Read Nzema Mɛla 14 Bible Online

Mɛla 14 - Nzema bible

Mɛla 14

¹ “Bɛle Ɛdɛnkɛma bɛ Nyamenle ne menli. Yemɔti saa bɛlɛsu anzɛɛ bɛlɛdi nyane bɛamaa menli mɔɔ ɛwu la a, anrɛɛ bɛmmafa debie bɛpepɛ bɛ nwo yɛɛ bɛmmakpa bɛ ti.

² Ɔluakɛ bɛle Ɛdɛnkɛma bɛ Nyamenle ne menli mɔɔ anwo te a. Ɛdɛnkɛma ɛkpa nu ɛye bɛ wɔ menli kɔsɔɔti mɔɔ wɔ ewiade la avinli kɛ ɔdaye ye menli a le bɛ.

³“Ɔnle kɛ bɛdi debie biala mɔɔ le kyibadeɛ la.

⁴Nane ngakyile mɔɔ ɔwɔ kɛ bɛdi la aluma ɛne: ɛnlankɛ, boane, abɔnkye,

⁵kɛtɛboɛ, kutu, weɛlɛ, dabɔ,

⁶nane biala mɔɔ bɛkpakye ɔ gyakɛ taboa ne anu nwiɔ na ɔkpu ɔkposa aleɛ mɔɔ ɔkɛli la.

⁷Noko nane mɔɔ bɛamkpakye ɔ gyakɛ taboa ne anu nwiɔ noko ɔkpu ɔkposa la anu ɛhye mɔ, bɛmmadi: afunlumu, asoasoa anzɛɛ abotokila, ɔboalekɛ bɛkpu bɛkposa bɔbɔ ɛdeɛ, noko bɛamkpakye bɛ gyakɛ adaboa ne mɔ anu. Yemɔti bɛ nwo ɛnde ɛmmaa bɛ.

⁸Akee kpolike noko, bɛkpakye ɔ gyakɛ taboa ne anu ɛdeɛ na ɔmkpu ɔmkposa, yemɔti ɔ nwo ɛnde ɛmmaa bɛ. Bɛmmadi ye nane yɛɛ bɛmmafa bɛ sa bɛka ye funli bɔbɔ.

⁹“Nzule nu fɛlɛ noko, mɔɔ ɔwɔ kɛ bɛdi la ɛne: fɛlɛ biala mɔɔ anwo lɛ abonle na ɔlɛ ɔ nzi ngyɛnengyɛne la bɛkola bɛdi.

¹⁰Mɔɔ anwo ɛnlɛ abonle nee ɔ nzi ngyɛnengyɛne la, bɛmmadi, ɔluakɛ bɛ nwo ɛnde ɛmaa bɛ.

¹¹“Bɛli anloma biala mɔɔ anwo te la.

¹²Nloma mɔɔ ɔnle kɛ bɛdi la a le ɛhye mɔ: kɔleɛ, ɛkpɔtɛ, bɔngɔ, sanzia, kyɛnyema, akoso, kpadule, akpanlɛ, kɔkɔsɛlɛ, soholo, ahweanga, azuazuanloma nee nloma mɔɔ le kɛ ɛhye mɔ la biala.

¹⁹“Kɛkɛba biala mɔɔ lɛ ndɛbalɛ la anwo ɛnde ɛmmaa bɛ; bɛmmadi bie fee.

²⁰Debie biala mɔɔ lɛ ndɛbalɛ na ɔ nwo te la bɛkola bɛdi.

²¹“Debie biala mɔɔ ɔdaye ɔ ngome ɔkɛwu la, bɛmmadi. Bɛkola bɛfa bɛmaa bɛ nyɛvolɛ mɔɔ de bɛ avinli wɔ bɛ azua ne mɔ azo la kɛ bɛli anzɛɛ bɛkola bɛtɔne ye bɛmaa ɛyɛvolɛ mɔɔ ɛnle Yizilayɛnli la, ɔluakɛ bɛmɛ Yizilayɛma, bɛle menli mɔɔ Ɛdɛnkɛma bɛ Nyamenle ne ɛdu bɛ ɛzie ahane ɛmaa ɔ nwo a. “Bɛmmato boane anzɛɛ abɔnkye ralɛ wɔ ɔ nli nyɛfonzule nu bɛdi.

