Read Nzema Mɛla 15 Bible Online

Mɛla 15 - Nzema bible

Mɛla 15

¹“Saa ɔdwu ɛvolɛ biala mɔɔ tɔ zolɛ nsuu la awieleɛ a, ɔwɔ kɛ bɛfa bɛ kavolɛma kakɛ bɛkyɛ bɛ.

²Na kɛ bɛbazi bɛava bɛahyɛ bɛ la ɛne: ɔwɔ kɛ sonla mɔɔ awie tua ye kakɛ la fa kakɛ ne kyɛ ɔ gɔnwo ne anzɛɛ ɔ diema ne mɔɔ tua ye kakɛ ne la, ɔboalekɛ Ɛdɛnkɛma ɛpɛ kakɛ biala anu.

³Saa ahenle mɔɔ tua kakɛ ne la le ɛyɛvolɛ a, yemɔ bɛkola bɛdie, na saa ahenle mɔɔ tua kakɛ ne la le bɛdabɛ menli ko ye ala bie a, bɛmmabɔ zo mgbane bɔbɔ.

⁴“Saa bɛyɛ tieyɛ bɛmaa Ɛdɛnkɛma bɛ Nyamenle ne na bɛdi ye mɛla ne mɔɔ melɛfa meamaa bɛ ɛnɛ kenle ye la azo a, Ɛdɛnkɛma bayila bɛ wɔ azɛlɛ ne mɔɔ ɔlɛfa yeamaa bɛayɛ bɛ ɛdeɛ la azo, bɛ nuhua ko bɔbɔ ɛnrɛli ehyia ɛlɛ.

⁶Ɛdɛnkɛma bɛ Nyamenle ne bayila bɛ, kɛmɔ ɔvale ɔbɔle bɛ ɛwɔkɛ la. Bɛbabɔ maanle maanle dɔɔnwo bosea, na bɛmɛ, bɛnrɛbiza awie bosea ɛlɛ. Bɛbazie maanle maanle dɔɔnwo, noko maanle biala ɛnrɛzie bɛ ɛlɛ.

⁷“Saa bɛ diema bie yɛ ehyianli wɔ sua bie azo, wɔ azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo a, anrɛɛ bɛmmayɛ ye atisesebɛ anzɛɛ bɛmmafoa adiema ne bɛ nwo.

⁸Bɛmaa bɛ sa ɛdwu ɔ nwo zo na bɛvɛne ye debie biala mɔɔ ɔkpondɛ la anzɛɛ bɛbɔ ye bosea mɔɔ sa ye ɛbɛla bɔ la.

⁹Bɛnlea boɛ na bɛannyia adwenle ɛtane, bɛanga kɛ ɛvolɛ nsuu ne mɔɔ bɛfa awie biala kakɛ bɛkyɛ ye la ɛbikye, na bɛyɛ bɛ diema mɔɔ tua bɛ kakɛ la kpɔdekpɔde anzɛɛ bɛyɛ mɔɔ bɔ zo mɔɔ ɛra babiza bosea la atisesebɛ kɛ bɛnrɛmaa ye ɛhwee. Saa bɛyɛ ye zɔhane a ɔbazu yeavɛlɛ Ɛdɛnkɛma bɛ Nyamenle ne yeamaa nyɛleɛ ne ayɛ ɛtane atia bɛ.

¹⁰Bɛbuke bɛ munli nu bɛbɔ bɛ bosea ne, yɛɛ bɛmmatendɛ bɛ kolaa na bɛava bɛamaa bɛ, na Ɛdɛnkɛma bɛ Nyamenle ne ayila bɛ wɔ gyima biala mɔɔ bɛkɛzɔ nu la anu.

¹¹Ɔluakɛ kɛ ɔkɛyɛ biala la, ehyianli ɛnrɛkpa bɛ avinli wɔ azɛlɛ ne azo. Zɔhane ati mese bɛ kɛ, ‘Bɛbuke bɛ sa nu bɛmaa bɛ mediema ne mɔ nee ehyianvolɛma mɔɔ wɔ azɛlɛ ne azo la.’

