Read Nzema Mɛla 13 Bible Online

Mɛla 13 - Nzema bible

Mɛla 13

¹“Saa Nyamenle kpɔmanvolɛ bie finde bɛ nu anzɛɛ awie ka ɛlalɛ na ɔka nwanwane debie anzɛɛ sɛkɛlɛneɛ bie anwo edwɛkɛ,

²na saa ninyɛne zɔhane mɔ sisi na ɔse bɛ kɛ, ‘Bɛmaa yɛhɔzonle awozonle bie mɔ,’ mɔɔ bɛdabɛ bɛze kɛ bɛtɛyɛle bie ɛlɛ la a,

³bɛmmatie Nyamenle kpɔmanvolɛ zɔhane anzɛɛ ahenle ne mɔɔ hanle ɛlalɛ ne la edwɛkɛ biala. Ɔluakɛ ɛnee Ɛdɛnkɛma bɛ Nyamenle ne lɛ ye ɛlɛsɔ bɛ anlea saa bɛfa bɛ ahonle muala nee bɛ ɛkɛla muala bɛkulo ye a.

⁴Bɛdoa Ɛdɛnkɛma bɛ Nyamenle ne abo zo na bɛzulo ye, bɛli ye mɛla ne mɔ azo, bɛdie ɔ ne, bɛzonle ye na bɛva bɛ nwo amuala bɛmaa ye.

⁵Bɛhu Nyamenle kpɔmanvolɛ zɔhane anzɛɛ ahenle ne mɔɔ hanle ɛlalɛ ne la, ɔboalekɛ yehilehile bɛ kɛ bɛde Ɛdɛnkɛma bɛ Nyamenle ne mɔɔ yele bɛ vile Yigyibiti rale la anwo atua, amaa bɛavi adenle ne mɔɔ Ɛdɛnkɛma bɛ Nyamenle ne ɛze bɛ kɛ bɛlua nu la anu. Zɔhane yɛɛ bɛbayɛ na bɛaye musuofoɔ ne bɛavi bɛ avinli a.

⁶“Saa ɛdawɔ ɛ nli ara nrenya anzɛɛ ɛ ra nrenya anzɛɛ raalɛ, anzɛɛ ɛ ye mɔɔ la wɔ ahonle nwo, anzɛɛ ɛ gɔnwo mɔɔ tɛla ɛ nli ara bɔbɔ la pe fealera adenle nu bɛlɛbɛla wɔ kɛ ɛmaa bɛhɔzonle awozonle mɔɔ bɛ nlenya mɔ anzonle bie la,

⁷saa menli mɔɔ ɛbɔ ɛyia bɛ la bie mɔ awozonle o, saa bɛwɔ moa anzɛɛ bɛbikye o, ɔvi ewiade ye ati kɔkpula ɔ bo,

⁸bɛmmakponle zolɛ bɛmaa ye anzɛɛ bɛtie ye edwɛkɛ bɔbɔ. Eza bɛmmase ye anwunvɔne, yɛɛ bɛmmamaa ɔfa ɔ nwo dwɔɔ.

⁹Bɛmmafa ye bɛfea noko; bɛhu ye. Ɛdawɔ mɔɔ ɔhanle edwɛkɛ ne ɔhilele wɔ la, ɔwɔ kɛ ɛdumua ɛbɔ ye kɛ ɛku ye na menli arazɔ wɔ nu bɛahu ye.

¹⁰Bɛzi ye awolɛ bɛhu ye, ɔboalekɛ ɔhulole kɛ bɛkɛhwe bɛ nwo bɛkɛvi Ɛdɛnkɛma bɛ Nyamenle ne mɔɔ yele bɛ vile Yigyibiti azɛlɛ zo, wɔ akɛlɛzonlenlɛ nu rale la anwo.

¹¹Na Yizilayɛma kɔsɔɔti bade, bɛbazulo, na bɛanyɛ amumuyɛ debie mɔɔ le zɛhae la bieko wɔ bɛ avinli.

¹²“Saa bɛwɔ bɛ azua mɔɔ Ɛdɛnkɛma bɛ Nyamenle ne ɛva ɛmaa bɛ la azo,

¹³na bɛte kɛ kpamgbanvolɛma bie ɛdwazo sua bie azo amra anwo zo, bɛze bɛ kɛ, ‘Bɛmaa yɛhɔzonle awozonle,’ mɔɔ bɛ ze mɔ anzonle bie ɛlɛ la a,

¹⁴bɛbiza nu kpalɛ, bɛvedevede nuhua gyɛlɛɛnye na saa amgba edwɛkɛ ne le nɔhalɛ kɛ debie zɛhae ɛzi a,

¹⁵bɛhu menli mɔɔ wɔ sua ne azo la amuala, bɛbɔ sua ne tɔɔ, bɛzɛkye debie biala nee nlankɛ mɔɔ wɔ zolɛ la.

¹⁶Bɛva debie biala mɔɔ bɛkɛnyia ye wɔ sua ne azo la bɛrɛla ɛleka kpatawienyi ne na bɛdo senle nu, bɛdo senle sua ne azo bɛyela ye kɛ ɛyelalɛ azubɔdeɛ bɛmaa Ɛdɛnkɛma bɛ Nyamenle ne. Na ɔbayɛ suadu mɔɔ awie ɛnrɛkyekye ye bieko ɛlɛ a.

¹⁷Ninyɛne mɔɔ ɔwɔ kɛ bɛyela bɛ la, bɛmmafa bie, amaa Ɛdɛnkɛma agyakyi ye ɛya kpole ne mɔɔ yeva la na yeaze bɛ anwunvɔne, amaa saa bɛyɛ tieyɛ bɛmaa Ɛdɛnkɛma bɛ Nyamenle ne, na bɛdi ye mɛla ne mɔ mɔɔ melɛfa meamaa bɛ ɛnɛ la azo, bɛyɛ mɔɔ le kpalɛ la na bɛsɔ ɔ nye a, yeamaa bɛ nwo azo, kɛmɔ ɔvale ɔbɔle bɛ ze mɔ ɛwɔkɛ la.