ɛnwomenle la, yɛɛ bɛtɛdwule agyadeɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo.

¹⁰Na saa bɛpɛ Dwɔdan ne bɛkɔ ɔ nzi lɔ na bɛkɔtɛnla azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ kɛ bɛ ɛdeɛ ɔ la azo, na ɔdie bɛ ɔfi bɛ agbɔvolɛ mɔɔ ɛbɔ ɛyia bɛ la asa anu, mɔɔ bɛ nwo kɛdɔ bɛ na bɛ tiakunlu kɛgya la,

¹¹yɛɛ bɛbahɔ ɛleka mɔɔ ɔdaye Ɛdɛnkɛma bɛ Nyamenle ne kɛhile kɛ bɛva ye duma bɛvɛlɛ ye la, na bɛahɔzonle a. Ɛkɛ ne yɛɛ bɛbava mɔɔ meha mehile bɛ la amuala: bɛ ɛyelalɛ azubɔlɛ ninyɛne, bɛ azubɔlɛ ngakyile ne mɔ ninyɛne, bɛ ngyɛnu bulu ɛkpɔ ngoko ne mɔ, bɛ ahyɛlɛ ninyɛne nee bɛ ɛwɔkɛ mɔɔ bɛbɔ Ɛdɛnkɛma la ɛyelɛ kɔsɔɔti bɛahɔ a.

¹²Na bɛ nee bɛ mra mrenya nee mraalɛ, bɛ sonvolɛ mrenya nee mraalɛ yɛɛ Livaema mɔɔ wɔ bɛ azua ne mɔ azo, mɔɔ ɛnlɛ agyadeɛ la, bɛ nye balie wɔ Ɛdɛnkɛma anyunlu.

¹³Bɛnlea bɛ nwo boɛ na bɛanva bɛ ɛyelalɛ azubɔlɛ ninyɛne bɛangɔ ɛleka biala mɔɔ bɛkɛnwu ye la.

¹⁴Bɛbava bɛahɔ ɛleka ne mɔɔ Ɛdɛnkɛma kɛnlea mbusua ekpunli ekpunli ne mɔ anu kɛye la ala. Ɛkɛ ne yɛɛ bɛbabɔ bɛ ɛyelalɛ azu ne mɔ na bɛayɛ mɔɔ melɛka meahile bɛ la a.

¹⁵“Noko bɛkola bɛku nane bɛdi wɔ bɛ azua zo. Bɛkola bɛku nane dodo biala, kɛmɔ Ɛdɛnkɛma bɛ Nyamenle ne ɛva ɛlo bɛ la, bɛdi. Saa bɛ nwo te o, bɛ nwo ɛnde o, bɛ muala bɛkola bɛbɔ nu bɛdi, kɛmɔ bɛdi kutu anzɛɛ kɛtɛboɛ la.

¹⁶Noko akee anrɛɛ bɛmmadi bɛ mogya ne. Bɛhwi bɛgua aze kɛ nzule la.

¹⁷Bɛmmafea bɛ azua ne mɔ azo bɛdi bɛ abɛlɛ ngyɛnu bulu ɛkpɔ ngoko ne mɔ nee nwolɛ nwanye anzɛɛ nwole ne, anzɛɛ bɛ nyɛmoa ne mɔ amra mɔɔ bɛkɛlumua bɛkɛwo bɛ, nee bɛ ɛwɔkɛ ne mɔ mɔɔ bɛkɛbɔ la anzɛɛ bɛ ahyɛlɛ ninyɛne mɔɔ ɔwɔ kɛ bɛyeye bɛ ahonle nu bɛfa bɛmaa la.

¹⁸Saa bɛdi a, ɔwɔ kɛ bɛbadi ye wɔ Ɛdɛnkɛma bɛ Nyamenle ne anyunlu, wɔ ɛleka mɔɔ ɔdaye ɔkɛhile la. Ɔwɔ kɛ bɛ nee bɛ mra mrenya nee mraalɛ, bɛ sonvolɛ mrenya nee mraalɛ nee Livaema mɔɔ wɔ bɛ azua zo la a badi a, na bɛmaa bɛ nye die wɔ Ɛdɛnkɛma bɛ Nyamenle ne anyunlu, wɔ debie biala mɔɔ bɛyɛ la anu.

¹⁹Saa bɛdwu bɛ azɛlɛ ne azo na bɛtɛnla aze a, anrɛɛ bɛnlea boɛ na bɛ rɛle anvi Livaema mɔɔ wɔ bɛ avinli la.