²² “Ɛvolɛ biala aleɛ mɔɔ bɛkɛnyia ye wɔ bɛ ɛya ne mɔ anu la, ɔwɔ kɛ bɛkyɛ nu bulu bɛtu ɛkpɔ ngoko bɛsie ahane bɛmaa Ɛdɛnkɛma bɛ Nyamenle ne.

²³Akee bɛva bɛ aleɛ ngyɛnu bulu ɛkpɔ ngoko ne mɔ bɛhɔ ɛleka mɔɔ Ɛdɛnkɛma bɛ Nyamenle ne ɛva ye duma ɛdo zolɛ kɛ bɛzonle ye wɔ ɛkɛ ne la na bɛali. Zɔhane ala yɛɛ bɛyɛ bɛ ma, nwanye, ɔlivi nwole mɔɔ lumua nee bɛ nlankɛ nee mboane ne mɔ amra mɔɔ bɛkɛlumua bɛkɛwo bɛ la a. Bɛyɛ ɛhye bɛva bɛzukoa Ɛdɛnkɛma bɛ Nyamenle ne enililɛ dahuu.

²⁴Na saa ɛleka mɔɔ bɛ bie mɔ de la nee ɛleka mɔɔ Ɛdɛnkɛma bɛ Nyamenle ne se bɛzonle ye la anu twe, na bɛnrɛhola bɛnrɛva ninyɛne mɔɔ Ɛdɛkɛma ɛlo bɛ ɛmaa bɛnyia ye ɛvolɛ ne anu la ngyɛnu bulu ɛkpɔ ngoko ne mɔ bɛnrɛhɔ a,

²⁵ɛnee bɛva ye ezukoa nu, na bɛva ezukoa ne bɛkyekye bɛ sa bɛhɔ ɛleka mɔɔ Ɛdɛnkɛma ɛhile kɛ bɛzonle ye la.

²⁶Akee bɛva ezukoa ne bɛdɔ ɛnlankɛ anzɛɛ boane anzɛɛ nwanye anzɛɛ nza ɛsesebɛ biala, anzɛɛ debie biala mɔɔ bɛ tiakunlu wɔ zolɛ la na bɛli wɔ Ɛdɛnkɛma bɛ Nyamenle ne anyunlu na bɛ nee bɛ sua nu amra ɛlie bɛ nye.

²⁷“Anrɛɛ bɛmmamaa bɛ rɛle fi Livaema mɔɔ wɔ bɛ azua ne mɔ azo la, ɔboalekɛ bɛampɛ bɛ gya yɛɛ bɛnlɛ agyadeɛ biala wɔ bɛ avinli.

²⁸Ɛvolɛ nsa biala awieleɛ bɛva bɛ ngyɛnu bulu ɛkpɔ ngoko ne mɔ bɛrɛla sua zo bɛrazie.

²⁹Aleɛ zɛhae le Livaema ne mɔ ɛdeɛ, ɔboalekɛ bɛmɛ, bɛampɛ bɛ gya yɛɛ bɛnlɛ agyadeɛ. Eza ɔwɔ ɛkɛ ne ɔmaa nyɛvolɛ, nrisa, nee ahunlanvolɛ mɔɔ wɔ bɛ azua ne mɔ azo la. Ɔwɔ kɛ bɛba na bɛbadie aleɛ biala mɔɔ bɛkɛhyia nwolɛ la wɔ ɛkɛ. Bɛyɛ ɛhye na Ɛdɛnkɛma bɛ Nyamenle ne bayila bɛ wɔ debie biala mɔɔ bɛyɛ la anu.