¹² “Saa bɛtɔne bɛ diema Hibulunli bie,[7] raalɛ o, nrenya o, bɛmaa bɛ nuhua biala a, bɛmaa ɔzonle bɛ ɛvolɛ nsia. Ye ɛvolɛ nsuu ne azo bɛgyakyi ye bɛmaa ɔva ɔ nwo dwɔɔ ɔhɔ.

¹³Saa bɛgyakyi ye bɛamaa yeahɔ a, bɛmmamaa ɔdɛ ɔ sa mgbane ɔkɔ.

¹⁴Ɔwɔ kɛ bɛnea bɛ mboane ne mɔ anu, bɛ ma ɛzielɛ ɛleka ne nee bɛ nwanye sua ne anu, na bɛmaa ye ninyɛne ala mɔɔ sɔ ɛnyelɛ la. Kɛmɔ Ɛdɛnkɛma wɔ Nyamenle ne zile lole wɔ la, zɔhane ala yɛɛ ɔwɔ kɛ ɛyɛ ɛmaa ɔdaye noko a.

¹⁵Ɔwɔ kɛ bɛkakye kɛ ɛnee bɛdabɛ noko bɛle ahanra wɔ Yigyibiti azɛlɛ zo yɛɛ Ɛdɛnkɛma bɛ Nyamenle ne raliele bɛ a; ɛhye ati yɛɛ ɛnɛ kenle ye melɛfa mɛla ɛhye meamaa bɛ a.

¹⁶“Na saa kanranli ne ka kile wɔ kɛ ɔkulo wɔ nee wɔ sua nu amra, na eza ɔwɔ ɛ nwo ɛkɛ ne a ɔ nwo tɔ ye la ati, ɔvi ɛ nwo ɛkɛ ne ɔnrɛhɔ a,

¹⁷ɛnee fa ye kɔ wɔ anlenkɛ ne anwo, na fa ketera fiti ɔ nzo maa ɔwɔ anlenkɛ ne anu kile kɛ ɔle wɔ kanranli dahuu. Zɔhane ala yɛɛ ɔwɔ kɛ ɛyɛ wɔ kanranli raalɛ a.

¹⁸Bɛmmamaa ɔyɛ se ɔmaa bɛ kɛ bɛgyakyi bɛ kanranli bɛamaa yeava ɔ nwo dwɔɔ yeahɔ, ɔluakɛ mekɛ mɔɔ ɔ nee bɛ de la ɔzonlenle bɛ kɛ ɛkpanli wɔ ɛvolɛ nsia ne anu. Bɛyɛ ye zɔhane na Ɛdɛnkɛma bɛ Nyamenle ne bayila bɛ wɔ bɛ gyima biala anu.

¹⁹ “Bɛ mboane nyinli anzɛɛ nlankɛ nyinli mɔɔ bɛkɛlumua bɛkɛwo bɛ la, bɛva bɛ bɛzie ahane bɛmaa Ɛdɛnkɛma bɛ Nyamenle ne. Bɛmmafa nlankɛ nyinli zɔhane mɔ bɛyɛ gyima biala yɛɛ bɛmmapepɛ mboane nyinli zɔhane mɔ anwo enrinli.

²⁰Ɛvolɛ biala bɛva nlankɛ nee mboane zɛhae mɔ bɛhɔ ɛleka mɔɔ Ɛdɛnkɛma bɛ Nyamenle ne kɛhile kɛ bɛzonle ye la, na bɛ nee bɛ awuke nu amra ɛli wɔ Ɛdɛnkɛma anyunlu ɛkɛ.

²¹Na saa ayɛmoa zɔhane anwo lɛ dɛne, saa ye ndwɛlɛ ɛbubu anzɛɛ saa ɔ nye ɛzi a, bɛmmafa bɛbɔ azu bɛmaa Ɛdɛnkɛma bɛ Nyamenle ne.

²²Bɛdo bɛli wɔ bɛ azua zo. Bɛmaa mɔɔ anwo te nee mɔɔ anwo ɛnde la biala ɛli bie, kɛmɔ bɛdi kutu anzɛɛ kɛtɛboɛ la.

²³Noko bɛmmadi ye mogya ne; bɛhwi bɛgua aze kɛ asɛɛ nzule la.