²⁰“Saa Ɛdɛnkɛma bɛ Nyamenle ne maa bɛ maanle ne tɛlɛ, kɛmɔ yeva yebɔ bɛ ɛwɔkɛ la, na ɔba ye kɛ bɛ tiakunlu ɛra nane zo a, bɛli dodo biala mɔɔ bɛdabɛ bɛkulo la.

²¹Saa ɛleka mɔɔ Ɛdɛnkɛma bɛ Nyamenle ne kɛva ye duma kɛdo zolɛ kɛ bɛzonle ye la nee ɛleka mɔɔ bɛde la wale somaa a, ɛnee bɛhu bɛ mboane ne mɔ mɔɔ Ɛdɛnkɛma ɛva ɛmaa bɛ la bie bɛli, kɛmɔ meha la. Bɛli dodo biala mɔɔ bɛkulo la wɔ bɛ azua ne mɔ azo.

²²Kɛmɔ bɛsi bɛdi kutu nee kɛtɛboɛ la, zɔhane ala yɛɛ bɛli bɛ mboane a. Bɛdabɛ mɔɔ bɛ nwo te nee bɛdabɛ mɔɔ bɛ nwo ɛnde la, bɛkola bɛdi bie.

²³Noko akee bɛnlea boɛ na bɛanli mogya ne. Ɔluakɛ mogya ne a le ngoane ne, yɛɛ ɔnle kɛ bɛfa ngoane ne bɛboka nane ne bɛdi.

²⁴Bɛmmadi mogya ne. Bɛhwi bɛgua aze kɛ asɛɛ nzule la.

²⁵Bɛmmadi ye fee, amaa saa bɛyɛ mɔɔ sɔ Ɛdɛnkɛma anye la a bɛ nee bɛ mra mɔɔ li bɛ nzi la anwo adɔ bɛ.

²⁶Na ninyɛne mɔɔ anwo te, mɔɔ le bɛ azubɔlɛ ninyɛne ne mɔ, mɔɔ bɛyeye bɛ ahonle nu bɛva bɛmaa Ɛdɛnkɛma la, bɛva bɛ muala bɛhɔ ɛleka ne mɔɔ Ɛdɛnkɛma kɛhile la.

²⁷Ɛkɛ ne yɛɛ bɛyela nane mumua nee ye mogya ne wɔ Ɛdɛnkɛma bɛ Nyamenle ne azukponle ne azo a. Bɛwola azubɔdeɛ ne mɔɔ bɛbali la anu mogya ne bɛgua Ɛdɛnkɛma bɛ Nyamenle ne azukponle ne azo na akee bɛdo nane ne bɛli.

²⁸Bɛnlea boɛ na bɛli mɔɔ meha la amuala azo, amaa saa bɛyɛ mɔɔ sɔ Ɛdɛnkɛma bɛ Nyamenle ne anye la a, yeayɛ kpalɛ yeamaa bɛ nee bɛ mra mɔɔ li bɛ nzi la, wɔ mekɛ mɔɔ ɛnlɛ awieleɛ.

²⁹“Ɛdɛnkɛma bɛ Nyamenle ne bali maanlema mɔɔ de azɛlɛ ne azo la anwo zo konim na bɛahɔva azɛlɛ ne bɛadɛnla zolɛ.

³⁰Saa Ɛdɛnkɛma sɛkye maanle zɔhane mɔ wie a, bɛnlea boɛ na debie andwe bɛ ammaa bɛanva menli zɔhane agyakɛ. Bɛmmabiza bɛ awozonle ne mɔ bɔbɔ abo zo na bɛanwu kɛ bɛzile bɛzonlenle bɛ la, na bɛdabɛ bɛayɛ bie.

³¹Bɛmmasonle Ɛdɛnkɛma bɛ Nyamenle ne, kɛmɔ menli zɔhane mɔ si sonle bɛ awozonle ne mɔ la. Ɔluakɛ ninyɛne mɔɔ Ɛdɛnkɛma kyi la angome a bɛyɛ bɛmaa bɛ awozonle ne mɔ a. Bɛyela bɛ mra mrenya nee mraalɛ bɔbɔ bɛmaa bɛ awozonle[6] ne mɔ.

³²“Bɛli mɔɔ meha mehile bɛ la azo kpalɛ. Bɛmmafa bie bɛboka nwolɛ yɛɛ bɛmmaye bie bɛfi nuhua.