Read Nzema Mɛla 16 Bible Online

Mɛla 16 - Nzema bible

Mɛla 16

¹“Bɛzie siane ne mɔɔ bɛfɛlɛ ye Ebebe la na bɛli Akpabɛnwo Ɛvoyia ne wɔ nuhua bɛwula Ɛdɛnkɛma bɛ Nyamenle ne anyunlunyia. Ɔluakɛ siane Ebebe ne anu kenle ko nɔɔzo yɛɛ Ɛdɛnkɛma bɛ Nyamenle ne rayele bɛ vile Yigyibiti a.

²Bɛva bɛ mboane anzɛɛ nlankɛ ne mɔ ko bɛbɔ Akpabɛnwo azu ne bɛmaa Ɛdɛnkɛma bɛ Nyamenle ne wɔ ɛleka ne mɔɔ ɔkɛhile kɛ ɛkɛ ne a bɛzonle ye la.

³Bɛdi a ɔnle kɛ bɛdi ye nee ɛdɔkɛ mɔɔ mgbɔvonle wɔ nuhua la. Bɛli ye nee ɛdɔkɛ amgbe kenle nsuu, bɛvɛlɛ ye nyanenwunlɛ aleɛ, kɛmɔ bɛnriandi bɛavi Yigyibiti mɔɔ bɛyɛle la, amaa mekɛ biala mɔɔ bɛde ngoane nu la bɛava bɛahakye mekɛ mɔɔ bɛvi Yigyibiti azɛlɛ zo bɛyele bɛ nwo la.

⁴Mekɛ ne anu ɔnle kɛ bɛnwu mgbɔvonle biala wɔ awie biala sua nu, wɔ azɛlɛ ne mɔɔ bɛde zo la amuala azo dedee kenle nsuu. Eza nane ne mɔɔ bɛkɛhu ye kenle ne mɔɔ lumua la nɔsolɛ nu la, ɔnle kɛ bɛdi bɛmaa bie ka aleɛ kye zolɛ.

⁵“Bɛmmabɔ Akpabɛnwo azu ne wɔ bɛ azua ne mɔ mɔɔ Ɛdɛnkɛma bɛ Nyamenle ne bava amaa bɛadɛnlɛdɛnla zolɛ la azo.

⁶Bɛbɔ ye wɔ ɛleka ne mɔɔ Ɛdɛnkɛma bɛ Nyamenle ne kɛhile kɛ bɛzonle ye la, wɔ nɔsolɛ nu, mekɛ mɔɔ sɛnzɛne ne ɛlɛkɔ ahɔdɔ la, kɛmɔ bɛyɛle ye wɔ mekɛ mɔɔ bɛfi Yigyibiti la.

⁷Ɔwɔ kɛ bɛto na bɛdi ye wɔ ɛleka ko ne mɔɔ Ɛdɛnkɛma bɛ Nyamenle ne kɛhile la, na aleɛ kye a akee bɛahɔ bɛ azua nu.

⁸Ɔwɔ kɛ bɛdi ɛdɔkɛ mɔɔ mgbɔvonle ɛnle nu la kenle nsia, na kenle nsuu ne azo bɛayia bɛazonle Ɛdɛnkɛma bɛ Nyamenle ne. Kenle ko ne ɔnle kɛ bɛyɛ gyima biala.

⁹“Bɛbɔ ɔ bo kenle ko ne mɔɔ bɛkɛbɔ abɛlɛ ɛbulɛ bo la, bɛdia toonwo dapɛne nsuu,

¹⁰na bɛli Bɛyɔba Ɛvoyia ne bɛwula Ɛdɛnkɛma bɛ Nyamenle ne anyunlunyia. Bɛva bɛ sa nu ahyɛlɛdeɛ, kɛmɔ Ɛdɛnkɛma kɛva kɛlo bɛ la bɛbɔ azu bɛmaa Ɛdɛnkɛma.

¹¹Bɛ nee bɛ mra mrenya nee mraalɛ, bɛ sonvolɛ mrenya nee mraalɛ, Livaema nee nyɛvolɛ mɔɔ wɔ bɛ azua ne mɔ azo, nrisa nee ahunlanvolɛ mɔɔ wɔ bɛ avinli la ɛbɔ nu ɛli ɛvoyia ne anyelielɛ nu, wɔ Ɛdɛnkɛma anyunlu, wɔ ɛleka ko ne mɔɔ Ɛdɛnkɛma bɛ Nyamenle ne kɛhile kɛ bɛzonle ye la.

