Read Nzema Mɛla 17 Bible Online

Mɛla 17 - Nzema bible

Mɛla 17

¹“Ɔnle kɛ bɛfa ɛnlankɛ nyinli biala nee boane biala mɔɔ anwo lɛ dɛne la anzɛɛ yebubu la bɛbɔ azu bɛmaa Ɛdɛnkɛma bɛ Nyamenle ne, ɔluakɛ ɔle kyibadeɛ kpole ɔmaa Ɛdɛnkɛma bɛ Nyamenle ne.

²“Saa bɛwɔ bɛ azua mɔɔ Ɛdɛnkɛma bɛ Nyamenle ne bava amaa bɛ la azo na bɛte kɛ nrenya bie anzɛɛ raalɛ bie ɛyɛ ɛtane ɛtia Ɛdɛnkɛma bɛ Nyamenle ne, yebulu ngyekyeleɛ ne azo,

³yehɔzonle awozonle na yebɔ ɔ ti aze yemaa bɛ, anzɛɛ sɛnzɛne ne, siane ne anzɛɛ anwumaneamra ne mɔ biala a,

⁴bɛnleɛnlea nu kpalɛ. Na saa bɛnwu kɛ amgba yeyɛ munzule debie ɛhye wɔ Yizilayɛ maanle ye anu a,

⁵bɛva ye bɛvinde suakpole ne anlenkɛ kpole ne anzi na bɛzi raalɛ anzɛɛ nrenya zɔhane awolɛ bɛhu ye.

⁶Saa bɛnyia menli nwiɔ anzɛɛ nsa di daselɛ tia ahenle mɔɔ ɔwɔ kɛ bɛku ye la ɛdeɛ a, ɛnee bɛhu ye; saa sonla ko ala di daselɛ tia ye a, yemɔ bɛmmaku ye.

⁷Bɛdabɛ mɔɔ bɛkɛli daselɛ ne la, bɛmɛ a ɔwɔ kɛ bɛdumua bɛbɔ ɔ bo kɛ bɛku ye kolaa na akee menli mɔɔ ɛha la arazɔ nu bɛahu ye a. Zɛhae adenle zo yɛɛ ɔwɔ kɛ bɛfa na bɛye munzule ne bɛfi bɛ avinli a.

⁸“Saa edwɛkɛ bie si bɛ sua zo, mɔɔ le kɛ awie ɛhu awie, na bɛkpondɛ kɛ bɛnwu ye kɛ ɔ nye la nwo anzɛɛ ɔ nye ɛnla nwo, anzɛɛ agyadeɛ bie abo zo ɛbɔ kpolera anzɛɛ awie anye fuu yeboda awie anzɛɛ tɛ ɔ nye fuu, na ndɛnebuavolɛma mɔɔ wɔ sua ne azo la ɛngola ɛnnwu ɔ nye ɛmbua a, bɛ kɔsɔɔti bɛhɔ ɛleka ne mɔɔ Ɛdɛnkɛma kɛhile kɛ bɛzonle ye la,

⁹na bɛva edwɛkɛ ne bɛhɔmaa Livaema mɔɔ le sɛlɛvolɛma la nee ndɛnebuavolɛ ne mɔɔ de ebia nu wɔ mekɛ ne anu la bɛmaa bɛbua.

¹⁰Saa bɛbua na mɔɔ bɛkɛha bɛkɛhile bɛ wɔ ɛkɛ ne la, ɔwɔ kɛ bɛnea boɛ na bɛyɛ debie biala mɔɔ bɛkɛze bɛ kɛ bɛyɛ la.

¹¹Edwɛkɛ biala mɔɔ bɛkɛha bɛkɛhile bɛ nee kɛ bɛkɛzi bɛkɛbua ndɛne ne biala la, ɔwɔ kɛ bɛdie bɛto nu na bɛdi zolɛ; ɔnle kɛ bɛkyea ye bɛkɔ fema anzɛɛ bɛne zo.

¹²Awie biala mɔɔ kɛli ɔ ti anwo na yeanli mɔɔ sɛlɛvolɛ ne mɔɔ gyi Nyamenle agyakɛ anu, anzɛɛ yeanli mɔɔ ndɛnebuavolɛ ne kɛha la azo, na ɔkɛyɛ debie gyɛne biala la, ɔwɔ kɛ bɛku ye; bɛyɛ ye zɔhane bɛva bɛdu munzule ne abo bɛvi Yizilayɛ maanle ne anu.

¹³Saa bɛyɛ ye zɔhane a, menli kɔsɔɔti bade na bɛazulo na bɛanli bɛ ti anwo bieko.

¹⁴“Saa bɛdwu azɛlɛ ne mɔɔ Ɛdɛnkɛma bɛ Nyamenle ne bava amaa bɛ la azo, na bɛfa azɛlɛ ne bɛtɛnla zo, na bɛnyia adwenle kɛ akee bɛkpondɛ belemgbunli azie bɛ, kɛmɔ maanle maanle mɔɔ ɛbɔ ɛyia bɛ la de la a,

¹⁵bɛkola bɛsie ahenle mɔɔ Ɛdɛnkɛma bɛ Nyamenle ne kɛye ye kɛmaa bɛ la belemgbunli bɛmaa ɔsie bɛ. Bɛdabɛ bɛ nuhua ko yɛɛ bɛva ye bɛzie bɛ belemgbunli a; bɛmmafa ɛyɛvolɛ biala mɔɔ ɔnle bɛ diema la bɛsie belemgbunli.

¹⁶Belemgbunli ne, ɔnle kɛ ɔnyia mgbɔnwɔ dɔɔnwo. Ɔnle kɛ ɔfa adenle bie anu kɛ ɔmaa menli ne azia ahɔ Yigyibiti amaa bɛanyia mgbɔnwɔ dɔɔnwo, ɔluakɛ Ɛdɛnkɛma ɛze kɛ, ‘Bɛmmasia bɛ nzi bɛfa zɔhane adenle ne azo ɛlɛ kɛ bɛkɔ ɛkɛ.’

¹⁷Ɔnle kɛ ɔgya mraalɛ dɔɔnwo, ɔboalekɛ ɛhye bamaa ɔ rɛle avi Ɛdɛnkɛma ye Nyamenle ne, yɛɛ eza ɔnle kɛ ɔ nye bolo dwɛtɛ fufule nee ezukoa nvutuke dɔɔnwo ɛnyianlɛ.

¹⁸Ɔwɔ kɛ ahenle mɔɔ bɛkɛzie ye belemgbunli la nyia Nyamenle Mɛla Buluku ne ko. Ɔwɔ kɛ ɔdaye mumua ne ɔkɛlɛ edwɛkɛ ne ɔfi Mɛla Buluku ne mɔɔ Livae sɛlɛvolɛma ne lɛ la anu.

¹⁹Ɔwɔ kɛ ɔfa ɔsie kpalɛ na ɔkenga ye dahuu wɔ mekɛ mɔɔ ɔde ngoane nu la, amaa yeazulo Ɛdɛnkɛma ye Nyamenle ne na yeali ye mɛla nee ngyehyɛlɛ ɛhye mɔ azo.

²⁰Ɛhye bazi ye adenle amaa yeammemaa ɔ nwo zo yeangile ɔ mediema ne mɔ. Eza ɔnrɛmaa ɔnrɛvi mɛla ne nee ngyehyɛlɛ ne mɔ anwo ɔnrɛhɔ fema zo anzɛɛ bɛne zo, na ɔdaye nee ɔ mra bɛali belemgbunli wɔ Yizilayɛ bɛahyɛ.