¹²Bɛhakye kɛ ɛnee bɛle ahanra wɔ Yigyibiti na bɛnlea boɛ bɛli mɛla ɛhye mɔ azo.

¹³“Saa bɛwie bɛ ma ne mɔ amuala te, bɛwozo bɛwie na bɛwie bɛ vanye ma ne anu nzule twihwi a, akee bɛli Kpɔda Bo Ɛdɛnlanlɛ Ɛvoyia ne.

¹⁴Bɛ nee bɛ mra mrenya nee mraalɛ, bɛ sonvolɛ mrenya nee mraalɛ, nyɛvolɛ, Livaema, nrisa nee ahunlanvolɛ mɔɔ wɔ bɛ azua ne mɔ azo la ɛbɔ nu ɛli ɛvoyia ne anyelielɛ nu.

¹⁵Bɛli ɛvoyia ne kenle nsuu wɔ ɛleka ne mɔɔ Ɛdɛnkɛma bɛ Nyamenle ne kɛhile la bɛva bɛwula Ɛdɛnkɛma bɛ Nyamenle ne anyunlunyia, ɔboalekɛ Ɛdɛnkɛma bɛ Nyamenle ne bayila bɛ, amaa bɛanyia aleɛ dɔɔnwo na bɛakpazi wɔ gyima biala mɔɔ bɛkɛva bɛ sa bɛkɛha ye la anu, amaa bɛ muala bɛ nye alie.

¹⁶“Ɔwɔ kɛ mrenya mɔɔ wɔ maanle ne anu la amuala yia nuhua fane nsa wɔ Ɛdɛnkɛma bɛ Nyamenle ne anyunlu, wɔ ɛleka ne mɔɔ ɔkɛhile la. Ayia fane nsa ne a le Angye (Akpabɛnwo) Ɛvoyia ne, Bɛyɔba Ɛvoyia ne, yɛɛ Kpɔda Bo Ɛdɛnlanlɛ Ɛvoyia ne. Bɛlɛba biala a ɔnle kɛ bɛdɛ bɛ sa mgbane bɛba.

¹⁷Bɛ nuhua ko biala bava debie mɔɔ ɔkɛhola ye fa la, kɛmɔ Ɛdɛnkɛma bɛ Nyamenle ne nyilalɛ ne mɔɔ ɛva ɛmaa ye la si de la.

¹⁸“Bɛye ndɛnebuavolɛma na bɛdu maanle mgbanyima wɔ bɛ azua ne mɔ mɔɔ Ɛdɛnkɛma bɛ Nyamenle ne kɛva kɛmaa bɛ la azo, kɛmɔ bɛ mbusua ekpunli ekpunli ne mɔ de la. Ɔwɔ kɛ menli ɛhye mɔ nea di menli ne mɔ edwɛkɛ wɔ pɛlepɛle adenle zo; ɔnle kɛ bɛnea sonla nyunlu.

¹⁹ Bɛmmadi mɔguazo, bɛmmanea sonla nyunlu yɛɛ bɛmmadie ndoloboa, ɔluakɛ ndoloboa ɛlielɛ si nrɛlɛbɛvolɛ bɔbɔ anye na ɔsɛkye mɔɔ di pɛlepɛle la adenle ɔmaa ɔbua mgbɔvodɛne.

²⁰Pɛlepɛle ala a bɛli ɔ nzi a, amaa bɛanyi bɛahyɛ na bɛava azɛlɛ ne mɔɔ Ɛdɛnkɛma bava amaa bɛ la.

²¹“Bɛmmakpɔnla baka biala bɛfa bɛyɛ bozonle raalɛ Ahyela ne sɛkɛlɛneɛ bɛboka Ɛdɛnkɛma bɛ Nyamenle ne azukponle ne mɔɔ bɛbazi la anwo.

²² Eza bɛmmakpɔnla mpila biala kɛ bɛfa bɛazonle awozonle, Ɛdɛnkɛma bɛ Nyamenle ne kyi.